الأربعاء، 4 أغسطس 2010

لما أكون رئيسة الجمهورية



يعني إية رئيس جمهورية ...؟ طيب هي إية وظيتفه ...؟ يعني المفروض لو أنا رئيسة جمهورية هعمل إية ..؟ وحياتي هتكون إزاي وهبقي مختلفة كتير عن باقي الناس ومش هاعرف أعيش زيهم ...؟؟؟ طيب يا تري رئاسة الجمهورية صعبة أووووي لدرجة إننا نخاف نفكر فيها إننا نفكر ف يوم من الايام اننا نكون مكان الريس ....


كلها أسئلة بتدور جوايا ويمكن بتدور جواكم انتم كمان ....لكن يا تري لو فعلا قدر لك انك تكون رئيس جمهورية هتعمل إية ...؟ طيب أول شيء هتغيره إيه هو ...؟ طيب مممكن تعمل قوانين إية وتلغي قوانين إية ....؟


طييييييييب قبل ما أرد انا علي الأسئلة دي كلها عايزة أحكي لكم علي كام موقف كدة حصلوا معايا وادامي يمكن شاركت ف بعضها ويمكن راقبت الاخر بدون تدخل بس كنت ف موقف المتفرج بعصبية وفقط .........


المواصلات يمكن تكون أكتر شيء تاخد منه حكايات وأراء وقصص وروايات ومشكلات .....


الحكاية الاولي


كانت قبل انتخابات الرياسة اللي فاتت ...أقصد تجديد حبنا واخترناك اخترناك .....


كان تقريبا انا البنوتة الوحيدة ف الاتوبيس وكان ف شخص معاه جريدة وبعدين فتح الكلام مع اللي معاه ف موضوع الانتخابات وقال والله لو في حد أحسن من الريس بتاعنا قولوا وهاتوا اللي عندكم وبعدين اللي تعرفه احسن من اللي متعرفوش ....رد عليه واحد تاني لاء معندناش للأسف حد احسن منه ......رد تالت لاء في بتوع المعارضة وكمان الاخوان ......رد رابع والله انا شايف ان الريس حلو اوووي والمثل بيقول اللي تعرفه احسن من اللي متعرفوش .......دخلت انا ف الكلام وقلت :يعني اية اللي تعرفه احسن من اللي متعرفوش ...واللي عرفته يا تري عملك اية ...؟ رد واحد وكأنه بيزعق لي : وانت مالك انت ...؟ هي البنات كمان بقي ليها رأي ...ناقص كمان شوية تقوليلي هترشحي نفسك للأنتخابات انت والا واحدة ست تانية ....... قلت له وانا بحاول اني اسيطر علي اعصابي عشان متخانقش معاه : انا لي حق زيي زييك تمام اني انتخب واني كمان اترشح ....ومن حقي اختار وانا شايفة ان البلد بتتأخر باللي نعرفهم ...قوللي رد عليا اللي تعرفه عملك اية ....أه عمل يا هانم حملات شلل الاطفال والقراءة للجميع والتعليم المجاني وحاجات تانية كتيييير ......قلت وانا هنفجر م الغيظ حضرتك بتشتغل اية ....؟ انا مدرس كيمياء واحياء ......قلت آه ....ومكملتش حوار لاني كنت وصلت خلاص للمكان اللي انا عايزاه....بس فضلت افكر ...هو اللي نعرفه فعلا احسن من اللي منعرفوش .....؟؟؟!!


مرة تانية ....


كان واحد سني وواحد عادي ....السني مصمم ان الاخوان افضل والتاني مصمم ان الريس او ابنه احسن ....لان الاخوان هيفرضوا علينا الدين بالقوة وهيدخلوا الدين ف كل شيء ومش بعيد يلغوا كل التكنولوجيا الجديدة من تليفزيون وفضائيات ونت وموبايل .....ونرجع تاني لأيام الجاهلية .....ساعتها سمعت بس متكلمتش...


مرة تالتة ....


كنت مع صاحبتي وكنا بنتناقش بصوت عالي هي بتحب ايمن نور وبتقول هو كان الاحق بالانتخابات وعلي الاقل تغير خلينا مرة نحس بالتغير بقي ....دخل ف الكلام شيخ شكله طيب كتيييير قال : والله يا بنتي نفسنا ف حاجة بجد تتغير ما بقالنا كتير مستنين ومفيش تغييير ابدا غير ان في ناس كتيييير بتطلع فوق وناس تانية بتتخسف بيها لسابع ارض ....الفقر زاد والجهل زاد والامية انتشرت بدل التعليم والا الامراض ده الجنين ف بطن امه بينزل عنده سرطان وايدز كمان ......الفساد الفساد الفسااااااد مين هينقذنا منه عايزين تغيير علي الاقل نموت واحنا متطمنين علي الاجيال الجاية ......رديت انا : والله معاك حق يا حاج ...بس انت بقي ممكن تنتخب حد تاني غير الريس ...؟ اه يا بنتي انا اتخبت قبل كدة .....بس تفتكري يعني صوتي مقابل اصواااات تانية مش فاهمة ومش عارفة والموالسين والمرتشييين واللي كمان منتخبوش هيكون له اي تأثير ......؟ صديقتي قالت : طبعا له تأثير علي الاقل تكون قدوة لأولادك واحفادك وكمان ادام ربنا .....


رد واحد مش تاني قال : وهو انت تعرفي ربنا والا تعرفي اية ف الدنيا ....؟ وهو انت فاكرة رئيس الجمهورية ده حاجة سهلة .... ده حاجة صعبة جدا ...انت متعرفيش حاجة


طيب عرفني يا اخ ....رد الشيخ وقال اصبري يا بنتي وقال للشاب ده هو لو الريس اتعامل مع المسؤليين زي ما اي اب بيتعامل مع ولاده وحكم بالعدل بينهم هتلاقي مشاكل ...؟ ولو كل واحد من الاولاد الكبار عامل ولاده زي ما ابوه عامله هيكون النتيجة اية ...؟ الحياة هتختلف .....وهتكون اكيد احسن لان كل واحد اخد حقه...


قال الشاب : وهي رياسة دولة بحالها زي بيت والا اية .....؟ فكرت شوية ولقيت ان ممكن فعلا تكون زي حكم اي بيت بس بطريقة مختلفة اكييييييد


مرة رابعة .....


ده بقي شخص اعرفه و ذو مكانة اجتماعية وثقافية مرموقة ...قالي بكل بساطة " الريس يعني مالو والا ابنه حتي مالو ...؟ عادي جدا يا رحاب انا هقولك علي حاجة بسيطة جدا اي ريس جديد هيكون كل همه انه ياخد مننا ومن البلد علي اد ما يقدر فلوس ونفوز وسطوة وجاه .....يعني هيمص ف دمنا اكتر ...لكن الريس او ابنه اخد من زمااان كل اللي عايزينه واكتفوا خلاص ...يعني مش هياخدوا اكتر من اللي اخدوه ...يبقي هما الاحسن من اي حد جديد........


هو ده منطق برضه وفي ناس كتير فعلا بتفكر بالشكل ده ...لكن انتم يا جماعة اية عرفكم ...؟ اية عرفكم ان الريس الجديد هيكون عايز ياخد مننا ويمص دمنا ما جايز يكون غير كدة وفعلا انسان حابب مصر وعايز ليها الخير ويوصلها للأفضل ........


وكمان اية عرفكم ان الريس او ابنه اخدوا كل اللي محتاجينه وخلاص بقي مش عايزين تاني ....طيب والبلد اللي كل حتة منها بتتباع بأرخص من التراب وللأجانب والعرب ...يعني ممكن ف لحظة يبيعونا احنا كمان......


اخيرا وليس اخر .....


كنت في الجريدة وزميلي بيوقف لي تاكسي عشان رايحة الاكادمية المهنية للمعلمين لشيء ما ....ركبت وهو بيسألني : هترجعي الجريدة تاني والا هتروحي علي طول ...قلت له مش عارفة ...حسب الظروف ...


مشي التاكسي وسألني السواق بفضول : انت صحفية ..؟؟!!! قلت بابتسامة خفيفة لاني عارفة السخرية اللي هواجهها معاه :ايوة .... قالي : والله كويس ...طيب بقولك اية ما تكتبي عن ترشيح د.زويل ود. البرادعي للأنتخابات ...طيب اقولك هو انت هتنتخبي مين فيهم ...تعرفي انا من رأي ان برغم د.زويل و د. البرادعي ناس محترمين وبيحبوا البلد لكن مش هينفعوا يبقوا رؤساء لانهم علماء ...تعرفي مين فعلا ينفع يكون ريس ...؟


قلت بعد ما كان مش عاطيني فرصة اتكلم : مين ...؟


قالي : عمرو موسي ...لانه اتعامل مع الاجانب والعرب كتير ورجل دبلوماسي وانا واثق انه هيكون ريس ممتاز


قلت : يعني لو عمرو موسي رشح نفسه هتنتخبه ...؟؟


قال بطريقة سؤال بسؤال وكأنه بيهرب ومش عايز يجاوب : طيب انت لو اترشح د.زويل ود. البرادعي وعمرو موسي هتنتخبي مين فيهم ....؟


قلت وانا محتارة : مش عارفة اكيد هحتار فعلا لانهم ناس بتحب مصر بس يمكن انا ميالة اكتر للدكتور زويل ...ها قولي بقي هتنتخب ميييييين انت ....؟


قال : انا .....بيني وبينك ....هنتخب الريس او ابنه ....خليني ماشي جوه الحيط احسن انا مش عايز اروح ورا الشمس ....خليني اربي عيالي احسن ..بلا سياسة بلا وجع دماغ واهو احنا عايشين وخلاص


وساعتها كنت وصلت للأكادمية ....فقلت له : شكرا انت افدتني كتيييير بس حاول انك يكون لك موقف في مصلحة بلدك اللي هي مصلحة ولادك ...ونزلت ولكنه استوقفني ....استني انت مش هتكتبي اسمي بقي ف المقال الي هتكتبيه ....؟ ضحكت من قلبي بسخرية ,,,,وتركته ومشيت


لو اللي بيقرا وصل لغاية هنا عايزة اقوله كتر خييييييرك بجد انك استحملت الرغي ده كله اللي انا عماله ارغييه


انا بقي فكرت مع نفسي لو انا بقيت رئيس الجمهورية هعمل اية ...؟


اول حاجة حكاية الغاز المصدر لإسرائيل ...وبعدها قوانين الاسرة والطفل والزواج ....المستشفيات الحكومية والاستثمارية واللي بيحصل فيها ...هحاول ان كل مدرس وكل طبيب وكل زي عمل يكون مرتبه او ما يحصل عليه مناسب فعلا للمعيشة الآن ....كل محافظ وكل مسؤل هيتحاسب علي اخطائه ومفيش حاجة اسمها حصانة مجلس شعب ولا شوري ....هيكون في حرية اعلامية اكيدة لكن بدون ابتذال ....وخاصة ف الافلام والمسلسلات والتليفزيون البرامج المنيلة اللي بتقول اراء متشابهه لللغرب لا تمت بصله لتقاليدنا الاجتماعية ولا الدينية ....


واما مشكلة التعليم فدي مشكلة تانية هحلها كدة علي روووقان ..واولها بقي اني هغير المناهج كلها من اول كي جي ون لغاية الاخر ...بحاجات كلها حديثة ومناسبة ومفيدة ومش اي كلام ومش حفظ وصم وبعدها طرش في ورقة الاجابة بدون ما يفهموا هما كانوا بيتعلموا اية ....وحاجات تانية اكيد مع مرور الوقت هكتشف عيوبها واعدلها ...بالنسبة بقي للصحافة اللي انا انتمي اليها ..نفسي ف حريتها بس حرية تكون مسؤلة بدون ابتذال عايزة تكون صحافة حقيقية دقيقة وصادقة ليضرب بها المثل ولا تكون مجرد اعداد واسماء لجرائد ومجلات بدون اي لازمة ...جرائد صفراء وحسب .....لاء صحافة حقيقية....


الرياضة ...الله يخرب بيت الكورة والاهلي والزمالك ...هو مفيش ف البلد دي غير الكورة وبس مفيش حاجة تانية ....مفيش تنس ولا سلة ولا يد ولا سباحة ولا اي رياضة غير كرة القدم ولا في اي فريق غير الاهلي والزمالك ..اهتمام اهتمام اهتمام اهتمام اهتمام بكلافة انواع الرياضة والقاء الضوء عليها اعلاميا ...وسن قانون لحماية الرياضي والمحافظة عليه يعني مينفعش يكون عنده بطولة عالمية وعنده امتحان ف نفسي الوقت ...لازم يضحي بشيء فيهم ...وليه يضحي ما ممكن يسافر للبطولة وبعدين يجي يمتحن امتحان خاص وهو مش اسمه هيرفع اسم مصر ....؟ لازم يكون للرياضي الموهوب كافة انواع الراحة النفسية والاقتصادية والاجتماعية حتي يستطيع ان يتأهل لكل البطولات التي ترفع اسم مصر مع اسمه عاليا .....


شوفو بقي انا في قانون نفسي فيه اوووووي اوووي اووووي لما اكون رئيس الجمهورية هعمله علي طول ما انا بقي رئيس الجمهورية وطلباتي مجابة ....قانون للحد من الاغتصاب والتحرش ....اي حد ثبت فعلا انه قام بحادث اغتصاب فالقانون يقول "إعدام " واما المتحرش ف " السجن " و25 سنة مع الشغل ....ساعتها هتلاقي البلد نضفت بجد ومعدش في حاجة من دي ولا من تلك الجرائم التي تواجهنا ف كافة وسائل الاعلام من صحافة وتليفزيون واذاعة وانترنت .....


اييية تاني .....؟ ياة تاني يا حوبة ...مش فاكرة بس لو حد عنده اضافة يا ريت بجد يقولي وهكون سعيدة بجد لاني بحب مصر بجد ونفسي اغيرها للأحسن


آه في كمان حاجة مهمة كنت هنساها ....يا جماعة مصر مش بس القاهرة واسكندرية لاء في محافظات تانية عايزة اهتمام محافظات ملغية م الوجود مالهاش اسم بس غير علي الخريطة ويمكن كمان لو قلت مرة اسمها متلقيش حد عارفها ...يعني انا مرة وانا ف الجامعة زميلي بيسألني انت منين فقلت " من بلطيم ودي مدينة ف محافظة كفر الشيخ" كان رده غريب جدا انه أول مرة يسمع اسمها ومش اسم بلطيم وبس لاء كفر الشيخ كمان والمصيبة بقي انه من اسكندرية اقرب محافظة لينا ....؟ يعني دي مشكلة بجد وكمان مرتبطة بالثقافة اكيد لكن اللي عمل المشكلة دي الاعلام والمسؤلين اللي بيهتموا بس بالقاهرة واسكندرية بعيدا عن باقي المحافظات ... يااااة لسة حاجات كتير الشرطة مثلا والعلماء والبحث العلمي وال...و و و و و ....


معلش دوشت دماغكوا


حوبة

هناك 25 تعليقًا:

  1. السلام عليكم
    كلامك ده هيخلينا نصيف
    فى سويسرا
    البلد
    ولا ايه ملناش فى السياسه
    هى دى السلبيه بعينها
    اللى نعرفه احسن من اللى منعرفهوش
    تسليم مطلق
    ايمن مين
    برادعى مين
    جمال مين
    وعمنا عمرو موسى
    مين
    اوباما كان عنده حلم (مع انى مش بحب امريكا اصلا)
    حلم الوصول
    ووصل
    حلمك ممكن يكون حقيقه مين عارف
    اصلاح النيه لله
    وخلى بالك حتى لو مبقتيش رئيسه للجمهوريه
    خليكى رئيسه لجمهوريه نفسك
    اقيمى دولتك فى بيتك
    وفى مجتمعك
    واصلاح المنكر وكده
    وبكده انتى اقمتى العدل اللى مبارك مش قادر يقيمه
    اما اللى احنا فيه من السلبيه المطلقه وكده
    تيارات مختلفه احزاب وخراب
    واخوان
    رغم انى اميل الى الفكر الاخوانى شويه لانى عايش معاهم فى جامعه الازهر ولكنى مش اخوانى بس بحب التنظيم بتاعهم
    بس برضوا
    وايمن نور اللى بيقولو يد امريكا فى مصر
    طيب ما اللى فوق وابنه كده ايه الفرق
    والبرادعى
    طيب احنا اصلا فى استعمار اقتصادى استثمارى
    هيقولوا طيب عمرو موسى طيب الراجل ده يا اخوانا ليه لازم يحكمنا اللى خلاص هيودع
    ليه مفيش دم جديد انتخابات نزيهه ونظيفه بجد
    ليه حلم الرئاسه بعيد عننا كلنا كده
    معلش طولت
    بس لو رشحتى نفسك بجد
    هخاف عليكى
    والدليل اللى حكم ببطلان العقد بتاع مدينتى
    حادث
    صدفه
    خايف عليا وةعليكى وكل اللى بيدخل المدونه دى تلوقتى
    سلام

    ردحذف
  2. انا كده خلاص عرفت هنتخب مين

    بس لو في ريس هيعمل زيك كده

    احنا الي هنحكم العالم ومفيش حد هيرضي بكده

    فلازم يحكمنا حد الدول الكبري هيا الي تختاره وعارفه كويس انه هينزلنا مش هيطلعنا لفوق

    عشان لو طلعنا اول حد هندوس عليه هما

    فاتحداكي لو البلد دي اتغيرت ما انا وانتي عايشين فيها بقالنا زمان

    حصلها حاجه

    هيا زي ماهيا

    لا تغير ولا تجديد

    ومساء الورد علي احسن شعب

    ردحذف
  3. عايزة الحق من غير رتوش و تحفظ فى الكلام؟

    جايز فعلا يكون الحل فى الستات لان البلد ماعدش فيها رجالة لان وجود كل الظلم و الفساد و التعذيب ده و فى الاخر ساكتين و خانعيين و اذلاء و سلبيين يبقوا مش رجالة لان فيه فرق كبير بين الدكر و الرجل

    الرجولة معنى عميق و بعدين ادينا جربنا الرؤساء الرجالة على مر العصور...اخدنا ايه غير حروب و تسلط و فساد و تشريد للشعب؟

    ردحذف
  4. الموضوع بتاعك جميل اوووي وفي كذا حاجة فكرت بها...

    اولا سياسة الاقصاء اللي انت حتى وقعت فيها ونحمد ربنا انك مش حتحكمي..اولا اقصاء الرجال للستات.. اقصاء الجهلة للعلم ونظام ادام عرفت حاجة خلاص كدة بقى كفاية ومش لازم نعرف حد تاني واللي نعرفه احسن من اللي مانعرفوش...أهل السنة أي المتدينين للحياة المدنية .وانت كمان يا ستي اقصاء للحكومة خالص وشيلتى الليلة كلها واول قرارتك سجن المتحرشين 25 سنة مع ان التحرش عرض وليس مرض ولابد من علاج الاسباب الاقتصادية والثقافية....

    ثانيا جهل المجتمع مثل مدرس كيميا اللي بيفكر زي اي واحد جاهل.. واحد مش عارف محافظات مصر مع انه متعلم ومن بحري كمان.. الاعتقاد ان البرادعي عالم ولكنه قانوني مش اكثر ولا أقل


    ثالثا...سياسة الافتاء كل الشعب المصري مفتي بدون علم وامثلة لها كتير في كلام الناس

    رابعا ..سياسة حنظلة بعد ما اخد القلم على قفاه وقعد يقسم الجواري واعطاها في الاخر جميعا لسيده صاحب القلم..هذه هذه لسيدي في الصبوحة وهذه لسيدي في المساء وهذه لسيدي ما بين الصبوحة والمسا.... وزي ما قال الريس حنظلة والله كويس

    ردحذف
  5. شوفى يا رحاب

    الموضوع أن تكون ريس مش سهلة طبعا لأن الرئاسة مش بس شخص الريس

    لأن موضوع التغير مش بس فى الئاسة و الناس

    يعنى الباشا اللى مش عارف كفر الشيخ الله أكبر عليه الصراحة يعنى

    دة أكيد بيهرج

    يعنى برضة لما يحصل تغير الرئاسة هيحتاج سنين لتغير كل شيىء

    تغير الوضع و الناس و لازم الناس تحاول بجد معاه مش عاوزة تغير و تقف

    انا مش من مؤيدى الأخوان مش علشان سبب دينى

    لما بشوف أفغانستان بخاف جدا علينا كلنا
    كفاية اللى قال لك مبقاش غير البنات

    مش عارف الموضوع أكبر من انة يتقال فى كومنت واحد

    بوست يدعو للرغى المجدى (:

