الثلاثاء، 31 أغسطس، 2010

ماذا تستطيع أن تفعل ...؟

في يوم قريب جدا قالت لي أختي " رشا " اللي هي ام " زياد" رحاب انا عارفة اني بتعبك بس انا عايزاكي تسأليلي علي التحاليل دي " واعطتني اوراق تحاليل لمعمل مشهور جدا " وتشوفي كدة اي حد من اصحابك الاطباء وتقوليلي هو فيه اية ...؟
كانت التحاليل لطفل  عمره عشر اشهر فقط ....ومهما ذهبوا به الي الاطباء قالوا عنده انيميا حادة وممكن ان يحتاج نقل دم ..
ثم اصبحت الحالة غريبة وتحليل ورا تحليل ورا كشف ورا دكتور يحول لدكتور تاني ..........الخ
اعرف الطفل جيدا فهو قريب لي ما شاء الله عليه لا تستطيع ان تنظر في وجهه من جماله وأنا برغم حبي للأطفال كنت اخاف ان احمله ...لآنني أول مرة احمله شعرت بمدي غرابته ...فجسمه مرتخي وليس متماسك كأي طفل وحتي " زياد " ابن اختي الذي لم يكمل الشهر والنصف اعتقد ان جسمه متماسك عنه ...
" فلفل" اسم الدلع ....وكل شوية اسأل اختي عنه لاني اخاف ان اسأل امه التي كانت تأتيني علي فترات لأقرأ لها الادوية أو اساعدها في شراء ادوية ليست موجودة  في البلد عندا احضرها لها من القاهرة مثلا ....
فوجت بالامس وانا ذاهبة لأختي " ام زياد" بأم " فلفل" تبكي ولا تتوقف عن البكاء وحالتها لا تسمح بالكلام .....وبعد وقت  استطعت فيه ان افهم من كلماتها المتقطعة ومن بين بكائها  أن  هي تشك ان طفلها مصاب بالمرض الخبيث ...والا فلماذا لم يكلمها الطبيب وطلب ان يكلم الاب علي انفراد ...ولماذا كل هذه التحاليل وصور الدم ....ومعمل غير معل ثم هذا المعمل الشهير ....انا حاولت تهدئتها بقدر ما استطيع ولكنها كانت لا تتوقف عن البكاء ابدا ....
قلت لها  اعطيني التحاليل سأسأل احد اصدقائي وهو طبيب وانا اعرف جيدا انه سيقول لي انها انيما فقط وانا تتوهمين ...
واتصلت بصديقي ...الذي من اول كلمة قال لي ...رحاب مش محتاجة كلام دي واضحة جدا ..." سرطان دم " بس يا تري في اي مرحلة ....وده اكيد وراثي ...وللأسف ان جده لأباه مكتشف هذا المرض ويعالج منه منذ سنة ...
صدمت وما عرفت  ماذا سأقول لها او كيف سيكون كلامي وكيف سأواجهها وملامح وجهي تدل دائما علي ما يعتمل بداخلي فأنا لا استطيع الكذب ...
الله كان رحيما بي ...فعندما ذهبت اليها ورنيت جرس الشقة ...لم يفتح احد .....
حاولت ان استوعب الامر رغم هوله علي ....فيا تري كيف سيكون وقعه علي الام نفسها .......؟
الساعة اتنين ونص قبل الفجر توضأت وكنت استعد للذهاب للمسجد للصلاة ...وجدتها علي باب الشقة ...حاولت اقناعها انه قال لي انها انيما فقط وتحتاج لعلاج طويل المدي ...واقسم لها ان " فلفل " بخير وسيكون بخير ....وهي تقسم لي انه سيكون مثل جده ....
تبكي وتقول لي ....ولو بقي زي جده يا تري هعمل اية ده مفيش علاج هنا ...العلاج في مصر ...وانا مش بعرف اقرا ولا اكتب كمان ودي مشكلة تانية ....طيب ولو سافرت ب " فلفل " مين هياخد باله من " سارة واسامة " اخواته ....يا تري هعمل اية بس يارب ي...ليه بس يا ربي كدة ليه هو بس يارب .....
حاولت اني امنعها م الكلام ده والاعتراض علي مشيئة ربنا .....واستهدي بالله قومي اتوضي وصللي ركعتين واحمدي ربنا واذا يا ستي  قدر الله وكان مرض فعلا زي جده ...ربنا يخليله ابوه واعمامه وان شاء الله مش هتحتاري ف شي ء....
تقولي ازاي ...اذا كانت اختك المتعلمة بتحتار لما تروح اي مكان هنا وبتاخدك معاها ....انا بق ياللي مش متعلمة ...هعمل اية واروح فين واجي منين ...؟ آآآآآآآه يا ربي ....
رجعت اقول لنفسي يار ريتني ما كلمتك يا ابراهيم ولا عرفت منك حاجة .......كذبت عليها والا كذبت علي نفسي لاني من اول مرة شفت الطفل ده وانا حسيته مش طبيعي ....
اخيرا عرفت اهديها واخليها تروح شقتها وحالفتها بالله تصلي وتتسحر وتأل الولد وتعطيه الادوية زي ما الدكتور قال ....
وذهبت لصلاة التهجد التي فاتتني للأسف .....وذهبت علي صلاة الفجر ...وكم دعوت له ودعوت لها بالصبر ....وكم هي كثيرة مشاكلها لو جلست وعددتها مع نفسي ....وكيف ستواجهها ...
والاكثر من هذا .....طفل صغير لا يستطيع ان يقول شيء او يفعل شيء مصاب بالمرض اللعين ...ولا نستطيع عمل شيء

رحاب صالح

الخميس، 26 أغسطس، 2010

السجــــــــــــن الكبيـــــــــــــر

1
عادي ...


كنت انسان عادي


عايش زي اي حد عادي ...بحلم اكبر وعندي طموح ......اتخرج من كليتي واشتغل بشهادتي واحب واتجوز واعمل اسرة صغيرة ابنيها بحب واخليها تكون احسن مني في كل شيء ...


اية اللي اتغير .....انا لسة زي ما انا ...عندي طموح وامل ...عايز اتخرج من كليتي ...واشتغل ....بحبها لسة وعايز اتجوزها هي مش حد تاني ......


اتخرجت ....اشتغلت ......عملت بيت .....


بس بيت فاضي


مفيش حبيب


مفيش اصحاب


اية اللي اتغير ...؟


انا ...؟


والا الزمن....؟


والا الناس ....؟


ده كله لية ....؟


عشان قولت رأي ...؟


عشان مشيت ف مظاهرة ...؟


عشان اتكلمت ف السياسة...؟


عشان ....اعتقلت ....؟


اتسجنت ...


اتعذبت....


اهنت ....


ولكني بعد كل هذا .....


خرجت للدنيا ....للأهل ...للأصحاب ...للحب ....


لكن .....


اكتشفت اني ....ما خرجت من السجن ...بأني قد دخلته للأسف...


فها هي حبيبتي تخلت عني ...لمجرد اني اصبحت سياسيا ...وانني اعتقلت ...يعني رد سجون ...


اصحابي ...مسحوا اسمي ورقم موبايلي ...ما عادوا يريدون ان اكون بينهم ...


وحتي اصحاب المعتقل ...يريدون كل منهم ان يبتعد عن من كانوا معه ..لعل الناس ..والآمن ينسي ....


ولكن هل ينسوا .....


هل كتب علي ان ابقي ف سجن من صنع الناس ...ام ان هذا السجن من صنع يدي انا .....






2
تزوجته رغم معارضة اهلها


فقد كانت تحبه


تعشقه


قالوا " وهل يكفي الحب لخلق حياة سعيدة ...؟ لابد من التكافؤ .."


قالت "يكفيني الحب ....وهل التكافوء المادي والفكري اقوي من الحب ..."


تزوجته .....واكتشفت ان الحب وحده لا يكفي لصنع حياة ....اي حياة ...وليست حياة سعيدة للاسف


تحملت عدم التكافوء ....عدم التفاهم ...الاهانة ....


تحملت ...حتي لا تشمت بها احد ...حتي لا تستمع لكلام احد من اهلها واتهاماتهم لها ....


تحملت .....لانه كانت هناك طفلة .....من اجلها تحملت وتحملت


عدم تكافوء ...عدم تفاهم .....اهانة ...وضرب ....


ما عادت تستطيع التحمل ....طلبت الطلاق .....


ثار الاهل ....وثار هو اكثر ..فكيف تطلب الطلاق .....؟


اليس هذا من تحديتين من اجله ..؟


اليس هذا من فضلتيه علي الكثيروون ...؟


اليس هذا من قلت عنه ....انه كل حياتك ولن يتخلي عنك او تتخلين عنه ...؟


الاهل رفضوا الفكرة تماما ....وحتي اصدقائها ...


تحملي من اجل ابنتك ...و انت لا تعرفين معني كلمة طلاق ....


الا تعلمين كيف ينظر الناس للمطلقة ....؟


كان ردها واحدا ......الطــــــــــــــــــــــــــلاق.....


فأنا من اخترته منذ البداية وانا من كرهته الان ....


وتم الطلاق .....


تخللي عنها اهلها .....وتخلت عنها صديقاتها .....


فالمتزوجات يخفن علي ازواجهن من المطلقة الجميلة


واما الغير متزوجات ..فيخافون من تشويه انفسهن بأنهم صديقات لمطلقة ....


نظرة المجتمع الدونية ....


وجدت نفسها في سجن ...


سجن صنعه المجتمع وافكاره وتقاليده البالية


فهل هذا المجتمع عرف معاناتها ...؟


ام انه فقط ينظر نظرة سطحية ....؟


وجدت ان هذا السجن من صنعها هي وليس من صنع المجتمع


خرجت للمجتمع رافعة رأسها


متعلمة من خطأها


ومصممة للعيش كما تحب وكما تريد لطفلتها ان تعيش بسعادة


خرجت للحياة ....


وكما تخللي عنها اهلها وصديقاتها ....تخلت عنهم


وبحثت عن ...اصدقاء جدد.....واهل جدد


وليس من نادي المطلقات الجدد كما كانوا يقولون لها ....


فالحياة معاناة .....ولن تنتهي تلك المعاناه الا اذا انهيناها بأنفسنا










رحاب صالح

الأربعاء، 18 أغسطس، 2010

رمضان ...أول مــــــــــرة



امتي عرفت رمضان ...؟ امتي حسيت بيه ...؟ امتي اول مرة صومت ...؟ اول مرة فطرت غصب عنك ...؟



اول مرة اعرف رمضان ...كنت مصممة اعرف مين رمضان ولية نصوم بالنهار مش بالليل ...؟ ولية يعني مش ناكل الا اما المغرب يأذن ....كنت فضولية لكل حاجة ومتعديش عليا حاجة كدة بالساهل لازم اعرف اصلها وفصلها


كنت عايشة مع جدتي لأبي ....زمان بعرف اني كتير عشت مع اقارب لي مش مع اهلي ...والسبب بكل بساطة اني كنت عجباهم اووي لدرجة ان كل واحد عايزني اعيش معاه ....


كنت عايشة مع جدتي ...كنت احبها اوووي ....كنت مصممة اني اصوم ...فاكرة ان الجو كان برد جدا ...فاكرة الكلب اللي لونة اصفر ....اللي كان بيحرس البيت ...الكلب ده ياما اكل السندوتشات اللي جدتي كانت تعطيهالي وانا رايحة المدرسة وتقولي " انت لسة صغيرة مينفعش تصومي ...وانا كنت اصمم واقولها لاء هصوم ...وهي تضغط علي وتحوطلي السندوتشات ف الشنطة " وطبعا انا كنت بعطيها للكلب ده ......اللي الحرامية قتلته ....هو ينفع اني اقول الله يرحمه ...بجد مش عارفة اذا كان ينفع والا لاء


اول مرة احس برمضان ...وانا ف بيتنا وسط اهلي .......المسحراتي لما يجي يصحي الناس بالطبلة ...مش فاكرة اسمة كان اية ....توضيب الفطور ...الفانوس اللي عمتو جابته لي ...واحد لي وواحد لاحمد وواحد لعبير ......الهيصة واللمة وحالو يا حالو بعد الفطار ف الشارع والفوانيس منورة .......زينة رمضان اللي كنا نعلقها ف الشارع ......والورق الملون والفوانيس الكبيرة


فاكرة لما صممت وانا ف ثالثة ابتدائي لما حبينا نسلي صيمنا بعد المدرسة ونخللي اليوم يعدي بسرعة عشان منحسش بالجوع ....كان نفسي اشوف ابو قردان ف الاراضي اللي علي البحر ....روحت مع اصحابي من غير ما اقول لأي حد م البيت ...وكاااانت مشكلة فضلوا يدوروا عليا بابا عمل مشكلة ف المدرسة " يعني ازاي بنتي تكون ف المدرسة ومترجعش البيت ......والبيت اصلا ميبعدش عن المدرسة عشرة متر ...البنت رااااحت فييييين " ماكنش باقي غير انهم يمشوا كدة بمايك ويقولوا بنت تايهة يا ولاد الحلال قصيرة ورفيعة وعينيها واسعه وشعرها احمر .....هههههههه ...لما رجعت البيت قلت لهم اني كنت بلعب مع اصحابي طبعا مش قولت اني كنت رايحة اشوف ابو قردان....المهم انها عدت علي خير .....ههههه بجد لسة فاكرة اليوم ده اصلي كمان شوفت عصافير كتيرة وحاجات عمري ما شوفتها ...بابا كان صعب اووي انه يخليني نروح عند اي حد خروجنا قليل جدااااا


فاكرة ..اول مرة قريت ف المصحف ...وان كل كلمة مش فاهماها اقول لأختي الكبيرة تقولي اية معناها ...وتشرحلي وطبعا اصحابي خلصوا وختموا القرآن وانا لسة ف الجزء الاول ....مكنتش اعرف اقرا وبس لازم افهم ...محبش اجري وخلاص علي اي كلام ...ما بالك بكلام ربنا ....


فاكرة ف اولي اعداي اول مرة نبعد عن بيتنا ف مدرسةبعيييدة شوية .......كنا نفضل نتمشي ساعتين تلاتة عشان نعدي اليوم ...فاكرة اني رجلي اتكسرت ف السنة دي واني فطرت ايام كتيرة ف رمضان ده ومعرفتش كام يوم لاني كنت باخد مسكنات كتيرة وادوية كتيرة وكان الدكتور بيقنعني اني كدة صايمة لان دي ادوية .... بعدها صومت ايام كتيرة وكل ما اصوم ايام غير الفروض ادعي ان اكون قضيت الايام دي لاني بجد مش كنت فاكرة كام يوم ......


فاكرة من سبع سنين فاتوا ...ان تعبت ف يوم سبعة وعشرين رمضان تحديدا اليوم ده ...الدكتور قال اشتباه ف الزايدة واني لازم اخد الادوية دي وقالي متصوميش ....بس علي ميييين ...قالي ان الحقن دي مش بتفطر ....بس علي مييييين .......كنت تعبانة جدا وقاومت وكل اللي ف البيت يتحايلوا علي اني اخد الابرة دي وانا مستحيل افطر...كنت تعبانة كتير وقاومت وقاومت وقاومت ...ولغاية قبل الفطار بنص ساعة بس ....حصل اللي كنت متوقعاه طبعا ....حالة قيء شديد ....قالولي اني كدة فطرت والمفروض اني اخد الابرة بس انا برضه قلت لالالالاء


وبرغم الاختلاف ف نقطة اني كدة مع القيء فطرت او لاء بس انا برضه اعدت صيام اليوم ده ....


لية بفتكر زمااان ومش بفتكر دلوقت ...؟ لية دايما نقول زماان احسن من دلوقت .....لية ..؟


يمكن زماان كان الناس بيهتموا بالاجتماعيات اكتر ....يمكن عشان الطبيعة والبساطة اللي ف كل شيء من بداية المسحراتي والفانوس العادي ...مش دلوقتي نصحي علي رنات الموبايل وفانوس هيفاء وهبي ونانسي وكرومبو


يمكن عشان حتي زينة رمضان بقي فيها تكلف ونوع من الاستعلاء بين الناس وبعضها حتي ف زينة رمضان ....يمكن عشان احنا كبيرنا والزمن اتغير ....يمكن ...بس نفسي ف يوم من ايام زمان ...بنوتة صغيرة ...وبتلعب حالو يا حالو بفانوس جميل بينور مش بيغني ....بتعلق زينة ملونة ع البيت مش نور بيزغلل العين ويعميها .... يمكن الحاجة الوحيدة الباقية من رمضان زمان ودلوقت هي صلالالالاة التراويح وصلاة الفجر ف الجامع ...بكل متعتها وخشوعها ...ضحكنا ولمتنا ....بنلم بعض واحنا رايحين نصلي وبرضه نرجع تاني بلمتنا ...هي هي نفس اللمة بتاعة صلاة العيد وبوسات وحضونات مع اننا كنا مع بعض لسة ف صلاة الفجر .....وعيدية ...وخروج ع البحر ....وزيارات ....وفسح ...احنا اكبرنا اووي .. ....


بس لسة بنحن لأيـــــــــــام زمـــــــــــــــــــــان


رحــــــــــــــاب صــــــالح

الخميس، 12 أغسطس، 2010

التفكير المتعصب

كل عام وانتم بخير ورمضان كريم ...انا كنت هكتب عن رمضان بس الاحداث فرضت نفسها ف الفترة الاخيرة وده موقف حصل معايا وعايزة رأيكم فيه يار يت بوضوح ....
كنت مع أختي بتعمل كشف طبي عشان التأمين الصحي لآنها مدرسة يا جماعة وانتم عارفين المدرسين كل شوية يطلبوا منهم حاجة ..المهم اني روحت معاها المستشفي وهي مستشفي العبور بكفر الشيخ ..الصراحة انا قلت تبقي فرصه لو لقيت اي تجاوزات او زحمة وعدم تنظيم وكلام من ده يعني الحاسة الصحفية بتاعتي اللي كانت بتمشيني .....
لما روحنا المستشفي بالعكس كل حاجة كانت تمام التمام ونظام اية والمراوح شغالة والتليفزيون علي قناة ازهري والكراسي منظمة وكل حاجة بجد كانت مرتبة ومنظمة جدا حتي في دخول الكشف الطبي ...المهم اني قعدت مع اختي لغاية ما ندهوا اسمها وبدون خوض ف تفاصيل مملة وخلينا ف المفيد أول حاجة كانت التحاليل ودخلت مع اختي وانتظرت ف غرفة غريبة وظهر استغرابي ودهشتي علي وجهي لدرجة جعلت ذلك الطبيب يسألني : في اية مستغربة من اية ...؟
قلت : اصل شايفة كلمات " مورفين , ماريجوانا ...." حاسة اني في غرفة مخدرات مش تحاليل ...!
قال بلهجة عليمة لفتاه جاهلة مثلي في نظره : طبعا دي غرفة المخدرات ..انت اول مرة تدخلي مستشفي والا اية ...؟
قلت له : لاء دخلت واخدت مخدر المورفين كمان ...لكن ماريجوانا ده ...انا حاسة اني لو فتشت شوية هلاقي حشيش وبانجو ...
قالي : انت جاية تعملي كشف التأمين الصحي ؟
قلت : لاء ...انا جاية مع اختي
قال: وانت بتشتغلي اية ...؟
قلت بفخر واعتزاز: صحفية
وساعتها كأن ابواب جهنم انفتحت ولم استطع ايقافها ...." صحفية ..اهو انتوا اللي مضيعين البلد ...والله الصحفين دول شغلهم حرام ...انت بس غاويين شهرة واسفاف وحرام وبس
انا ذهلت ...في اية يا دكتور ...؟ هو اناقلت لك اني بشتغل اية يعني طيب لو قلت لك ممثلة والا مطربة  كان اية اللي حصل بقي ...!!!
قال وكأنه يتقاتل معي : يا هانم الصحافة دي لابد تكون مسؤلة وانتم مش مسؤلين والا مكونتوش تعملوا البلاوي اللي بتعملوها دي ...
قلت بدهشة : واحنا عملنا اية ...؟؟؟!!
قال " جريدة اليوم السابع اللي عاملة مقال بتحاسب فيه الرسول وبالخط العريض كدة محاكمة النبي محمد والليالي الحمراء للرسول والنبي محمد يغتصب الاطفال ....
بصراحة انا قلبي وقف  واتخضيت اووي ومبقتش عارفه اقول اية  لكني حاولت اني اتمالك نفسي وسألته : ازاي  حضرتك تقول الكلام ده اليوم السابع جريدة محترمة جدا وبتكتب دايما عن الدين حلو اووي ....يبقي ازاي تقول الكلام ده انت اكيد غلطان ...!!!
قال : لاء مش غلطان اقري  اليوم السابع  اللي من اسبوعين فاتوا وانت تعرفي
قلت كأني احدث نفسي : صحيح انا اشترتها بس مقريتهاش عشان امتحاناتي ...لكن انت متأكد ...
قال : طبعا متأكد وكمان  في ناس هترفع عليهم قضية ده كمان غير وقف اصدارها ومحاكمتها
و...ساعتها اختي خرجت من غرفة التحاليل ومش هقول معرفتش اكمل معاه لانه كان مصمم لكني قلت له " انا هحاول اشوف الموضوع ده اكيد لكن انا متأكدة انك غلطان "
قال : لاء مش غلطان بس انتم اللي غاويين شهرة ....
خرجت مع اختي لباقي الكشف وهو بين الحين والاخر يخرج ليراني ويستفزني بابتسامته ....
اول ما جيت للبيت فضلت ادور علي اليوم السابع والموضوع ده ...لقيت اييييييييية ....ان في كاتب مغمور اسمه انيس الدغيدي عامل رواية  ممكن نقول عنها فانتازيا او مستقبلية  مأخوذه عن الاحداث الاخيرة ف الدانمارك والرسوم المسيئة للرسول ...وبطل الرواية محامي ...حاول انه يدافع عن الرسول بالحجج والبراهين والادلة ...ف محاكمة ف الدانمارك ....ادي مختصر الرواية هو صحيح المستفز فيها العناوين ...وده شيء طبيعي جدا لكاتب مغمر  من خلال قاعدة خالف تعرف ...والاستفزاز هو اللي بيخلينا نتشهر .... ده كله من اليوم السابع وموقعها ومواقع اخري طبعا ...
شايفين ...ده تفكير ...ده شخص متعلم غير كونه طبيب ...؟؟؟!!! مؤكدا لي انه مقال مسيء للرسول وللسيرة النبوية كلها ...وانا الان اعرف جيدا انه لا قرأ ولا اي شيء ...هو كمعظم المصريين يعوم علي الموجة ...يعني واحد قاله الكلام ده وهو بيردده زي الببغان وبس ...محاولش زي ما انا حاولت اني اعرف اية اصل الحكاية عشان اعرف احكم ...لاء اختارالطريق السهل اللي اخرته ظلم الناس وبس ...ومن المواقف دي كتييييير ...بس بجد ساعتها قلت يا ريتني كنت عرفت الطبيب ده واسمه اية عشان ارجعه تاني وافهمه بس للاسف اني مش كنت اخدته اسمه ومش فاكره شكله ....واهو ده تفكير كتير من المصريين .....
كل  عام وانتم بخير ومضان كريييييييييم
رحاب صالح

الأربعاء، 4 أغسطس، 2010

لما أكون رئيسة الجمهورية



يعني إية رئيس جمهورية ...؟ طيب هي إية وظيتفه ...؟ يعني المفروض لو أنا رئيسة جمهورية هعمل إية ..؟ وحياتي هتكون إزاي وهبقي مختلفة كتير عن باقي الناس ومش هاعرف أعيش زيهم ...؟؟؟ طيب يا تري رئاسة الجمهورية صعبة أووووي لدرجة إننا نخاف نفكر فيها إننا نفكر ف يوم من الايام اننا نكون مكان الريس ....


كلها أسئلة بتدور جوايا ويمكن بتدور جواكم انتم كمان ....لكن يا تري لو فعلا قدر لك انك تكون رئيس جمهورية هتعمل إية ...؟ طيب أول شيء هتغيره إيه هو ...؟ طيب مممكن تعمل قوانين إية وتلغي قوانين إية ....؟


طييييييييب قبل ما أرد انا علي الأسئلة دي كلها عايزة أحكي لكم علي كام موقف كدة حصلوا معايا وادامي يمكن شاركت ف بعضها ويمكن راقبت الاخر بدون تدخل بس كنت ف موقف المتفرج بعصبية وفقط .........


المواصلات يمكن تكون أكتر شيء تاخد منه حكايات وأراء وقصص وروايات ومشكلات .....


الحكاية الاولي


كانت قبل انتخابات الرياسة اللي فاتت ...أقصد تجديد حبنا واخترناك اخترناك .....


كان تقريبا انا البنوتة الوحيدة ف الاتوبيس وكان ف شخص معاه جريدة وبعدين فتح الكلام مع اللي معاه ف موضوع الانتخابات وقال والله لو في حد أحسن من الريس بتاعنا قولوا وهاتوا اللي عندكم وبعدين اللي تعرفه احسن من اللي متعرفوش ....رد عليه واحد تاني لاء معندناش للأسف حد احسن منه ......رد تالت لاء في بتوع المعارضة وكمان الاخوان ......رد رابع والله انا شايف ان الريس حلو اوووي والمثل بيقول اللي تعرفه احسن من اللي متعرفوش .......دخلت انا ف الكلام وقلت :يعني اية اللي تعرفه احسن من اللي متعرفوش ...واللي عرفته يا تري عملك اية ...؟ رد واحد وكأنه بيزعق لي : وانت مالك انت ...؟ هي البنات كمان بقي ليها رأي ...ناقص كمان شوية تقوليلي هترشحي نفسك للأنتخابات انت والا واحدة ست تانية ....... قلت له وانا بحاول اني اسيطر علي اعصابي عشان متخانقش معاه : انا لي حق زيي زييك تمام اني انتخب واني كمان اترشح ....ومن حقي اختار وانا شايفة ان البلد بتتأخر باللي نعرفهم ...قوللي رد عليا اللي تعرفه عملك اية ....أه عمل يا هانم حملات شلل الاطفال والقراءة للجميع والتعليم المجاني وحاجات تانية كتيييير ......قلت وانا هنفجر م الغيظ حضرتك بتشتغل اية ....؟ انا مدرس كيمياء واحياء ......قلت آه ....ومكملتش حوار لاني كنت وصلت خلاص للمكان اللي انا عايزاه....بس فضلت افكر ...هو اللي نعرفه فعلا احسن من اللي منعرفوش .....؟؟؟!!


مرة تانية ....


كان واحد سني وواحد عادي ....السني مصمم ان الاخوان افضل والتاني مصمم ان الريس او ابنه احسن ....لان الاخوان هيفرضوا علينا الدين بالقوة وهيدخلوا الدين ف كل شيء ومش بعيد يلغوا كل التكنولوجيا الجديدة من تليفزيون وفضائيات ونت وموبايل .....ونرجع تاني لأيام الجاهلية .....ساعتها سمعت بس متكلمتش...


مرة تالتة ....


كنت مع صاحبتي وكنا بنتناقش بصوت عالي هي بتحب ايمن نور وبتقول هو كان الاحق بالانتخابات وعلي الاقل تغير خلينا مرة نحس بالتغير بقي ....دخل ف الكلام شيخ شكله طيب كتيييير قال : والله يا بنتي نفسنا ف حاجة بجد تتغير ما بقالنا كتير مستنين ومفيش تغييير ابدا غير ان في ناس كتيييير بتطلع فوق وناس تانية بتتخسف بيها لسابع ارض ....الفقر زاد والجهل زاد والامية انتشرت بدل التعليم والا الامراض ده الجنين ف بطن امه بينزل عنده سرطان وايدز كمان ......الفساد الفساد الفسااااااد مين هينقذنا منه عايزين تغيير علي الاقل نموت واحنا متطمنين علي الاجيال الجاية ......رديت انا : والله معاك حق يا حاج ...بس انت بقي ممكن تنتخب حد تاني غير الريس ...؟ اه يا بنتي انا اتخبت قبل كدة .....بس تفتكري يعني صوتي مقابل اصواااات تانية مش فاهمة ومش عارفة والموالسين والمرتشييين واللي كمان منتخبوش هيكون له اي تأثير ......؟ صديقتي قالت : طبعا له تأثير علي الاقل تكون قدوة لأولادك واحفادك وكمان ادام ربنا .....


رد واحد مش تاني قال : وهو انت تعرفي ربنا والا تعرفي اية ف الدنيا ....؟ وهو انت فاكرة رئيس الجمهورية ده حاجة سهلة .... ده حاجة صعبة جدا ...انت متعرفيش حاجة


طيب عرفني يا اخ ....رد الشيخ وقال اصبري يا بنتي وقال للشاب ده هو لو الريس اتعامل مع المسؤليين زي ما اي اب بيتعامل مع ولاده وحكم بالعدل بينهم هتلاقي مشاكل ...؟ ولو كل واحد من الاولاد الكبار عامل ولاده زي ما ابوه عامله هيكون النتيجة اية ...؟ الحياة هتختلف .....وهتكون اكيد احسن لان كل واحد اخد حقه...


قال الشاب : وهي رياسة دولة بحالها زي بيت والا اية .....؟ فكرت شوية ولقيت ان ممكن فعلا تكون زي حكم اي بيت بس بطريقة مختلفة اكييييييد


مرة رابعة .....


ده بقي شخص اعرفه و ذو مكانة اجتماعية وثقافية مرموقة ...قالي بكل بساطة " الريس يعني مالو والا ابنه حتي مالو ...؟ عادي جدا يا رحاب انا هقولك علي حاجة بسيطة جدا اي ريس جديد هيكون كل همه انه ياخد مننا ومن البلد علي اد ما يقدر فلوس ونفوز وسطوة وجاه .....يعني هيمص ف دمنا اكتر ...لكن الريس او ابنه اخد من زمااان كل اللي عايزينه واكتفوا خلاص ...يعني مش هياخدوا اكتر من اللي اخدوه ...يبقي هما الاحسن من اي حد جديد........


هو ده منطق برضه وفي ناس كتير فعلا بتفكر بالشكل ده ...لكن انتم يا جماعة اية عرفكم ...؟ اية عرفكم ان الريس الجديد هيكون عايز ياخد مننا ويمص دمنا ما جايز يكون غير كدة وفعلا انسان حابب مصر وعايز ليها الخير ويوصلها للأفضل ........


وكمان اية عرفكم ان الريس او ابنه اخدوا كل اللي محتاجينه وخلاص بقي مش عايزين تاني ....طيب والبلد اللي كل حتة منها بتتباع بأرخص من التراب وللأجانب والعرب ...يعني ممكن ف لحظة يبيعونا احنا كمان......


اخيرا وليس اخر .....


كنت في الجريدة وزميلي بيوقف لي تاكسي عشان رايحة الاكادمية المهنية للمعلمين لشيء ما ....ركبت وهو بيسألني : هترجعي الجريدة تاني والا هتروحي علي طول ...قلت له مش عارفة ...حسب الظروف ...


مشي التاكسي وسألني السواق بفضول : انت صحفية ..؟؟!!! قلت بابتسامة خفيفة لاني عارفة السخرية اللي هواجهها معاه :ايوة .... قالي : والله كويس ...طيب بقولك اية ما تكتبي عن ترشيح د.زويل ود. البرادعي للأنتخابات ...طيب اقولك هو انت هتنتخبي مين فيهم ...تعرفي انا من رأي ان برغم د.زويل و د. البرادعي ناس محترمين وبيحبوا البلد لكن مش هينفعوا يبقوا رؤساء لانهم علماء ...تعرفي مين فعلا ينفع يكون ريس ...؟


قلت بعد ما كان مش عاطيني فرصة اتكلم : مين ...؟


قالي : عمرو موسي ...لانه اتعامل مع الاجانب والعرب كتير ورجل دبلوماسي وانا واثق انه هيكون ريس ممتاز


قلت : يعني لو عمرو موسي رشح نفسه هتنتخبه ...؟؟


قال بطريقة سؤال بسؤال وكأنه بيهرب ومش عايز يجاوب : طيب انت لو اترشح د.زويل ود. البرادعي وعمرو موسي هتنتخبي مين فيهم ....؟


قلت وانا محتارة : مش عارفة اكيد هحتار فعلا لانهم ناس بتحب مصر بس يمكن انا ميالة اكتر للدكتور زويل ...ها قولي بقي هتنتخب ميييييين انت ....؟


قال : انا .....بيني وبينك ....هنتخب الريس او ابنه ....خليني ماشي جوه الحيط احسن انا مش عايز اروح ورا الشمس ....خليني اربي عيالي احسن ..بلا سياسة بلا وجع دماغ واهو احنا عايشين وخلاص


وساعتها كنت وصلت للأكادمية ....فقلت له : شكرا انت افدتني كتيييير بس حاول انك يكون لك موقف في مصلحة بلدك اللي هي مصلحة ولادك ...ونزلت ولكنه استوقفني ....استني انت مش هتكتبي اسمي بقي ف المقال الي هتكتبيه ....؟ ضحكت من قلبي بسخرية ,,,,وتركته ومشيت


لو اللي بيقرا وصل لغاية هنا عايزة اقوله كتر خييييييرك بجد انك استحملت الرغي ده كله اللي انا عماله ارغييه


انا بقي فكرت مع نفسي لو انا بقيت رئيس الجمهورية هعمل اية ...؟


اول حاجة حكاية الغاز المصدر لإسرائيل ...وبعدها قوانين الاسرة والطفل والزواج ....المستشفيات الحكومية والاستثمارية واللي بيحصل فيها ...هحاول ان كل مدرس وكل طبيب وكل زي عمل يكون مرتبه او ما يحصل عليه مناسب فعلا للمعيشة الآن ....كل محافظ وكل مسؤل هيتحاسب علي اخطائه ومفيش حاجة اسمها حصانة مجلس شعب ولا شوري ....هيكون في حرية اعلامية اكيدة لكن بدون ابتذال ....وخاصة ف الافلام والمسلسلات والتليفزيون البرامج المنيلة اللي بتقول اراء متشابهه لللغرب لا تمت بصله لتقاليدنا الاجتماعية ولا الدينية ....


واما مشكلة التعليم فدي مشكلة تانية هحلها كدة علي روووقان ..واولها بقي اني هغير المناهج كلها من اول كي جي ون لغاية الاخر ...بحاجات كلها حديثة ومناسبة ومفيدة ومش اي كلام ومش حفظ وصم وبعدها طرش في ورقة الاجابة بدون ما يفهموا هما كانوا بيتعلموا اية ....وحاجات تانية اكيد مع مرور الوقت هكتشف عيوبها واعدلها ...بالنسبة بقي للصحافة اللي انا انتمي اليها ..نفسي ف حريتها بس حرية تكون مسؤلة بدون ابتذال عايزة تكون صحافة حقيقية دقيقة وصادقة ليضرب بها المثل ولا تكون مجرد اعداد واسماء لجرائد ومجلات بدون اي لازمة ...جرائد صفراء وحسب .....لاء صحافة حقيقية....


الرياضة ...الله يخرب بيت الكورة والاهلي والزمالك ...هو مفيش ف البلد دي غير الكورة وبس مفيش حاجة تانية ....مفيش تنس ولا سلة ولا يد ولا سباحة ولا اي رياضة غير كرة القدم ولا في اي فريق غير الاهلي والزمالك ..اهتمام اهتمام اهتمام اهتمام اهتمام بكلافة انواع الرياضة والقاء الضوء عليها اعلاميا ...وسن قانون لحماية الرياضي والمحافظة عليه يعني مينفعش يكون عنده بطولة عالمية وعنده امتحان ف نفسي الوقت ...لازم يضحي بشيء فيهم ...وليه يضحي ما ممكن يسافر للبطولة وبعدين يجي يمتحن امتحان خاص وهو مش اسمه هيرفع اسم مصر ....؟ لازم يكون للرياضي الموهوب كافة انواع الراحة النفسية والاقتصادية والاجتماعية حتي يستطيع ان يتأهل لكل البطولات التي ترفع اسم مصر مع اسمه عاليا .....


شوفو بقي انا في قانون نفسي فيه اوووووي اوووي اووووي لما اكون رئيس الجمهورية هعمله علي طول ما انا بقي رئيس الجمهورية وطلباتي مجابة ....قانون للحد من الاغتصاب والتحرش ....اي حد ثبت فعلا انه قام بحادث اغتصاب فالقانون يقول "إعدام " واما المتحرش ف " السجن " و25 سنة مع الشغل ....ساعتها هتلاقي البلد نضفت بجد ومعدش في حاجة من دي ولا من تلك الجرائم التي تواجهنا ف كافة وسائل الاعلام من صحافة وتليفزيون واذاعة وانترنت .....


اييية تاني .....؟ ياة تاني يا حوبة ...مش فاكرة بس لو حد عنده اضافة يا ريت بجد يقولي وهكون سعيدة بجد لاني بحب مصر بجد ونفسي اغيرها للأحسن


آه في كمان حاجة مهمة كنت هنساها ....يا جماعة مصر مش بس القاهرة واسكندرية لاء في محافظات تانية عايزة اهتمام محافظات ملغية م الوجود مالهاش اسم بس غير علي الخريطة ويمكن كمان لو قلت مرة اسمها متلقيش حد عارفها ...يعني انا مرة وانا ف الجامعة زميلي بيسألني انت منين فقلت " من بلطيم ودي مدينة ف محافظة كفر الشيخ" كان رده غريب جدا انه أول مرة يسمع اسمها ومش اسم بلطيم وبس لاء كفر الشيخ كمان والمصيبة بقي انه من اسكندرية اقرب محافظة لينا ....؟ يعني دي مشكلة بجد وكمان مرتبطة بالثقافة اكيد لكن اللي عمل المشكلة دي الاعلام والمسؤلين اللي بيهتموا بس بالقاهرة واسكندرية بعيدا عن باقي المحافظات ... يااااة لسة حاجات كتير الشرطة مثلا والعلماء والبحث العلمي وال...و و و و و ....


معلش دوشت دماغكوا


حوبة