الثلاثاء، 23 أغسطس، 2011

إعلانات.....1/2 كم

بالطبع متابعتش او مقدرتش اتابع لا برامج ولا مسلسلات ولا اي حاجة ف رمضان السنة دي بسبب انشغالي ف الامتحانات
وبصراحة الحمد لله ....احسن لان يعني حالة المسلسلات بجد متطمنش ....بس كنت اتمني اشوف مسلسل " مشرفة" بحب انا  السيرة الذاتية بس يا خووووووفي لا يكون فيه عك هو كمان زي " الشحرورة"
المهم انا بقي نويت اتكلم عن الاعلانات
اصلها مستفزة اوووي الصراحة
أجمل اعلان من وجهة نظري ونظر كتير من الناس  اعلان فودافون " شكرا " يعني يمكن عشان الاغنية المعروفة  بتاعة ايمان البحر درويش وكمان عشان الناس اللي ف الاعلان زي نيللي وسمر غانم وابطال الكورة ابو زيد واكرامي والكاس وامام
بس المستفز بقي  " فودافون شكرا " عاملة الخدمة علي مزاجها .....
يعني لما حبيت اجرب  الخدمة دي بعتها لآخويا أحمد لان رقمه هو الاخف والاسهل عندي  وكمان حافظاه  فبعت له " شكرا" وجريت بسرعة أشوف  الرسالة جاية ازاي ......." ايموشن متغاظ كدة"
لقيت ان الوقت  اللي هيستمتع فيه بالخدمة مش مناسب خالص ...." يعني ساعة مجانا من عشرة الصبح لحداشر الصبح" وطبعا وقتها احمد بيكون نايم ....ده غير الناس اللي بعتالهم الخدمة دي برضه وكانت  خمسة  او ستة الفجر ......يعني اعلان 1/2 كم
اعلان بيبسي ...."دنيا سمير غانم "
لذيذ الاعلان .....بس يغيظ شوية ...." ولفت نظري برضه الفستان البمبي " وبدلع برضه واعمل زييها كدة  بس بابا مش بيديني كريدت ....اصلا مش باب مش بيحب البيبسي ....
المستفز ف الاعلان انه فعلا الثلاث حاجات مهمين ...بس الناس الاغنبيا اللي جم ف الاعلان  مبصوش للاعلان ده بصوا لدنيا ....فتقولهم  هتعمل فوت  علي اية يقولك دنيا سمير غانم....." ما كلهم دنيا يا مجانين " بس تقول اية  بقي ....والا كلهم مركزين اووي علي الفستان البمبي حتي الفنانين اللي استعان بيهم الاعلان ....بس في فنانين كانوا بجد كلامهم جميل جدا ...زي انجي وجدان ودرة  ....علي الاقل فاهمين ...بس معرفش لية جايبين ايمي  فالاعلان ...بتشجع اختها يعني .....؟
الاعلان بقي اللي مفهمتوش.....
اعلان "عمر الشريف " بتاع مؤسسة مجدي يعقوب........" شايفة حد بيقولي مش مفهوم لية...؟؟؟
عشان عمر عمل اعلان بايخ وسخيف عن  مياة غازية وكل الناس انتقدته......ودلوقت جاي ف اعلان خير....غرييييييييييييبة
الاعلان اللي نفسي يتلغي من خريطة الاعلانات.....
ومش هتكلم عنه  غير كلمتين...."قطونيل" بجد اعلان سقيل
الاعلان البايخ المستفز....
هو عرفني ازاي وانا بالدقن......كامل ...انت بتعمل اية ف بنك القاهرة.....خالد صالح السخيف ...اعلان بايخ زييك تمام
الاعلان الممميز علي الاقل من وجهه نظري
اعلان بنك مصر...بصوت عبد الرحمن ابو زهرة ....صوت مميز اعلان مميز بجد لذيذ وجميل وملفت وجاذب للنظر   وده بينطبق فيه شروط الاعلان الفعال ....كلام قليل صوت مميز وجاذب اعلان  عن شيء وصور مرتبطة بشخص الاعلان .....
الاعلان اللي بكرهه وبينقطني ....
احنا اتعرفنا علي جواز اون لاين ....صح حاجة زي كدة ...اصلا لما بيجي الاعلان ده بقلب علي اي حاجة تانية
علي اساس يعني ان متعرفش تتعرف علي اي شخص الا علي مواقع الزواج العبيطة دي ....وبعدين هو الفيس بوك راح فين يعني...؟
كفاية كدة بقي
بلاش  نرفزة تانية

الجمعة، 19 أغسطس، 2011

الوقت ....مكانش متأخر....

( 1 )
" نادية" انت عارفة اني بحب " فتحي " اووي  بس الظروف بجد صعبة كتير
انت صديقتي المقربة  صحيح بس يا ريتك تسيبيني احاول اني احل الموضوع ده بنفسي
******
نادية انت لية عملت كدة ...؟ انت فرقتينا بأسوء طريقة ...!! انت مش صاحبيتي
يا ريتك متكلمنيش تاني ....ومتحاوليش تتصلي بيا
جهاد ...انت فاهمة غلط صدقيني ...انت فاهمة غلط
جهاد ...اديني فرصة بس اشرح لك
نادية يا ريتك بجد تنسي اننا كنا اصحاب وتنسي رقم موبايلي  ومتحاوليش تشوفيني
******
نادية......نادية.... اصحي
جهاد ...ماتت
جهاد ماتت....؟؟؟؟
ماتت من غير ما تعرف الحقيقة ....ماتت من غير ما تسامحني
يا تري مهما بكيت هتفيد دموعي بشيء....؟
يا تري مهما روحت لقبرها وحكيت هتسمعني وتفهمني
يا تري هتديني الفرصة دلوقت  ...؟ الفرصة الل يمعتطهانيش وهي عايشة ...؟
هتقدر تعطيهالي وهي ميتة....؟

( 2 )
"سبحان الله الحب ده شيء غريب ....مش عارفة انت بتحبي خطيبك ده ازاي ...مع اني شايفة انه دمه تقيل "
قالتها  بسمة  لصديقتها " نادية"  فضحكت تلك الاخيرة كثيرا وقالت " الحب  ده شيء غريب فيه كل شيء غريب مباح ومتاح
لما تحبي هتعرفي ان اللي ممكن تشوفيه دمه تقيل  لما تحبيه ممكن يقي ازي ارق واحد ف الدنيا
*****
" نادية " انا معرفش كان قصد خطيبك اية  بالظبط ....؟؟!! انا قلت لك اللي حصل ...عايزاكي تفكر بهدوء مش بتوتر  تفكري صح عشان تقرري صح وبلاش السرعة ف القرار لانك هتكوني الخسرانة
" شوفي يا بسمة  انا بحب خطيبي ومش هسمح لك انك تفرقي بينا ...
" انا يا نادية بعمل كدة ...؟ بفرق بينك وبين خطيبك....؟ طيب ممكن تديني فرصة وانا اثبت لك كلامي....؟
" لاء انا مش عايزة منك حاجة ...مش عايزة اكلمك مش عايزة اشوفك"
" نادية احنا اصحاب من زمان اووي وبلاش نخسر بعض ف  لحظة غضب.... وانا باقية عليكي "
" وانا يا بسمة مش باقية عليك ...انت مش صاحبيتي ...وانا مش بحبك...."
" نادية مش بتحبيني ....؟؟؟؟
للحظات تخيلت نادية انا ملامح بسمة تغيرت ...فتحول شعرها الاسود الي اللون الاشقر وعينيها السواداء الي الاخضر ...واصبحت ملامحها ملامح  اخري .... فلم تستطع النطق
" نادية مش بتحبيني....؟؟؟؟"
"......................."
لية وقتها معرفتش ترد ...لية وقتها حست ان قلبها  قاسي اووي علي صديقتها .....
*****
نادية....نادية....اصحي.....
" في اية يا ماما.....؟
" بسمة صاحبتك...عملت حادثة وهي ف المستشفي دلوقت.....
ساعتها بس عرفت " نادية "  ان ملامح بسمة اتغيرت لملامح مين....
والموقف كان هو هو ...بس مع تغيير بسيط ف الادوار....
يا تري  ممكن " نادية " تلحق  الوقت المرة دي ...ومتتأخرش ؟؟؟؟؟

( 3 )

مين اللي قال ان  تكرار كلمة الحب بيفقدها معناها.....
بالعكس انا شايفة ان تكرار كلمة الحب  بيخليها أحلي وأحلي
بس الاحلي بيكون ...الصمت ....صمت المحبين....
الحب ده عامل زي البيبي..." الجنين"  بيتخلق بالحب وم الحب ...وبيكبر بالحب
وبرغم الالم  والعذاب اللي بنعانيه في  الحب وفي اننا نكبره  الا انه بيكون احلي عذاب ....
تسع شهور ....تسع شهور عشان البيبي ده يكبر ...عشان الحب يكبر ...عشان يكتمل نموه....
عشان يخرج للدنيا  حب قادر علي كل شيء ....يقدر يقاوم  كل شيء
يقدر يكبر  بحب وف حب
بس يا تري لو البيبي ده او الجنين ده كان عمره بس سبع شهور او سته ...يا تري ممكن يقدر يعيش ....؟
ولية ميقدرش....؟ هو بس محتاج فرصة تانية....محتاج رعاية اكبر ...محتاج حب اكتر .....
مش عارفة لية انت مكنتش صبور ....ومصبرتش علي الجنين انه ينمو كل مرحلة بهدوء ويسر...لية كان في دايما شيء يعكر صفو الحب ده ...فيخللي الجنين يتعب ....ويحاول انه....يستسلم للموت.....
كل مرة كان بيقاوم...لان كان بيحب...وبيدي فرصة...وفرصة ...فرص كتير ....
هو مكانش مثالي.....بس انت كمان مكنتش مثالي.....
بس اكيد كل واحد فيكم كان عارف  اية اللي ناقص وبيحاول يكمله....
انتم الاتنين كنتم حابين ان الجنين ده يجي ويخرج للدنيا بحب وف حب ....ومع بعض
بس اية اللي حصل....؟ لية مفيش فرصة تانية....؟
ولية  الوقت متأخر....؟؟؟
ولية انت المرة دي  ...قاسي اووي علي الحب ده
لية بتقول انها جاية متأخر اوووي ...لية ....؟
لية بتطلب منها بكل قسوة ...انها تجهض الحب ده...تجهض جنين الحب
لية بتطلبها بكل قسوة وتقول....انسي.....
وبعدها بكل هدوء بتطلب منها  انها توعدك وعد انت عارف ومتأكد انها مش هتنفذه
حتي لو هي وعدتك بيه......
انت عارفها مش بتوعد بشيء غير لما تكون متأكدة انها هتقدر تنفذه....
مكانش الوقت متأخر.....
بس انت اللي خليت الوقت يتأخر .....

اما أنــــــــا
خلصت امتحانات اخيرا ...وكان وقت بجد صعب كتيرجداااا
ومش عارفة بجد هتجنن علي ظهور النتيجة...
بالنسبة للبوست ......في سؤال...اكيد كلكم بتسألوه دلوقت اية ده...؟
المواقف الثلاثة حقيقي ...بس مع تغير بسيط 
معرفش لية كتبتهم دلوقت



الأربعاء، 3 أغسطس، 2011

محاكمة ...علي الهواء...............مباشرة

يمكن كنت متغاظة لدرجة اني سيبت المذاكرة وقمت أكتب
بعد ما سمعت محاكمة الباشوات
سمعت مش شفت ....لاني كنت بسمع وانا بذاكر مش ببص خالص علي المشهد الجميل
بس انا اتضايقت لية...........؟
المحامون الاعزاء  كل واحد لية كان جاي بمطالب معينة وعن فئة معينة ....؟
محامي عن شهداء الاسكندرية ومحامية عن شهداء وضحايا شمال سيناء و......كل واحد عن محافظة معينة
طب لية كدة....؟
لية متفقش كل المحاميين علي مطالب معينة  لان الشهداء شهداء في كل محافظة وفي كل مكان
لية كان كل واحد بيطالب بمطالب معينة ومبالغ معينة
لية المحاميين مكانش في ترتيب وتنسيق بينهم
لية حسيت انهم همجيين أووي ومش عارفين يتعاملوا مع ثقل المهمة اللي قايميين بيها
لية مكانش في نوع من اللباقة واللياقة في التعامل والكلام والطريقة
بصراحة انا اتضايقت واتغاظت جداااااااا
ده شيء ....
الشيء التاني اللي دار في دماغي  وانا بسمع المحاكمة
وخلاني اتغاظ أكتر  إن الرئيس أنكر هو واولاده كل التهم الموجهه ليهم بطريقة " اخبط دماغك ف الحيط انت وهو ....أو اشرب من المحيط ....علي أساس ان النيل معادتش فيه مية بقي"
الطبيعي انهم ينكروا كل التهم دي ...بس الغريب البرود والهدوء  ده اللي كانوا فيه............؟؟؟!!!!
الشيء الغريب التالت...المحامي اللي قال ان الرئيس اللي ف القفص ده ...مش الرئيس...لان الرئيس مات من سنيييييييييين ....ضحكت اوووي اووي اوووي
أصل أنا كنت بفكر ان ده مش الرئيس  وده مش جمال ولا علاء....لاء ده شبيه أو بديل للرئيس وأولاده ومش هما دول اللي ف القفص....الصراحة مش مصدقة......
مش مصدقة ان دي محاكمة...وان هو ده الرئيس...وان ده جمال وعلاء.....
لية حاسة ان كل ده حلم ......وان ده فعلا بديل...وان الرئيس واولاده عايشين في مكان تاني وبيضحكوا علينا ...وبيطلعوا لسنهم وبيقولوا لنا .....هههههه عليكم واحد....
ممممممممممم......هو انا سوداوية....؟
لاء  بس بجد بقول اللي حاساه
بجد هو ده اللي انا حسيته....محاكمة صورية ....بديل أو بدلاء ....ل حسني وجمال وعلاء....ويمكن للعادلي كمان
محاميين بيتعاملوا بغباء للأسف ...بهمجية للأسف بعدم تنسيق وعدم وعي وبلا تمكن وبلا هدف  ومش عارفين ثقل القضية اللي بيدافعوا عنها ......محاميينا للأسف مش فالحين بس غير يكفراوا اللي قلعت الحجاب أو يحللوا دم واحدة عملت فيلم مش محترم....
لكن انهم يقاتلوا بنفس الطريقة في القضية المهمة دي....للأسف لاء فشلوا جدااااا
بيتهيء لي ان المحامين اللي رفعوا قضية علي ساويرس بسبب رسوم ميكي  كانوا أشطر من محاميي محاكمة مبارك وأولاده ...للأسف
وهذا رأي الشخصي