    ألا صحيح هى كفر الشيخ دى فى مصر هههههههه

    ربنا معاكى و يوفقك

    ردحذف
  6. حلو كتير



    بس اللي مو حلو



    ابدا



    راي ست علقت هنا


    واناى عن دكر اسمها



    وبصراحة قاسية كتير ع الرجالة



    يبدوا واحد اقسى منها مزعلها علينا



    المهم هى حكت عن رجالات بلدها

    واساءت للجميع

    واكيد لم تستثني والدها واخوانها واخوالها........الخ






    طب وحضرتك عملتي اية؟؟؟



    وياترى كم ست بتايد كلامك؟؟



    اكيد بس انتي؟؟



    لان المصريات طالما يقدمنا فلزات اكبادهن للوطن الوطن مش طوشة والسلام


    ولا رغي ناتج عن اسقاطات نفسيةمريضة اساسها


    العجز


    كل الاحزاب الصغيرة في البلاد العربية مريضة لدرجة لايمكن ان تتشفى الا بالوهم وهزا ينسحب على اعضائها الدين فشلوا في الوصول الى احلامهم من خلال هدا المرض الحزبي


    لزا اصبحوا يافطة في متحف التاريخ وتسيء للتاريخ



    عاشت مصر وقيادة مصر وجيش مصر


    والمجد يركع لاشهداء وجرحي وثكلى وعلماء ونساء وزهرات واطفال وفنانين مصر


    اتشرف بمصر واهلها وان كنت ليس مصري


    ولا اسمح لاحد خارج التغطية ان يمس مصر والمصرين



    دمتي رائعة يا مصر

    ردحذف
  7. السلام عليكم
    بالنسبة لسؤال حضرتك الأول:
    لو الواحد بقى رئيس حيعمل ايه
    ده يتوقف هو جه ازاي
    على الدبابة الأأميريكية
    أم على أكتاف الجماهير
    والناس اللي انتي سمعتيهم في الأتوبيس
    صدقيني معظمهم مدسوسين
    وبتسمعيهمبس أيام الأنتخابات
    معلش
    يعدلها ربنا إن شاء الله

    ردحذف
  8. يا جماعة انا بفترض افتراض
    يعني انتم شايفينا رايحة ارشح نفسي للرياسة
    انا بعرض مشكلة اساسية لمجتمع عايشين فيه ويا ريتكم تفهموني

    ردحذف
  9. السلام عليكم
    مدونه جميلة ..الموضوع ده مستفز جدا هى هى نفس الآراء الخايبة المتخلفة اللى بأسمعها كل يوم كأن الناس ديه مافيش عندها عقل أو عقلها فى أجازة لإجل غير مسمى ..اللى نعرفه أحسن من الى منعرفوش ..الريس شبع خلاص ..طيب لما هو شبع يافالح مش راضى يسيبها ليه ومصمم يرثها لإبنه
    أنا آسفة ده منتهى الغباء الناس عنها بلادة ومش عايزة تجرب وخايفة من الجديد زى ما يكونوا اتعودوا على الأوضاع السيئة دى وخلاص...
    ربنا يصبرنا ..السلام عليكم

    ردحذف
  10. السلام عليكِ
    أتيت لأقول رمضان كريم

    ولو تحدثت في هذا الموضوع سأقول الكثير والحديث يطول

    كل سنة وأنتِ بخير

    ردحذف
  11. فعلا الموضوع ده لو فتحنا فيه مش هانخلص ياحوبه ...

    بس بجد نفسي حاجات كتييييير تتغير ... وأنا مش بحب خاااااالص السلبيه في الحاجات دي ...

    وفيها إيه لما نقول إن إللي حاكمنا مش عاجبنا ... ماحنا مش بنقول الكلام ده لله في لله ... والله كل ده من البلاوي إللي حاصله في الشعب .. مستحيييييييل مايكونوش شايفين كل السلبيات دي في مصر ...

    بجد ياحوبه إنتي جيتي على الجرح
    وفعلا عايزين حد جديد خالص يحكم .. كل واحد ضروري ياخد حقه ...

