الخميس، 22 سبتمبر، 2011

بلادي ...بلادي ....لك..... دمي ....يهدر بلا توقف

بلاد العرب أوطاني ...وكل العرب إخوان
ليبيا.......
قتال بين مؤيدي ومعارضي الرئيس الليبي معمر القذافي.....
بعد ما قتل أكثر من نصفهم  هل مازل هناك من يؤيده....؟؟!!!
سوريا......
قتال بين مؤيدي ومعارضي  بشار الاسد ......
وهناك مقال للناقد الفني طارق الشناوي في جريدة التحرير بعنوان" الشعب السوري  أسقط المهرجان الدموي" بشأن مهرجان دمشق السينمائي الدولي يوم 20 نوفمبر  والذي قاطعته نقابة السينمائين المصريين  تضامنا مع الشعب السوري  المناضل وكانت اولاهم الفنانة سوسن بدر وهي عضوة في لجنة التحكيم .....
وكان بشار يراد بإقامة المهرجان أن يرد علي العالم أن كل شيء تحت إمرتة ومحكوم بقبضتة  والدليل هو المهرجان
وده لينك المقال  للي يحب يقراه

مصر.....
يا حبيبتي يا مصر ......
عقدة سوازان مبارك أو ظل هذه السيدة   كما كتب ابراهيم عيسي ف التحرير عن ان زوجات مرشحي الرئاسة لم يظهرن اعلاميا  لخشيتهم من عقدة سوزان مبارك السيدة الاولي  ومشهدها الشهير بشأن تمزيق ورقة تعين عمر سليمان نائب رئيس ...
وده المقال ....http://tahrirnews.com/%d9%85%d9%82%d8%a7%d9%84%d8%a7%d8%aa/%d8%b8%d9%84-%d9%87%d8%b0%d9%87-%d8%a7%d9%84%d8%b3%d9%8a%d8%af%d8%a9/
تفتكروا ان ده الحل الصح ...؟ إن زوجات المرشحين يخافوا بالشكل ده ....
هو مين اللي ابدع لقت سيدة مصر الاول...؟
طبعا السيدة جيهان السادات زوجة الرئيس الثاني لمصر  محمد انور السادات  لانها كانت ومازالت للأسف  شخصية مظهرية تحب الظهور الاعلامي والتشبه بالغرب  ....
احدي صديقاتي قالت لي " الله يرحم مرات عبد الناصر ...كانت ست مصرية مائة بالمائة ,,, تفتكري انه ممكن السيدة الاولي تبقي تحية عبد الناصر ...؟ ....قلت مستحيل ...., وليس عيبا في السيدة الجليلة التي نكن لها كل احترام ...انها سيدة امية مصرية  ليس لها أراء سياسية  او ظهور اعلامي وكانت بتصيف مع جوزها ف جمصة مش شرم ولا بورتو مارينا ...,,,,  لا ليس لهذا بل لآن كل سيدة من زوجات المرشحين تضع نصب عينها  ما قعلته سوزان وجيهان من قبل وان كن سيختلقن  غير ما فعلت سوزان وجيهان  ...يعني بالعربي كدة  هيقولوا بنعمل  اعمال خيرية   مش مصالح لينا ...واه يا خوفي وقتها .....
                                     * * * * *
برغم ان كل مرشحي الرئاسة بيقولوا عايزين الصالح العام .....لكن
أولادهم أو زوجاتهم بيعملوا العكس خاااااااااالص .....
حكاية بنت البرادعي ...اللي قللت من شعبيته...للأسف  برغم اني ضد اللي حصل معاها
سلمي حمدين صباحي  اللي بتاخد سبعة مليون جنية ف برنامج مش هي المذيعة الوحيدة فيه  لاء معاها ست سبع مذيعين تانية وبرنامج مش كبير او ناجح نجاح مهول عشان تاخد المبلغ ده...والا عشان هي سلمي حمدين صباحي...؟
والا عشان صدقت انها مطربة بجد وصوتها حلو والشريط بتاعها كسر الدنيا....علي فكرة سمعت لها اغنيتين ولحنها مسروق عيني عينك  من لاغنيات قديمة مشهورة معروفة ده غير صوتها اللي اصلا مش مسموع...هو صوت الكورال اللي حلو
واللي عايز يسمع ويحكم بنفسه ف اليوتيوب  فيه كل حاجة
                                       * * * * *
صديقتي بتحب ابرهيم عيسي جداااااا ولما شافت صورته مع حمدين صباحي قالت " يا خوفي يقول انه مؤيده ساعتها هكرهه أووي  ومش هقرأ مقالاته تاني"
قلت ف عقل بالي اما لو عرفتي انه كان ف بيت عيسي ف رمضان  ف اجتماع التوافق  او الدعوة التاريخية اللي شباب ائتلاف الثورةة نادي بيه هتعملي اية ....؟
هو احنا لية مبنعرفش نفصل بين ده وده....بين اللي نحبه واللي منحبوش ...بين الشخ وكتاباته والا الشخص بتطغي عليه كتاباته ...
بفتكر ان في ناس كتيرة كانت بتحب فنانين او كتاب او روائيين , لكن مع عرض أرائهم ايم الثورة تغير حبهم او تأيدهم ليهم
وده بيخليني افكر هو الفنان فنان وبس والا لازم يكون له راي ف كل شيء ف بلده ....؟
ويحضرني هنا ايضا مقال دعاء سلطان بين الملك والهضبة ....موقف عمرو دياب الصامت من الثورة وقوله انا فنان وفقط...وبين محمد منير  واغنية إزاي....؟واللي كلامها فيه بعض الكلمات مش مفهومة ومش مهضومة....
أخيرا وليس أخر.....
هو دم الشهداء ده ثمنه فلوس....؟
اقصد يعني يستحق فلوس....؟طيب كام...؟ ملاييين...؟ وهو ده يا تري حقهم...؟ عشان المحامين يطالبوا بيه...؟
من رأيي لاء......لان الفلوس عمرها ما كانت ثمن....الاولي انهم يكون لهم ثمن معنوي وتقديري
اسم شارع اسم مدرسة اسم ميدان اسم محطة مترو  اسم مستشفي .....اسم يبقي ويستمر وقصة تحكي  ويستمر حكيها  دوما لجيل بعد جيل  بعد جيل .....لتكون معني وقدوة تأثيرا وتأثر ....

