الخميس، 23 أغسطس، 2012

شخابيطي ....4


 هي .....
تجلس في محطة القطار.....
لا تنتظر أحد ...
حولها كثيرون ...ينتظرون 
تتذكر وقت أن كانت تنتظر مثلهم....تنتظره
تشتاق لمزيد من الانتظار....انتظاره
لكنها.....هي .....تعرف أن لا مزيد من الانتظار له....هو
لآن وقت القطار ....مضي .....
والآن  ......لا أحد.....بالمحطة ....ينتظر

@-@

هي .....
" أنا بحبك اووووي "
تعلم هي لما  أرسلت تلك الرسالة ....أما هو....؟
 فـــ    هي ....  تشتاق له
* * * * *
هو ....
لم يعرف لماذا هي ارسلت تلك الرسالة في هذا الوقت ....
هي .....

تعرف أنه يقولها الان كما تعودا دوما....." أنا بحبك أكتر "

 @- @

هو....بإهتمامه الدائم
صوتك متغير ...انت تعبانة ....؟
هي ..... بدلال الحبيبة
 شوية كتييير ....شكلي هموت....
هو... بجزع وخوف
بعد الشر عليكي....
هي.... بجدية
انت هتيجي تعزي فيا لما أموت....؟
هو.... بمراوغته
هههه سؤالك الأزلي....لاء مش هاجي اعزي فيك ....وجايز كمان معيطش ...ده انا هرتاح من شقاوتك وعنادك 
هي.... بعفويتها
انت سخيف وبايخ ...باااااايخ.....عموما انت لما تموت انا مش هاجي برضه أعزي فيك ....بس هروح علي القبر واعيط 
هو.... بعناده معها
 هههههه بعد الشر عليا طبعا  ....واذا كان في حد عند المقبرة هتعملي اية ...؟
هي ..... بطفولتها وبراءتها
هقولهم يلا امشوا من هنا  ده حبيبي انا  ومش عايزة اي حد يعيط عليه غيري

 @ - @
 هي ......
ليس كل ما يتمناه المرء ....يدركه
لكن .....كل ما يدركه....لا يتمناه

@-@
هي.... .....
أستطيع أن أقولها  ....
بكل صدق.....وطوال الوقت.....
أني حقا لم أحب الاك .....وكل من أتي بعدك...وهــــــم ........ســــــــراب
أوهام ...اختلقتها ......لأنســـــــــــــــاك
@-@
هو...........
وحشتيني ............
هي .......
انت أكتر....
أكتر ......
أكتر.....


الأحد، 19 أغسطس، 2012

شخابيطي....3


 هي .....
قلبها حيرها بما يريد....
تتمني ....ولا تنال
....وتنال ما لا تتمني .....
هو.....
قراراته ليس ما يريد أن تكون....
لكنه أبي أن يقسو عليها أكثر مما قسي ....
فأثر أن يقسو علي نفسه أكثر مما تقسو هي عليه 

 هو ........
 يشعر بسعادة من وجد كنز...
كنز  قد بحث عنه مرارا الي أن يأس من وجوده....
فجأة وجد الكنز أمامه بكل ما تمني....
فكيف يسمح له بالافلات من بين يديه......؟؟؟

 هي .....
لا تؤمن بأن البعيد عن العين بعيد عن القلب
فكم من قريب بعيد ....وكم من بعيد قريب 
 هو ......
كان ينتظر أن تكون هي  اول من يقول له ....عيد سعيد 
هي .....  
كانت تتمني ان يكون هو اول ما يتصل بها ليقول لها... عيد سعيد 
 انتظرا الاثنان ...هو وهي ....ولم يتصل أحد

حتي وهي كدة....
كل مرة بتحس ان الاغنية دي فيها  حاجة منها 
في واحدة بتحبك اوي من كام سنة قدام عنيك
وانت بتسأل هي فين؟
في واحدة بتحبك وليه منتش هنا
ولو اسألك عنها تقولي هي مين
ياريت تحس ان اللي بتحبك .....انا
ياللي انت مش دريان..... بيا
شوف انت ترضي بأيه..... ليا
لو مت فيا تعيشني
لو سبتني تموت فيا
من عمري جمبك قد ايه
وقتي اتسرق وبعيش علي املي 

