السبت، 30 أبريل، 2011

يــــــوتــــــــــــوبيــــــــا......؟؟؟!!!؟


كنت في ميدان التحرير 
وكعادتي دوما  مهما حدث أقف عند بائعي الكتب والجرائد أتأمل وأتفحص عناوين الكتب علني أجد كتاب جديد كنت أبحث عنه أو كتاب لم أقرأه بعد....
ووجدت كتاب للدكتور أحمد خالد توفيق  فالتقطه وأنا أسأل البائع " عندك يوتوبيا...؟"
فقال " نعم"
قلت أخيرا ده انا بقالي سنتين بدور عليه
وتدخلت فتاة كانت تشتري كتاب ما " دي رواية تحفة بجد أنا بموت ف احمد خالد توفيق  "
قلت لها " ده شخص عظيم ومتواضع جدااا"
قالت " هو من القاهر ة...؟"
قلت " لاء من طنطا ...."
هي " بجد...؟!!...."
انا " آه بجد  من طنطا وحضرته له ندوة كمان واتصورت معاه  " كنت بقولها بفخر واعتزاز اووووي
هي بحسد" يا بختك ...طب قوليلي هو عامل ازاي ...بيتكلم ازاي ....يعني هو شكله اية...؟....اسلئة متلاحقة ...ولكتني كنت صبورة  وحكيت لها كل ما اعرفه عن الدكتور احمد خالد توفيق ....
انبهار بشخصية هذه الكاتب الانسان ....الذي يزداد عشاقه يوما بعد يوم وينبهرون بشخصيتة المتواضعه وكانبهارهم بروايته وقصصه
                                     

                        يـــــــوتوبيا
تلك الماساة
يا الله بجد
بالرغم من كل ما قاله لي أصدقائي الذين قرأوا الراواية
بالرغم من كل ما قرأته علي مواقع ومنتديات وجرائد عن الرواية
برغم كل انبهارهم وانبهاري
فالرواية .....لا أجد وصفا لها
فهي حقا الواقع المرير
كلمات...وشخصيات وحتي أسماء الشخصيات مختار بعناية  وذو معني
البداية  والنهاية.....الغلاف
الورق الاصفر للرواية
اللون الابيض للغلاف
اللون الابيض الدال علي الحياة والموت
دكتور أحمد خالد توفيق  نقل لنا واقع ما نعيشه كل يوم حتي وان لم يكن بنفس طريقة يوتوبيا  الرواية
برغم كل ما عانيته في قرائتها الا انني مع كل كلمة ولمحة وتعبير.......أزداد يقينا أنها حقيقة .....للأسف
 كنت أود لو أنشر بعض من كلمات الرواية التي ابهرتني ولكني رأيت أنني لن أكون منصفة
فحقا الرواية ....رائعة ولا أستطيع نقل بضع كلمات منها فقط
و....بالنسبة لي ....برغم كل الالم الذي عانيته ف القراءة..... حافظت علي الصفحة الاولي بيضاء حتي لقاء الندوة القادمة للدكتور احمد خالد توفيق " عشان توقيعه عليها طبعا " وكتبت اسمي والتاريخ ف الصفحة التالية  كعادتي دوما عندما اشتري كتاب "
 يا رب يكون لقاء قريييييب

الثلاثاء، 26 أبريل، 2011

ميدان التحرير ...كلاكيت أول مرة

أعشق ميدان التحرير  جدا عشق ماله وصف أو حد....
من قبل الثورة ....وليس مثلما أحبه كثيرون من بعد الثورة
أعشق  هذا الميدان لآنه كان  ملتقي الصحبة
فدوما  كنا نلتقي هناك....نتفق علي يوم ونلتقي ...كل منا من محافظة مختلفة ومنا من القاهرة
أعشق المكان لآنه مرتبط بالأصدقاء
ولكني أيضا أعشقه كمكان له تاريخ
لم يقدر لي أن أشارك في الثورة ....للأسف
وكان يوم 14 يناير 2011 هو أخر يوم رايت فيه ميدان التحرير ....
وكم كنت اتمني أن أذهب واشارك .....لكن قدر الله وما شاء فعل
وأخيرا يوم 20 أبريل 2011 تنفست هواء الثورة ....وذهبت لميدان الاحرار
ولــــــــــــــــكن....وآه من لكن هذه
كان أسوء يوم بحياتي
لم أكن أتخيل  أن أري كل شيء كما هو ...وما تغير شييء
فمازال الناس تأكل وترمي بالقمامة بالشارع
مازال المتسولون يملؤن الميدان
ومازال الناس  بجوار المتحف المصري يضايقون السائحين بكل الصور من أول " ويلكم تو ايجيبت " إلي " فيفتي دولار"
مش عارفة بجد اتخنقت أووي  من ان كل شيء زي ما هو متغيرش
أما بالنسبة لجو مقاطعة كنتاكي وهارديز وماكدونالد ...فهذا وهم بالتأكيد لان تلك المطاعم تعج بالمصريين
المعاكسات ...بكل شكل ولون
اما الاعتصام أو لفت النظر فحدث ولا حرج
فقد كانت هناك سيدة تحمل لافته تنادي بعودة الحزب الناصري   وكلام كتير مكتوب مش مرتبط ببعضه بس اهي هوجة وقفات اجتجاجية ومظاهرات .....وساعتها وانا واقفة اقرأ المكتوب  ع اللوحة سألني طفل " هو إية الحزب الناصري ده ..؟ هو في حزب اسمه الحزب الناصري عندنا ف مصر ...؟" وعلي فكرة انا شرحت للولد كل اللي اعرفه عن الحزب الناصري
لفت نظري شيء  غريب .....علي الطرقات  وخاصة الكورنيش .....كتبت كلمات مؤيدة للرئيس المخلوع ...وقفت كثيرا لقرائتها وقلت لمن معني ...حتي مؤيدي الرئيس المخلوع مخدوش بالهم  اننا هندوس ع الكلام ده ... باحذيتنا....؟ غباء غريب فعلا
صدمت جدا  بما رأيته ...فقد كنت  أتوقع أن تغيرنا الثورة للأفضل ....ولكن
لا يغير الله ما بقوم حتي يغيروا ما بأنفسهم
واحنا للأسف .....متغيرناش

الأحد، 17 أبريل، 2011

تــــــــــــــــــ الحــــــــب ـــــــــــــــــــاج أم تــــــ الثورة ـــــاج...؟

صباح الورد....أو مساؤه ....^-^
طبعا أنا اتدبست ف التاج ده من الاستاذ ماجد القاضي  واللي عمل نفسه شهيد وقال ان الاخت مجداوية هي اللي أمرتني بيه...."مش بحب الاوامر أنا" ....مممم بهزر طبعا أنا فعلا عجبني التاج جدا وكنت هعمله  ....وبشكرهم جدا وعارفة انها مش أوامر ....^-^
الـــتـــــــــــــــــــــــــــاج
هل توقعت ثورة 25 يناير ...؟
بالطبع لا ......أنا قلت انها مظاهرة عادية زي كل مرة ومتوقعتش ولا تخيلت ان ده ممكن يحصل  ,. حتي قلت الكلام ده لأصدقائي وصديقاتي اللي كانوا هناك ف اليوم ده ,,,,, وفاكرة كويس اني قلت لصديقتي الوفدية ميادة ....يا ريت تعبكم يجي بفايدة مش زي كل مرة .....
هل كنت من ثوار ميدان؟ التحرير _ الكنبة _ الكمبيوتر _ حدد الميدان الآخر الخاص بك؟
للأسف كنت أتمني فعلا اني اكون هناك لاني بعشق ميدان التحرير  , بس ده كان استحالة اولا لان كان عندي امتحانات  وحتي الامتحانات بابا وأخويا وماما رفضوا تماما إني أروحها فما بالكم إني أقول لهم رايحة التحرير ...؟؟؟!!!
بس كنت متابعة مع أصحابي دايما حتي لما انقطع النت والاتصال ....التليفون الارضي كان موجود وكمان بلطيم من البلاد المحظوظة اللي متقطعتش فيها الاتصالات كتير ,  وبلطيم عموما بلد هادية جدا ومحصلش فيها الا أشياء قليلة جدا , وحتي لما امتحاناتي تأجلت  رفض بابا اني اخرج من البيت حتي ...والصراحة أنا كان  نفسي بس  ظروفي العائلية وكمان اللي حصل عندنا مكانش زي ما تمنيت  ....يعني  لما سألت  واحد من المتظاهرين رايحين تعملوا إية ؟؟؟قالي رايحين نولع ف مقر الحزب الوطني ومركز الشرطة....وانا أكره التدمير بكل صورة ....وف الاول والاخر دي بلدنا ولازم نحافظ عليها ...ده رأيي الشخصي ...
مالم تنجح الثورة في تحقيقه هو...... اختار شيئا واحدا؟
 معرفش أقول شيء واحد .....بس يمكن زي ما قال الاخ مصطفي سيف  انها مقدرتش ترسخ مفهوم الديمقراطية او معني الحرية الحقيقية , وأزيد الاختلافات في وجهات النظر.....يعني لسة متعودناش نختلف مع بعض باحترام .....الفوضي والفوضي والفوضي ...............
أكثر شىء فرحك في هذه الثورة هو...... اختار شيئا واحدا؟
الاصرار......عجبني الاصرار أووي علي ان كل شيء يكون في نصابه الصحيح...وطبعا عجبني السلوكيات الجميلة اللي شفتها  وسمعتها من أكتر من شخص كان في الميدان ....لا تحرش ولا مضايقات ولا اي لفظ غير لائق ولا رمي ورقة في الشارع حتي ......

الشخصية التي اعجبتني خلال الثورة ...؟
كل شخص  قال رأيه قبل واثناء وبعد الثورة ولم يغيره ....." مش زي ما كان واضح من بعض الشخصيات ...معاهم معاهم عليهم عليهم..."
الشخصية التي احتقرتها بسبب الثورة؟ برضه نفس اجابة السؤال السابق ......بس شخصيات كتيييييرة جدا فعلا صدمت فيها ....منها شخصيات كنت .....اكن لها الاحترام والاعجاب .....ولا داعي لذكر اي اسماء لان القائمة تطول......
أظرف شيء سمعته خلال الثورة ...نكتة ...تعليق ...حدث ...أخري
ياااااااااااة كتير .....بس يمكن الاظرف فعلا ....اللي قالته لي صديقتي ...من ان خطيبها قالها " يا شيخة حللي عني بقي وانت عاملة زي الريس كدة لازقة ومش عايزة تسيبيني " بصراحة .....هم يبكي وهم يضحك....
القناة التي تابعت من خلالها أحداث الثورة هي؟
ف البداية كانت الجزيرة ...
ثم كانت البي بي سي
العربية.....
وبالنسبة  للاعلام المصري ....:انا نفسي بجد اروح انسفه .....
الجريدة التي كنت تتابعها ።።።؟
لاء مفيش جريدة محددة,,, بر غم اني اصلا لغاية دلوقت احب الجريدة الورقية عن المواقع الالكترونية ....بس كنت بتابع ع النت ولما النت فصل ....كنت بشتري تقريبا كل الجرايد عشان اعرف الاراء  واختلاافتها ...والله بقي علي الجرايد القومية ....ولا اروع...." سخرية طبعا.....^-^....هو حد بيصدق الناس دي"
الكاتب المفضل خلال الثورة هو؟
كل شخص احترم رأيه ورأي غيره ...واحترم نفسه واحترم غيره ....

بس لو قلت اسم واحد بس ....يبقي دكتور احمد خالد توفيق
المذيع (المذيعة) المفضل خلال الثورة هو؟
لا يوجد شخصية محددة
كلمة لشهداء الثورة ؟
بحسدكم فعلا
" ولا تحسبن الذين قتلوا في سبيل الله أمواتا "
" ان من مات لقوله كلمة حق .....لا يموت ابدا "
متقولش إية اديتنا مصر وقول هندي إية لمصر ؟ عندك حاجة تديها لمصر ؟
اديها من كل شيء ።።።።።።علم ።።።።ونظافة واستقرار ።።።وحب واهتمام ።።።።።وكل يوم وكل وقت ።።።።واخليها تفتخر بيا طول الوقت ።።።
من سترشح لرئاسة الجمهورية ؟ ولماذا ؟
أكيد مش اي شخص وخلاص ።።።።።الشخص اللي هحس انه فعلا بيحب مصر ومش بس مجرد كلام።።።።الللي هيعرض برنامجه الانتخابي بدون مبالغة ።።።።واللي هيحسسني فعلا انه خايف علي البلد وعايز رفعتها وتنميتها  ويخليها تسترد مكانتها  بين دول العالم

لو أصبحت رئيسا لمصر ما هي أول ثلاث قرارات لك؟

ثلاث قرارت فقط።።።።ممممممم صعب
بس أكيد أول شيء هفكر فيه  التعليم ።።።።لانه زي ما قلت قبل كدة شيء مهم جدا ولو صح صحت الدولة كلها ولو فسد فسدت الدولة كلها ።።።።وطبعا كلكم عارفين التعليم عندنا عامل ازاي
تاني شيء  لا للتطبيع  مع الاعداء ።።።።إلغاء اي اتفاقيات معهم
ثالث شيء ።።።።።الإجور።።።።يعني لو كل واحد اخد حقه أكيد مش هيبقي في سرقة ولا نهب ولا دروس خصوصية ولا رشاوي ።።።።كدة يعني
علي فكرة ثلاث اشياء دي مش حلوة خاااااااالص
* لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال؟
أكيد في حاجة تنفع البلد اي شيء ።።።።ويمكن يكون  شيء بتمناه جدا ።።።።زيادة الاهتمام بالتثقيف والقراءة والعلم ።።والاهتمام بالمواهب ።።።።عشان يبقي عندنا نوابغ زي زمان ።።።።مش مواهب ف التمثيل والرقص يا جماعة ።።።مواهب في العلم والثقافة والادب ።።።።።

ابعت التاج ده لـــــ
اسلام ....كلام مجانين .....مع الاعتذار الشديد ...وانت عارف لية
محمد متولي ....رحلة حياة
مروة صابر ....سنابل الامل .....صديقتي الصغيرة الاخوانية اللي راحت التحرير وحكت لي عملت اية هناك ...وكنت ومازلت بحسدها

علي فكرة انا حاسة اني مقدرتش اقول اي شيء ....من اللي جوايا ...وبعتذر فعلا لاني بجد مقدرتش اقول اي شيء .....آسفة

رحــــــــــــــاب صالح

الخميس، 14 أبريل، 2011

تـــــــــــــــــــــــ الثورة ــــــــــــــــــــــاج

لفت نظري عند متابعتي للمدونات باليومين الماضيين  بوست تاج الثورة  , والحقيقة انا مكنتش اعرف مين صاحب الفكرة لغاية ما قرأت بوست الاستاذ ماجد القاضي وعرفت  صاحبة الفكرة " مجداوية"  ودخلت المدونة فعلا بس وجدت انها لا تفتح بسهولة ثقيلة ف التحميل ...يمكن من كثرة الفيديوهات.....وانا اصلا لا احبذ مشاهدة الفيديوهات
المهم....اني أعجبت جدا بالتاج
وإليكم ما لفت نظري بالتفصيل
أولا ....من قرأت  لهم هذا التاج جميعهم لم يذهب ولم يشارك في الثورة....!!!
لآسباب....
صحية.....
اغتراب .......
ثانيا....جميعهم  تكلم من وجهه نظره.....
ودي شيء مش غلط....لكن.....
ثالثا....لاحظت أن اجابتهم متشابهه في اشياء عدة....
وده برضه مش غلط...
دلوقت اكيد كل واحد فيكم حاسس اني بلعب ف الوقت بدل الضايع ومش عارفة اجيب جون....
محدش فاهمني انا لية مضايقة....؟؟؟؟!!!
صح....صح انا مضايقة......
تعرفوا لية......؟؟؟؟؟
لان كل اللي قرأت لهم التاج بتاع الثورة نسي اهم شيء  في سؤال " لو أصبحت رئيسا لمصر ما هي اول ثلاث قرارات  لك؟
يعني اختلفت الاجابات بالاهتمام بالبحث العلمي وحد ادني للاجور والاهتمام بالقضاء علي الفساد ....وغيره وغيره....لكن مفيش اي شخص فيكم فكر في شيء مهم جدا ....واللي هو العلم والتعليم.....انتم ناسين ان التعليم ده هو اساس اي دولة...؟ لو صح صحت الدولة كلها ولو  فسد فسدت الدولة كلها....للأسف مفيش حد من اللي قرأت لهم التاج فكر في التعليم خالص لما يبقي رئيس دولة....انا بجد زعلانة منكم......زعلالالالالانة
هحكي لكم موقف ظريف خالص عن التعليم
انا في عام 2004 عملت في مدرسة ابتدائية ....لمدة عام دراسي وبجد كان من أجمل فترات عمري ...واللي مش قادرة انساها ابدا برغم اني نفسي انساها عشان صديقتي " رحمها الله"
في يوم كنت مع الاولاد في غرفة المكتبة....وجدت "أيمن " وهو طفل ذكي جدا وموهوب  للغاية ومحب للقراءة جدا....أيمن  أخد قصة وراء قصة وراء مجلة ....وفجأة لقيته جاي يقولي ...." يعني اية علاقة جنسية غير شرعية "
أنا ذهلت ....بس سالته " لية بتسأل السؤل ده...؟" لقيته بيديني كتاب  بيتكلم عن الايدز .....كتاب عن الايدز في مدرسة ابتدائي ....؟؟؟
عرفتم لية انا بقول الاهتمام بالتعليم والعلم كان المفروض تفكروا فيه .....؟؟؟
وللأسف أحبطتوني جدااااااااااا
أنا محبطة

الأربعاء، 13 أبريل، 2011

أنا......وأنا

هل هو الكلام الذي يحدث التفاهم بين الارواح المتحابة ...؟
هل هي الاصوات والمقاطع الخارجة من بين الشفاه  والالسنة التي تقرب بين القلوب....والعقول...؟
ألا يوجد شييء أسمي مما تلده الأفواه وأطهر مما تهتز به أوتار الحناجر ....؟
أليست هي السكينة التي تحمل شعاع النفس  إلي النفس وتنقل همس القلب إلي القلب ....؟
أليست هي السكينة التي تفصلنا عن ذواتنا فنسبح في فضاء الروح غير المحدود مقتربين من الملأ الأعلي شاعرين بأن أجسادنا لا تفرق السجون الضيقة وهذا العالم لا يمتاز عن المنفي البعيد...؟
وهذا العالم لا يمتاز عن المنفي البعيد
وهذا العالم لا يمتاز عن المنفي البعيد
" الأجنحة المتكسرة...جبران خليل جبران"

أحيانا كثيرة لا أعرفني.....أنا
وأنتظر أن تعرفني أنت.....
قد أعرف.....ولكن بعد فوات الآوان ..........كما قلت.....أنت
ولكن......لما تركتني ........ولم تساعدني.....  لأعرفني
فأنت تعرف جيدا........كل ما مررت به.........وتعرف مدي خوفي .....الذي يجعلني قد أفعل أشياء بطريقة غريبة.....
أوقات صمتي..............كثيرة
لآنها................تحكي أكثر
صدقت........فــ كلمة اسف .....لا تجدي نفعا
وكلمة حب.....قد تؤلم أكثر
أحيانا .......نحتاج للحظات يتوقف فيها عقرب الساعة  للحظة حب ....ولا ندعها تمر....بل ندعها تستمر وتستمر...........للأبد
وأحيانا.....نحتاج لآلة زمن.....لنعود ونمحي ....أثار ما اقترفته أيدينا من إثم في حق من نحب......ولكن....للأسف....لا نستطيع الندم علي ما فعلناه وقد ذهب للأبد
أتمني ...لو كان باستطاعتي ............البوح لك ....وقتها....بما شعرت
فساعتها فقط ....كان تغير الامر
ولــــــــــــــكن.......أنها........... تدابير القدر
     ........                .................                 ................

الثلاثاء، 12 أبريل، 2011

ألم تكن هذه بلدنا منذ ولدنا ...؟

لم أشعر برغم كل شيء ان هذه ليست بلدي ...
برغم كل الفساد
برغم كل القهر المادي والمعنوي
برغم انني فكرت ف الهجرة  اكتر من مليون مرة ولاسباب كثيرة  جدا
ولكن مع اندلاع الثورة .....
وجدتني أشعر بإحساس غريب .....بدأت أشعر بأن ما كنت أحلم به من تغييرللأفضل قد بدأ يتحقق
ولكن..................
ومع مرورالايام وما قد رأيت من أحداث مؤسفة وجدتني غير قادرة علي ...فهم ما يحدث....
بالأمس كنت أخرج  للجامعة وأجد الشباب يضايقون الفتيات بكلمات الغزل والافعال المشينة.....والان لم يختلف الوضع كثيراوان كان تحسن بالفعل
بالامس  كان الشباب بالجامعات وفي الشوارع والناس أيضا يلقون بأي شيء ف الشارع ....أوليس  الشارع ملكهم...؟
بالامس كان الناس ......ومازلوا.......يرتشون.....ينافقون.......يجاملون....
بالامس.....كان الناس يتظاهرون بالدين....والان يحاولون التبرأ منه.......للأسف
بالامس ....سرت وحدي بالشارع أقرأ اللافتات التي علقها بعض الاشخاص  وأندمجت في قرائتها لدرجة أن سيارة مسرعة كادت ان تصدمني .....اللافتات كتب عليها " الشارع ملكك...لا تلقي القمامة به" " مصر بلدك حافظ عليها " " اختك دي....اللي ماشية ف الشارع ....حافظ عليها" " مصر بلدنا  لازم نحافظ عليها "............
عدة لافتات .....كثيرة العدد جدا .....ولكن....هل يتوقف كثيرون مثلي لقرائتها...؟؟؟؟؟!!!
هل يفعل الناس هذا...؟
وحتي الاعلانات أصبحت غريبة  جدا....بلاش تخرب مصر...عشان بحب مصر مش هقول ع  البامية يييع ....عشان بحب مصر مش هرمي الزبالة في الشارع...وعشان بحب مصر مش هعاكس ولا أضايق بنت في الشارع....
ومن الكلمات المجاورة للوجو القناة التي كانت تنادي بإسقاط النظام  إلي الشعب يريد الامن والامان ....
ويخرج علينا كل من هب ودب يقول....الان أشعر أن هذه بلدي ...أولم تكن هذه بلدنا منذ ولدنا...؟؟؟!!
أتسائل ...من يرمي بالقمامة في الشارع...من يخرب المنشأت ...من يضايق الفتيات في الشوارع...من ينادي بنبذ الدين  وقيام دولة علمانية ..من ينادي بالتحرر والتشبة بالدول الغربية....
نحن حتي لا نرقي بأنفسنا بيننا وبين أنفسنا...فيوم خطاب الرئيس المخلوع عن أسفه عما يقال عنه ....وأنه حزين حقا لما يقال ....كنت في مطعم شهير مع صديقتي ووقفنا نستمع  للخطاب قبل أن نجلس علي مائدتنا , واستمعنا ولم نعلق سوي بأن الرئيس السابق يشعرنا بأنه لم يترك الرئاسة بعد...ولكن التعليقات التي سمعناها لم تكن بمثل رقي ما قلناه...بل بها ألفاظ سيئة جدا,,,حتي عندما جلسنا لتناول غدائنا وجدنا بعض الاشخاص وليس الجميع بالطبع....يتعامل بشكل غريب مع الاشياء كأن يرمي بالاشياء علي الارض  والكلام والضحك بصوت عال ...وحتي المناديل الورقية يمسح بها يديه ويلقيها علي الارض ....مشهد غير حضاري وغير لائق وغير ديني وغير اجتماعي ...للأسف
اليست هذه بلدنا......؟؟؟!!!
نعم بلدنا ....فلماذا نفعل هذا إذن ...؟
وهل نحتاج لاعلانات ولافتات لنفعل ذلك...؟
 مجرد تساؤل فقط.....

ملحوظة
آسفة جدا لانني لا أستطيع المتابعة ولا حتي الرد علي التعليقات ....اعذروني...آسفة جدا لكل من يتابع او يترك رد

السبت، 2 أبريل، 2011

عينة عشوائية

 


                                  ***************

كل رؤساء مصر ......مشكوك فيهم
يعني ..."ناصر " ضرب نجيب ؟...وأخد الرئاسة منه ....سواء بتخطيط او غيره
" السادات" تولي رئاسة مصر بعد موت " ناصر " بشكل مفاجيء مشكوك فيه ....؟؟؟!!!
" مبارك " تولي رئاسة مصر بعد اغتيال " السادات " المخطط له بدقه ....ولم يصبه سوي خدوش برغم انه كان قاعد جنبه ...!!!!؟
" مبارك " .......هل اطاح به موقع الكتروني .....ام تخطيط منظم ...ام هي القدرة الشبابية ....ام انه ... قضاء وقدر....؟؟!!

                                  * * * * *  * * * * * **

  ما  كنا مرتاحين وعايشين وخلاص كان لازم يعني الثورة دي ...؟؟؟!!
والا انتم يعني غاويين منظرة ع الفاضي ......,,,,
طيب يعني انت شايف اننا عايشين صح ....؟ مع كل الفساد اللي بيحصل ...؟؟!!
اهو كنا عايشين وخلاص بناكل وبنشرب وعايشين ويا ستي ف الاخر كلنا هنموت....
طيب وانت شايفة اية...؟
انا مش شايفة حاجة ...,,,, انا عايزة اعيش وخلاص ...اشتغل واتجوز واجيب ولاد وبس ,,,ماليش ف السياسة والكلام الفاضي ده
ده مجرد كلام مع اتنين أعرفهم
                                                      * * * * * * * * * ** * *
هو انت هتنتخبي مين ...؟
مش عارفة ...
ازاي مش عارفة ,,,,انت لازم يكون لك رأي واضح واختيار عن اقتناع
يعني هما مستنين رأيي ...,,,, ما طول عمرنا لا بنعرف انتخابات ولا غيره وكل اللي هما عايزينه بيحصل حتي لو مش عاجبنا,,,وبعدين قوليلي انت هو انت اصلا كنت تعرفي الانتخابات دي الا من كام سنة ....!!! اصلا احنا اول مرة نعرف اننا لازم نروح ننتخب سنة 1995 تقريبا قبل كدة مكناش نعرف ولا نسمع عن انتخابات ولا غيره ....يا بنتي سيبك من الكلام ف السياسة  وعيشي حياتك احسن 

                                                           * * * * * * *  * *** * ***  **



في السنة الاولي من كلية الاعلام درست مادة اسمها مناهج البحث العلمي , هي خاصة بالمسوح واستطلاعات الرأي  وما شابه ...احببت المادة برغم صعوبتها  بعض الشييء ,,, لا أدري لماذا تذكرت العينة العشوائية وكيفية اختيارها  هذه الايام ....؟!!!  أيمكن لانني اشعر أن كل ما أسمعه من أراء وأخبار وأحداث هو مجرد عينة عشوائية لا تمثل الشعب المصري حقا ...ام أن هذه مجرد حالة من الترقب والحذر ...والخوف مما هو آت

رحــــاب صالح
بتسألني عن رؤساء مصر السابقين
قلت لها تنازليا
محمد حسني مبارك
محمد انور السادات
جمال عبد الناصر
محمد نجيب
قالت لي بستغراب...مين محمد نجيب ده...؟ هو كان في رئيس لمصر اسمه محمد نجيب ....؟
وبعدين ليه كل رؤساء مصر اسمهم محمد....؟