الأحد، 21 أبريل، 2013

فلنجعل الحلم يتحقق

 كثيرون منا يستخدم موقع التواصل الاجتماعي الفيس بوك  في  أشياء عادية وبسيطة جدا منها والاكثر شيوعا هو الدردشة مع الاصدقاء ... أو يجعلوه منبرا للمجادلات السياسية والاراء السخيفة في بعض الاحيان
ولا شيء غير هذا ....
ولكني برغم ذلك أجد أن هناك  والحمد لله نسبة كبيرة تستخدم الفيس بوك  في الاعمال الخيرية بشكل منسق وجميل
منها منظمة " حلم " وزي ما هما قالوا عن نفسهم " منظمة غير ربحية غير حكومية صاعدة تهدف الى تعزيز حيوية المجتمع من خلال قوة التضامن الإجتماعى." وده لينك صفحتهم علي الفيس بوك " منظمة حلم "
ودي صورتهم 

إزاي اتكونت " حلم " .....؟
أربع أصدقاء  هما  " شريف أحمد ومحمد الشافعي ومجدي محمد وأحمد الشامي "  بيحبوا العمل الخيري  وانضموا لكذا حملة  تبرع لــ مستشفي 57 ....بس فكروا مع نفسهم " هو لية نروح القاهرة مع إن في أماكن تانية محتاجة التبرعات دي أكتر من القاهرة علي الاقل المستشفيات اللي ف القاهرة بتعمل اعلانات وكتير من الناس بتتبرع ليهم لكن الاقاليم  لاء ...." ومن الفكرة دي  قرر الاربع أصدقاء يكونوا فريق  يكون عنده خبره كافية ف التنظيم الخيري  ويقدم للمحتاجين  احتياجتهم علي قدر المستطاع 
بدأ الفريق يروح المستشفيات في الاقاليم المختلفة زي المنصورة و غيرها
ونشاطهم مش بس ف التبرعات أو زيارة المستشفيات لاء ...ده بيعملوا معارض ملابس مستعملة وهي ناجحة جدا علي فكرة  وبتكون مصدر ربح ليهم عشان يقدروا يكملوا مشوار التبرعات  بجوار الاشخاص الي بتتبرع ليهم علي فترات  والي أصبحوا بيعرفوهم كويس جداا وعارفين نشاطهم  ده وبيساعدوهم , وكمان طول السنة بيعملوا " شنطة الخير " للناس المحتاجين ....
في الاول مكانش ليهم مقر ثابت لكن حاليا  لهم مقر ثابت وهو عند  بوابة طب المنصورة  وف " حلم "  كل الاعمار يعني ممكن تلاقي ناس من أول ثانية ثانوي وكل الاعمار بعدها ....من طلبة وخريجين جامعات شباب وبنات وأي شخص حابب ينضم ليهم سهل جدااا المهم يكون عنده النية لأنه يكون معاهم علي اد ما يقدر .....
علي فكرة فريق " حلم " كان لهم ظهور أكتر من مرة علي التليفزيون ف برنامج عز شباب  وصدي البلد وكمان ف الجرائد زي اليوم السابع .....

عرفت بموضوع حملة التبرع لمركز الاورام ف المنصورة من ريم حبيب  ومونتي محمد  متولي مونتانا بوكية ورد ....والايفنت الي عملوه ع الفيس ...
وقتها مكانش ادامي غير اسبوع واحد بس  علي الميعاد .....يعني لازم اتصرف بسرعة ......وأول شيء فكرت فيه هو مكان عملي ..." مدرستي "  وسألت المدير  إذا كان ممكن إني اسأل زملائي اعضاء هيئة التدريس  بجمع تبرعات منهم ....والحقيقة  إن الاستاذ " محمود البطاط " مديرالمدرسة رحب جدا بالفكرة وكان من أول المتبرعين والحقيقة إن كل المدرسين  رحبوا جدا واتبرعوا وكان هنا لازم أشكرهم كلهم بالاسم  من أول المدير  أ محمود البطاط  والحاج محمد السعدني وطبعا  أ. اسماعيل البطاط وأ. وليد رشاد وأ. محمد الدعدر   وأ. عادل القلفاط وأ. اسماعيل الخياط وأ . محمود الغبور وأ . علي رضوان وأ. سيد شرابي  وأ. بكر القمري و كل المدرسات بــ مدرستي اللي كل يوم بيزيد حبي واحترامي وتقديري  لكل الموجودين فيها .....


