الأحد، 26 مايو 2013

اكتب لــ ــه لــهـــا ...خطابا نابعا من قلبك


مساء البنفسج 
تحت عنوان اكتب خطابا نابعا من القلب  تدعوكم  الاخت Memi Hussia
 هنبدأ حملة تدوين من الخميس الي بعد الجاي ان شاء الله

مستنينكم تجهزوا حالكم من دلوقت عشان تكونوا معانا 
يا تري هتكتب  لمين من قلبك ....؟
انا عندي جوابات كتير 
أاااااااااااااااد كدة

أنا هكتب  أكيد 
عشان أقول إن ...
 الكتابة الي خلاني احبها مقبلتوش في حياتي ...وكنت اتمني ده جداااا
وإن في شخص علي اد ما اتحايل عليا أقول الي ف قلبي مقدرش يخليني أقوله ...
بس قدر انه يخليني اكتبه ....
هنا...ف مدونتي :)
وهكتب لكل الناس الي أحبطوني ...لآنهم خلوني أقوي ....:)
مستنينكم تكتبوا....
والايفينت هنا ....
يلا حضروا ورقكوا واقلامكم ^___^

الأحد، 19 مايو 2013

بؤجة الخير



كل حاجة عندك انت مش محتاجها غيرك محتاجها .. هاتها و تعالى شارك معانا
هو ده شعار بؤجة الخير
بؤجة الخير ده تقليد بلوجري صميم 
مين الي عمله ...مين الي فكر فيه ..مين اول حد صمم فكرته....كان امتي اول مرة عملناه....
كل دي تساؤلات مالهاش لازمة علي فكرة 
الي له لازمة فعلا  البؤجة دي عبارة عن إية ...؟
البؤجة هي تجمع خيري  بنجمع فيه كل شيء احنا مش محتاجينه ..خلاص استغنينا عنه .... 
زي الملابس  الادوات المنزلية الاجهزة  .... كدة يعني ...احنا استغنينا عنها خلاص ...
بس الاكيد ان في ناس غيرنا محتاجة الحاجات دي ...عشان كدة بنجمع الحاجات دي وبنتجمع مع بعض ف مكان  وهو شارع احمد خيرى بجوار محطة مترو الانفاق الزهراء فوق كافتيريا السرايا 
وده هيكون يوم الجمعة الجاية 24 يونيو   
طيب مين هيكون موجود من المدونين ....؟
أسامة الازهري طبعا ......الغتاتة كلها  الي مطلع عين كل بنت بلوجرية  بس انا عرفت اقلبه ف شوية شيكولاته جالكسي  :)
شيرين سامي ....تقريبا شيرين جاية 
داليا رانيبو ....
وعمرو يسري ...وشريف صابر  و أحمد عبد الحميد  ومحمد بهجت ومحمد عادل  و .....أنا  :)
والله ان شاء الله اكيد يعني  هكون موجودة بس لوقت قليل جداااا لاني فعلا تعبانة ومش هقدر اني اكمل اليوم ويا شماتة أسامة  الازهري فيا ....كنت ناوية اغرمه  غدا وايس كريم بس يلا بقي تتعوض ...
الناس سألتني أحمد هيكون موجود ....؟ ممممم يا جماعة احمد اخويا لسة موصلش البيت  يعني مش عارفة بس معتقدش انه ممكن يجي .....بس لو عرفت ازن عليه اوك مفيش مشكلة ازن عادي يعني 
عايزة المدونين كلهم يكون موجودين ....
وربنا ما يحرمكم من عمل الخير ....
وادعولي اكون معاكم  ف اليوم ده وميحصلش حاجة :)
مع 
بس واضح ان دعوات ازهري  مستجابة لانه دعي عليا انا  وسوني  ...
سوني رجليها اتكسرت ....وانا واضح ان الزايدة هتنفجر ....:)
بس برضه هغيظك يا ااسامة وجاية :؛  " وش بيطلع لسانة "
وده لينك الايفينت ....

الثلاثاء، 14 مايو 2013

قصاصات عنــــــ ـــــه ..و..عنــــ ـــــها 1


0
الصمت دائما  لا يكون حل مناسب
بل يكون هروب من واقع لا نريد الاعتراف به
أحببت أن أعترف قبل أن يخونني صمتي ...
فلا أعرف كيف أقولها  أبدا.....
بأنني كنت ومازلت  أنا تلك الأنثي  التي وهبتك حبها
فوهبتها صمتك اللعين .....
فذهبت لآخر ....نكاية فيك ....
فذهبت لآخري لتنساها
فما كان من هذا الصمت إلا أن أضركم بأغلي ما تمتلكون
حبـــ ......... ــــكما
1
إن ما يؤلمني حقا
أن يكون في قلبينا ذلك الحب
ولا نستطيع سوي الصمت
لماذا لا تعترف بأنك تعشقني
لماذا تصمت عندما أقول لك بعيني أحبك
لماذا تقول عيوننا شيء
وتقول شفاهنا شيء أخر
2
يدك لا تقول  ما تقوله شفاهك
أتذكر دفء يدك
فهل تتذكر كيف كانت يدي دافئة  وانت تضمها ...؟
ساعتها كان الصمت  يحكي احساسنا
3

أحيانا يكون الهروب  هو الوسلية  الوحيدة
لكي يفهم هذا الشخص انك
تهرب منه ....
فقط لأنك تحبه
4

هي ....
أنا اعفيك من كل شيء  الا حبك لي
هو ....
وانا أعفيك  من أي شيء ....
حتي حبك ....
5
قد لا تكون  أنت حلم طفولتي
ولكني أعلم أنك حلم صباي
حلمت أن  تطير  بي بـــ حصان ابيض بجناحين ذهبيين
الي عنان السماء ....فوق سحاب ابيض ورمادي
لكنك ....
فوق سحاب أخذتني ....
ومن اعاليه.....قذفت بقلبي ....
وما أحببتني....
6
احيانا أجدني اتلهف عليك
اشتاقك....
اهرب منك....إليك
اشتاق أن اجدك متلهفا  لي ...كما أنا....
اجدك ...تحكي لي عن أخري .... تشبهك
ولا تشبهني ....
رائحتها تفوح بالمكان وتلتصق بك
شعرها يتراقص حول وجهك
انفها يتشبث بأنفك
تقترب منك حد الذوبان....
لا تخجل....مثلي ....لا تخجل  مثلي
لا تخجل منك.... مثلي أنا
7

هو...
حواجز بيننا...وليس حاجز فقط
هي ...
انت من تصنع تلك الحواجز .....وتزيدها علوا  طوال الوقت
" عندما   نهرب من  مشاعرنا "


وللقصاصات بقيه.....
عنه وعنها 

ملحوظة صغنتوتة
  للبنات والستات
ممكن اعرف ازاي ادخل المطبخ  ومحرقش ايدي 
المرة دي انا حرقت دراعي كله  وبشكل غريب جدااا 
بقيت مشوهه من الاخر حد يفيدني  طيب  لان كدة ماما اتجننت مني 