اللي بكرة هاعيشه بيك
مستسلمة ومع نفسي
بشكي علي الورق منك ساعات
وساعات كتيرة بشكي ليك
دة لو انت ايه ياحبيبي

 كان
 قلبك نطق

الثلاثاء، 7 أغسطس، 2012

أبو الريش........المنسية

العنوان جه معايا كدة 
معرفش  لية
يمكن من كلام فاتيما

عايزة اقولكم ان اول مرة ف حياتي احضر لقاء مدونين كان في ابو الريش 
تقريبا كدة ف 2009  وقتها كنا ف الكلية  وكنت لسة بدأة التدوين  ومكنتش اعرف غير غادة صاحبتي وبس من المدونين وهي اللي قالتلي علي اللقاء ده 
فاكرة  بالظبط كل حاجة حصلت ف اليوم ده وفاكرة كل الناس الحلوين اللي  شوفتهم هناك وعرفتهم " فاتيما  وخالد همس الاحباب وشريف باشا ومصطفي ريان وبنت خيخة واي كلام وكيارا  وابو حميد ووليد الدوغري  وغيرهم وغيرهم
صحيح انا اتبرعت بمبلغ صغير  وصغير اووي كمان  لاني مكنتش عاملة حسابي انا واصحابي  صحيح احنا روحنا من الكلية علي هناك بعد ما غادة جمعت  مبلغ من اصحابنا  وزملائنا في الكلية  عشان نروح بمبلغ يستاهل 
بس  انا لما فكرت بعدها  اذا كان المبلغ اللي انا اتبرعت بيه هينفع والا لاء   لقيت ان في ناس بيفرق معاهم اووي الربع جنية مش الجنية او العشرة جنية  .....بيفرق اووي المبلغ البسيط اللي احنا بنستهون بيه  ونقول هنتبرع بيه ....؟؟؟!!! ده مبلغ ميساويش .....

صحيح المبلغ ده ميساويش بالنسبة لك  ......جنية او عشرة ....لكن لغيرك يساوي ويساوي اوووي 
ف مستشفي ابو الريش  ناس محتاجين لكل قرش مش هقول جنية 
مش بيعملوا اعلانات زي اعلانات الاورمان ورسالة ومستشفي 57 او  مجدي يعقوب ....وانا مش بعيب ف الناس دي لاء والله 
بس بقولكم انهم مش بيعملوا اعلانات عشان الناس تعرف  انهم محتاجين 
 وانا معرفش ازاي فاتيما  بتعرف انهم محتاجين الادوية دي او الجهاز ده او الفلوس دي او التبرع بالدم  بس بيتهيئلي ان في حد م المدونين بيشتغل هناك او بيعرف  اشخاص هناك وبيعرف احتياجتهم
وكل سنة ف نفس الميعاد   بيروحوا  وبيقدموا لهم اي احتياجات
فاكرة اني اول ما حضرت اللقاء ده برغم اني كنت تعبانة م الموصلات والحر الا اني جيت مبسوطة وجوايا شيء غريب وجميل   

فاكرة اني جيت وقتها وانا مصممة اكتب عن اليوم ده وكتبت عنه في الجريدة اللي كنت بشتغل فيها    وف اكتر من جريدة تانية وده مفيش حد يعرفه م المدونين لاني وقتها كنت حابة اكتب   وبس عن الحدث حتي مكتبتش اسمي من ضمن الاسماء اللي كتبتها ف ال مقال 
دلوقت  بسأل أهل الخير  اللي ف القاهرة وغيرها واللي يقدروا يروحوا يا تري ليك ف الخير.....؟؟!!!
 وكمان في ايفينت ع الفيس بوك هنا   
سألت ناس بعرفهم اذا كان ممكن يتبرعوا وانا معاهم  لو مقدرتش اروح  ف اليوم ده اني ابعت المبلغ ده بحوالة بريدية  ل أبو الريش عن طريق احد المدونين 
يا ريت يا جماعة بجد اننا نقدر نساهم ولو بجزء بسيط ولو بطبطبه علي كتف اي مريض او اي شخص محتاج 
ومتنسوش الدعوات اللي هتاخدوها وقتها 
ملحوظة 
الصور  لاطشاهم من عند فاتيما