 اليوم كان غزير الامطار .....والمطر يجلب الخير كما يقولون .....
الحقيقة أنني لو كنت  خارجة من بيتي لأقوم بعمل لي  في هذا الجو الممطر لن أخرج أبدا .....ولكن لأنه عمل خير  فكان  قلبي مطمئن جدا ......أنني سأعود لــ بيتي سالمة ....
أول شخص قابلته  كانت ريم حبيب ...وبعدها اسلام ونيرة ....بعدها افراد منظمة حلم بدات في الظهور ....اتعرفت علي شريف أحمد 
ومحمد واحمد الشامي وثروت عطية ودينا عصام .....

وبعدها  طبعا حضرت هاجر الصراف وماجد متولي  ومنار عادل و  وفاء  وداليا  .....
بس المفاجأة كانت في شخصية حبوبة كتييييييير  هي " نورهان المندوة" شخصية لطيفة جدا وحبوبة  اووي  سعيدة اني اتعرفت عليكي يا نور  والسبب ف تعرفي بيها طبعا " مونتي " محمد متولي مونتانا بوكية ورد " بجد نورهان عملت جو مش ممكن  صحيح خالد غتت عليها كتير بس  هي كانت بتتقبل هزار خالد بشكل جميل  جدااا ....

 
المشكلة ان طول الوقت نورهان كانت بتدور عليا وانا بدور عليها ومش عارفين بعض وأنا كنت كل شوية أبص وأقول مين البنوتة العسولة دي  النشيطة الي ماسكة الديجتال كام وبتصور  بكل حرفية  وموتي لانه كان ف شغل برة كان بيتواصل معانا ع الموبايل واحنا مش واصلين لبعض مع اننا أدام بعض ...!!!
بس بجد نورهان شخصية لذلذة جداا ولما دخلنا غرف الاطفال كلهم كانوا حابين يتكلموا معها لانها شخصية حبوبة جداااا 
انا ونورهان
طبعااستأذنتها خلاص  
ريم حبيب تقريبا مفيش شخص اسمه ميعرفهاش وكل الاطفال بيقولولها ماما ريم  من حبهم ليها  وبجد ريم تعبت جدااا اليوم ده  بس كانت سعيدة جدا وطول الوقت رايحة جاية ف المكان   
خالد محمد صديق مونتي والي أصبح صديقي أنا ونورهان ده مشكلة ...قلت له يا خالد وانت جاي هات معاك شوية بسكوتات وشيكولاتات للولاد تخيلوا خالد جاب إية ...؟
خالد جاب شيكولاتة جالكسي فلوتس وجالكسي فليك وجالكسي بالبندق وكادبري ديري ميلك ....كنت هنفجر من الضحك علي خالد  إية يا عم جو الشيكولاتة الارستقراطية دي ....؟ آه نسيت إنك جاي من قطر قريب لسة .....ههههه
المشكلة اني بضعف أووي ادام جالكسي فلوتس ...بس طبعا دي للاطفال مقدرتش امد إيدي عليها ...بس الصراحة خالد عمل معايا واجب جدا  وجاب لي جالكسي فلوتس عشاني ^_^ 
ده خالد ....والشنطة دي فيها إية  ...؟
فيها جالكسي فلوتس ...@_@
بدأنا نرتب كل حاجة من مصاحف وعسل  وقصص  ولعب ووبسكويت وشيكولاتة ونقسمها  عشان يكون علي كل سرير ولكل طفل  نفس الاشياء  ومحدش يزعل انه مأخدش حاجة زي التاني
بعدها  كان في احتفال جميل من العاب وغناء وعرض مسرح عرائس قامت بيه ريم حبيب ونهاد......
وشريف احمد عمل وصلة غناء ممتعة ومضحكة وكل الاطفال تفاعلوا معاه
الاطفال برغم انهم كانوا علي كراسي متحركة بس كانوا بيضحكوا  وكانوا مبسوطين جدا وعندهم أمل ف بكرة كبير وما شاء الله مستوايتهم الدراسية والفكرية  عالية جدااا  ....
اتعرفت علي كتير منهم ....زي زهراء الي عايزة تكون مهندسة  لما تكبر وهي شطورة خالص وباقي لها كام  جرعة كدة  بس وتخرج بالسلامة  اتكلمت معاها كتير يمكن تكون أكتر شخص اتكلمت معاه واتصورت معاها كمان ....وكانت زهراء كوول خالص وبتتكلم معانا عادي ومبسوطة وبتضحك علي عكس سحر الي كانت مش بتتكلم ومكشرة  بس يمكن لانها كانت لسة واخدة الجرعة وكانت ندي  بتتألم بس حابة انها تتفرج علي العرض المسرحي  وطلبت لعبة  مكعبات وجبتهالها  و ووعدتها ان المرة الجاية اجيب لها مكعبات افضل منها ....ان شاء الله الاقيكي بقيتي احسن يا  ندي
في الغرف كان الوضع متغير شوية 
نادر مكانش عايز ياكل واتحايلنا عليه كتير  بس واضح ان الجرعات بتخليهم ميتقبلوش الاكل خالص " ربنا يكون ف عونهم ويشفيهم "  
ده نادر

