الاثنين، 30 ديسمبر، 2013

قبل أن يرحل 2013



أخر أيام 2013 
أعود أدراجي لبداية العام ...
أجد انني قلت ان 2012 كانت سنة كبيسة ...وقلت لها وداعا 
الآن برغم بداية 2013 السعيدة وونهايتها المحزنة الا انني اقول لها إلي اللقاء واتمني لقائك مرة أخري في زمن أخر 
حقا ان الأيام الجميلة لا تتكرر 
ففي  2013 كانت  أشياء تحدث لأول مرة ....عشقتها جدااا  وتمنيت أن أعيشها مرات ومرات 
ففيها كان أول حفل توقيع لكتابي الجماعي  في معرض الكتاب " صندوق ورق "
وكتابي الجماعي الاخر " نوافذ مواربة " كتاب المئة  تدوينة الثاني 

وحضرت تقريبا اكثر من خمس حفلات توقيع مختلفة  للكتابين في أماكن مختلفة 
وأيضا كان أول لقاء لي بصديقات وأصدقاء أراهم لأول مرة بعدما عشقتهم عبر كلماتهم
كانت 2013 سنة مفعمة بالنشاط والبهجة بالنسبة لي في بدايتها ...وحتي منتصفها ...
في منصف العام انشغلت بالدراسات العليا ...ثم عدت لأستكمل انشغالي بالبهجة  عبر  زيارات  ولقاءات لمستشفي السرطان  مع الاصدقاء المدونين وأصدقاء أخرون عبر رسم البهجة في عيون الأطفال
مش عارفة اتكلم عن احداث كتير  ف 2013 بس المهم اني عرفت ناس كتير علي حقيقتهم بسبب الاتجاهات السياسية  
انا لا يوجد عندي مشكلة  اني اختلف معك في اتجاهك السياسي لكن انت حر وانا حر ولا داعي للسباب  وإدعاء عدم وطنيتنا
مازلت كما أنا .....أشعر  بالبهجة لتلك الاشياء الصغيرة ....
وأشتاق لجنوني مع الأصدقاء 
أعتقد أن 2013 كانت اعمالي القصصية فيه قليلة جدا جدا  ولم انشر فيه سوي القليل  برغم ان عندي قصص كثيرة تحتاج المراجعة والنشر الا انني لم اود النشر  الآن ....
مازال عندي مشروع  كتابي الذي لم يكتمل بعد ....
علي صعيد آخر ...مازل هناك اصدقاء اعتز بهم ...وهناك أصدقاء جدد ....وهناك اصدقاء  لم يعد لهم وجود 
علي الصعيد الشخصي ....مازلت كما أنا دوما مهملة جداا بصحتي ....وأخر 2013 يشهد علي قسوتي ضد نفسي ...
علي صعيد العمل ....الحمد لله  بعد مشكلات كثيرة جداا ...العمل مازل ممتعا ....والأجمل انه  كان سيتم تكريمي خلال نصف العام الدراسي الاول  علي اساس اني اية ....مش عارفة ...لآن المفروض ان التكريم يتم  مفاجأة   في طابور الصباح  وللأسف اني ف الوقت ده قدمت علي اجازة مرضي  لآني كنت مريضة جدااا وطبعا عرفت بموضوع التكريم ده لما رجعت من الاجازة _ المدير قاللي احنا كنا هنكرمك انت اللي غبتي _  هههه بس هعرف التكريم ده كان عبارة عن إية ولية في الفصل الدراسي القادم ان شاء الله 
 هذا العام قرأت روايات كثيرة  وسعيدة اني قرأتها برغم نهاياتها الغير متوقعة والحزينة جدااا مثل واحة الغروب وقمر علي سمر قند واحببتك أكثر مما ينبغي  ...ولكن  اعجبت جداا برواية ساق البامبو واعجبتني نهايتها جدااا هي ورواية احدي عشر دقيقة ...وخوفت جداا من نهاية رواية  عناق عند جسر بروكلين ....
ف الدراسات العليا كنت حاسة اني مش هكمل السنة دي بس لقيت ان الدكتور  المسؤول  عن مجموعتنا دكتور  محترم جداا ومتفهم وكيوت أووي^_^  عشان كدة قررت اكمل والاجمل ان انا الوحيدة ف المجموعة " بنت " الباقي رجالة هههه 
اية أكتر شيء ضايقني ف 2013 ...طبعا الاحداث  الي حصلت ف مصر وتكذيب وتخوين الجميع للجميع :( مصدومة جداا
مصر لا تستحق منا هذا 
اكثر شيء ضايقني علي المستوي الشخصي ...ان الدكتور قالي اني ملبسش كعب عالي تاني  لاسباب مرضية كتيرة وانا بدأت ألتزم والبس كعب من ثلاثة لخمسة سم بس وسيبت الكعب العالي  للأسف  وبقيت اتحسر  كل ما أشوف كعب عالي رفيع ادامي  اهيء اهيء اهيء
من أجمل الاشياء التي حدثت ف 2013  وصول إياد حبيب خالتو  .... الي طالع قصير زي حالاتي  ورفيع وعسول خااالص  ودي اخر صورة لي أنا وإياد 
 بس طبعا زياد اخوه  هو حبيب خالتو الاولاني  عشان كدة كانت صورتي مع زياد هي صورة البروفايل علي الفيس بوك  أخر 2013 
كمان السنة دي عملت مدونتي التانية في فعاليات الحوليات  " حوليات رحاب صالح "  وكتبت فيها لغاية دلوقت وده الشهر السابع تقريبا 55 تدوينة ...لكني بعتز بيهم جداا وبعتز بالفاعلية الي عرفتني علي ناس حبيتهم جداااا  لكني منسيتش " حياتي لكن مش حرة فيها " 
ف 2013 حصلت حاجات كتير حلوة ....وعلي اد الحلو حصل وحش ...بس الحلو غطي علي الوحش الحمد لله 
ولسة بعطي نفسي أمل ... 
وبرغم اني مش متفائلة بــ 2014  الا إني بقول إن شاء الله تكون حلوة 
وكل سنة وانتم طيبين 
ويارب السنة  تكون سعيدة علينا وعلي مصر 
بحبكم كدة يعني ^_^

السبت، 14 ديسمبر، 2013

أن تكون ....



