الثلاثاء، 22 يونيو، 2010

فضفضات شهرذاد



إشعات حكومية


خرجت من منزلها مثل كل يوم متوجهه للعمل في جريدتها , ونزلت للشارع الذي وجدته غارقا بالماء فاستغربت أن تكون قد انفجرت مواسير المياة مرة أخري ...لكنها وجدت جارتهما المدعية للود تغسل في مدخل منزلها وتفتح صنبور الماء عن أخره بدون داع.......


_ صباح الخير يا طانط


_ صباح الخير يا أستاذة


_ ليه المية دي كلها بس يا طانط ؟ انت مش عارفة ان دول حوض النيل منعوا عننا المية ومش هنلاقي مية بعد كدة نشربها حتي مش نغسل بيها ....؟


_ انت بتصدقي برضه الكلام ده ؟ ده إشاعات الحكومة مش عايزينا نستهلك مية عايزين يحولوها للمصايف والا حتي يصدروها زي بقيت الحاجات اللي بيصدروها


_ لاء يا طانط ده حقيقي , انت مش بتشوفي نشرة الأخبار ؟ وبتسمعيهم يتكلموا عن دول حوض النيل


في هذه الاثناء جاء المحامي الشاب الذي يسكن بجوارهم وقال موجها حديثه للصحفية الشابة " نشرة اخبار اية ودول حوض النيل اللي انت بتتكلمي عنهم مع طانط ....طانط متعرفش غير حوض الغسيل بس ...


بما أنك صحفية


بعد حكاية الشاب الاسكندراني خالد سعيد والأقوال المتناثرة هنا وهناك بين الناس وفي وسائل الاعلام المختلفة وتكفيره من البعض واستشهاده من البعض الاخر .....وبرغم اني قد اشمئززت فعلا من كلام بعض الاعلاميين الذين وصفوه ب"صايع وبتاع بانجو" وجدت بعضهم يسألوني : بما أنك صحفية ممكن تقولي هو صحيح " صايع ...وبتاع بانجو" زي ما هما بيقولوا ...والا " شاب راح غدر حكومة لا تعترف بأبنائها " مثل ما تقول المعارضة .....فقلت بدون خوض في أية تفاصيل " هو مواطن له حقوق وعليه واجبات ...وسواء أكان صايع بتاع بانجو ...والا مواطن شريف ومحترم ...فهو إنسان ولابد ان يعامل كأنسان وحسب ....ولكن منذ متي يعترفون بالانسان عندنا في مصر ...؟


في المترو


قالت لي كأنها تقدم اعترافاتها : أول مرة أحس إني عنصرية وطائفية ومش بني أدمة ....بس والله انا كنت بجد تعبانة جدا ....وانت عارفاني لما أخرج اقابل خطيبي ف قاهرة المعز وف عز الحر عشان شغله ومشينا كتير عشان منصرفش كتير , ولما انتهي الوقت وركبت المترو وانا مش حاسة غير اني حمارة بجد اني لبست كعب عالي اليوم ده , وحمدت ربنا اني لقيت كرسي فاضي , لكن بعد محطة واحدة بس ركبت سيدة عجوز واضح من طريقة لبسها والصليب المرسوم علي معصمها انها مسيحية ...كنت هقوم بصراحها واقعدها مكاني بس بصيت ف المترو لقيت في بنات مسيحين , قلت لنفسي لية متقومش واحدة منهم وتقعدها مكانها ....؟ وكأنني كنت أفكر بصوت عالي فقد قامت فتاه مسيحية من مقعدها وأجلست السيدة العجوز .....واما انا فنظرت لنفسي بإشمئزاز وغضب .....وشتمت نفسي وانا افكر كم اننا بلد مليء بالشعارات الرنانة فقط ...وقلوبنا مليئة بعكسها تماما


في الكلية


هو بيقول " بحب اتفرج علي البنات وهما بيبصوا لبعض ....بتكون نظراتهم مليانة حاجات "

هي بتقول " يا سلام ......طيب ما انا بحب اتفرج علي الشباب وهما بيبصوا لبعض برضه ..."

قلت لهم " انا مش ببص للبنات انا ببص للبسهم واذا لفت نظري شيء اقول : شايفين الجيبة اللي ماشية دي؟ أو الطرحة اللي ماشية هناك دي ؟ أو الصندل اللي هناك ده..؟

بس اللي ضايقني أكتر اني الاقي واحدة بتقول تعليق سخيف عن زميلة لينا

والا بنت بتدعي انها متدينة جدا لما شافت بنت سمراء جدا ...أو سوداء او زنجية ...سموها كما يحلو لكم ...قالت بكل سخرية وبصوت قد تكون سمعته الفتاه " إية ده هما نسيوكي في الفرن حبة زيادة لغاية ما اتحرقتي كدة ...؟" واتبعتها بضحكة سخيفة .............وكم هي سخيفة كلماتنا ....,كم هو سخيف إحساسنا بالآخرين .....

الفرصة ما بعد الأخيرة


قبلتها بالصدفة وبعد السلام والقبلات قلت " هتتجوزي إمتي ؟

رفعت لي اصابعها الخالية من دبلة خطوبتها بنظرة ذات معني قائلة " زي ما انت شايفة "

قلت بإستسلام وقد تعودت منها هذا " تاني ...والا اقول عاشر ....انت سيبتي خطيبك والا عشر مرات ...!!؟"

قالت بمرارة " وماذا أفعل ..؟ انا احبه وهو لا يقدر هذا الحب أبدا وكل مرة يفعل نفس الأخطاء واتركه ثم أعود لاني احبه ..واقول اعطيه فرصه اخري ...أسامحه ...ويكرر الخطأ ثانية ...ماذا افعل ...؟..لن اعود له ابدا هذه المرة .....برغم كل محاولاته ومحاولات الاخرين ....لن اعود

بعد شهرين ...قابلتها وقد عادت الية ولما سألتها قالت" قلت أعطيه الفرصة ما بعد الأخيرة ...وبعدها اذا عاد كما كان سأكون بهذا قد ملئت الكوب لأخره وعلي الآن أن أفرغه ....


زوج فوق الخمسين


فتاة ف العشرين من عمرها ما الذي يرغمها أن تتزوج رجل ف الخمسين من عمره .....؟

الظروف المادية , ام قسوة الاهل , ام حلم الامومة ؟ ام حلم الزواج فقط ......؟

قالت " كل هذا وأكثر فأنا أحلم بفراش لي وحدي أنام عليه بهدوء ف الصيف , وغطاء لا تشده احدي اخواتي طلبا للدفء اكثر ف الشتاء , أن يكون لي زوج ان يكون لي ابناء , ان يكون لي بيت هو مملكتي واشعر لأول مرة إني ملكة هذا البيت ....وفوق كل هذا هو قال " اذا وافقت علي الزواج مني سنذهب في رحلة عمرة في رمضان , ومن الممكن ان تكون عمرة وحج بإذن الله "


أهو إغراء .....؟ سألت نفسي ثم سألتها " وانت ...ماذا في رأسك ...؟"


قالت : موافقة طبعا ...كفاية بس العمرة والحج ...دول عندي بالدنيا "


فقلت لنفسي ووساوسها " يارب بس يكون حقيقي ومش من إياهم "


مقال في جريدة


مقال لأحلام مستغاني لفت نظري ملخصه يقول " ان بعض الدراسات التي أجريت حديثا أن الكنديات والبريطانيات يفضلون أكل الشيكولاتة عن الحب وعلاقتهم بالرجال , وأن الألمانيات يشغلهن جمع المال عن الحب والزواج والرجال , والفرنسيات يحببن الكلاب أكثر من حبهن للرجال مبرررين ذلك بوفاء الكلب عن الرجل , اما الجميلة مادونا فهي تفضل اقتناء زوج من أحذية مصمم الازياء البريطاني الشهير جيمي شو علي حب رجل قائلة " ان زوجا من أحذية هذا المصمم يدوم للأبد وهذا ما لا تضمنه مع رجل

افتكرت هذا المقال واعدت قرائته مرة أخري بعدما وجدت استطلاع يقول ان نسبة55% من الفتيات العربيات يرفضن الزواج ولا يفكرن فيه لان الرجال لا يرغبون في زوجة تعمل او طموحة او شهيرة او تفكر او عندها ذكاء ...يعني يا غبية ومبتفكرش ف ده كله يا ميتجوزوهاش ....باقي مقال احلام مستغانمي بتقول فيه ما دام النساء الاجنبيات يفكرن بهذه الطريقة فالنساء العربيات وحدهن من تطوعن لإنقاذ استمرارية الجنس البشري في تفكيرهن بالزواج والانجاب طوال الوقت ....!!!


تغييييييييير الافكار


صديقتي الثرثارة بقالها ساعة بتكلمني ف الموبايل لغاية ما وجعتلي ودني وف أخرة الكالمة قالتلي " اسيبك بقي عشان مسلسل نور الشريف هبتدي ...الله نور الشريف ده عسل يا سلام لو كان خطيبي شبهه "

استغربت كلامها أوووي لانها منذ شهور قالت لي وهي تقرأ ف الجيدة التقرير المفصل لقضية الآداب الشهيرة لنور الشريف ومعه اثنان اخران " والله شبهه برضه بيقول انه كدة , بس انا عايزة أعرف لما هو كدة اتجوز بوسي ازاي وجاب بنتين منها ...؟"

دلوقت بتحبه وبتتمني لو كان خطيبها شبهه ......اهو ده التغيير والا بلالالالالالاش

إمتي بقي احنا نتغير يا مصرييين ...بس مش بالطريقة دي طبعا

رحاب صالح

السبت، 5 يونيو، 2010

التاج السلطاني


مش عارفة لية حاسة اني مش هقول كلام حلو او مهم


اصل الحكاية صعبه بجد


ممكن الشخص يتكلم عن نفسه مع أصحابه أو ف وسط شلته لكن يكتب عن نفسه ...اممم صعبة الحكاية .......وبعدين انا بحب الغموض ...برج الاسد بقي


الأول اللي بعت لي التاج ده  بنوتة عراقية عسولة  هي قطرة وفا أو مدونة " قطرة من بحر الحياة "


المفروض هنا اني اتكلم عن ستة أسرار عني اللي يقابلني للمرة الأولي قد لا يكتشفها في


امممم سته أسرار فقط ...انا ممكن علي فكرة اتكلم عن اسرار اكتر


أولا


يشوفني أي رجل يقول بنوته رقيقة وهادية , وتشوفني أي بنت تقول لطيفة وعسولة


لكن يتفقوا علي اني ضعيفة لاني بتعب بسرعة اوووي وممكن اكون وسط الناس وبتكلم وبضحك وفجأة يلاقوني وقعت علي الارض أو دايخة ...وده نابع عن ضعف جسماني يعني باختصار كدة عندي نوع من ضعف المناعة بيخليني ضعيفة نسبيا ....وكدة اظهر ادامهم اني ضعيفة اوووي وطيووووووووووبة وساذجة


لكني مش ضعيفة ابدا ....بل العكس تماما


ثانيا


اللي ممكن يشوفني ويتكلم معايا للمرة الاولي يقول اني متحررة


يمكن عشان انا بحب اتكلم بصراحة ومش بخاف اتكلم ف شيء واكلم أي حد بس بحدودي وطريقتي انا ...عشان كدة في شباب كتير قالولي اني غريبة جدا


وبقول علي أي كلمة متعجبنيش انها مش عجباني ومش بحب الكلام الروش والا اللي بيقحم الانجليزي ف الكلام برغم اني احيانا بقول كلمة بالانجليزي بس يمكن عشان بتكون اوضح


ثالثا


الحب ...... في شيء غريب ف موضوع الحب


ممكن أي شاب يتخدع فيا ويقول اني سهلة جدا وساذجة وينضحك عليا بسهولة...بس ميعرفش الحقيقة اللي هتواجهه ...تقريبا كل اللي حبوني قالولي نفس الكلمة " انت صعب اوووي " لاني بتعامل بطريقة تانية ...بعطي اللي انا عايزة اعطية مش اللي انت عايزه مني بتعامل بطريقتي مش بطريقتك بمزاجي مش بمزاجك انت ...يعني تنبيه لأي حد عايز يستولي علي قلبي " خطر ...احذر ...اقترب بخطوات محسوبة " وبرضه مش هتنجح مية بالمية لو اتبعت أي طريقة من الطرق الرجولية المعروفة


رابعا


بيقولولي اني جميلة ...برغم اني مش شايفة ده ......ومش غرور ولا تواضع او ادعاء لكن " رحم الله امرؤ عرف قدر نفسه"....دايما الاقي ناس كتير تشبه عليا !! وطلعلي ولا اربعين مليون شبيهه وف كل محافظات مصر , يعني كل ما اروح مكان واقابل ناس تشوفني لأول مرة الاقيهم يبحلقوا فيا ويشبهوني بحد يعرفوه ووالله بكون ماشية ف الشارع والاقي اللي بيوقفني ويقولي " فلانة " آه ...آسف والله اصل انت تشبهيها اووي ...من بنات وشباب ورجال ونساء ...حتي صاحبيتي الاسكندرانية زوجة عمها الهولندية اول ما شافتني قالت بدهشة " كرستين " ودي تبقي صاحبيتها ف هولندا يعني برضه طلعلي شبيهه في هولندا...!! لاء والادهي كمان انهم بيشبهوني بالفنانة الرقيقة "مني ذكي " بس طبعا انا بقول " انا احلي طبعا " مش غرور بس هزار ...يعني كله بيكون حابب يشبه نفسه بفنان انا لاء خالص....لاني شبه نفسي وبس


رابعا


انا مدمنة .....آة مدمنة لحاجات غريبة مش هيلاحظها في أي شخص يقابلني للمرة الاولي


مدمنة للكتب اعشق الكتب واحب الاحتفاظ بها , مدمنة شراء المجات لاني احب اشرب شاي كتير وف مج كبير , مدمنة للنحافة ...برغم اني مش تخينة ولا حاجة بس بموت لو وزني زاد كيلو عشان كدة بلاحظ أي شيء اكله واحب اكون نحيفة ومتبعة حمية....مدمنة شراء ادوات ميك اب برغم اني مش بستعملها الا قليلا جدا ف خروجي , بصراحة انا ممكن اكون مسرفة بعض الشيء لكن في طبع حلو اوووي اني بعرف امشي حالي باي مبلغ واعيش اخر انبساط , يعني مدبرة برضه والفضل يعود لأمي وأبي لأنهم ربوني بجد علي الأفضل


خامسا


عمري ما كنت وحشة مع صحباتي بس منهم كتير فهمني غلط ودايما احب يكون لي صديقات كتير لكني كنت بفقدهم ولأسباب غريبة , بس كل صحباتي اللي خسرتهم خسرتهم بسبب انهم اتخطبوا والمثال جاي في السطر اللي بعد ده


عمري ما حسيت اني مغرورة بس اتقالتلي الكلمة دي كتيييييييييييييير جدا ومن مين بقي من خطاب صديقاتي ...كل واحدة من صديقاتي المخطوبات خطيبها بيعاكسني ولما اتعامل معاه بشكل يخليه ميعرفش يرد عليا يقولي " انت مغرورة " عشان متقبلتش كلامهم البايخ , حسيت اني لازم ابقي ادعي ربنا اني صحباتي ميتخطبوش عشان مخسرهمش برغم اني حابة يكون لهم دنيا وبيت وزوج صالح


سادسا


بحب اسمع لأصحابي اووي والحمد لله بيثقوا في جدا وتقريبا انا قريبة منهم جدا لاني بلاحظ انهم بيقولولي علي أي خبر يخصهم الاول قبل أي حد تاني من الجروب وعمري ما تعديت علي خصوصيات حد لاني مش بحب أي حد يتدخل في خصوصياتي يعني ماشية بمبدأ عامل الناس كما تحب ان يعاملوك به,احب التأمل واني الاحظ الحاجات والناس وانا معاهم وممكن اتكلم واكون انا ملكة المناقشة مع أي جروب واحيانا العكس , بتكلم بحرية وجريئة وخجولة جدا جدا جدا ....شخصية متناقضة اوووي ,بحب اعرف كل شيء عن أي شيء , مغامرة جدا جدا جدا ومش بخاف من أي شيء وحتي لو كنت خايفة بداري خوفي واقوي نفسي بنفسي عشان اتغلب علي خوفي حتي لو بقيت ف موقف صعب جدا , انا برج الاسد ...يعني رومانسية اوووي وبتحب تكون ملكة في وسط الناس بيقولوا برج الاسد بيميلوا للغرور وانا بقول اننا فينا من كل الصفات لكن بنسب مختلفة


عمر ما حد هيفهمني بسرعة ولا هيعرفني بسرعة , كتير من اصحابي شباب وبنات بيقولوا اني كتاب مفتوح لكن ميعرفوش انهم فتحوا الكتاب غلط ....


سابعا


انا قولت سابعا لاني بحب الارقام الفردية واكره الارقام الزوجية هههههههههه


شوفوا اللي عايز يعرف حاجة عني ما في مشكلة خالص خالص انا صريحة جدا واللي طلبوا انهم يشوفوا صورتي علي المدونة معلش مش هينفع لان اخويا قالي لاء


بس انا عادية جدا وصفي عادي اووي يعني اميل للقصر مش تخينة عيني ملونة علي رأي رانيا محسن وانا كنت حابة عيني تكون سودة بس هي عسلي وبتتغير تبع الشيء اللي ادامي يعني لو عيني في الشمس بتتلون لون وادام البحر لون تاني ويا سلام لو بعيط بقي او متغاظة وبتخانق بتقلب الوان ...مش بقولكم متناقضة حتي ف لون عيني وبحمد ربنا علي كل شيء فيا , وبموت ف الكتابة والقراءة وبكتب قصص قصيرة وحاليا بكتب رواية , انا صحفية منذ اكثر من خمس سنوات وكتبت في صحف معروفة ومشهورة جدا لكن صحفية متدربة مش صحفية ممارسة وادعولي انا وصحباتي ننهي فترة التدريب وندخل النقابة بقي ... وبتمني بجد اني اكون كاتبة وصحفية مشهورة زي ما بتمني لصديقات كتير ده , بهتم بصحة اصحابي واسرتي جدا علي عكس اهتمامي بصحتي
سألتني قطرة وفا عن رأي في .....
الزواج المبكر ....انا ضده جدا وارفضه تماما
الغرب .....اتطلع له واخذ فقط ما يناسبني منه وما يناسب ديني
عمل المرأة .....انا معه قلبا وقالبا ما دام لا يضر الاسرة والزوج
زواج المرأة ام اكمال دراستها.........اممممم مينفعش الاتنين ...؟ الاتنين مهمين جدا وياريت كل بنت تقدر توفق بينهم لانهم مهمين جدا ....بس الاغلبية مبيعرفوش يوفقوا بينهم
حاجتين بيزعجوني ولا يعرفهم احد عني ......اممممم صعبة اوووي بس ممكن اقول الكذب والنفاق
امران يريحانك ......امممممم...... رضي اهلي عني ....ووتقربي من الله
ثلاث اسرار اخري عني .......طبعا لاء لاني رغيت كتييير جدا


ياريت مكونش دوشت دماغكم .....


جينا بقي لإية للمدونات اللي بتلفت نظري ....في كتير جدا وبحب اتابع لكني مشغولة وبحاول اتابع لكننا مقسمين الوقت بينا انا واخواتي عشان هو كمبيوتر واحد بس ف البيت


لكن في مدونات كتيرة حلوةوفي حلوة بس بتخنق من البهرجة الكتير فيها بجد في مدونات بتعجبني وبحب اتابعها حتي لو مكتبتش تعليق فيها


عايزة اقول ان المدونة برغم انها بتنقل شخصية صاحبها لكن احيانا بتغلب الكتابة الكاتب يعني مش كل شخصية زي ما بتكتب , احيانا بيكونوا مختلفين تماما


عايزة التاج ده اهديه لمين


لمدونة دموع قد تكون حزن او فرح


لانها بجد مدونة تستحق المتابعة وكمان لاني معرفش أي شيء عن شخصية صاحبة المدونة برغم اني متشوقة جدا لاعرفها لان واضح جدا انها شخصية حبوبة اووووي ومرموقة وراقية جدا


كمان مدونة خواطر شابة


لانها من دولة اخري وانا بحب اعرف الاماكن الاخري والاتفاقات والاختلافات والحضارات


ومدونة بجد اعجبت بيها مش فاكرة اسمها بس هي مدونة دكتور عمرو فاروق


وفي اكيد غيرهم لكن لو كدة هقول كل المدونات ومنهم مدونات اصحابي لكني مش عايزة أنسي أي حد منهم عشان ميزعلوش


وبس كدة عشان انا اتكلمت كتير كدة يعني ............... كدة يعني

رحاب صالح