بس  سيد كان مبسوط بكلامه معانا وقالنا انه  بيطلع الاول كل سنة علي مدرسته وناوي يكون دكتور  عشان يقدر يعالج كل الاطفال  وعشان كدة كلنا مكناش بنقول له الا يا دكتور سيد ....
ده سيد مع هاجر 
سيد مع وفاء  

 هاجر عسولة خالص البنات ةوالولاد بيحبوها جداا  وعملت مجهود جبار ف اليوم ده 
اتعرفنا علي بنوتة عسولة بتحب الرسم وأصبحت صديقة لينا وهي كانت اخدة الجرعة ومش عايزة تاكل بس هاجر خلتها تاكل ...ودي صورتها مع هاجر
وده كلام مونتي عنها  
دي بقي البنوته صديقتي ال وعدتني هتاكل و تنجح في دراستها وتدخل ثانوية عامة عشان تدخل فنون جميله و هترسم و هتلون وشوش الناس بالفرحة 

ووعدتها إني هزورها تاني 
وانا عن نفسي هزورها تاني واخد لها الوان وورق رسم   

البنت دي أثرت فيا اووي وزعلت عشانها جداا
ومكنتش عايزة انشر صورتها :(

تعبت جدااا لما شوفت اطفال  مجرد عمرهم شهور وبيتعالجوا وبيتألموا وكام مرة أخرج من الغرف وأنا منهارة نفسيا  وعيوني مليانة دموع
صعب انك تكون جنب شخص ومش عارف تخفف عنه آلامه ....عشان كدة كنت في غاية الاشفاق علي أهالي الاطفال  وكنت ملتمسة العذر  لــ أب خرج عن شعورة وبنته تتألم وهو مش عارف يعمل لها حاجة ومكانش أدامة غير أنه يزعق ف الريسبشن للممرضات ....
العجيب ف الموضوع ان الممرضات كبروا الموضوع أووي  وعملوها قضية ودخلوا فيها الامن ومدير المستشفي  و...و....و....
حتي لما حاولت أنا وخالد نتدخل  ونحل الموضوع بطريقة ودية معاهمالممرضات كانوا عنيدين جدااا  و " ازاي يتعدي عليا بالكلام أثناء تأديتي عملي وبعدين يعني اعمله إية  التحاليل المطلوبة  مالهاش معامل هنا نعمل اية يعني ...؟ " 
كنت أتمني يكون في المستشفيات فريق من العلاقات العامة يكون متفهم لظروف اهالي المرضي  ويمتص غضبهم وخوفهم علي أولادهم ويحاول يتعامل مع  عصبيتهم بطريقة مختلفة  مش زي ما شوفت .....لأنهم بجد معذورين وأكيد لو أي شخص مكانهم أكيد هيعمل كدة .....الله يكون ف عونهم ويصبرهم ....


ريم وهاجر

مونتي " محمد متولي " مونتانا بوكية ورد  ....هو اسم علي مسمي بجد هو بوكية ورد ملون بكل الالوان هتلاقيه ف كل مكان ف حفلة يوم اليتيم ف مستشفي الاورام ف تجمع مدونين عشان تبرعات من أي نوع هتلاقيه...
ف كل كلمة وكل نظرة وبسمة  لكل طفل ولكل ام  وكل أب  هتلاقيه بوكية ورد ملون بيحضن احساسك .....مونتي بجد مش ممكن يتوصف بكلام لأنه شخصية مينفعش تتوصف  لكن تتحب وبس ^_^
مونتي مهما قلت عنه أكيد مش هقدر أوفيه حقه  بس ممكن انشر  كلامه عن اليوم ده  والي كتبه علي صفحته علي الفيس ....
أجمل حاجه في الدنيا لما تشوف الخير في قلوب نقية كل همها في حياتها تسعد ال حواليها وتشوف ابتسامه علي وجه مريض محتاج الابتسامه حواليه والايد الحنينه تطبطب عليه لانها حاساه مش مجرد انها بتحاول تعمل واجب ..
الناس دي شباب وبنات أنا اعرفهم وهما دول علاقاتي الكبيره ال لازم الدنيا كلها تعرفهم و تعرف اني بفتخر وبتشرف بيهم .. بتشرف بانهم هنا في عالمي ومنورني وبيساعدو دايما بقلبهم وحبهم في رسم الابتسامه علي وجه كل الناس
كان يوم جميل جداً معاهم في زيارتنا امبارح لمركز الاورام في المنصورة مع ريم حبيب الصديقة و الصحفية و عضوة فريق حلم .. و جروب راديو النهاردة الراقي و أصدقائي و المدونة العزيزة رحاب صالح اللي عاوزها تشير كلامي في تدوينتها ال مش هتبخل بيها علينا مع الصور وتشكرلي فائق الشكر والتقدير كل الناس الراقية ال دعتلنا بالخير و اخصتني بالاسم بالدعوات في تدوينتها عن حفلة يوم اليتيم و اعتذاري الشديد علي تأخيري في الرد والشكر و دعواتي الخالصة ليهم بالصحة و السعادة و اشوفهم دايما معانا في كل عمل جميل يارب ♥
  

مونتي ....جزاك الله خيرا 

في الاخر بجد كان يوم ميتوصفش 
كفاية انك تسمع دعوات الامهات
ويكفي ان تقابل كل هذا بإبتسامة لــ طفل او طفة أو ابتسامة أم أو أب 
وهما بيودعونا كان رجائهم الوحيد أن ..متنسوناش .....
يا ريت بجد كل شخص يقرأ الكلام ده يفكر انه يزورهم ...
هنستناكم ....      
  وعايزة اقول لكل الي كانوا معانا ف اليوم ده بحبكم اووووووي ي ي ي  كدة يعني 
والناس الي كانت عاملة حسابها تيجي ومقدرتش لظروف معينة  زي موناليزا  وايمان وجمال ومحمد ...تتعوض ان شاء الله  

هناك 20 تعليقًا:

  1. ملحوظة مهمة ...
    طبعا مفيش ولا صورة ليا هنشرها
    ولا صورة لنور ...نورهان لاني لازم استأذنها الأول
    كمان مونتي طلب اني منشرش اي صورة له مع الاطفال
    اكيد انا مش حابة بس اني احتفظ بالصور دي لنفسي
    وانا مش بتكلم عن الموضوع هنا عشان اقول انا عملت كذا
    لا عشان انا بعمل بالحديث ..." الدال علي الخير كــ فاعله "
    يا رب تفهموني

    ردحذف
    الردود
    1. أنتى كلامك صح وحقا الدال على الخير كفاعله ونتمنى نشوف النشطات دى بين الشباب سواء فى العمل الخيرى التطوعى أو غيره ودول فعلا الشباب الى بيحبوا مصر وبيحبوا بلدهم جدا وباخلاص وفعلا أى شخص يتمنى يشارك فى الاعمال التطوعيه وخصوصا ان جامعة المنصورة والمنصورة تحديدا تعتبر عاصمة الطب فى مصر

      شكرا لكى وأتمنى ان يتقبل الله منك ما تقومين به وأن تكون نيتك لوجه الله تعالى

      شكرا على موضوعك الاكثر من رائع وجميل ومبدع

      حذف
    2. شكرا علي وجودك الدائم وتشجيعك
      والله يتقبل منا جميعا صالح الاعمال

      حذف
  2. في ميزان حسناتكم بإذن الله

    ردحذف
    الردود
    1. وف ميزان حسناتك انت كمان يا مني
      لانك كنت ناوية تيجي بس تعب ماما ...الف سلامة عليها
      وان شاء الله المرة الجاية تكوني معانا

      حذف
  3. تدوينة رائعة .. تسلم الأيادي اللي دونت
    فعلا احنا تأثرن من الأطفال والكبار اللي ربنا ابتلاهم في صحتهم وعافيتهم
    لكن في نفس الوقت فرحنا اننا قدرنا بفضل الله اننا ندخل السرور ولو قيلا لقلوبهم ..
    وفي كل موقف بنقابله في الحياة .. لازم ناخد منه عبرة وعظة ودرس و نستفيد منه
    ويمكن الدرس اللي اتعلمناه ان الواحد يحمد ربنا على نعمة الصحة والعافية .. ويقنع باللي ربنا اداهوله .. ايا كان كتير او قليل ..
    لأن الأرزاق مش فلوس وبس ..
    الأرزاق فلوس وصحة واولاد وراحة بال وسعادة ومنصب وجاه ووظيفة .. و و و
    وكله بيتساوى في الارزاق
    ربنا بيديك فلوس كتير وصحة على أدك
    بيديك عافية وقوة بس بيحرمك من الاولاد
    بيديك وظيفة حلوة ومنصب بس بيسلب منك راحة البال
    عشان كدا لازم نحمد ربما في كل الأحوال

    خالد

    ردحذف
    الردود
    1. صح يا خالد كل كلامك
      ومبسوطة بجد انك كنت معانا
      وانك كنت معايا وقت الخناقة الطيفة ف الريسيبشن ...
      وان رأيك كان من رأي ....
      وكدة يعني ....
      ربنا يكرمك يا خالد ويقدرك لفعل الخير دايما

      حذف
  4. رحاب .. بصراحة من يوم ما كتبتي عن يوم اليتيم و اتشديت بابنبهار لسرعة ادائك و روعة اسلوبك و تنسيقك لليوم و عرضك الراقي لكل حاجه لكل الناس ال بحبها .. وانا نفسي اشكرك واشكر كل الناس ال راقية ال علقو علي التدوينة بروح مليانة حب و خير لا حدود لها ..
    و النهارده بيزيد انبهاري و احترامي ليكي .. انك تيجي مشوار زي ده كل مرة و تستحملي الدوشة والتعب عشان تشوفي ابتسامة و ترجعي تعبانه و ماتستنيش تنسي حد و تكتبي كل ال جواكي بالتنسيق الهايل ده .. فاكيد ليكي مننا كلنا مليون شكر وتقدير .. و اظن ان محتاج لو رجعت وكتبت في مدونتي ان التدوينة كلها تكون عن مجهودك و طريقتك الجميله .. و ربنا شاهد انتي قولتي في حقي اكتر مما استحق و بدعي ربنا يساعدني ارتقي بنفسي دايما للروح ال وصفتيها بقلبك الراقي ده ..
    و انا بفتخر تاني بالناس ال ساعدتنا من اول ريم و جروب اصدقائي وفريق عمل النهاردة و نورهان لحد الناس الراقية ال سندتنا بدعواتها و نفسي كلنا ننظم يوم في كل فترة ونزور الاطفال ال وعدناهم وميكونش كلامنا مجرد احساس وقتي و يتنسي عاوزين نذكر نفسنا دايما بالواجب .. ونفتكر ابتسامة زهرة ال تشرح القلب و نطمن عليها و لا جلاكسي ولا فلوتس ولا كنوز الدنيا يسوو ضحكة من وشوهم الجميله و خالد معايا وماجد و وكل الاصدقاء ان شاء الله هانكمل و ليكي مني اجمل بوكيه ورد ..
    و اما عن وصفك فحقيقي .. اخجلتيني بيه و يارب احافظ ع الثقه دي دايما مع اغلي كنوز ربنا منحهالي .. ارواحكم ربنا يحميها

    ردحذف
    الردود
    1. بعد الكلام ده كله انا في غاية الخجل
      مقدرش اقول غير بس
      انك السبب ف كل ده ...وانا مقولتش غير الحقيقة
      وتاني جزاك الله خيرا
      ^_^

      حذف
  5. صوركم مع الاطفال خلتني اعيط بجد ... كلامك مؤلم جداً ..

    الحمد لله الذي عافانا مما ابتلى به غيرنا ... يااااااااا رب يشفيهم ويشفي كل مرضى المسلمين ياااا رب ...

    موضوع الجمعيات الخيرية جميل جداً بجد ... ربنا يوفقكم لكل خير ان شاء الله

    ردحذف
  6. حبك للخير فاق كل حب يا رحاب
    ورحابك الوفيض فاض على الجميع بالحنان لمن يستحقه وهم بامنك فى امان وسلام
    وبمقدار سعادتهم بوجودك نحن سعداء بتواجدك بمدوناتنا
    ميزان اعمالك فاض وعاوز شويه

    ردحذف
  7. ماشاء الله
    اغبطك يارحاب واحسدكم فى الخير على ماقمتم به من واجب رائع

    هكذا يجب ان يكون دورنا جميعا بارك الله فيك اختى الحبيبة وفى كل من ساهم فى هذا العمل الجليل

    اعزك الله وجزاك الله خيرا

    تحياتى بحجم السماء

    ردحذف
  8. بجد ربنا يوفقكم انا بعشق هذا العمل صدقا ابكتني تلك الصور ربنا يحميكم هو ده تقدم واذدهار البلد مش نقعد نكلم بدون عمل

    ردحذف
  9. كتبت لك يا رحاب ردا طويلا فى مدونتى ارجو الرجوع اليه لانه يحتاج ردا منك
    مع الشكر

    ردحذف
  10. والله بجد كان نفسي اكون موجود :(

    ردحذف
  11. ماشاء الله عليكم
    يارب دايما

    ويارب دايما تبقوا سبب في الخير واسعاد الناس

    ردحذف
  12. جعل ربنا ما فعلتى فى ميزان حسناتك وربنا يشفيهم ويصبر الاهل على مصابهم ..

    ردحذف
  13. بجد عمل راائع كان نفسي اكون معاكم فعلا
    ربنا يجازيكم كل خير ان شاء الله
    اتمني اني ابقي معاكم المره الجايه
    تحياتي

    ردحذف
  14. يارب ربنا يجعله في ميزان حسناتك يارب :)

    ردحذف
  15. بارك الله فيكم
    وجعله بميزان حسناتكم
    ووفققكم لفعل الخير

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين