السبت، 31 مارس 2018

ملل .....الانتظار


تقول لي انك مشغول طوال الوقت, بينما أري في مواقع التواصل الاجتماعي تفاعلك مع كل الأصدقاء ماعاداي..
اتركك بالأيام لعلك تشعر بغيابي فتشتاق لي 
يصيبني الملل من طول الانتظار 
أحاول أن أكتب شيء تقرأه لعلك تشعر بي
تقرأه ولا تهتم كأنك تقصد أن تثير غضبي وحنقي وحسب
يقولون أن الحب حزن وآسي , وكنت أنا أعتقده فرح وراحة 
كنا كلما ألتقينا ترتدي نظارة شمسية تداري بها انفعالاتك وكلما مددت يدي لانتزاعها رفضت أنت 
صرت أنا الآن مثلك أرتدي واحدة مثلها أداري بها اشتياقي ولهفي عليك
وأخبيء بها حزني وخيبة أملي فيك 
صارت نظارتي الشمسية لا تفارق عيني ...صرت أخبيء بها كل شيء ليس عن الأصدقاء الذين يسألونني عنك  وحسب بل عنك  وعني أيضا 
صرت أخبيء عن نفسي حزن...واشتياق...ولهف...ورجاء و أمل 
صار ضوء الشمس يؤلمني لأنه يظهر لي عكس ما أقول 
كانت ظلال النظارة التي تخفف حدة الشمس عن عيني تؤلمني لأنها تظهر عكس ما أتمني
لعلك تذكر موعدنا...لعلك تناسيت...لعلك اشتقت ...ونسيت
أنتظر...
انتظرك ...
رغم علمي أنك سافرت

الجمعة، 2 مارس 2018

احمد ....

السنة اللي فاتت أول يوم في الدراسة الولاد والبنات في سنة أولي إعدادي كانوا بيحسبوني طالبة وده خللي مساحة الحرية بيني وبينهم كبيرة وبقينا أصحاب بسرعة 
فصل واحد من سنة أولي مكنتش بحب الحصص عنده ...فصل أولي تاني 
فصل مكانش حد م المدرسين بيحبه لأنه فيه طلاب كتير مشاغبين 
أنا وميس راند اللي كنا بس بنعرف نتعامل معاهم هي بالتجارب  والتمثيل بالمنهج الانجليزي الي بتخليه ممتع  بال السبورة التفاعلية
وأنا وأنا عايشة معاهم تجربة ذا فويس كيدذ واستخراج مواهبهم  ...
الفصل مكانش فيه طلاب تشجع والغالبية مشاغبين بنات وولاد  
ولد واحد بس اللي لفت نظري لما عرضنا بالسبورة التفاعلية رسومات ولوح لفنانين ورسامين مشهورين
احمد كان في المقعد الأول في وسط الفصل مع أمير , طلع اسكتش الرسم وقالي ...أنا رسمي أحلي منهم 
فعلا كان رسمه احلي لأن كل رسوماته طبيعية وألوان مبهجة , غالبية رسوماته كانت بحر ومركب بشراع وسما وبحر أزرق والشمس دايما ليها عيون وشفايف بتضحك ....
كنت تحس الرسمة بتبتسم أو بتنعشك ...
احمد كان طالب متفوق...خلوق ...من الأوائل ...وكان طالب مثالي مفيش اي شكوي منه من مدرسين أو طلاب 
لما اكتشفت موهبته في الرسم بدأت اشجعه وأصوره هو ورسوماته وانشر الصور علي صفحة  المدرسة ,كان طول الاسبوع في الوقت اللي انا مش عندي حصص لفصلهم ينزل لمكتبي  ومعاه اسكتش الرسم يوريني الرسومات الجديدة ...
وخلصت السنة وانا واحمد اصحاب جدا برغم اني محبتش الفصل اللي كان اسمه فصل المشاغبين بدل فصل اولي تاني 
أحمد كان من اوائل السنة دي زي كل السنين الي فاتت في الابتدائي ....
في أجازة الصيف انا كان عندي تدريب لمدة شهرين ولما رجعت المدرسة عرفت ان احمد مريض...:( 
حاولت ازوره بس كان طول الوقت مسافر للعلاج, وبرغم ذلك كنت بروح تاني واسأل عليه حتي لو كان الرد انه مسافر ...
السنة الدراسية الجديدة بدأت واحمد مريض...
امتحانات نصف العام واحمد جه عشان يمتحن ...كنت هتجنن وأشوفه ونزلت جري م الدور الخامس عشان أشوفه بس ملحقتش ...تاني يوم صممت اني مطلعش اللجنة غير لما أشوفه لانه كان في لجنة خاصة في الدور الأول عشان ظروف مرضه ...شوفته ويا ريتني ما شوفته كان حاجة تانية خالص غير احمد  اللي اعرفه ....المرض حاجة وحشة أوي ...
كنت بحسبه مش فاكرني وانه نساني لكن بالعكس لقيته بيعاتبني اني مبسألش عليه ومش بزوره ...
طول فترة الامتحانات كنت لازم اشوفه الصبح  اول ما يجي و بعد الضهر قبل ما يمشي ...كنت بحس ان برغم خوفي ان اجرحه بحزني عليه نفسي احضنه واخفف عنه ...مكنتش ببين حزني وكنت بضحك دايما واهزر معاه ...
اخر يوم في الامتحانات اشتريت له شوية مجلات اطفال يتسلي فيهم ....وقلت له يرسم كتير عشان اخد رسوماته وانشرها علي صفحة المدرسة واعلقها في معرض المدرسة ...كان مبسوط اووي لما قلت له اني هزوره في الاجازة ...ومبسوطة انه لسة بيعرف يرسم رغم المرض 
احمد طلب مني حاجة من ادوات الرسم وانا وعدته اني اجيبهاله, للأسف انا مقدرتش اوفي بوعدي لان ملقتش الحاجة اللي طلبها , وفضلت يوم ورا التاني أقول لنفسي لاء مش هزوره الا وانا معايا الحاجات اللي طلبها ويوم ورا يوم ....
لغاية ما في يوم عرفت انه أحمد راح للسما اللي رسمها وللشمس اللي بتضحك 
فضلت الوم نفسي واعاتبها اني مروحتش شوفته قبل ما يموت حتي لو مكنتش وفيت بوعدي بالطلب اللي طلبه مني ...
نصيحة متستنوش  الوقت اللي في نظركم مناسب  لزيارة شخص مريض  لانه جايز الوقت المناسب ده يجي بعد فوات الآوان 
وتندموا انكم معرفتوش تشوفوا الي بتحبوهم قبل ما يمشوا ...
واحد مارس 2018 هيفضل يوم محفور في تاريخ مدرستنا كلها لدرجة اني حسيت ان حيطان الفصل والمدرسة والشجر والحجر والرمل بيبكي علي احمد مش  مدرسين وطلاب ......الجنازة مالهاش عدد من طلاب المدرسة والمدارس التانية .... هفضل كل ما ادخل الفصل ابص للمقعد اللي كان بيقعد عليه ....هفتكر وقفته في الفصل وكلامه مع زمايله ...ابتسامته ...وهدوءه واخلاقه 
:( :( :(
" ماذا لو رحل الذين نحبهم قبل أن نقول لهم كل شيء"
احمد طالب في تانية اعدادي 13 سنة 
احمد مات امبارح من غير ما اشوفه ومن غير ما وفي بوعدي له 
احمد مات وانا اللي كل يوم اصلي وادعي له ان ربنا يشفيه ويعافيه 
احمد دلوقت في مكان احسن مفيهوش ألم ولا خوف ولا مرض
مكان فيه شمس بتضحك وسما وبحر ومركب بشراع بألوان مبهجة
إدعوا لـ احمد بالرحمة