الأحد، 17 أبريل، 2011

تــــــــــــــــــ الحــــــــب ـــــــــــــــــــاج أم تــــــ الثورة ـــــاج...؟

صباح الورد....أو مساؤه ....^-^
طبعا أنا اتدبست ف التاج ده من الاستاذ ماجد القاضي  واللي عمل نفسه شهيد وقال ان الاخت مجداوية هي اللي أمرتني بيه...."مش بحب الاوامر أنا" ....مممم بهزر طبعا أنا فعلا عجبني التاج جدا وكنت هعمله  ....وبشكرهم جدا وعارفة انها مش أوامر ....^-^
الـــتـــــــــــــــــــــــــــاج
هل توقعت ثورة 25 يناير ...؟
بالطبع لا ......أنا قلت انها مظاهرة عادية زي كل مرة ومتوقعتش ولا تخيلت ان ده ممكن يحصل  ,. حتي قلت الكلام ده لأصدقائي وصديقاتي اللي كانوا هناك ف اليوم ده ,,,,, وفاكرة كويس اني قلت لصديقتي الوفدية ميادة ....يا ريت تعبكم يجي بفايدة مش زي كل مرة .....
هل كنت من ثوار ميدان؟ التحرير _ الكنبة _ الكمبيوتر _ حدد الميدان الآخر الخاص بك؟
للأسف كنت أتمني فعلا اني اكون هناك لاني بعشق ميدان التحرير  , بس ده كان استحالة اولا لان كان عندي امتحانات  وحتي الامتحانات بابا وأخويا وماما رفضوا تماما إني أروحها فما بالكم إني أقول لهم رايحة التحرير ...؟؟؟!!!
بس كنت متابعة مع أصحابي دايما حتي لما انقطع النت والاتصال ....التليفون الارضي كان موجود وكمان بلطيم من البلاد المحظوظة اللي متقطعتش فيها الاتصالات كتير ,  وبلطيم عموما بلد هادية جدا ومحصلش فيها الا أشياء قليلة جدا , وحتي لما امتحاناتي تأجلت  رفض بابا اني اخرج من البيت حتي ...والصراحة أنا كان  نفسي بس  ظروفي العائلية وكمان اللي حصل عندنا مكانش زي ما تمنيت  ....يعني  لما سألت  واحد من المتظاهرين رايحين تعملوا إية ؟؟؟قالي رايحين نولع ف مقر الحزب الوطني ومركز الشرطة....وانا أكره التدمير بكل صورة ....وف الاول والاخر دي بلدنا ولازم نحافظ عليها ...ده رأيي الشخصي ...
مالم تنجح الثورة في تحقيقه هو...... اختار شيئا واحدا؟
 معرفش أقول شيء واحد .....بس يمكن زي ما قال الاخ مصطفي سيف  انها مقدرتش ترسخ مفهوم الديمقراطية او معني الحرية الحقيقية , وأزيد الاختلافات في وجهات النظر.....يعني لسة متعودناش نختلف مع بعض باحترام .....الفوضي والفوضي والفوضي ...............
أكثر شىء فرحك في هذه الثورة هو...... اختار شيئا واحدا؟
الاصرار......عجبني الاصرار أووي علي ان كل شيء يكون في نصابه الصحيح...وطبعا عجبني السلوكيات الجميلة اللي شفتها  وسمعتها من أكتر من شخص كان في الميدان ....لا تحرش ولا مضايقات ولا اي لفظ غير لائق ولا رمي ورقة في الشارع حتي ......

الشخصية التي اعجبتني خلال الثورة ...؟
كل شخص  قال رأيه قبل واثناء وبعد الثورة ولم يغيره ....." مش زي ما كان واضح من بعض الشخصيات ...معاهم معاهم عليهم عليهم..."
الشخصية التي احتقرتها بسبب الثورة؟ برضه نفس اجابة السؤال السابق ......بس شخصيات كتيييييرة جدا فعلا صدمت فيها ....منها شخصيات كنت .....اكن لها الاحترام والاعجاب .....ولا داعي لذكر اي اسماء لان القائمة تطول......
أظرف شيء سمعته خلال الثورة ...نكتة ...تعليق ...حدث ...أخري
ياااااااااااة كتير .....بس يمكن الاظرف فعلا ....اللي قالته لي صديقتي ...من ان خطيبها قالها " يا شيخة حللي عني بقي وانت عاملة زي الريس كدة لازقة ومش عايزة تسيبيني " بصراحة .....هم يبكي وهم يضحك....
القناة التي تابعت من خلالها أحداث الثورة هي؟
ف البداية كانت الجزيرة ...
ثم كانت البي بي سي
العربية.....
وبالنسبة  للاعلام المصري ....:انا نفسي بجد اروح انسفه .....
الجريدة التي كنت تتابعها ።።።؟
لاء مفيش جريدة محددة,,, بر غم اني اصلا لغاية دلوقت احب الجريدة الورقية عن المواقع الالكترونية ....بس كنت بتابع ع النت ولما النت فصل ....كنت بشتري تقريبا كل الجرايد عشان اعرف الاراء  واختلاافتها ...والله بقي علي الجرايد القومية ....ولا اروع...." سخرية طبعا.....^-^....هو حد بيصدق الناس دي"
الكاتب المفضل خلال الثورة هو؟
كل شخص احترم رأيه ورأي غيره ...واحترم نفسه واحترم غيره ....

بس لو قلت اسم واحد بس ....يبقي دكتور احمد خالد توفيق
المذيع (المذيعة) المفضل خلال الثورة هو؟
لا يوجد شخصية محددة
كلمة لشهداء الثورة ؟
بحسدكم فعلا
" ولا تحسبن الذين قتلوا في سبيل الله أمواتا "
" ان من مات لقوله كلمة حق .....لا يموت ابدا "
متقولش إية اديتنا مصر وقول هندي إية لمصر ؟ عندك حاجة تديها لمصر ؟
اديها من كل شيء ።።።።።።علم ።።።።ونظافة واستقرار ።።።وحب واهتمام ።።።።።وكل يوم وكل وقت ።።።።واخليها تفتخر بيا طول الوقت ።።።
من سترشح لرئاسة الجمهورية ؟ ولماذا ؟
أكيد مش اي شخص وخلاص ።።።።።الشخص اللي هحس انه فعلا بيحب مصر ومش بس مجرد كلام።።።።الللي هيعرض برنامجه الانتخابي بدون مبالغة ።።።።واللي هيحسسني فعلا انه خايف علي البلد وعايز رفعتها وتنميتها  ويخليها تسترد مكانتها  بين دول العالم

لو أصبحت رئيسا لمصر ما هي أول ثلاث قرارات لك؟

ثلاث قرارت فقط።።።።ممممممم صعب
بس أكيد أول شيء هفكر فيه  التعليم ።።።።لانه زي ما قلت قبل كدة شيء مهم جدا ولو صح صحت الدولة كلها ولو فسد فسدت الدولة كلها ።።።።وطبعا كلكم عارفين التعليم عندنا عامل ازاي
تاني شيء  لا للتطبيع  مع الاعداء ።።።።إلغاء اي اتفاقيات معهم
ثالث شيء ።።።።።الإجور።።።።يعني لو كل واحد اخد حقه أكيد مش هيبقي في سرقة ولا نهب ولا دروس خصوصية ولا رشاوي ።።።።كدة يعني
علي فكرة ثلاث اشياء دي مش حلوة خاااااااالص
* لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال؟
أكيد في حاجة تنفع البلد اي شيء ።።።።ويمكن يكون  شيء بتمناه جدا ።።።።زيادة الاهتمام بالتثقيف والقراءة والعلم ።።والاهتمام بالمواهب ።።።።عشان يبقي عندنا نوابغ زي زمان ።።።።مش مواهب ف التمثيل والرقص يا جماعة ።።።مواهب في العلم والثقافة والادب ።።።።።

ابعت التاج ده لـــــ
اسلام ....كلام مجانين .....مع الاعتذار الشديد ...وانت عارف لية
محمد متولي ....رحلة حياة
مروة صابر ....سنابل الامل .....صديقتي الصغيرة الاخوانية اللي راحت التحرير وحكت لي عملت اية هناك ...وكنت ومازلت بحسدها

علي فكرة انا حاسة اني مقدرتش اقول اي شيء ....من اللي جوايا ...وبعتذر فعلا لاني بجد مقدرتش اقول اي شيء .....آسفة

رحــــــــــــــاب صالح

هناك 20 تعليقًا:

  1. ربي يبارك فيكي يا رحاب

    أجوبة جميل لتاج جمعنا كلنا باجمل الأسئلة والأجوبة ...تسلمي

    ردحذف
  2. مبرووووووك عليكى يا قمر التاج

    وبجد اجاباتك عجبتنى جداااااا وجميلة

    ربنا يوفقك يارب

    ويحمى مصر وتكون زى ما احنا عاوزينها احسن بلد فى الدنيا

    لك كل التقدير والاحترام

    ردحذف
  3. اجابات جميلة
    خالص تحياتي

    ونسأل الله أن يرزق بلدنا مصر الأمن والأمان

    تقبلي مروري

    ردحذف
  4. اجاباتك تلقائية وبسيطة
    وفكرتينى باجابة اول سؤال
    انى كنت كتب من حوالى سنتين شئ باحس فيه الشعوب العربية على التغيير وباقول يا شعوب العالم افيقو

    اما بالنسبة لصديقتك وخطيبها
    هو سابها بجد ولا كلام وبس

    تحياتى

    ردحذف
  5. مساء الفل و الياسمين يا رحاب مفايه انك اشتركت في التاج الرائع ده أكيد محدش بيعرف يقول كل اللي جواه لكن المهم اللي وصلنا منك و هو عفويتك و حبك اللي بتتحرجي انك تبوحي بيه لمصر...
    سعيده انك اتدبستي كل تدبيسه و انت بخير و جميله زي ما انت
    تحياتي و كل الود لكي

    ردحذف
  6. السلام عليكم
    مش عارف ينفع اعلق ولا مينفعش ولا ايه
    دبستينى هى دى اخرتها ماشى يا ستى عيونى لمصر
    عجبنى قوى صراحتك فى الكلام بس انا لو عملت التاج ممكن يعملوا عليا ثورة فسيبينى افكر خماشر سنة وبعدين احل الواجب
    دومتى بود وانسى كل شئ تانى

    ردحذف
  7. ...اللي قالته لي صديقتي ...من ان خطيبها قالها " يا شيخة حللي عني بقي وانت عاملة زي الريس كدة لازقة ومش عايزة تسيبيني " بصراحة .....هم يبكي وهم يضحك....


    هههههههههههههههههههههههههههه

    ضحكتينى بجد

    انا كمان كان نفسى اووى اروح الميدان بس للاسف المؤسف الاسف معرفتش اروح لنفس ذات الظروف

    والى الان مش قادره اسامح نفسى ان حاجه زى دى ضاعت من عمرى

    عرفت فعلاً يعنى ايه : فاتك نص عمرك

    اهو انا بقى فاتنى عمرى كله عشان ماشاركتش فى ميدان التحرير ولكنى شاركت باضعف الايمان وهو " قلبى "

    جميله اجاباتك يااستاذه رحاب

    دمتى بكل الخييييير

    (: (:

    ردحذف
  8. هعلق على حاجتين

    الأولى انى عارف الأحساس دة ان انتى مقلتيش كل اللى عندك

    كان نفسك يبقى فى ان انتِ تقولى كل الكلام وش لوش (:

    التانية

    أغنية شادية تسلم اختياراتك (:

    ردحذف
  9. متتأسفيش واجاباتك حلوة

    وحشانى ياريري يارب تكونى

    كويسه وبخير واطمن عليكى

    ردحذف
  10. لفت انتباهي لي هذه الجملة التي ناديت بها في اليوم الاول للثورة التونسية.وانا (أكره التدمير بكل صورة ....وف الاول والاخر دي بلدنا ولازم نحافظ عليها ...ده رأيي الشخصي ...)
    رؤوف

    ردحذف
  11. السلام عليكم

    أشكرك أختي رحاب على الاستجابة..

    إجاباتك تلقائية جدا.. مش عارف ليه بتقولي أنها لم تعبر عما بداخلك؟!!

    لاحظت بصورة عامة - حتى الآن - أن إجاباتنا - نحن المدونين - على التاج متقاربة.. مما يعطيني انطباع دائم أننا كمصريين همنا واحد وطباعنا واحدة.. وأنتِ لم تخرجي عن القاعدة..

    بينما شذ عن القاعدة مدونة واحدة أو اثنتين ممن أعرف.. وهذا أستنتج منه - بدرجة ما - نسبة المؤيدين فعلا للثورة ونسبة المعارضين.. أو نسبة الكارهين للنظام السابق ونسبة (آسفين يا ريس)!!!!

    تحياتي أختي الكريمة.

    ردحذف
  12. اهو اتكلمتى على التعليم محدش حرمك من حاجة اللى لازم يمشى مع التعليم هو اعادة التاهيل لان احنا بنخرج نصف اميين

    تحياتى لاجابتك بس خسارة انك مرحتيش التحرير و لو مرة

    ردحذف
  13. اولا اردت ان ارد على تعليقك عندك حتى يكون لك حرية نشره او لا

    اختى الغالية
    تعلمنا فى الصحافة و الادب انه لا يوجد وصف غير لائق و لكن يوجد صياغة غير لائقة والا ماذا يحدث عندما نصف القبح سواء فى الادب او الصحافة الادب العالمى الانجليزى مثل و الاسبانى اى اللاتينى ملىء بالالفاظ و لم يقل احد لا يصح او يحذف والادب و الشعر العربى و لو اردتى امثلة جئت لكى بها و مع ذلك انا من وجهة نظرى لم استخدم وصف غير لائق انا وصفت حالة بلد كانت قميئة لم افترى او اتى باكاذيب هذا كان حاله وصف القبح ليس بقبح
    هذه نصيحة من اخ اكبر اذا كانت هذه طبيعتك لانه لا يستقيم مع طبيعة عملك سواء الادبى او الصحفى مثل الذى يخاف من منظر الدم و يدخل كلية الطب
    ايضا انا لا ازعل من النقد ابدا و لو وجدت لفظا (غير موائم للصياغة) اعدك ان احذفه او اغيره
    سعيد بمتابعتك لى و تعليقاتك
    تحياتى

    ردحذف
  14. اجاباتك تنم عن فكر راقي ووطنية بالغة
    اشكرك اختي رحاب ونتمنى ان نجد رئيسا في القريب العاجل يقول لا للتطبيع
    تحياتي

    ردحذف
  15. انا اول واحد هنتخبك
    لأنك اهتميتي باكثر ثلاث اشياء اهمية من وجهة نظري ايضا
    التعليم
    التطبيع
    الاجور

    تاج رائع
    لك كل التحية والتقدير

    ردحذف
  16. مساء او صباح الورد
    اولا بحب اتاسف لكى كتير لكنى مكنتش بعلق الفتره اللى فاتت
    ثانيا استعمت بقراءه البوست بجد ياريس رحاب وعايزيك لما تكونى ريس متنسنيش وانا عن نفسي مش عايز لو هترشح امامك هتنازل عن المنصب ليكى (بصراحه مسئوليه انا مش قدها)
    اسف انى طولت عليكى
    تحياتى ليكى اختى رحاب

    ردحذف
  17. عجبتني اجاباتك بجد :)

    و ان شاء الله الرئيس القادم يكون أحسن من التوقعات يااا رب :)

    ردحذف
  18. لا للتطبيع ، اجابة لم اقرأ مثلها فى عديد المدونات .. اما باقى الاجوبة فقدتنافست مع تنافست مع زمائلها غى رقى الفكر وشهادة الوطنية بورك عليك التاج يا رحاب

    ردحذف
  19. ربنا يحميكي حبيبتي اجابات موفقة لشخصية جميلة
    تحياتي لفكرك

    ردحذف
  20. رحاب صالح :
    اهم شئ يجب ان يحدث هو التعليم والنظام التعليمي ، كما قلتِ انه يصلح الامم ، من رأيي ان يتم تخصيص نسبة كبيرة جدا من ميزانية الدولة من اجل التعليم والنهضة به ، وكفاية مناهج التعليم اللي من ايام جدي وجدك دي ..
    //
    شكرا على الواجب التاجي :)
    ومفيش اعتذار بين الاخوات :)
    //
    تحياتي لكِ وتقبلي ردي ومروري

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين