الخميس، 25 فبراير 2010

وانتهت زوبعة الامتحانات ...لكن منتهتش حكاية النص رغيف....؟!



في كل الامتحانات لازم يكون في حاجات غريبة بنعملها بنسميها طقوس وتعود وكدة يعني بس انا بقي الغريبة ان طقوس الامتحانات ثابته عندي علي اشياء واشياء بتتغير ....يعني بحب اذاكر في السرير والكاست جنبي وممكن اتمشي وانا بذاكر في الاوضة او البلكونة الساعة اتنين بعد نص الليل , بشرب شاي علية نسكافية وكاكاو , وممكن اغني وانا بذاكر ....واحب اذاكر وانا فاردة شعري علي كتفي .....


واذا كانت دي طقوس المذاكرة طقوس الامتحانات اية ظروفها ..؟


اممممم بلاقي نفسي في حالة ملل وعندي خوف ورعب من الامتحانات وبحب اكسر أي حاجة ازاز عشان كدة ماما بتخبي أي حاجة ازاز لما تلاقي جنونة الامتحانات بتعتي طلعت , بس ده كله كوم وان طقوسي قبل الامتحانات تكون قص شعري كوم تاني ومكنتش ارتاح ابدا الا لما اقص شعري .........لاني قبل الامتحانات ومن التوتر بحس شعري شكله غريب ومش حلو بالمرة


المرة دي والحمدلله رحمت شعري ومش قصيته يمكن عشان انا كنت مذاكرة كويس والا يمكن تغيير في الطقوس والا اييييييية ....؟ بصراحه صعب عليا شعري اوووي


المشكلة الكبري كانت بجد لا في المذاكرة ولا الامتحانات ولا حتي في قص شعري المشكلة اني مش كنت بعرف اكل خالص لدرجة اني مش بعرف اكل غير نص رغيف ..!


اكون جعانة جدا جدا جدا واقعد حوالي ساعة اكل ووفي الاخر الاقيني اكلت نص رغيف , طيب اية المشكلة ..؟ المشكلة ان لما رحت الامتحان اصحابي معرفونيش ولولا انهم عارفين المخبأ السري اللي كنا عاملينه انا وحسام وحسن وايزيس نذاكر فيه قبل دخول اللجنة مكنوش عرفوني , المشكلة اني ملاحظتش ابدا اني اتغيرت ولا اني خسيت كدة لدرجة ان ملامحي اتغيرت زي ما بيقولوا وكنت بقول يمكن عشان مشفناش بعض من كام شهر , لكن لما دخلت اللجنة والمراقب يصمم ان مش اشبه الصورة اللي في الكارنية خلاني افكر هو انا صحيح اتغيرت ..؟ لكن صدقت بجد وامنت لما شفت بنت عمي وانا خارجة من الكلية ومعرفتنيش ...!!! بنت عمي مشفتهاش من الصيف اللي فات وبرغم اني عرفتها وهي كمان اتغيرت بس انا عرفتها ..ازاي هي متعرفنيش ...؟ مش معقول فعلا اكون اتغيرت اوووي.....................


وكل مرة في الامتحانات يحصلي موقف طريف اووي المرة بقي كان مع الامن علي بوابة الكلية مهو مش معقول يا جماعة مش فاهمة انا اية لازمته اني ادخل من بوابة واخرج من بوابة تانية والبوابتين جنب بعض ...!!؟ اليوم الاول وانا بدخل الكلية رجعني عسكرثي الامن وقالي م البوابة التانية يا انسة قلت له لية ما هي أي بوابة وخلاص رد قالي واللله معرفش ابقي قولي لحضرة الظابط ........بصراحة مكنتش رايقة وكنت قلقانة فقلت استسلمي المرة دي وعديها يا حوبة وبلاش مشاكل من اولها واهو كنت لسة مدخلتش ولا حاجة يعني , ودخلت وانا بقول لنفسي يمكن بوابة للدخول صغيرة عشان بيكون كل واحد جاي لوحده وبوابة الخروج كبيرة عشان الطلبة ما بيصدقوا يخرجوا من الكلية ...ههههه


وتاني يوم كنت نسيت حكاية البوابة وبعد ما دخلت ومشيت يجي مترين لقيت اللي بيقوللي ارجعي يا انسة وادخلي من بوابة الدخول انت دخلتي من بوابة الخروج ...يا سلام انا دخلت خلاص لسة هرجع تاني يا عم عديها مش مشكلة المرة دي ....مينفعش يا انسة ....بصراحة كنت هسمع الكلام واعديها , لكن لقيت ناس تانين داخلين وسايبهم وماسكني انا....ف بصيت له بتحدي ولقيت نفسي بعمل زي ما عملت سعاد حسني للاولاد في فيلم صغيرة علي الحب لما كانت متقمصة دور بنت صغيرة وطلعت له لساني .......ودخلت من بوابة الخروج وسيبته يبرطم زي ما هو عايز....
وفي اخر يوم امتحانات حبيت اكافيء نفسي بالايس كريم اياة وشوية مجلات كدة مقريتهمش من زمااان من ايام ما كان احمد ابن عمي بيشتغل في مصر للطيران لما كان يجيبلي مجلات اشكال والوان افضل اقرا فيها لغاية الشهر ما يخلص ويجي احمد تاني ومعاه مجلات تانية , بس مالقيش للاسف غير مجلة واحد بس هي زهرة الخليج اللي بجد اتغيرت كتيير بس للاحسن بجد وساعتها اتحسرت علي حال الصحافة عندنا
خلاص عدت الزوبعة بتاعت الامتحانات وبقيت رايقة وفايسقة للافلام الاجنبي والنت والمدونة والنوووووم الله ع النوم
بس للاسف لسة برضه مش عارفة لية كل ما حد يشوفني يقولي انت اتغيرتي وخسيييييتي اوووي كدة لية مع اني مش حاسة بده خالص , وبرضه لسة مش عارفة لية مش بعرف اكل غير نص رغيف

رحاب صالح





الأحد، 7 فبراير 2010

Pray for me thank you









ادعي لي شكرا ....ما هو في كلمني شكرا , اشحنلي شكرا , وسلفني شكرا ...ليه ميبقاش في ادعي لي شكرا ...!!؟


ما هو انتم عارفين إننا في معمعة الامتحانات اللي لازم يكون فيها الدعاء من قلبك ومحايلة من اللي حوالبك عشان يدعولك , هتقولولي ذاكري هو يعني هندعيلك وانت مش بتذاكري ....! طيب كدة هتنجحي ازاي...! يا جماعة انا بذاكر والله وقاتلة نفسي مذاكرة بس اعمل اية وانا بقي عاملة زي المثل اللي بيقول قليل الحظ يلاقي العضم في الكرشة


ييييععع اية الامثال الوحشة دي , ما هو يعني اعمل اية وانا كل تيرم يطلعلي حاجة تقلق تفكيري وتخليني قلوقة ومش عارفة اركز حلو في المذاكرة , يعني مثلا التيرم اللي فات مش ممكن انساه ابدا وهو ده يتنسي فاكرة ان كان عندي امتحان وكنت تعبانة وقلت انام واصحي الفجر اصلي وافضل اذاكر قبل السفر للكلية وكنت عند اختي لان جوزها مسافر وهي حامل وعلي وشك الولادة وماما بقي قالتلي مينفعش تسيبي اختك لوحدها ونسيت ماما اني عندي امتحان _ تقولي اياكش يولع الامتحان المهم اختك تقوم بالسلامة _ وطبعا بنت اختي اللي هي عاصفة اصرت ايما اصرار الا ان تيجي للدنيا المهببة دي ليلة امتحاني وكانت ليلة لا نمت فيها ولا ذاكرت وروحت الامتحان وانا نايمانة خالص وشربت قهوة ونسكافية بلاك وشاي وكابتشينو ولا أي حاجة خلت النوم يروح مني ودخلت الامتحان مش فاكرة غير عياط البنت المفعوصة عاصفة العصوفة اللي بيقولوا ان عنيها حلوة زي عيني _ آه بيثبتوني _ طييييييب


ماشي التيرم ده الحمد لله ما في حالة ولادة ولا حالة جواز بس في حالة خطوبة وحالة سفر , بنت خالتي بتتخطب , وابن عمي جة من قطر بعد غربة ثلاث سنوات ..................


ماما بتقولي : هاه خلصتي غسيل , هتكوي الهدوم دي النهاردة والا بكره , كنت عايزاكي تروحي تشوفي رشا كدة متنسيش انها حامل ابقي اشتري لبن وزبادي وبيض وانت رايحة لها


انا عايزة اصرخ بس بقول مينفعش دي ماما , مسكت نفسي وحاولت اقول بهدوء: انا مش فاضية انت ناسية يا مامي اني عندي امتحان بعد بكرة ...!!؟؟


ماما: لاء مش ناسية , ابقي ذاكري بالليل , انت بتسهري وبتقومي من النوم بعد العصر


آه كسفتيني يا ماما طيب حاضر يا ماما


ماما : طيب هتروحي لبنت خالتك دي خطوبتها بكرة , وكمان عايزاكي تيجي معايا تشوفي ابن عمك


انا : ما تخليها الاسبوع الجاي يا ماما ابارك لبنت خالتي وابقي اروح اشوف ابن عمي واقوله مع السلامة ...قصدي حمد الله بالسلامة........... كل كلامي بقي ملخبط


ماما : مينفعش ....هو بعد العيد بينفتل كحك...هتروحي تباركي بعد الخطوبة باسبوع ..! واللي جاي من السفر تروحي تشوفيه بعد اسبوع ..! اية قلة ذوقك دي


امممممم يعني هو ميحلاش الخطوبة الا دلوقت , ويعني ابن عمي مكانش ممكن يجي الشهر الجاي , مش كفاية بنتك شيرين مش راضية تترجم لي التدريبات دي


شيرين : يا سلام مش انا ترجمتهالك قبل كدة والا هي شغلانة يعني


انا : يا بنتي دا انت بتشرحي للجيران وجيران الجيران ولحد عندي وبتقفي والا يعني هو باب النجار مخلع


شيرين: لاء يا ماما ابقي احفظي الكلمات انت بس بتحفظي كلمات الاغاني لكن المذاكرة لاء


اوووووووف ماشي يا ست شيرين, طيب مش هتدعيلي يا شيري


عبير اختي قالت لي انت عارفة ان دعوتي مستجابة وكمان ممكن احلم لك حلم ويتحقق وتجيبي بلاش ممتاز خليها جيد جدا بس كله بتمنه , هاتيلي تورتاية وانت جاية وانا ادعيلك دعوة كدة تنجحك والله واما بقي اذا مجبتيش حاجة انت عارفة دعوتي مبتنزلش الارض ابداااااااا


اهيء اهيء اهيء اهيء


قلت اكلم احمد اخويا , ميدو حبيبي شايف اختينك عبير وشيرين عاملين فيا اية


ميدو: متقلقيش ذاكري يا حبيبتي وربنا يوفقك, بقولك اية ابقي اشحنيلي علي خط فودافون الا مفيهوش رصيد وكمان موبينيل يا حوبة يا قمر ....اتصالات بقي مش مهم مش بستعمله كتيييير


عاااااااااااااااااااعاااااااااااااااااااااعااااااااا


النهاردة الجمعة فضلت ادعي ربنا كتير وقبل ما بابا يخرج يصلي ف المسجد حلفتة بكل عزيز وغالي يدعيلي كتير ده يوم مفترج وفيه ساعة استجابة


وبقيت حاسة ان كل حاجة ملخبطة


واول ما بابا دخل البيت بعد صلاة الجمعة ...جريت استقبله واسأله بسرعة ...هاه يا بابا دعيتلي


واول ما ماما خلصت صلاة سألته نفس السؤال


اية يا حوبة اللي جرالك , هي دعوتهم يعني اللي هتنجحك والا هي بس اشتغالات


امممممممم لا والله بس برتاح لما الاقي حد بيدعي لي دعوة حلوة وبنت حلالالالالالالالالالال


ادعولي والنبي






حوبة


السبت 6فبراير 2010

الأربعاء، 3 فبراير 2010

البحث عن السعادة






نبحث دائما عن السعادة, نبحث عنها في النجاح في الكلية, ونجاح صداقتنا, نجاحنا في ما نمتلك من موهبة, ونبحث عنها كثيرا في حياتنا العائلية ونسعى أن نحصل علي حياة زوجية سعيدة, ولكن كيف لنا أن نحصل علي تلك السعادة...؟


قد يجيب البعض بالحب فالزواج بدون حب زواج فاشل


وأنا أن كنت مؤمنة تماما أن الزواج السعيد أساسه الحب ولكن هذا ليس مقياسا فهناك زيجات كثيرة بدون حب وتقليدية جدا وناجحة أيضا جدا , وعلي عكسها تماما زيجات كثيرة انهارت بعد اقل من سنة برغم أنهم متزوجون عن حب ..ّ! فما هي المشكلة ...؟


يقولون أن الحب الناجح يكون فيه الطرفان متشابهان في كل شيء أو علي الأقل متشابهان في أشياء كثيرة وان الأزواج المختلفان في الصفات فكثيرا ما تفشل حياتهم...!


فكرت في تلك المقولة كثيرا واستغربتها وتشبهت في عقلي بدرس العلوم في المدرسة عندما علمونا أن الاقطاب المختلفة للمغناطيس تتجاذب والأقطاب المتشابهة تتنافر ولكننا بالطبع لسنا مغناطيس وان كانت تلك النظرية قد طبقت علينا بالفعل


لسنا مغناطيس ولسنا درس علوم ولا حتى معادلة كيميائية أو مسألة رياضيات فكل تلك الأشياء تحكمها قوانين ثابتة أما نحن فلا...ليس لنا قانون أو نظرية أو قاعدة ثابتة فلما لا نترك أنفسنا نخوض التجربة ولا ننظر ورائنا...لا ننظر لتجارب الفشل التي تحيط بنا , بل ننظر لمستقبل نرسمه كل لحظة كيفما نشاء نتفق حين ونختلف حينا ولكننا في النهاية لا نيأس ونحاول النجاح ونحاول أن نستمتع بطعم السعادة المختلف كل وقت






رحاب صالح