الأحد، 29 مايو 2011

نفسي ....اللي هي انا...اللي هي مش أنا

عارفة
اني عنيدة.....
بس مش علي الغلط....
يبقي بلاش تقوللي اني عنيدة وخلاص لمجرد العناد

******

عارف
اني مش بحب الاوامر
يبقي بلاش  ...ومتكررهاش

*****
عارف
اني كنت مستنياك
وبرضة
كسرت قلبي
ونسيت الميعاد
*****
عارفة
اني صعبة اووي 
صعب إني اثق ف أي شخص
أني اعط الامان لأي شخص
أني حتي وانا معاك ...
أحيانا بحس بالخوف....منك

*****

عارف
كنت زمان أعرف الكلمة  اللي هتقولها
قبل ما تنطقها شفايفك
دلوقت
بقيت ابص علي شفايفك
عشان اعرف هتقول إية.....

*****

عارف
فكرت أنك هتكون أول واحد تكون جنبي
تخفف عني ..... تقف جنبي ف محنتي
لـــــــــــــكن
كل اللي متوقعتهمش  كانوا هنا
معايا
الا
انت

*****

عارف
احيانا بحس انك  فعلا محبتنيش
واني كنت مجرد
لعبة ...عجبتك
والاحساس ده بيقتلني
*****

عارف
لما كلمتني
وقلتلي انك ف المستشفي
معرفش لية مصدقتك
محستش انك تعبان  زي ما كنت بحس زمان 
زمان لما كنت بحس بألمك وتعبك من أول كلمة تقولها
ومن أول ما اسمع صوتك
ويمكن منقبل ما تكلمني
كنت بحس بألمك ف قلبي
لية المرة دي محستوش
لية
يمكن عشان جرحك ليا
والا عشان فعلا أنا
مبقتش احسك ولا أحبك

****

عارف
انت كنت بتقوللي اني قاسية
بس بجد
انت الأقسي........



رحـــــــاب

الجمعة، 27 مايو 2011

إنتماء .....وسياسة......وثورة




إن أكثر جملة يكرهها الاشخاص الان هي " انت معندكش انتماء للبلد "  هذا عندما يتجادلوا في شيء  ويختلفا .....
ولكن هل سأل أحدكم ماذا يعني الانتماء للوطن...؟
ماذا يعني الحب للوطن....؟
وهل حقا تحب وطنك الذي لم يعطيك أي شيء سوي الامراض والقهر  والذل والسجن والسحل  ف الشوارع .....؟
دعونا نبتعد عن كلام الاغاني  " ومقولش اية اديتنا مصر وقول هندي اية لمصر"  بلاش كلام شعارات ....خلونا واقعيين .....
ماذا يعني الانتماء ....؟
جلست بجوار رجل عجوز وكنت أقرأ الجريدة ....وتبادلنا الحديث ووجدته يقول لي بعد حوار قصير إن الشباب برضه معذور  وبلاش حكاية معندوش انتماء دي  هو هيبقي عنده انتماء ازاي وبلده اصلا مش بتسأل فيه  انت عارفة كان في شاب أجنبي اتهم في قضية مخدرات في بلد  عربي  وتمت محاكمته وسجنه ف هذا البلد وقامت حكومته بكل ما اوتيت من قوة  لنقله لبلده وقضاء عقوبه السجن هناك الا ان الدولة العربية قالت ان هذا مخالف لقوانينها  فما كان من الدولة الاجنبية الا ان وفرت لمواطنها الشاب كافة سبل الراحة وقامت جامعته بارسال كافة المواد التعليمية له بالسجن حتي يستذكر دروسه ولا يمر عليه العام الدراسي مرور الكرام
وفي مقابلة للشاب مع  وفد من دولته سأله رئيس الوفد " اتريد شيء من بلدك ...؟
فما كان من الشاب الذي لمس اهتمام دولته به الا ان قال " أنا روحي لبلدي "
ونظر لي الشيخ وقال " شايفة الفرق ...؟ بينهم وبينا ,,,, شايفة الفرق بين الاهتمام وبين اللي بيسيبوهم يموتوا علي شواطيء ايطاليا  وتركيا وغيره وبين الاهتمام بمواطن متهم بقضية مخدرات ....؟ وبعد كدة تقولوا انتماء....؟؟؟!!!!"
لا أعرف اذا كانت الحكاية حقيقية ام لا ...ولكني سمعت وقرأت عشرات القصص بهذا المعني  وساعتها اعقد المقارنات ....واندهش...واتحسر
                             **********
أموال مبارك واعوانه  اللي لسة مش عارفين مصيرها إية ولا حد معبرنا ...,السيدة مارجريت سكوبي اللي بترفض الكشف عن التفاصيل ......
والبنوك اللي مش معبرنا
والدول اللي مش سائلة فينا
ده كله بيخليني اد اية احس اننا دولة مالهاش كيان ومالهاش كلمة مسموعة ....
ويا ريتها مصر بس.....لاء ده بلاتر اللي  طبخ الطبخة مع قطر جاي دلوقت ويقول ان ده كان مجرد حلم .....طبعا حلم
انت ازاي تفكر تتحداني يا ولد.....عايز تبقي راسك براسي يا همام....؟
احلم علي ادك يا شاطر....
وادي همام اللي مش همام ...حس بغلطته ور اح يعتذر....
 يا سلام علي الدول العربية ومستواها
يا سلام علي قوتها وكلمتها المسموعة....
                          ***************
بيقولوا ان الثورة دي اتعملت عشان الاسعار  مولعة نار.... سألتني...؟
وقبل ما أرد عليها كانت كملت كلامها قائلة" طب ما الاسعار بتزيد لسة ...وكمان مفيش غاز ولا بترول....ولاولاولاولا ........ والله ايام مبارك كانت احلي ....ده انتم شعب  تييييييييييييييت"
 يا سلام....بقي ايام مبارك كانت أحلي....؟
من ناحية إية طيب....؟
مكانش فية أزمة غاز....؟ مكانش في زيادة أسعار....مكانش في إجرام ولا بلطجية...؟
اقول للناس اللي بتقول للكلام ده.....إصحوا من النوم بقي ...كفاياكم  نوووم

أما بالنسبة لعدم محاكمة مبارك بدعوي سنه ومكانته  وانه مهما كان " راجل كبير وعلي وش موت "
اقول " كل واحد يتكلم عن نفسه ...اللي مات ابنه او ابوه او اخوه,,,اللي مات خطيبها واللي مات جوزها .....ودم الشهداء ده  مين يتحاسب عليه ....؟
وكلام الفنانين أمثال زوج زهرة الاولاني والا التاني .... خليك ف مسلسلاتك الهادفة اللي بتناقش  واقع البلد ده علي اساس اننا عيال  لسة.....
وأخيرا ....
هناك حديث لآشرف خلق الله رسوله محمد صلي الله عليه وسلم معناه أن " انما اهلك من قبلكم أنهم كانوا اذا سرق القوي فيهم تركوه واذا سرق ضعيفهم أقاموا عليه الحد  ووالله لو ان فاطمة بنت محمد سرقت لقطعت يدها "
فهل مبارك وأعوانه يا من تطلبون له الرحمة أفضل من فاطمة بنت محمد رسول الله ...؟؟؟!!!
 لا تتحدثوا بلساننا ......فكل شخص حر وكل شخص يتحدث عن نفسه ولا تنصحونا فنحن نفهم جيدا الوضع....ولن اسامح من استحل دمائنا ودنس طعامنا وصدر القوت لآعداءنا
ابدا....لن أسامح ولن أصالح



ملحوظة

كان نفسي أروح التحرير أووي النهاردة
بس برغم كل شيء...برغم الناس اللي قالت لاء متروحوش...برغم ان في كتير  كنت بعتقد انهم هيكونوا هناك زي البرادعي  والبسطويسي ....
برغم اني توقعت ان حمدين ونرو ميروحوش بس  حصل العكس
برغم كل شيء واي شيء
مبسوطة ان في ناس بتفهم اللي بيحصل حاليا ......ويا ريتهم يزيدوا عن الناس النايمة ف العسل  ومش هاممها اللي بيحصل .........
ملحوظة تانية....
في شيء غريب  ف بلوجر ...معرفش إية مشكلة التعليقات كل ما ادخل مدونة التعليق مش بيظهر وبيعملي تسجيل الدخول تاني ...ف اغلب المدونات ...قليل جدا من المدونات اللي عرفت اعلق فيها...يا تري  المشكلة دي عندي بس والا....؟

رحاب صالح

الأربعاء، 25 مايو 2011

لو كنت أعلم.....

لو كنت أعلم انني لن أراك مرة أخري ....لقضيت معك وقتا أطول....
 لو كنت أعلم أنك سترحيل ....ما كنت حاولت أن أغضبك أو اضايقك أبدا
برغم أننا صديقتين جدا  وما كنا نغضب من بعض  الا  ونبتسم بعدها ونتصالح
مازلت أتذكر يوم سافرنا سويا وقضيت أنا ساعتين أكل في سندوتش جبنة لدرجة أثارت جنونك وأصبحت تتندرين بالموقف  كلما أكلنا سويا ...
مازلت أتذكر  قبل عيد الحب بايام عندما قلت لك " انت مش هتبعتيلي رسالة يوم عيد الحب يا جوجو ...؟"
وردك عليا " والله انت رايقة يا روبي ...بقي بذمتك المسجد الاقصي بيدنسوه وانت بتفكري ف عيد الحب ....والله انا بتمني اروح افجر نفسي  ف اليهود هناك  واهو علي الاقل الواحد يكون عمل ف حياته شيء كويس "
اتكسفت منك جدا ...برغم انك عارفة كويس اووي ان مشكلة فلسطين كانت ومازلت تؤرقنا جميعا...
وبرغم ذلك كنت أنت أول من أرسل لي رسالة يوم عيد الحب ...........
يومها كنا متفقين كعادتنا  أن نلتقي عندك في البيت ....
يومها كنت علي سفر ....وبرغم ذلك قررت أن لا اخلف موعدي معك....
ولكن القدر كان أقوي ...وعرفت برحيلك قبل أن أدخل منزلي ...قبل أن أراك ...قبل أن اقول لك أنني أحبك ...وأنني أبدا لن أنساك ...وسأظل أتذكرك دوما....
كنت أريد أن أراك.......
وبرغم من صورنا علي البحر وصورك التي معي...
قصاصات الوق التي كنا نتبادلها أيام المدرسة وحتي ايام العمل 
الورود التي كنا نجففها وسط القصص والكتب.....
الهدايا.....
كل شييء وضعته بمكان أمين ولم أفتحه منذ  يوم رحيلك.........
لم أصدق ولم أستوعب....ولم افهم
وقضيت سنة كاملة لا أصدق  رحيلك ........
ومع مرور الوقت بدأت استوعب وأفهم ....فهذا هو قدرنا
لقد ولدنا...ويوما ما سنموت
اتذكر طوال الوقت..ادعو لك في صلاتي دوما ولا أنساك من الدعاء أبدا.......
أوقات أراك بأحلامي .....افرح وأحزن........فليرحمك الله.......
                                               ************
كلما التقينا كانت " الاندومي والشيبسي " في يدها
أقول لها " سهام"  والله ده اللي موديكي ف داهية ....
ترد عليا" يا شيخة بصي لنفسك بقي ....الحال من بعضه 
نضحك ....أقول لها " ابقي عدي عليا وانت رايحة تصلي التراويح ...نروح سوا "
ترد" طب والفجر....؟ "
ارد " والفجر كمان...."
لا أتذكر سوي هذا ....؟؟؟
بل أتذكر الكثير
لكن يظل هذا عالقا بذاكرتي.....
                                  ؟؟؟؟؟؟؟؟؟؟؟؟
كنت أراك منذ يومين
وافاجيء  بخبر بموتك وأنا خارج البيت............
كيف هذا...؟ لا اعترض علي قضاء الله
لكني لم أفهم ولم أستوعب أيضا ما حدث...............
سهام الرقيقة ...الهادئة .....المطيعة.....الخجولة.....المؤدبة......التي تتقي الله دوما
كيف لم ننتبه لكلامك ....
كيف لم ننتبه ان نور الحياة انطفيء  من محياك ....
كيف لم ننتبه أن هذه أعراض انسحاب الحياة منك
كيف ....كيف ...كيف...........
كلها أسئلة بدون اجابات ...
لكنه لغز الحياة والموت....
صعب جدا أن نفهمه برغم اننا نعرفه وننتظره
ولكن  وقع المفاجاة علينا  دوما يكون صعب
لم أفاجيء يوم  وفاة جدتي ....لا لاني لا احبها...بالعكس...بل اعشقها ...لكني فهمت منذ صغير ان الكبار يموتون...وليس الصغار
لهذا افاجيء لموت اعز صديقاتي  التي كنا نخطط  ليوم خطبتها.....
ومنذ أيام افاجيء بموت احدي قريباتي.....سبعة عشر عاما.....

صدمتي قوية.....لكنه قضاء الله
اشعر بشيء غريب
أعرف اني لست مذنبة ولست صالحة في كل اعمالي ..لكني احاول أن اكون كما  طلب منا الله ورسوله
أنا انسانة ولي اخطائي ..ولكني دوما أحاول أن لا تكون خطايا
أنا بشر .....والبشر خطاؤون وخير الخطائين التوابيين

اخاف الموت وأنتظره برغم كل شيء....
ولكني اتمني دوما أن أموت أنا قبل جميع من أحبهم...
لا أستطيع النظر لشخص مريض....فهل أستطيع يوما النظر لشخص  ماتت فيه الحياة...؟
لا أريد أن يتألم شخص من أجلي
ولكني أعرف جيدا أنني سأتألم من أجل الجميع.....

فليرحمنا الله ويغفر لنا
فليرحم الله جميع موتانا
ويغفر لنا جميعا ذنوبنا


أما أنا......
بجد بجد بجد
مش قادرة اتكلم مع اي حد
تعبانة جداااااااااااااااا
نفسيا وجسديا
بعتذر لكم جميعا
انا كتبت بس فضفضة
لاني مخنوقة

السبت، 14 مايو 2011

فارس أحلامي المنتظر.....Go To Hell

كنت دايما بحس إني أميرة الحكايات وجنية الافلام...وحورية بحر الحب
كنت بحس اني  " ياسمين" اللي طايرة مع " علاء الدين " علي بساطه السحري ...فوق السحاب الابيض الجميل
كنت بحلم بفارس أحلامي ...الشاب الوسيم .....اللي يقطف لي  سحابة بيضا ويغرقني بنعومتها

لـــــــــــــــــكن

" علاء الدين " مش زي ما انتم فاكرين.....
صحيح هو أخدني علي بساطه السحري ...وطرنا فوق ..فوق ...فوق السحاب.....
قالي انه بيحبني....ميقدرش يستغني عني......ميستحملش السحاب ولا  حتي البساط  السحري من غيري.........
وصدقته............مممممممممم ...بس أكتشفت بقي بعيون وقلب الانثي ....إنه طمعان في ثروة أبويا....
عشان كدة ....بعد ما اتجوزنا  وطرنا بالبساط السحري ..فوق ..فوق ...فوق....فوق...فوق السحاب...وحاول هو يرميني من فوق فوق فوق السحاااااااااااااااااااب...- طبعا عشان يورثني - كنت  أنا أشطر منه.......
ورميته من فوووووووووووووووق ....البساط السحري اللي طاير بينا فوووووق السحاب

                                                       ************

" سنو وايت "  كانت بنوتة جميلة .........بتحب كل شيء ف الدنيا
وحتي جمالها محستش بيه ولا كانت عارفة قيمة جمالها ده اللي مخللي زوجة ابيها  تعمل كل ده  عشانه
وهو يعني الجمال  شيء مهم جدا .........؟!!!
" سنو وايت معرفتش  معني جمالها الا لما قابلت " الامير" اللي صحاها  علي " قبلة الحياة" كما تقول الاسطورة...قصدي الحكاية....
بس اللي انتم متعرفهوش ...ان " سنو وايت "
اتغاظت أوووي لما الامير باسها.....تعرفوا لية ؟
يا جماعة كانت عايزة تنام....ثم إن الأمير ...مكانش حالق دقنه.....^-^
                                         **************
" سندريلا " .....وحفلة الامير .......
ويا تري هتجيب فستان منين ....؟
والا يعني  جمالها هيغطي علي  ملابسها القديمة دي ......؟؟؟
سؤال وجيه يا " سندريلا" بس....." سندريلا " زي بقية البنات  بتحب تلبس وتكون أجمل الجميلات....

عشان كدة  الجنية الطيبة.....عرفت من غير ما تقول اية اللي نفسها فيه " سندريلا"
وراحت " سندريلا " الحفلة.....وعجبت الامير .............وكل البنانيت اللي ف الحفلة اتجننوا علي فستانها الجميل ...
وحسدوها ان الامير رقص معاها طول الوقت.......بس زي ما الاسطورة بتقول.....اقصد الحكاية....الساعة اتناشر  دقت......ولازم سندريلا تمشي  عشان السحر هيخلص.....وجرت سندريلا .....وطبعا حذائها  فلت من رجليها وهي بتجري....
واحنا عارفين باقي الحكاية.....
بس اللي انتم متعرفهوش.....إن
سندريلا  حذائها فلت منها بقصدها ...مش غصب عنها
وكمان الامير لما دور عليها
مش عشان حبه ليها
لاء......عشان فردة حذائها التانية......؟ لآن الحذاء كان مصنوع من الماس.....وأهو كله فايدة للمملكة.........
                                               **************
أما عشقي وجنوني وصبايا واحلامي ...وهرجي  اللامتناهي  كان مع " آليس"
"آليس" بفستانها القصير  وقبعتها الحمراء الجميلة
آليس تلك الطفلة الحالمة ...الطفلة التي لا تتمتع بجمال نادر كباقي ابطال القصص
آليس ....الطفلة  ذات الاحلام اللامعقولة ......عن أرنب يتحدث وعن حفلة شاي...

وعن أشجار وحيوانات  تتسابق...
عن رقعة شطرنج حقيقية
وعن دموع تتحول لآنهار......
آليس ...أنت أنا...وأنا أنت
كم تمنيت أن يكون عندي أنا أيضا أرنب " باني " مثلك
ولكني كنت ومازلت مثلك في احلامي .....
بكل شيء.....لم تحلمي بفارس أحلام ولم تبكي علي فتي ما.........
لم تتذوقي حب المراهقة والشباب  وتتعذبي كباقي  أبطال القصص والحكايات ....
لهذا تبقي أنت طفلة قلبي ....
و أنت أنا يا " آليس"
تبقين أنت أنا......

فمازلت أنا تلك الطفلة الحالمة.....
ولكن ...قلبي مثقل بالهموم..........
ليتني كنت مثلك " آليس"  لا أكبر أبدا  وابقي دوما طفلة حالمة في بلاد العجائب

الجمعة، 6 مايو 2011

ميلاد جديد

كل الناس بتحب مشهد الغروب
بس انا بحب مشهد الشروق أكتر
يمكن لآن الشروق بيحسسني  بالأمل ....بيحسسني بلحظة الميلاد
كل شروق أشاهده كأنني أشهد لحظة ميلاد طفل .......
                ***********
لي زميل في الجامعة اعرفه  منذ وقت قليل بسبب جروب للجامعة انشأه
والدته كانت مريضة ,,,ثم توفيت ,,, اتصلت به  لأقول البقاء لله ....
انتهت حياة  انسان  اليوم......ثم
بعدها بساعات كانت هناك ولادة انسان أخر......
                       ***********
شروق الشمس مرتبط بالميلاد ....ميلاد يوم جديد
ويمكن ده اللي حصل امبارح....قصدي النهاردة
الفجر......لحظة شروق الشمس......
أخيراااااااااااا  نور الدنيا  وشرف فيها " محمود " ابن اختي "منة"
وده يبقي الحفيد رقم سبعة  في العائلة الكريمة بتاعتنا.....
               ***********
المشكلة ان دايما الحاجات دي مفاجأة
يعني انا قبلها كنت بلعب مع  " اوشة " بنت اختي اللي اخوها شرف الدنيا ده....
كنت بلعب معاها بالهدوم اللي اختي اشترتها للنونو  انا اخد الهدوم واقول بتاعتي  و" أوشة " تصرخ وتقول بتاعت النونو .....
                    **********
قبلها بساعات كنت بكلم " أحمد " اخويا وسألني  هي " منة " ولدت ...؟
قلت له لاء يظهر ان الولد ده مش عايز يجي الدنيا  وعايز يفضل جوه براحته بقي 
هو يعني وراه اية ...قاعد نايم شارب اكل اربعة وعشرين قيراط  جوه , يبقي يطلع بره يعمل اية...؟
                                  **************
قبلها بيوم كنت بكلم  زوج أختي 
بقوله ...." يا رب ما يكون ولد  وتبقي بنت ...مش عارفة لية دايما الرجالة عايزين ولاد مش بنات "
ضحك كتير اووي وقاللي " عشان ياخد باله من مامته واخته ....."
ضحكت وقلت " اها ....الحجج البايته  ههههههههههه "
قالي " مش حجة المهم انه  ولد ...وان شاء الله يبقي طويل مش قصير زي اخته اللي طالعة لخالتها قصيرة _ ده أنا يعني  _ "
                           ************
قبلها بأيام
كنت علي جروب المدونين ع الفيس بوك ...
وكان " د. محمود ..سٍبايدر مان .... وسمار توك...بيتكلموا عن ولادة الاطفال ...
بصراحة كنت  متغاظة منهم جدا ..لانهم مش بيخافوا وانا بخاف اوووي
قالولي وقتها اني بدلع ...بس والله ماهو دلع....
فعلا بخاف اووي  لحظة ولادة الاطفال وبخاف اني اشوفهم او اني اشيلهم كدة بين ايديا ...اخاف جداااااا
فعلا وقت ما اختي ولدت " محمود" كنت خايفة اوووي اوووي
بس حبيت اشوفه اول ما خرج للدنيا ...
طبعا كان مع جدته...وانا ملمستوش اصلا ...انا قلت لها اول شيء " هو انتم غسلتوه والا لاء ...؟"
خليت الناس اللي واقفين ميبطلوش ضحك......
لية ضحكوا هو انا قلت شيء غريب ..........؟؟؟!!!
بس الولد اية " الله بجد جميل اووي وعسول ...وعنيه سودا وانا بموت ف العيون السودا والله علي صوابعه الله بجد ....سبحان الله  وما شاء الله .....دايما الانسان يقف عاجز ومبهور علي قدرة الله ....سبحان الله"
               ***********
قبلها بشهور..............
عرفنا من اختي انها حامل  في ولد
طيب تمام حلو خالص ......
زوجها بقي  كان  عمال علي بطال يقولها " بلاش تبصي لـــ رحاب  عشان الولد ميطلعش قصير كفاية البنت طالعة قصيرة لها "
واختي بقي تتنرفز عشاني " طب يا رب يطلع قصير "

هو لية دايما يقولوا للستات الحوامل بصوا لشخص حلو عشان البيبي يطلع شبهه ...؟ حاجة غريبة بجد
دي حتي البنت " أوشة" طالعة احلي مني مليون مرة  برغم انهم بيقولوا انها طالعالي _ يا سلام هو انا قمر كدة _
                     ***********
منذ ساعات .......
كل اللي جاي لأختي يبارك لها  يقوللي عقبالك ....
وانا بقي زي الاطفال ....اخبط رجلي ف الارض واقول ...لاء لاء لاء  محدش يقوللي عقبالك  خااااااااالص
انا مش هتجوز مش هتجوز مش هتجووووووووووز
وبعدين بقي لو حصل واتجوزت مش هخلف
واذا هو عايز ...يبقي هو اللي يولد هه" فاكرين مشهد فيلم الحيدى بين مدبولي والبنت الصغيرة "
علي فكرة ده مش دلع والله.........
                        **********
اخيرااااااااااااا
كان نفسي بجد اني اصور محمود عشان تشوفوه بجد الله عليه
بس معرفتش بقي ...ماما بتقولي مش عارف اية كدة ومينفعش اني اصورة دلوقت
بس علي مييييييييييييين
والله ما تحصل ابدا .........
كلها يوم وبرضه اصوره واحط الصورة هنا

خارج الاطار: عقبال كل المتجوزين واللي حتي علي وشك الجواز ...ومحدش يقوللي عقبالك  ...ساعتها ممكن اموته


ملحوظة
بجد عارفة اني مقصرة كتيييييييييير في حقكم لاني مش بعرف ازور مدوناتكم
بس غصب عني بجد