هناك اوقات قد تشعر انك تحتاج لشخص ما بجوارك ....قد تجده ....وقد لا تجده
لكن تأكد دوما أنك حينما تحتاج الله ....تجده جوارك 

أعتقد إني  قضيت اسوأ اسبوع او عشرة أيام بحياتي  " الايام الماضية " 
الحمد لله ان لا أحد من اصدقائي كان يعرف غير زملاء العمل 
حتي اخي " المسافر "ما كان يعرف انني مريضة .... الا منذ يومين فقط
مرت علي أيام فقدت الامل أن اقف علي قدمي مرة أخري ....
دعوت الله ...استغفرت وتبت عن كل ما فعلت وما قد توزعني نفسي الية مستقبلا ...بكيت ...دعوت 
دعوت الله ان يرفع عني غضبه ...ان يرحمني من الامي ....
كان الله ودوما ...رحيما بي وبكل خلقه اجمعين ......
الحمد لله علي كل شيء ....
لا شيء يضاهي أن تكون انسان سليم وليس مريضا 
الحمد لله .....انا دوما ادعو  الله ان يشفي جميع مرضانا 
اشعر ان حالتي افضل من ذي قبل ....واشفق علي اصحاب المرض ...وادعو الله ان يخفف عنهم آلآمهم اللهم آميين
اتمني  منا جميعا أن نتذكر في صلواتنا ودعواتنا اصحاب المرض واآلآم  ندعو لهم ....
في النهاية ....اتمني ان لا يمر أي شخص بما مررت به ....

سؤال : لماذا عندما نمرض نقترب من الله أكثر  ونخشي الموت  ونخشي من ذنوبنا مهما كانت صغيرة ؟ 
جواب : اجب فقط عن نفسي في نقطة واحدة....انني احاول أن أكون قريبة من الله في كل وقت وليس وقت المرض والخوف فقط .... وادعو ان اقترب من الله دوما 

السبت، 23 نوفمبر، 2013

أيام من حياتي .....



0
لقاء المدونين  .....
كان اغلبه  بنووتات قمرات .....
طبعا شيمو ....صاحبة كيك الشيكولاتة  والفطير المشلتت والعسل والقشطة والجبنة والحبشتكنات دي كلها ....
قلت لك يا شيمو قبل كدة عايزة اخد دروس ...كدة انا لو اتجوزت هتطلق بسب فشلي ف الطبخ
قابلت اخيراااا سارة طوبار ....اعرف سارة من سنين طويلة بس دي اول مرة اشوفها  شخصيا  وكانت هي وزوجها أمجد وابنها إياد  الي موتناه كلنا من البوس فيه هههه عسل عسل يعني
سما ...ليساندرا ...كانت هي وزوجها محمد  اول مرة اشوفها  بس كأني عرفتها طول عمري حاجة كدة من الي تدخل القلب علي طول ...
دعاء سلطان زميلة " صندوق ورق "  الي بجد كل مرة بحس اني بكتشفها من جديد
رشا نعمان ....الي اول مرة اشوفها واعرفها بس حبيتها جدااا
الاكتشاف الخطير كان  مع كريستل مايند أو أل جي ...أو سماح ...يا ربي ....اتصدمت لما شوفتك يا سماح اية كنت بحسب اني الوحيدة الي رفيعة ...هههه مختلفة خالص عن الصورة ...[س اكتشفت انها كانت كدة قبل ما تعمل الريجيم.....
زي حالاتي يعني .....ههه مفيش احلي من الريجيم بس بيتهيألي بعد  فطير وكيك شيماء  مش ممكن اكون رفيعة هروح اوزن نفسي كدة اشوف انا لسة 41 كيلو والا اصبحت 51 كيلو هههه
اخيرا  موناليزا ....حبيبتي موني ...زي ما انت لسة بابتسامتك الحلوة الي بتخلي كل حاجة تضحك ...
والاجمل ان موناليزا وانا فضلنا نتكلم عن احمد اخويا  الحاضر الغائب ...حبيبي ده
والاخر عملنا حفلة توقيع للكتب بتاعتنا ....
صحيح انا وقتي كان محدود بس قضيت اجمل ساعتين معاكم واكيد هتتكرر تاني عشان انا بحبكم كدة ...وكدة وكدة يعني ....
وعلي هامش هذا القاء اتبرعنا بأدوية وفلوس  لمستشفي اورام الاطفال  وطبعا الي جمعت التبرعات دي شيماء الخولي شيمو صاحبة الكيك الاجمل ...والفطر الالذ ...انا بحسد بس يا شيمو علي فكرة :)
1
النهاردة كان عندنا معسكر ف المدرسة
الصراحة كان اخر  تهيييييييييس
البنات قمرات مجانين   مهوسين ع الاخر
 وبرغم اني بشوفهم كل يوم لكن أول ما رحت اخدوني بالاحضان والقبلات ...
قلنا ماشي .... اخدتكم عليا انا عارفة
لكن كله كوم وانهم ياخدوا موبايلي يصوروا بيه فيديوهات  وصور  هههه اخر مسخرة وهما بيغنوا ويرفقصوا  بجد كان يوم تحفة ...ف الاخر الاقيهم جاين يجروا ورا بعض م الدور الخامس  وانا عند مكتب المدير  " يا ميس يا ميس  في واحد اتصل وبيقول انه خطيبك ....!!!!!
وكمان رديتوا علي موبايلي ...شكلي هولع ف .....كدة يعني 
هو انا اتخطبت امتي ....!!!!؟؟؟
قلتها قبل ما يقولها لي حد من المشرفين 
وف الاخر معرفتش مين الي كان بيتصل ...احسن بردو بلا وجع راس
المثير ف المعسكر ان البنات كانوا واخدين راحتهم ع الاخر  ف كل شيء من اول اللبس  الي معرفتش اعمل زيهم واخد راحتي  لدرجة ان الجينز الي كنت لابساه الله يرحمة من التراب والمية .... ده غير محايلات من نوع  غني وارقصي يا ميس ...المواهب كانت شغالة الله ينور ...
 والاختلافات السياسية بردوا موجودة ...شوية  مشغالين ثورة دي والا انقلاب ...وشوية ...تسلم الايادي ...
وميمنعش ان كان في اغاني فيلم قبل الاسد  بردو ^_@
بس بجد كان يوم لذيذ
حسيت ان يوم السبت بقي شكله غير .....مختلف عن كل ايام السبت اللي مرت السنة دي
عشان لقاء المدونين كان السبت الي فات
والمعسكر كان السبت ده ^_^
حسيت برغم ان السنة دي 2013 كانت بداياتها وحشة  جدا معايا بس كنت متفائلة .... وحصل فيها كتير حاجات ضايقتني بس من وقت لتاني بلاقي الي يخرجني من  الجو ده ....
مبسوطة ان حياتي  فيها " شغلي " متعب  بس " حلو "
وحياتي فيها " ناس " بيحبوني بجد " وبحبهم بجد " جدا خالص كدهون ^_^
اخيرا ...
ميرسي لكل الناس الي سألت عني ...
وتاني بعتذر
والله ما عارفة ارد علي تعليقات خالص
وتاني والله  مش عارفة ارد علي موبايلي خاااالص
عارفة ان في ناس كتير زعلانين ...بس والله غصب عني
ف الاخر بحبكم اااااااااااااااااااد كدة  :)

السبت، 12 أكتوبر، 2013

شيزلونج.....!


شيزلونج هو مجموعة قصص وقصائد
اوك اية الجديد ...؟
الجديد ان الكتاب كله من كلية طب طنطا ...طلبة طب لما يبدعوا 
طبعا انا معرفش من طب طنطا غير  محمد الوكيل وجهاد نجيب 
طبعا محمد الوكيل  شاركت معاه ف كتاب   " صندوق ورق "و كتاب المائة تدوينة  " نوافذ مواربة "
وقبل ده كله محمد عرفته من  خلال اصدقاء  اعتز بيهم  وكان اول لقاء  يجمعني بـــ محمد الوكيل ف ندوة للدكتور احمد خالد توفيق بــ طنطا ...ومش ممكن انسي اليوم ده لانه عرفني بناس  هم اعز اصدقائي 
الآن محمد يشارك في كتاب " شيزلونج "  
شيزلونج   ....حاسة من اسمه انه هيككون مجموعة مميزة 
خصوصا ان قبل كدة كلية طب طنطا اصدرت مجلة اسمها " ميكروفون " بجد  الاعداد الي اخدتها من محمد كانت تحفة  وتستحق القراءة والاشادة بها 
شيزلونج ...عاملين حفلة توقيع  بعد العيد ان شاء الله ف كلية طب طنطا ....." مدرج التشريح "  :×  ايموشن مرعوب كدة ...
انتم متخيلين لما يعملوا حفلة التوقيع ف مدرج التشريح ...يامامي 
بس محمد طمني وقالي ان المدرج ده اسم بس ..مش فعل...الحمد لله ...يعني مدرج عادي جدا من غير جثث  :* ايموشن بيضحك بهبل كدة 
شيزلونج ...قدمت الدعوة  لحضورة ندوة الكتاب ....الكاتب الرائع ...ستيفن كينج العرب ....دكتور احمد خالد توفيق 
الحفلة الساعة اتناشر الضهر يوم الاثنين 21/10/2013 
 بالنسبة لي الوقت مناسب جدااااا جدااا جدااا
طبعا انا مش ممكن افوت يوم زي ده ... ده دكتور احمد خالد توفيق ....وااااااووو
صحيح هيكون عندي شغل 
بس هزوغ
بس يا ريت المدير بتاعي ميشوفش التدوينة دي 
ده الايفينت .....  علي الفيس بوك
مستنينكم هناك ....

الأربعاء، 25 سبتمبر، 2013

شخابيطي .....13

0

الشباك ده  بيدل علي حالتي تمام بهذه الايام
مزهر ومفرح   ومستني بشوق  حاجات كتير حلوة ان شاء الله 
بس بنفس الوقت قافل الازاز ...يعني لسة بيفكر  بعد ما فتح الشيش  وهو ورا الازاز ده ....
يفتح  الازاز  والا يستني شوية
@_ @

دراسة تاني ....
طيب  حاجة بعيدة عن كل الناس اللي بتضايقني
عايزة اكون لوحدي ...
اخترت قسم  بعيد عنهم
قسم  وتخصص صعب ....
اوك مفيش مشكلة انه صعب هذاكر ... ان شاء الله من البداية هذاكر
وهستعد من أول يوم عشان يكون تقديري العام افضل من العام الماضي
1
اختاري حاجة واحدة بس .....
" علم اجتماع " 
" تربية دولية "
" بناء المقاييس النفسية "
" سيكولوجية الشخصية "
مش عارفة اختار ....ايموشن محتار 
طيب ناخد رأي احمد  اخويا ...." علم اجتماع _ سيكولوجية الشخصية " 
 لسة محتارة ....
زميلي قال " خدي سيكولوجية الشخصية  ....هي  دراستها  حلوة ...
لسة محتارة ....
الصراحة انا  نفسي ادرس الثلاث مقرررات بس للأسف مينفعش ....ايموشن متغاظ
بس واضح اني  هاخد ف الاخر سيكولوجية الشخصية ....
 2

القاهرة 
اسكندرية 
القاهرة 
اسكندرية
القاهرة 
اسكندرية 
القاهرة 
اسكندرية 
زي الوردة الي بتقطع منها  ورقها عشان تختار .....
خلاص القدر هو الي اختار ....
اسكندرية  هو الاختيار ....
وهو احسن اختيار ...ان شاء الله 
ايموشن ..مش زعلان 

3

هو " اخبارك اية  "
هي " الحمد لله .... عندك وقت تسمعني ...
هو " طبعا عندي ولو معنديش اخلق  الوقت عشانك ....
هي " شوف يا سيدي ....عندي مشاكل ف الشغل ومشاكل ف البيت ومشاكل شخصية  و...و....و....."
هو " اية ده كله اية ده كله ....طيب سؤال لو سمحتي يا حبيبتي ...
هي "....؟؟؟؟ 
هو " انت يعني بتقوليلي المشاكل دي عايزة حلول ....والا من باب الفضفضة وبس ....؟؟؟
هي ....عمري ما قلت مشكلة عشان عايزة حل ....لاني بفكر كويس ف كل مشكلة وبلاقي حل بفضل الله  بس ...مشكلتي الاساسية اني بحكي كتير كل المشاكل ومش بقول المشكلة الرئيسية الي بتطير النوم من عيني .....عشان انت عارف اني عمري ما بحكي الي جوايا ...عرفت اني مش عايزة حلول ......انا بس  بفض فض 


الجمعة، 13 سبتمبر، 2013

شخابيطي.....12


 0
الدراسة خلاص علي الابواب ...
 الشغل ف المدرسة  اكيد كتير جدااا
مبسوطة برغم اني هصحي من بدري اووي وهخرج ف عز الحر
بس مبسووووطة جدااا
مبسوطة اني هشغل نفسي  من التفكير  ف حاجات كتير   في الشغل ...
والله الشغل  له فوايد كتير وانا مش عارفة .. :)1
حاجات كتير اتغيرت ف الشغل ...
ناس اخدت اجازة
وناس  اتجوزت
 وناس  هتتجوز
 وناس  سابوا المدرسة ومش راجعين تاني
بس علي الاقل لسة  المجموعة بتاعت الشغل  فيها نفس الروح الحلوة
ويارب تكون سنة  دراسية سعيدة علي الجميع
1
اشتريت موبايل جديد  :)
هو بالنسبة لأيدي كبير شوية ..بس للأسف ده اصغر موبايل   لقيته  ف السنتر :( " ايموشن متغاظ "
أجمل حاجة فيه انه مفيهوش ولارسالة   من راسيلي القديمة
وان مفيش ولا رقم عليه ...ههه
بس ارقام انا حافظاها زي ارقام اخواتي
عشان كدة قلت مش هطلب من اي حد رقمه ....
لان الي عايزني اكيد هيتصل ...
والا مش عايزني .....
انا كمان مش عايزاه ....
2
مش حكاية ان حظك وحش وانك منحوس انك تفضل رايح جاي بأوراقك  زي فيلم قص ولصق
ويقولولك ...... بكرة .....   بعده..... الاسبوع الجاي .... الشهر الجاي
ومرة واحدة تلاقي الحظ ...ضرب معاك والاوراق ثم قبلولها واتمضت واتختمت وخلصت خلاص ...: ) هاااااه
وشك حلو يا زوزو عليا ....
ده القدر ...ربنا كتبه  لينا واحنا علينا نسعي  ...وننفذ الي علينا ....
3
ان كل الناس تشوفك غير ما انت شايف نفسك
ده احساس بيخليك تتجنن
بس خليك انت ...انت  زي ما انت
وبلاش تخللي كلام الناس ....
يحبطك
4
علي فكرة يا ميس ...انا هلعب مباراة مهمة  كمان اسبوعين ...لو بعت لك دعوة هتيجي تحضري المباراة وتشوفيني وانا بلعب ...؟
قالهالي وهو متردد " يا تري هقبل والا هرفض  ".......عشان عارف طبعي  بفكر كتير قبل ما اقول ردي ...
بفكر  ازاي ان المراهقين  حاجة من اتنين " منتبهين لدراستهم اووي " دحاحين يعني "
يا أما  " ناسين الدراسة خالص ومركزين ف موهبتهم الرياضية " فاشلين دراسيا يعني ..."
طيب لية مفيش الاتنين مع بعض ...؟
فاكرة  اني شوفت فيلم اجنبي بيتكلم عن نفس المشكلة و الي عالجها بطل الفيلم  بطريقة  قاسية لكنها كانت نافعة جدااا  اسم الفيلم " كابتن كارتر "   لدنزل واشنطون ان لم تخني الذاكرة ...
احنا لية مش بنفكر بالشكل ده ....
انا بفكر كتير ف مشكلة كل الطلاب  الي بالشكل ده ...ومش عارفة يا تري  مستقبلهم هيكون اية  " ربنا يستر "
5
حاجة غريبة اوي الايام دي  كل ما حد يسلم عليا  يقولي " صوابعك رفيعة اووي "
كنت بضحك دايما لما اخواتي يقولولي كدة ان صوابعي رفيعة اوووي
لكن لما كنا ف البحر واتصورت مع ولاد اخواتي  اكتشفت  من الصورة ان فعلا صوابعي رفيعة اوووي
عادي يعني  مفكرتش ف الموضوع كتير
عادي يعني لما صاحباتي يقولولي كدة عادي
لكـــــــــــــــــــــــن
ان اكون بعمل شغل واجي اكتب طلب لمدير القسم المختص  ياخد مني الورقة والقلم ويقول لصاحبتي الي معايا  " اكتبي انت ...دي صوابعها هتنكسر بعد حرفين تكتبهم ... " 
الصراحة ساعتها كنت هعمل مشكلة بس قلت خليني اخلص شغلي وامشي احسن ...
مع اني بردو مش شايفة صوابعي رفيعة للدرجة دي 
في كتير من الاصدقاء بيشتكوا انهم مش عارفين يكتبوا 
والظاهر انها حالة اكتئاب جماعي  ....
عن نفسي  الجو العام مش مخليني عارفة اكتب اي حاجة وكل ما اجي اكتب الاقيني بكتب كلام مش مفهوم ومش مرتبط ببعضه عشان كدة قلت لنفسي متكتبيش غصب عنك ...والكتابة هتيجي هتيجي 
فــ ياريت محدش يضغط علي نفسه ويكتب اي كلام وخلاص 
الكتابة دي وحي ....والوحي مبيجيش الا  وقت معين ...ومتتحايلوش عليه يجي ...عشان هو مش بيحب المحايلة ..:) 
7
هي " شوفي يا ستي  انت اخوان عشان كدة مش هشتري منك "
هو " يا عم انت سيسي ...انا مش هبيع لك ..."
هي " انا محايدة ....ينفع اشتري وابيع ....؟! والا ده مش من ضمن  تفكيرك انت وهي  "
الحياة اصبحت  كشري ....


الأربعاء، 21 أغسطس، 2013

حاجات ....

0
ساعات
اقوم الصبح قلبي حزين ....
اطل ...علي مصر ....
الاقي كل البشر  مش فرحانين 
" يارب  يارب  يارب ....انت عالم بنفوسنا  والي جوه قلوبنا ...ارحمنا يارب واهدينا جميعا ...اللهم آميييين "
1
خلينا نقول خبر حلو الاول
صحبتي الانتيم ف الشغل .....اخيراااا وصل ولي العهد " محمد " 
اينعم مكنتش عايزة  انه يكون ولد  وكنت عايزاه  بنوتة حلوة اعرف العب بيها  بس يلا تتعوض المرة الجاية  :)
قلت لصاحبتي .....المهم ان " محمد " ميطلعش مهندس زي باباه ...والا هرتكب جناية ....
مبسوطة اووي عشانك يا نوسة 
2
مع حظر التجول  الي حصل 
احمد اخويا عملي حظر تجول انا كمان 
لدرجة اني عايزة اروح للدكتور العظام و اعمل صورة اشعة لإيدي   مش موافق   " قلقان جداا من الاحداث "
لدرجة اني روحت مشوار ميبعدش عن البيت عشر دقايق عملي محضر وسين وجيم " مش عارفة لو قلت له انا عايزة اروح المحافظة  مع صاحبتي هيعمل اية ...؟ "
مع ان كفر الشيخ يعني مش من ضمن المحافظات بتاعت الحظر
3
كل يوم انام اكتر من اليوم الي قبله 
بقول جايز اصحي من النوم الاقي ان ده كله كان كابوس
وان مفيش  اي حد اتقتل ولا حد اتجرح ولا في اي حد اعرفه من اي اتجاه مات او حصله حاجة ...
بس بصحي والاقي في حد اعرفه " مات "
في حد اعرفه"  اتجرح "
في حد اعرفه " اتسجن "
في حد اعرفه " كان هنا ...وبقي هناااك "
4
اسطوانة كل يوم
وطول النهار والليل ....
علي اليمين " ساندي ولميس " بنوتات ولاد عمي   " لميس سبع سنوات  وساندي ثلاث سنوات "
شغالين علي الطبلة " ارحل ياسيسي مرسي رئيسي "
ومع كمية اغنيات مهولة  عن مرسي 
علي الجانب الاخر  ..." لوجي ولوسي ...ريماس وريتاج  توءم ابن عمي التاني البالغين من العمر ثلاث سنوات "
علي الطبلة  بردو ...ارحل يا مرسي  ارحل يا مرسي  وتسلم الايادي ..
حتي الاطفال اصبحوا بيتكلموا ف السايسة ...
5
" انت مع مين ...؟"
سؤال اتسألته ملاييين المرات 
" مديري " ف الشغل  قالهالي " واحدة زييك كدة فكرها ليبرالي   مش ممكن تكون مع الاخوان "
زميلي الاخواني ف الشغل " لا طبعا رحاب معانا "
زميل اخر " لا رحاب  ليبرالية علمانية  مش اخوان "
@
برة البيت 
سؤال لأختي " هي رحاب فين ..؟ طلعت مع الاخوان ...؟"
لماما " رحاب طلعت مع مسيرة السيسي صح ..؟ "
بابا " رحوبة ...متتكلميش ف السياسة 
#
أنـــــا
انا علي فكرة مش مع ولا ضد حد بعينة...
انا ضد القتل ..سفك الدماء ....
انا مع السلوك الصح وضد السلوك السيء 
أنا  مع مصر 
مش مع شخص 
أنا  بتشتم من الفريقين لاني من وجهه نظرهم فلول  لما بقول الكلام ده
اووووك 
انا حرة ...ومحدش هيقدر انه يحجر علي رأي ...انا مازلت مصرة اني مش مع فرقة من الاتنين لا ده ولا ده 
انا مع مصلحة البلد  ...مع مصر 
عايز تعرف بني ادم صاحبك  علي حقيقته  " بنت سواء او ولد "
اعرف اتجاهه السياسي ثم ناقشه ......
اذا  تكلم معك بالعقل والمنطق والدليل  واحترم رأيك....فهذا يستحق ان يكون انسان  وان يكون صديق حقيقي
اما اذا تكلم معك بمبدا الجدل الغير مجدي والسباب والشتائم  فتأكد أنك أمام " لا شيء "  فهؤلاء لا شيء وما أكثرهم للأسف
فقدت كثيرون  علي الفيس بوك  بسبب " الفاظهم وجدالهم الغبي ....لست نادمة انني  قاطعت بعضهم ...لست مهتمة بمن  حذفني من قائمة اصدقائه  ...فمن لا يعرف كيف يتحدث معي بدون حشر الفاظ  " غبية " فأنا لا أريد أن اعرفه 
فكل فرقة تريد أن تقتص من الاخري ...تصر علي انها كافرة ...تصر علي انها المسؤلة الاولي عن الاحداث 
لماذا تنسي الفرقتان أننا  مصرييون  وحسب ....؟؟؟!!!
7
يقع بيتنا  علي قارعة الطريق ...
اقف في شرفة منزلنا أري مسجدنا  الذي لا يبعد  اكثر من عشرة امتار تقريبا 
طوال شهر رمضان  علي مدي سنين عمري كنت اذهب لذلك المسجد لأصلي .....التراويح والتهجد 
هذا العام ....لم اذهب سوي مرات معدودة  تعد علي اصابع اليد الواحدة ....لانني بكل بساطة  خنقت من جدل  المصليات  السياسي 
خنقت انه لا يوجد  " من يصلي بنا  " فاختزلوا  عدد الركعات ....
خنقت انه لم تعد تللك السكينة والروحانية التي كنت اجدها هناك ...." يا الله  هل اصبح بيتك  لا سكينة  ولا هدوء فيه !!! "
للأسف  
انه وبعد كل تلك الاحداث فوجئت  أن إمام المسجد  يدعو في كل صلاة   علي الجيش والسيسي وعلي اسماء بعينها 
والمصليين يأمنون خلفه ...فكيف يخالفون إمامهم ......؟؟!!!! سؤال صعب 
هذا كان يحدث مرارا   والدعوات جهارا نهارا   في كل الصلوات ....
بالطبع اثار هذا  الناس ...خاصة المحايدين ....
ولكن الامام لم يرجع عن دعواته الا  بعد حين ....
لا أعرف هل هي سياسة  من الامام ...أم من .....
وأصبح الامام يدعو " علي من أراق دماء المصريين جميعا  , علي من أحرق  كنائس الاخوة المسيحين ,  علي من نشر الفتنة في مصر ....واللهم اجل مصر بلدا آمنا  ...وأصلح بين مسلمي ومسيحي هذا البلد ......"
" أه  بعد ما خربت مالطة جاي تصلحها .....؟؟؟!!! 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
هي دي الاغنية الي المفروض نعمل بكلماتها

الثلاثاء، 13 أغسطس، 2013

شخابيطي .....11

0
جيدا جدااا
مع تكشيرة كدة  كبيرة ....هو ده تقديري العام للسنة الدراسية الي كنت بعملها السنة دي ...أه جيد جداا وتكشيرة كبيرة جداااا جداا جدااا 
عشان كنت اتمني اجيب تقدير احسن من ده ....
حتي لما خرجت من الكنترول  وقابلت " هاني " زميلي  وبص ف وشي وشاف االتكشيرة قال ان حصل لا قدر الله واخدت مواد والا حاجة .....بس لما لاقني بقوله تقدير جيد جدااا كان هيقتلني .....ههه
اقول لنفسي مبروك يا حوبة ....وتستاهلي بوسة  :*
1
هفتقد العيال دول ...
صحباتي واصحابي ...زملائي وزميلاتي  الي قضيت معاهم سنة طويلة عريضة ف جامعة كفر الشيخ فيما يسمي بالدراسات العليا " قطيعة علي رأي  ايمان ..ال دراسات عليا أل "
" مجموعة التدريب العملي "
البنوتة فاتن هتوحشني ضحكتها الي بتهز المدرج ...وهتوحشني وهي كل شوية تقولي ...حوبة  انا جعانة ...ماتيجي نروح مؤمن والا كنتاكي ..." مع اننا نكون لسة فاطرين  " باتية بالجبنة وكابتشينو "
هتوحشني  ايمان وهي محتارة بين الجامعة والجريدة ...وبين انها تعزمنا علي ايس كريم وعصير قصب كل مرة علي حسابها ...
هتوحشني منار وهي مش عارفة تمشي بالكعب العالي  وكل شوية  تقول " ملعون ابو الاناقة " 
هتوحشني رضوي  الي كل ما نروح نوصلها لمحطة القطر تبص لي وتقول " يا بنتي سلفيني عيونك  دول اقعد بس  مع محمد يومين تلاتة واجيبهوملك تاني " 
وارد انا واقول " ما هو لو مش اسمه محمد كنت قلت ماشي ...غيري اسم خطيبك وانا اسلفك عيوني  ...وبعدين العيون السودة احلي من العسلي ...اقولك  إشربي عسل نحل كتير وعينك تقلب عسلي  زي عيوني  ههههه "
ونضحك  بصوت عالي  ف محطة القطر  نخللي الناس تقول علينا مجانين 
هيوحشني " احمد " الي وعدني انه يبدأ معايا دروس بيانو تاني ...مستنية يا مستر  :)
هيوحشني " العميد  محمد "   اصل محمد ناوي يكون عميد الكلية علي طول  مش حتي معيد ف الاول ...عارفة اني الوحيدة ف الجروب يا محمد اللي غلبتك اووي  فكان من الطبيعي انك دايما تقولي " تعالي يا مغلباني "  
ميرسي علي رسالتك يوم عيد ميلادي وميرسي علي انك  دايما بتطمن عليا " مع ان اسمك محمد " ههه
علي فكرة مش ناسية ان ليا عزومة ايس كريم    والا ....كدة يعني 
منال  وصوتها الملائكي بالدعاء والقرآ ن .... قلقها المجنون من كل شيء
اميرة وهي مشغولة دايما علي ميدو ابنها  ويا تري  جوزها هيجي ياخدها بالعربية والا لاء ...؟!! 
شيماء  الي دايما شاغلة نفسها بأنها عايزة  تشتغل بمجال العلاقات العامة ومش عارفة توصل .....
بسمة وهي مش عارفة هتروح بيت حماتها والا بيت مامتها ...والا تروح شقتها  ...وادي حيرة الي جوزها دايما علي سفر بسبب الشغل  
 استاذ طارق ...الي كان كل ما يشوفني يقولي انت عايز صيدلية  متنقلة عشان البرد الي عندك ...وحبيت مساعدته ليا وكنت بحاول اني اكون  ايجابية واسمع كلامه ونصايحه ليا
" محمود  وعصام وعبد العزيز  ورشا ومايسة ...مجموعة  كورس الكمبيوتر ....  وعبد العزيز الي دايما كان يوصلنا بعربيته  ويقولي متنسيش  عزومة السمك ف المصيف ....واهو سافر عبد العزيز السعودية ....واهو بنتقابل  انا ومحمود ورشا وعصام ومايسة  بين وقت وتاني ....
"....."  احد الزملاء الي قالهالي بكل وضوح ....والله ما كنت عايز اتعرف عليك ولا اكلمك .... عشان محبكيش ....وحبيتك ...انا ؟؟؟!!!" اندهاش "
"..........." تعرفي يا رحاب انا مبسوطة بجد اني اتعرفت عليكي ...والله وانا كمان جداا جداا " احدي الصديقات الكفيفات التي قابلتهن هناك ...ف الجامعة 
العيال دول .... بجد بحبهم اوووي  ومبسوطة اني اتعرفت عليهم
العيال دول بيتحايلوا عليا اني اكون معاهم تاني ف جامعة كفر الشيخ ...بس انا مصممة اني اكمل ف جامعة الاسكندرية  لظروووووف كتير جدااا جدااا جداا 
اه بحبهم اوووي ...مش عايزة ابعد عنهم .....
بس عايزة ابعد عن  كل الناس الي اعرفهم ....وكل الناس الي بحبهم ...عايزة بس اكون لوحدي ....
ومحدش يسألني لية .....:( 
2
كنت ناوية اشتري لاب توب وموبايل جديد  لو جبت تقدير  احسن ....
بس انا عملت اية لما  التقدير جيد جدا ...." خبطت الموبايل ف الحيط " 
احسن بردو ...ومحصالوش ايييييييييييييية حاجة عادي كأنه بيغيظني وبيقولي   انا هفضل سليم ومش هتشري موبايل جديد يا حوبة 
طب بالعند فيك هشتري  موبايل جديد ولاب توب كمان  ...
3
كعادتي دوما عندما  أذهب  في احد المشاوير .....
انسي نفسي وانسي روحي وامشي كتير ف الحر والشمس  ومش اكل خالص وارجع البيت تعبانة وااقول لماما " جعانة يا ماما "
ماما " انا مش قولتلك ميلون مرة ابقي كلي اي حاجة  عشان متتعبيش ....
وبعد كدة الدكتور يقولك ضعف عام ....وهو انت عايزة تعملي ف نفسك كدة وميبقاش عندك ضعف عام ......
وتبدأ اسطوانة  انت رفيعة ....مبتكليش ..خسيتي ...يا ربي اعمل اية ...
المشكلة ف ده كله ..الصداع....
صداع عنيف شديد مريع ....طول الوقت عندي
بدات اشك ان الصداع ده سببه اني مش باكل ....
طيب ...هبدا اكل  وامري لله :)
ناس كتير وحشتني اوووي
بس يا تري انا وحشتهم ...؟

الثلاثاء، 30 يوليو، 2013

ابو الريش ....



ليس هو ...بل انت الذي تحتاج ....
تحتاج لتراه يتألم ...لتعرف أن الله أعطاك صحة 
تحتاج  لتراه حزين ...لتعرف مقدار ما أعطاك الله من سعادة 
تحتاج لتراه وحيد ....لتعرف أن  كثيرون حولك 
تحتاج لتراه محبوب  ...لتعرف أن الحب شيء عظيم  يحتاجه الجميع 
تحتاج ...وهو أيضا يحتاج 
لذا يجب أن نكون  " دايما مع بعض ف الخير "
هو ده  ملخص اللقاء  ف ابو الريش 
 لقاء خيرى لجمع تبرعات لاطفال مستشفى ابو الريش اليابانى
اللقاء يوم 3 اغسطس الساعة 4 العصر
و سيتم جمع التبرعات من المتواجدين و شراء ما تحتاجه المستشفى من ادوية او اجهزة حسب المبلغ الذى تم جمعه
و يستمر اللقاء حتى الساعة 5:30
يمكنم التواصل على الارقام التالية لمزيد من التفاصيل
01010733318 ____
  01001345140

  
والصراحة انا كنت اتمني اني اكون هناك  جدااا بس بابا رافض تماما فكرة السفر القاهرة  حاليا عشان القلق  
كنت اتمني اني اروح عشان اللقاء ده بيفكرني بناس حلوين اووي  مش ممكن اني انساهم ابدا وانه عرفني علي اعز اصحاب
عايزة اروح عشان اشوف شيرين سامي واحسان  ومحمد بهجت   وابراهيم رزق وساليناز وغيرهم كتييييييييير  
ومش عايزة اشوف الواد اسامة الازهري ...لاني ممكن اقتله  
 زعلالالالالالانة جدااا  بس بنفس الوقت فرحانة لان  الاصحاب كلهم هيتجمعوا زي كل سنة  ويا رب  دايما متجمعين ف الخير 
يلا هنا تفاصيل   اللقاء .... 
كمان هنا تدوينة شيرين سامي ف حدوتة مصرية 
وهنا  اسامة الازهري وخلينا انا الطيوبة  ذكريات ابو الريش   
 
يلا مستنينكم  :)

الأحد، 28 يوليو، 2013

عندي خمس سنين



لا انا منسيتش عيد ميلادك 
ازاي انساكي وانت أنا 
انت حياتي اللي حاولت ارسمها
حاولت اكون حرة فيها 
وحاولت أكون فيها أنا 
1
حياتي ...وانا حرة فيها 
كان عنوان مدونتي الي اختارته ....
لكن اول ما جيت اسجله ع النت لقيت نفسي بكتبه " حياتي ...لكن مش حرة فيها "
يمكن لأني حسيت ان مهما اكون حرة ....بلاقي قيود 
وكانت حياتي ...لكن مش حرة فيها 
2
مهما ابعد 
ماليش غيرك
انت انا
انت بنتي
الي مش فجأة لقتها اصبح عندها خمس سنين ...لا 
انا كل يوم كنت بشوفك بتكبري 
يااااااااارب اعيش واشوفك  عروسة حلوة ....عيونها عسلي  وحلوة زي عيوني  :)
انا بحبك يا بنتي ...يا أنا ...يا حياتي الي مش حرة فيها 
عيد ميلاد سعيد يا مدونتي  :*
كان عيد ميلادها الخامس ف يونيو  بس انا نسيت ف غمرة انشغالي بالامتحانات :)
معلش  سامحيني ...بوسات وحضونات كدة :)(

السبت، 20 يوليو، 2013

عن ...ذلك اليوم


مساء البنفسجات
النهاردة يوم مش عادي ....
ده يومي ....:)
مش عشان هو ثورة 23 يوليو " اللي هو بعد بكرة يعني "
لا 
ده عشان عيد ميلادي 
:)
اول ما عملت المدونة دي قلت اني هكتب فيها عن حياتي....
بس مكتبتش الا قليل عن حياتي
والنهاردة قررت أكتب عن حياتي اللي حرة فيها ....مش اللي انا مش حرة فيها ...
وادي شوية حاجات كدة يعني ...ما هو النهاردة بيريك ....اجازة وكدة يعني 
0
من فترة طالع ف دماغي اني اشتري  " مفتاح الحياة " سلسلة  مفتاح الحياة الفرعوني دي بس للأسف مش لاقيه خالص
كنت في القاهرة قبل رمضان بحوالي شهر  وسألت صديق ان يأخذني لمكان ما لأنهي عمل هناك لاني لم اعرف كيف اذهب هناك ...وعند انتهاء العمل مررنا بالحسين  فوقفت وقلت له " عايزة اشتري مفتاح الحياة "
لكم ان تتخيلوا هذا الصديق الذي اعتبرني مخلوقة من خارج الكون لاشتري من مكان سياحي  مفتاح الحياة ...." امشي يا بنتي وانا هشتريلك واحدة بس مش من الحسين " ...طبعا هذا الصديق قالي بكل بساطة بعدها ....انت حد قالك صدقيني ....وراحت عليا السلسلة ...بس انا مش مستسلمة لازم هشتري مفتاح الحياة ....

1
قلت لبابا ....انت هتجيب لي هدية اية ف عيد ميلادي ...؟
قال" اشتري الي انت عايزاه وانا هحاسب علية بس يعجبني الاول "
قبلها كنت بتخانق مع بابا عشان هو مش بيحب اي الوان انا بلبسها ....ودايما يقول اني الشريك المخالف  ...عشان دايما اقول " انا أكل الي يعجبني والبس بردو الي يعجبني مش الي يعجب الناس "
متمردة ....جداااا
2
قافلة الوول ع الفيس بوك  وعاملة خصوصية كبييييييييييرة جداااا
مش بكتب  ع الفيس الا قليييييييييل جداااا
بعيدة عن التعليقات عند الاصدقاء .....فجزء كبير من اصدقائي  ثوار معارضون والجزء الاخر اخوان ....وانا لا أريد أن اخسر اي منهم 
فأثرت   أن أكون " نو كومنت "
لكني قرررت أن ...أفتح الووول فقط يوم عيد ميلادي   عشان  اللي حابب يبعت لي تورتاية  *_@
3
كالعادة ف  كل سنة بعيد ميلادي  قررت يكون في شيء  مختلف ....
صحيح اختي  فضلت تزن علي دماغي اجيب تورتاية من عند "....." محل جاتو شهير عندنا وغاااالي جداااا   بس انا كنت قررت اصلا اني مش هجيب تورتة ....
قررت تكون تورتة عيد ميلادي عبارة عن .....بيتزا تشيز لافور 
وبردوا هحط فيها شمعة :) 
وقررت اني اخد صورة معاها بس موعدكوش اني احطها عشان احمد اكيد هيقول لاء 
بس لو وافق هحطها ....
4
قررت اني اوزن نفسي قبل الفطار وبعد الفطار ....
والحمد لله  اتضح اني بزيد نص كيلو بعد الفطار ...كويس  جدااا
بس والله النحافة حلوة علي فكرة ....*_@
5
علي فكرة الهدية الي بستناها دايما مش بتيجي ...
مرة ف عيد ميلادي جات الهدية دي ....بس بردو هستني انها ف يوم تيجي ...
لكن كل مرة بلاقي في  شخصية مش متوقعاها بتبعت لي هدية .....
ودي بتكون مفاجأة .....لذيذة  يمكن
بس  احيانا بيكون احباط انك متلاقيش الي انت مستنيه ...فاكرك 
6
قررت أشتري موبايل جديد ....الصراحة انا عشرية اووي  موبايلي صعبان عليا اني اسيبه عشان كدة مش عايزة اشتري واحد جديد  بس بعد ما حالتة وصلت لسرطان الرئة ده الي مش ممكن ..." موبايلي اصبح بيهيس وبيفصل ف اوقات باييييخة جدااا المفروض ميفصلش فيها  وكدة يعني "
قررت اشتري لاب توب ....لو احمد اخويا مسمعش كلامي وزني واشتري واحد خلال الايام الجاية   هشتري واحد بعد ما احمد يسافر " غيظ فيه " ايموشن شورير كدة " 
ده لو سلم يعني من زني عليه ف انه يشتري اللاب   ...عشان انا استغله يا استغل الكمبيوتر ....هاهاهاها " استغلالية انا "
بس عموما الموبايل واللاب مرهونين عندي بنتيجة الدبلومة .....اللي عملتها السنة دي ...لو نتيجة الدبلومة دي كانت ممتاز اوك هشتري لو  اقل من ممتاز ....فـــ انسي يا حوبة 

7

الأربعاء، 10 يوليو، 2013

رمضان كريم ....




 0
وانا صغيرة كنت دايما أسأل لية بنقول رمضان كريم ...ولية يردوا بالله أكرم
وبما إني مكنتش اعمل ولا أقول حاجة من غير ما افهمها وأستوعبها فمكنتش أقول زي الناس غير لما كبرت وفهمت 
فعلا رمضان كريم ....لكن ...الله أكرم 
 ربنا كريم وحليم بينا أوووي
1
  عشان احوال البلد محستش بهلال رمضان
بلطيم  مش شايفة فيها اي احتفال برمضان  تقريبا 
اتمشيت فيها شوية النهاردة حسيت ان  البلد هادية وعادية  كأننا مش أول يوم رمضان الي كان  ليه مذاق خاص
اصلا النهاردة اول يوم اخرج فيه ف البلد   ملحقتش طبعا ارتاح بعد الامتحانات وطبعا اجازة الشغل خلصت فكان لازم  أخرج  وده سبب لي ارهاق  فظيييع  برغم لان الجو كان حلو جداااا  ومش حر ولا حاجة
نفسيا احوال البلد  مش مخليانا نحس برمضان خالص
2
دايما اروح أصلي العشاء والتراويح والتهجد والفجر ف المسجد الي جنب البيت 
السنة دي  حصل حاجة غريبة جداااا 
مفيش رجالة بتصلي ف المسجد يا جماعة ....!!!
اصل المسجد مسجد اخواني ....
وصاحبتي بتسألني باهتمام انت مجتيش لية  الصلاة ؟؟؟  والا عشان المسجد مسجد اخوان ...؟
والله العظيم ده غباء لاني مروحتش بس عشان كنت تعبانة  جدا وفضلت الصلاة ف البيت 
لكن ليه احنا بقينا نحسبها كدة ....حتي المساجد بقي فيها اخوان ومعارضة  ده بيت ربنا علي فكرة.....!!!؟؟؟
كتير من اصدقائي  وصديقاتي  بعتوا رسايل  موبايل وفيس بوك وكمان اتصال علي الموبايل ....
والله انا آسفة بجد  والله غصب عني مقدرتش اني ارد علي اي حد بجد كنت مرهقة لدرجة اني  مش قادرة ابعت حتي رسالة جماعية 
بعتذر جدااااا
قبل رمضان بيوم
 احد اصدقائي بيتصل بيا  يقولي مخصوص  كل سنة وانت طيبة ....رديت عليه باستغراب " بمناسبة إية ...؟ "
ضحك كتيييييييييير جدا  وقالي عشان عيد ميلادك .... حبيت اكون اول حد يقولهالك ...والهدية مش ناسيها 
" علي فكرة هديتي فعلا اني احضر خطوبتك انت وحبيبتك " 
4
كل يوم كنت بحضر خناقات بين الاخوان والمعارضين قبل وبعد واثناء الامتحانات ....
معنديش مشكلة اني اسمع الجدل ده 
بس المشكلة الحقيقية ف الناس المتلونين 
بكره انا النوع ده ....
اعرف  زميلة " كانت تجادل احدي زميلاتنا  الاخوانجية  ابا عن جدا  وتطاولت  جدااا "
الصراحة انا وقفت جنب زميلتي  الاخوانية  برغم اني مش اخوانية ولا حاجة بس لسبب واحد ان زميلتنا هذه متلونة فقبل ان يولي مرسي رئيسا كانت  منضمة لحزب الكرامة وتؤيد حمدين وعندما خسر حمدين صباحي  بسرعة لانضمت للأخوان  قائلة لي ....الواحد لازم يشوف مصلحتة يا بنتي "
والمصيبة انها فضلت تتجادل مع الاخوانية وتقولها انا  معارضة وانا مش زيكم وانا  اتضريت منكم ....
مشكلتي ان لساني طويل لما الاقي الكدب علني كدة ....
مسكتش " طبعا  بكل بساطة وهدوء  قلت لها  انت متلونة وانت كنت كذا ولما الاخوان  حكموا  عملتي كذا ...."
زميلاتنا كلهم اتصدموا ....بس بعدها ضحكوا اووي ...اصل زميلتنا دي محدش بيعرف يكلمها  اووي 
اما أنا فلله الحمد لم انضم ولن انضم ابدا لأي حزب ....والحمد لله بردوا اني رأي واحد متغيرش ....انا مع البلد وبس مش مع شخص بعينه  ولا يهمني  اني اكون قريبة من شخصية  تحكم ....
عشان كنت بمتحن  فكل شيء عندي كان متوقف  حتي الاهتمام بصحتي 
امتحانات كل يوم وكل يوم سفر وموصلات  وتعب  ومفيش أكل   ومفيش نوم وفي بس قلق وتوتر  وتعب وتفكير 
حتي لما عملت الحادثة برغم انها بسيطة جدااا بس انا الوحيدة الي ف العربية الي اتأثرت  
حتي لما روحت للدكتور من قبل ما يكتب لي العلاج وبنظرة واحدة ليا قالي  " ما هو واحدة بالشكل ده لازم يكون عضمها قابل للكسر  احمدي ربنا ان دراعك متكسرش وجات علي اد  تجمع زلالي  ف دراعك "
وكتب لي كل العلاج عبارة عن ابر وكبسولات فيتامينات  وعلبة دوا وحيدة بس لمشكلة دراعي " دكتور عاقل  جداااا "  بعدها بيسألني انت وزنك اد اية ؟  لما عرف ان وزني 40 كيلو  كان هيطردني  وقالي زودي وزنك لخمسين ع الاقل
الغريبة اني مش حاسة ان وزني فيه مشكلة خالص بالعكس انا حاسة اني زي ما انا  ولا خسيت ولا حاجة بس اللي بيجنني ان كل ما حد يشوفني من قبل ما يسلم عليا يقولي انت خسيتي اوووي  حتي زمايلي الي ف الكلية الي بس غبت عنهم شهر  واحد بس كان تعليقهم عليا طول فترة الامتحانات   اني بختفي  .....خصوصا ان كلهم بدون استثناء  وزنهم زاد  يعني في اتنين منهم زادوا 17 و20 ك  وده صدمني الصراحة لاني بخاف جداا جداا جداا من زيادة الوزن ...حاسة ان عندي فوبيا  هههه
 في ناس وزنهم بيزيد ف رمضان  جدااا الحمد لله اني مش منهم 
كل سنة وانتم طيبين ورمضان كريم