الأحد، 4 سبتمبر، 2011

حاجات ....ملخبطة......أوووي

( 0 )

دايما بتكون البداية صعبة
بس المرة دي كنت حاسة انها كانت الاصعب عليا اوووي
كنت متفاءلة جدا  ومبسوطة اووي ومرتاحة
فجأة اتلخبط كل شيء
واتغير شعوري واحساسي 90 درجة  مش 180  لاني هكون من الصفر للصفر " زي ما انت كنت دايما تقوللي"
برغم اني كنت جاية اكتب حاجة بتعطيني امل ......لقيتني شايلة هموم كتير
كنت غيرت صورة البروفايل علي الفيس بوك ...صورة بألوان زاهية  بنوتة بتضحك وبتبتسم للدنيا وللمستقبل
لية حسيت ان ده مش وقتها خاااااااااالص...مزاجي اتغير

( 1 )
الجو حر اوووي اووي اووي ....ده من سخونة  الاحداث اللي فيها البلد ...كتب كدة علي تويتر
بس فعلا انا بقيت حاسة بالخوف او ي م اللي بيحصل ف البلد
مش مرتاحة....كتير قابلتهم  بيفكروا ف الهجرة  يمكن عشان هم كانوا زي ما انا برضه كنت
كنت فاكرة ان الحياة هتتغير بعد الثورة
كنت فاكرة اننا هنعيش حياة افضل
كنت فاكرة ان كل شيء غلط هيختتفي
لكن اتضح العكس...لاء مش العكس ...العيب فينا كـــ بني آدمين ..مش ف النظام
العيب ف مدير ادارة شغال لسة بالواسطة
العيب ف محافظ يقولك البلد فوضي  وانا شغال بالفوضي ولو مكانتش فوضي مكنتش قدرت اصلا تقابلني او تقف ادامي كدة ف مكتبي ده علي اساس يعني اني رايحة اشحت منه مش رايحة له لانه اساسا هو ف خدمتي  انا
( 2 )
شايفة ان كل مرشح للرئاسة  الاعلام بيعطيه شهرة اكتر بكيتر 
دايما بلاقيهم  ينشروا اخبارهم ولقاءتهم بالبسطاء  وكمان كل اللي بينشروه الجانب الايجابي وبس  علي اساس ان ده هيخلينا ننتخبهم
بس تفتكروا ان ده مقنع....؟
ومن امتي بقي نصدق كلام الاعلام اللي حاسة انه بقي أسوء من الاول
( 3 )
انا بقي ضد حمدين صباحي
حد عنده مانع .....؟؟؟!!
انا حرة .....وده رأيي ومش راح انتخب حمدين صباحي لا للرئاسة ولا لآي شيء ...أنا حرة
بيتهيء لي ...لاء انا متأكدة  ان حمدين صباحي اتغير اووي وللأسوء
فاكرة اول مرة سمعت اسم حمدين صباحي .....أول مرة أدخل بيته ...أول مرة أشارك ف انتخابات
أول مرة أشوف سلمي بنته ....أول مرة أحس ان لي رأي ولي وجود....أول مرة أعرف يعني إية انتخابات
ده كان ف عام 1995 كنت طفلة معنديش خمستاشر سنة  بس حبيت أقول رأي حبيت أشارك ولسة فاكرة الوقت ده
لسة فاكرة قنابل الدخان والناس ف الشوارع واللي حصلهم  وسقوط حمدين ف الانتخابات برغم حب الناس له وانتخابهم له بس كنا عارفين السبب وقتها....صحيح انا مكانش ليا حق الانتخاب لاني مكنتش طلعت بطاقة بس كنت مبسوطة اووي اني بقول رأيي
دلوقت لية الحال اتغير ....؟
هو صحيح لما بيتغير الشكل بيتغير اللي جوانا ....؟
فاكرة لما شفت سلمي ...بنوتة اكبر مني مش بكتير ....سمراء جميلة ...نحيفة .....
حمدين كان شخص بسيط بيتكلم مع كل شخص ومع اي شخص بدون تمييز
لية اتقلب الحال وبقيت يا حمدين ماشي مع ابن عبد الناصر وبتتباهي بيه ف كل مكان ...؟
عايز تبقي ناصر التاني ...الزعيم ....؟
مبسوط بكلام خالد عبد الناصر لما يقول اللي بيحب جمال عبد الناصر ينتخب حمدين صباحي ....
مانت عارف انها مش باقية لحد ....ولو كانت باقية كانت بقت لناصر والسادات والقذافي وصدام ...ما انت عارفهم كلهم وعلاقتك بيهم كانت قوية ....لية بحس ان نهايتك هتبقي قريبة منهم ...مش عارفة
يمكن زي ما ناس كتير وانا منهم بنقول  ان الناس اللي حواليك هيضيعوك
يا ريتك تلحق نفسك بجد ....بجد انا اتصدمت كتير فيك ....للأسف
علي فكرة انا لست ناصرية ......
( 4 )
رئيس مصر القادم.............
مسلم .....مسيحي.....معارض.....متعصب.....علماني.....اخواني .....
يا ناس بجد اتخنقت ....والله حرام
اولا مينفعش لا اخواني يحكم مصر ولا مسيحي برضه
مينفعش علماني ...ولا معارض
عايزين شخص وسط ...بيفهم الاسلام ويطبقه صح...بيفهم حقوق الاقلية ويطبقها صح ...بيفهم حقوق الناس واختلافاتهم وطبقاتهم " العوامل الديموجرافية " للناس
انا مش مقتنعة لسة باي من المرشحين ....لسة مش مقتنعة ولو مقتنعتش مش راح انتخب أي شخص
اختي بتقوللي حاجة غريبة اوووي
" تفتكري يا روبي انه ممكن يحصل زي القصص الخيالية ويجي فارس ....زعيم....نلتف كلنا حوالية وينقذنا من اللي احنا فيه"
يا سلام علي السلبية والاحلام
دايما عايزين نقعد مرتاحين وغيرنا يعمل
احنا لية كدة ...شعب كسوووووووووووول
( 5 )
هو احنا ممكن نبقي اصحاب ....؟
لاء.....بس هنفضل قريبين من بعض اووووي
الحب مش ممكن يتحول الي صداقة
(6 )
هو " بحب أشوفك وانت بتبكي ...بتكوني حلوة اوووي
فاكرة لما كنت بتبكي يوم عيد ميلادك....؟
عينيك كانت حلوة اوووي
هي " انا كنت ببكي من فرحتي ...من مفاجأتك ليا ...بس في فرق كبير بين بكاء الفرح وبكاء الحزن والغم
صدقني هبقي وحشة اووي لو بكيت وانا زعلانة
وهزعل اكتر لو انت شوفتني بالشكل ده ,,, بحب  يكون أخر حاجة تشوفها ابتسامتي وعيوني وهي بتضحك

( 7 )
أما أنا ........
انا رحاب صالح...... متضايقة اووي ومخنوقة اوووي م اللي بيحصل ف البلد ....
دايما اصلي واقول يارب سلم مصر من كل سوء
بقي عندي خوف غريب .....بقيت احس اني خايفة اسافر لوحدي  او حتي اخرج مجرد خروجة خفيفة جنب البيت
م الحوادث اللي بسمع عنها او اشوفها او اقرا عنها ,,,,البلد بتتغير للأسوأ وده محسسني بالخوف اوووي
الناس كتير بقت قاسية وعندها  وحشية  وإجرام ,,, بقيت حتي اخاف اركب تاكسي لوحدي
مش عارفة اية الخوف ده كله....أول مرة احس بالخوف ده
مش عارفة......حتي رمضان  شهر الخير ....محستش بيه ,,,شفت فيه حوادث خليتني بجد اخاف....شفت دم بيسيل ادامي ف نهار رمضان لآتفه الاسباب  وحسيت وقتها اد اية الانسان رخيص اووي تمنه
محستش بالعيد.....يمكن لاني كنت ف اعتصام يوم الوقفة وجيت تعبانة ومقدرتش انام غير ساعة ....؟ قمت صليت العيد لانها مهمة جدا عندي .....حتي مش زي كل سنة روحت عيدت علي اخواتي المتجوزين ؟....لاء روحت نمت لاني كنت تعبانة ...بس موبايلي مرحمنيش  من المكالمات وبجد كان الاجمل معايدة اصحابي  ربنا يخليهم لي ....بجد محستش بالعيد زي كل سنة
وأخيرا وليس أخر......
أنا يا بشر 42 كيلو بكل فخر ....بعد ما كنت 47 ك من شهرين
يعني الامتحانات خلصت عليا ....بس مش زعلانة
ولآول مرة ف تاريخي انا رحاب صالح قررت قرار مأسوي جداااااااا
قررت ....* ايموشن مكشر كدة * قررت اني ازود وزني شوية  لاية 43 كيلو  هه عشان بحب الارقام الفردية
و......
بس خلصت اللخبطة....لاء مخلصتش ...[س ممكن ندعي انها تخلص علي خير
يارب ...يارب ...يارب....اوصل بينا وببلدنا لبر الامان...اللهم آمييييييييين

رحــــــــــــــا ب صـــــــالح