الأربعاء، 8 مايو 2013

بعض ....منهم

بعض من الاصدقاء  نظل  نهتم به أو نتعلق بهم لا ندري لماذا ...
 تشتد الرياح بهم ...تلاعبهم ....
تقسو عليهم .....تبكيهم ...وتعذبهم...
لكن ....
وقوفنا بجوارهم   ولو حتي بمجرد كلمة او مكالمة تليفونية ....يكون له تأثير السحر عليهم ....وعلينا أيضا ....
1
عزيزتي ماهي 
سعيدة جدا ان  حياتك الاسرية استقرت ...وان الله عوضك خير عن زوج لا يستحقك بزوج أخر  يتق الله فيك
بحبك وسعيدة اني شوفت صورتك وانت بتضحكي أخيرا ....
2
عزيزتي مودي
ان الله لا يبعد عنا  أبدا
بل نحن من نبتعد عنه .....سواء بأنفسنا أو من يبعدنا عنه بفكره ومذهبه
كنت قلقة عليك منك ...من أفكارك ومن هؤلاء الذين حولك.....
ابتعدت .....
بعدي عنك ليس بإرادتي 
وبعدك عني  ليس بإرادتك أيضا 
ولكني كنت دوما تلك الصديقة التي  تعرف ماذا يدور وراء ابتسامة غير مكتملة ...
ووراء عين تضج بالنشاط وهي نائمة ف كوابيسها الخاصة 
كان حزني عليك أكبر من أن  ابوح به لك....
ولكن....قد تكفي كلمات  لتجعل  الظلام يتبدد 
كنت دوما بنظري قوية  جدا ....
ولكن أن أراك هكذا ضعيفة ......
حمدا لله أن بعد حديث بيننا قد طال   قد عرفت أخيرا أن الله لا يبعد عنا ...بل نحن من نبتعد عنه
عزيزتي .....سعيدة أنك  عدتي إلي ربك ...آمنة مطمئنة 
3
الصديق العزيز ورفيق الدرب ...مصطفي الطبجي  
سعيدة  جدا بحفلة توقيع  مجموعتك القصصية " ركاب عربة المترو "  واكيد  كنت اتمني اني افضل اكبر وقت ممكن ف الحفلة بس  معلش تتعوض
سعيدة بصور الحفلة والاصدقاء الذين سعدت بلقائهم 
وسعيدة بكل صور الحفلة الجميلة جداا
 والاجمل ان الحفلة كانت في بلدي " كفر الشيخ "  ودي كان المفاجاة بالنسبة لي .... واكيد هعمل حفلة توقيع هناك  بالايام الجاية 
والصور خير دليل  علي رقي المكان  وتنظيمه  وروعته ....
كريتيف هوم مكتبة كلامنا مانو ....بجوار نادي كفر الشيخ  فعلا تستحق التعريف
بها  وبجد أنا سعيدة ان بلدي بها هذه الاماكن الرائعة ويكفي ان صاحب المكان قاريء وكاتب  يعرف جيدا ماذا تعني الكلمة ويريد أن يخلق مكانا ثقافيا  راقيا 
 دكتور تامر المغازي ...شكرا  جدا لحديثك معنا  :)
واستضافتك الراقية ^_^ 
صور الحفلة 
              مصطفي مع دكتور  تامر مغازي  مستضيف الحفل

 مصطفي اثناء التوقيع
  مصطفي والصديق ورفيق الدرب احمد سعيد  
    الصديق احمد سعيد 

  لالالالا مش انا مع مصطفي 

  ولا انا دي بردو  :) 
                     كنت بحاور مصطفي   والتصوير شغال وانا مش عارفة 
                         قلت لنفسي بلاش اقف جنب احمد سعيد عشان هو اطول مني كتير خليني جنب مصطفي 
              علي اساس يعني ان مصطفي قصير ....اتضح لي اني انا القصيرة  :)
     مصطفي  ودكتور تامر وجزء من الحضور 

والورد الي ف المكتبة عجبني وقلت  أتصور جنبه ..... وميرسي للي صور الابتسامة والضحكة دي  :)
والي خلاني اضحك ف اليوم ده  ميرسي جداااااا ...ومش مهم اقول الاسم  :)

المهم بس ان يكون ف قلبي للأصدقاء مكانة تزداد بحبهم دوما 
:)

السبت، 4 مايو 2013

فراشتــــ _ ـهـ _


فراشتــــهــ....هو...
نعم فراشتـــهـــ....
فالهاء عائدة له ....
الهاء تعني أنها ملكــــهــ ....نعم ملكـــهـــ هو 
فراشته...نعم هي فراشتــهــ...

تشعر بنعومتها معــهــ...
بانوثتها ...
بجمال روحها الخلابة 
بنظراتـــهـ...
يزداد تألق ألوانها  بوجوده 
تشرق عيناها بلمسة يده


فراشتـــهـــ ...هو
تعشق هذا الامتلاك ...معه
وهي التي دوما كرهت أن.... يمتلكها أحد
تعشق تملكهــ....وتعلقه بها....
تعشق تفاصيلها معه....
وتفاصيله معها...


فراشتـــهـــ ...هو
تعشق  إحتضانه ألآسر ...
تعشق قوته
 ولا تخشي تمزق أجنحتها 
لأنها...
تختبيء في قلبه...
فراشتــــهـــــ...هو
تعشقــــهـــ...
وتعشق  دوما أن تقول له....
أشعر بالآمان معك..... 
:)


شوية...حاجات 
كدة يعني  
^_^

الأربعاء، 1 مايو 2013

من داخل الصندوق ......




عن حفل توقيع صندوق ورق
المكان " الأكاديمية العربية لـ تكنولوجيا المعلومات و الإدارة
المكان بالتحديد ( طنطا . شارع الأشرف من سعيد _ عمارة ( 1 ) _ شقة ( 2 )
الجميل ان شارع سعيد ده لينا ذكريات فيه انا وغادة ورانيا ومروة ورضا  تجنن من اول كافية  " عمرية " الي كان قصاد الاكادمية بالظبط  وده الي متوهنيش ...ومرورا ب مومنت ....وسافاناو.....اية ده  هو انا هقدم اعلان ....؟؟؟ سوري نسيت انا بقدم حفلة ...:)

المهم ان اليوم كان رااااائع  وكنت اتمني أشوف ناس كتير  هناك ....
بس للأسف  مش كل شخص قال  جاي ...جه ....:(

شوفوا بقي إية رأيكم نخلوها  تحقيق صحفي مصور ....؟ 
موافقين ...أوك موافقة ....."  ديمقراطية  ولا  مجلس الشعب اهو ....عشان متقولوش اني دكتاتورية 
ماشي ....أول الحضور ...بالطبع غادة  محسن وهي الي قدمتنا 
 غادة وهي بتقرأ الاهداء بتاع الصندوق

غادة وهي بتتكلم عن المشاركين ف الكتاب وكانت بتشاور علي نفسها وبتقول وفي ناس من اليمن...تقصد نفسها يعني :)


غادة وهي بتقري جزء من مشاركتها 

طبعا اللي كان موجود من بدري ف الاكاديمية هو خالد ناجي الآب الروحي للصندوق 
وهناك شخص قلت له أكثر من مرة ....
انت مش ممكن تكون طبيب
 اصله بصراحة جنتل اووي وكيووووووت جداا
 والدكاترة جزارين جداااا  " ابتسامة شوريرة " 
انه محمد الوكيل 
 واصلا معانا جزار تاني ف الكتاب ...اقصد دكتور تاني وهو جمال عمر بلدياتي وصديقي العزيز ...اللي قلت عليه ف الحفلة انه منحاز لبني جنسه وعمله اللي هو الطب ومعجب بالوكيل جدااا" ابتسامة شوريرة "
وكان في محمد تاني 
بس رزل جداااا ههههه
مع اني والله بحبه بس هو بيحب يطلع كل جنوني عليه 
" محمد غالية " 
اييييية ...نجم سينمائي يا اخواتي 
غادة   وهي بتقدم غالية  للحضور وبتقول انه نشيط جدا وله اكتر من عمل منفرد اولها كان " هل تبحث عن السعادة " 
اكيد طبعا الناس بتقول دلوقت هو الحفلة مكانش فيه بنوتات ...؟
لا طبعا 
كان في .....
العسولة اللي اسمها لبني غانم .....
شوفتها ف معرض الكتاب ودي تاني مرة اشوفها 
مبسوطة بيك كتير يا لبني ....:)
وهنا لبني هي وجهاد محمد صديقتنا 

كان في كمان ...
بنوتة لاسعة .....هو اسم مدونتها 
الاميرة سارة ....وهي أميرة فعلا
هي سارة درويش ....صاحبة " زوجي مازال حبيبي"
صاحبة الابتسامة الجميلة 
صحيح هي جات متأخرة بس انبسطنا جداا انها حضرت 
ومبسوطة انا جدااا لاني مشوفتش سارة من يوم حضورنا ندوة الدكتور احمد خالد توفيق ف 2009 
مبسوطة يا سارة اني شوفتك :)
سمو الاميرة سارة 

ثم كان موجود ....
أنا ....:)
بس والله انا مش عايزة اصدمكم بصوري ...
لانها بشعة جدااااا
وبعدين كل ما نيجي نتصور يجي غالية والوكيل جنبي 
وخالد يزعق محدش يقف جنب رحاب ...
رحاب مش ظاهرة يا جماعة .....
ههههه
بس ف الاخر بردو طلعت مكشرة ف كل الصور :(
ما عادا الصورة دي ....:)
 وهنا انا وسارة  وكانت سارة بتزغزغني عشان اضحك 
وهنا  كنت بتكلم عن تجربتي بالصندوق  
 واضح جدا ان وزني زاد ...صح ...اه وزني زاد
وزني زاد وزني زاد  ...يا ربي علي عقدة الوزن عندي 

بنوتات الصندوق  :)
غادة ..لبني ...رحاب ...سارة 
طارق  وعبد الرازق أصدقائنا 
جانب من الحضور 
والي ف الاول دي وبتضحك للصورة   ولابسة ابيض هي منار اخت غادة محسن 
وهنا جانب من الحضور وبتظهر فيه يسرا  ومنار اخوات غادة 
صديقاتنا اللاتي حضرن الحفل 
منار وهاجر وغادة وهند واسماء
غالية وغادة وبينهم صديق 
مش فاكرة اسمه :)


ف كل حفلة توقيع  بتوكون توقيعاتنا شيء مبهج
بس توقيعاتنا لــ خالد ناجي كانت تجننن
الاب الروحي وبعض التعليقات 
توقيع غادة لــ خالد ناجي 
وهنا توقيع غالية ولبني غانم والوكيل وأنا 
انا قلت اني اوقع بالبنفسج   عشان اظهر وسط العمالقة دول 
وبردو مش واضحة 
بس الجميل ان كلنا كاتبين بابا خالد :)
 هنا غادة   ويسرا مع احد الاصدقاء ...اللي كالعادة نسيت اسمه
لبني غانم وسهي الوكيل 
البنوتة الي ف كل حفلة توقيع  كل الناس بتسأل عنها " سهي الوكيل " اخت محمد 
سهي بتفكرني بنفسي  ف شيء 
كل ما حد يشوف  محمد الوكيل يسأله فين سهي ..؟
زي كل مرة احضر حفلة توقيع يسألوني فين أحمد ..؟
لعلمكم بغير جداااا 
أه والله بغير اووي  لما كل اصحاب بيكون معاهم اخواتهم  وانا لاء ...
بس اعمل اية احمد مسافر ...
المهم ان كانت الحفلة جميلة بجد والجميل اني شوفت ناس بحبهم كتير مشوفتهمش من زمااان 
زي منار ويسرا اخوات غادة محسن وسارة دوريش  ولبني غانم  وسهي الوكيل 
وهاني  وعبد الرزاق  وطارق  وكل الناس الحلوين الي اتعرفت عليهم اول مرة زي سارة وهناء وهدير واسماء ومحمد 
وكفاية اني شوفت صديق  قديم سعدت بحضوره جداا
في النهاية بشكر كل الناس اللي حضرت وبعتذر عن الي نسيت اسمائهم او صورهم لان كل الصور موصلتنيش لغاية دلوقت 
حتي الصور الجماعية 
وبشكر كل الناس اللي اتصلت وبعتت رسايل 
وبعتذر  لكل الناس الي مردتش علي اتصالهم 
وبشكر يسرا محسن  علي تعاونها معانا هي والاكاديمية وبجد الاكاديمية رائعة وبتمني نعمل فيها حفلة تانية ان شاء الله 
يسرا وغادة :)
بحبكم كدة 
وف النهاية انتهت الحفلة علي كل حب 
أشوفكم علي خير دايما ف كل حفلة توقيع 3>