    ويااااه بجد بتمنى إن إللي تحكم تبقى واحده .. مش بقول كده عشان أنا بنت لا .. أنا نفسي نجرب مش يمكن واحده هي إللي تضبطها ...

    هابقى أتناقش معاكي وأكمل معاكي الموضوع لما اشوفك ياحوبه ياحبيبتي ...

    وبجد تسلمي على إثارة الموضوع ده ...

    وربنا يهدينا جميعا
    ^_^

    ردحذف
  12. السلام عليكم
    كل سنة وانت طيبة اللهم بلغنا رمضان

    ردحذف
  13. كل سنة وحضرتك طيبة وبألف خير وصحة وسلامة إن شاء الله
    :)
    رمضان كريم

    ردحذف
  14. محمود
    لية اخليني رئيسة جمهورية نفسي ...؟ انا من حقي اني احاول تغير المنكر اللي انا شايفاه وده حق شرعه لي الدين قبل القانون
    وبطول ما بنقول اللي نعرفه احسن من اللي منعرفوش ده هيرجعنا للجاهلية ان شاء الله...
    الاخوان مشكلتهم انهم يمكن مش عارفة اقول اية بس كل اللي شفته منهم بيخليني مفضلهمش ولا حتي المعارضة احنا عايزين حد عارف الدين وعارف مصلحة البلد يعني وسط بين الاتنين
    عموما شرفتني برأيك

    ردحذف
  15. ديالا
    اهلا بيك ونورتيني
    لية حد يحكمنا ولية نخلي حد يتحكم فينا هو احنا منعرفش نحكم بلدنا دي بلدنا احنا مش بلدهم ...!!! لازم نتغير بس لازم تكون شجاعتنا ادنا واكبر عدد مننا يكون عايز التغيير مش بس كلام

    ردحذف
  16. تيرز
    هلا بيك
    معاك حق شوفي كدة كليوبترا وحتشبسوت ...ارجعي لزماااان خالص ملكة سبأ بلقيس ....
    هتلاقي الخير والسلام
    بس دلوقت لو حد مننا فكر كدة هتلاقي اية ...؟

    ردحذف
  17. Tarkieb
    انا بقي وقعت ف سياسة الاقصاء ازاي ...؟
    والحمد لله اني مش هحكم ...لية ده حقي...؟
    رمضان كريم

    ردحذف
  18. Ramy
    عجبني كلامك جدا جدا
    رمضان كريم

    ردحذف
  19. حلم
    انت جيت اقسي مما تخيلت
    الرأي هنا للجميع بدون سب او قذف الرأي هنا يحتمل الاختلاف ولا يحتمل الجهل ...الرأي هنا مختلف ولكن محترم
    كلنا نحب مصر ولكن هذا الحب لا يجعلنا منافقين لها فاذا ما حدث خطأمنها لابد ان نقول انها اخطأت ...نحب مصر ونتمني لها الافضل لهذا نقول ما نراه سواء اكان جيدا ام سيئا

    ردحذف
  20. عمدة كفر المظاليم
    نورتني
    معاك حق اكيييد
    بس لازم نحلم ونحقق حلمنا ف التغيير

    ردحذف
  21. انا حرة
    اهلا وسهلا
    معاك حق اكيييد
    بس للاسف الاغلبية هي السلبية
    ربنا يعينا ونحاول نخلي الاغلبية ايجابية

    ردحذف
  22. احمد شريف
    اهلا وسهلا
    ورمضان كريم
    ولا يهمك هو الموضوع كبير شوية وعايز مناقشات كتيرة

    ردحذف
  23. غاااااادة
    والله انا كمان نفسي اجرب اهو من باب التغييير
    لكن تفتكري ان ده ممكن يحصل ..؟ واذا حصل هيبقي بالساهل كدة.....؟
    اممم معتقدش بس بجد بتمني اي تغيير ..للأحسن

    ردحذف
  24. ذكري رحيل قلم
    الله اكرم وربنا يعيد علينا ايامه كلها بالخير

    ردحذف
  25. شريف باشا
    الله اكرم ويارب رمضان الجاي تكون انت واميرتك مع بعضيكم

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين