الاثنين، 4 فبراير 2013

يوم لا ينسي في معرض الكتاب + تحديث

اه نسيت اقولكم اني كنت عاملة دعوة للكاتب الكبير الاستاذ شريف شوقي وقالنا مبروك  صحيح هو قالي انه مش هيقدر يحضر بس كفاية مبروك منه
هنا ايفنت الصندوق... 
وهنا صور حفلة التوقيع ع الفيس بوك...
صور تانية 
غادة وخالد وبسنت ونيفين وانا ثم
شروق احمد موسي ونهال حمدي
بسنت ودينا ممدوخ
شروق واحمد

نيفين وانا بنوقع
وخطي وحششششششش جدااااا
 
شورق ومحمد غالية ثم
غيودة حبيبتي واحمد موسي ونيفين
غيودة وشروق اللي ظاهرة جنب غادة دي اخت شروق بس عسل اووي
^_^ 

شوفت لما تحس انك من كتر السعادة هتطير
شوفت لما تكون برغم تعبك سعيد سعيد سعيد
شوفت لما تكون مستني ناس بتحبك جاية عشانك
شوفت لما تلاقي اهتمام من حد بيحبك وجالك
شوفت لما تستني انك تفرح والفرحة تجيلك علي غفلة حتي لو كان ميعادها متحدد ادامك
طيب شوفت لما يكون عندك أخ بجد بيحبك اووي حتي لو مش بيقولك انه بيحبك
هو ده احمد اخويا الي بجد  اجمل وأحسن اخ ف الدنيا " ربنا يخليك ليا " بحبك  اووي وعارفة اني تعبتك معايا جدا

أول مرة بتشوف حد يا يدخل قلبك ...يا يقف علي الباب ميدخلش....سلمي هشام فتحي ...تشوفها تلاقيها جوه قلبك علي طول
فرحت بجد اني شوفتك يا سلمي وبجد انت جدعة اووي اووي اووي
هشام مصطفي " مشاعر واحاسيس سندباد" اخد اجازة من شغله عشان  حفلة توقيع صندوق ورق ...وكتن معانا من اول ما دخلنا المعرض ..هشام كان شغال معايا خدمة توصيل التايهين للمعرض ههههه كل شوية حد من اصحابي يكلمني ومش عارف احنا فين وتايه ف المعرض وهشام بكل زوق واحترام وجدعنة يجيبهولي ازاي معرفش ههههه ميرسي اووي اووي يا هشام علي اليوم الجميل
دعاء عمرو " دودو مواجهات " صديقتي العزيزة متتخيليش بجد فرحتي اني شوفتك ...انت بجد احلويتي  وبقيتي عسل عسل عسل
شكرا يا دودو اني جيتي برغم كل  شيء وبجد انت صديقة لا تتكرر...بحبك
أسامة الازهري .....أقول إية طيب...ميرسي علي الشيكولاتة ...والا ميرسي علي الهدية ..والا ميرسي عل كلامك العثل عثل عثل ...والا ميرسي علي الصور ...والا ميرسي  علي أجدع أسامة  في الدنيا بحالها ....بس برضه مش مصدقة الكلام الي قلته هههه" ايموشن مطلع لسانة كدة " ومتنساش توصل النسخة لفاتيما
نهي صالح جات ف اخر الوقت ملحقناش حتي نتكلم معاها ....بس سعيدة اني شوفتك يا احلي نهي ولسة بردوا الناس بتتلخبط فينا ههه
غادة محسن ...صديقتي حبيبتي ...مشوفتش غادة الا قليل جدا مع اننا كنا جنب بعض  بس عشان كنا مشغولين ف التوقيع  يعني شوفتها اول ما وصلنا المعرض واستلمت النسخ بتاعتي اخيرا منها وبعد كدة لما كنت خلاص مروحة ...غادة بحبك ومتزعليش  لاني نسيت اهم حاجة ...اني اعطيك هديتك ..." ايموشن زعلان كدة "
ابراهيم رزق ...ساليزيادسو كان جاي مع " ميج ريان " ...
ايوة ميج ريان مين ادك يا عم عندك احلي بنوتة فالدنيا حبيبتي يا سالي
ميرسي جدا علي زوقك وشهامتك وكلامك واعتقد انك نسيتني اصلا خالص بعد ما شوفت احمد 
بجد سعيدة اني شوفتك جدااااااا
بتكلم عن ناس وممكن انسي ناس بس بجد مش عايزةانسي اي حد ....اليوم كان جميل جدا لدرجة اني من كتر ما اتكلمت طالعة ف الصورة بضحك بشناعة علي رأي غادة عشان كدة مش هنشر ولا اي صورة ليا ...
ده حتي صورتي مع محمد سامي تموت من الضحك فرق الطول رهييب فعلا ...والحجم كمان ...هههه
قابلت احلي بنوتات  اصحابي الانتيم  غادة واخوتها رانيا ومنار وصديقتنا رضا العمري  وقابلت مجموعة مجلة " دقة جديدة " وقابلت طبعا من مجموعة صندوق ورق " شروق الهامي ورضوي اشرف  شيرين سامي ونهي صالح  ورباب محمد وبسنت خطاب ونيفين كمال و نهال حمدي ونهي الماجد وطبعا الشباب الحلوين خالد ناجي ومحمدغالية ورامي يوسف واحمد موسي و محمد الناغي ...وغيرهم بس مش فاكرة للأسف يا رب محدش يزعل مني بس .....
طبعا قابلت مدونين تانية  زي صاحبة " فقاعات افكاري " الي بجد كنت سعيدة بيها لدرجة متتخيلوهاش اصلها عسل اووي 
وقابلت " لبني احمد " عسل يا لبني عرفتيني علي طول  مش عارفة ازاي ....حبيتك اووي انت وايثار
 اخوات شروق واصحابها ..اخت " فقاعات افكاري .." دعاء ...بنوتات تانين مش فاكره اسماءهم   للأسف بس كان يوم رااااااااائع جدا واشتريت تقريبا كل الي ف مشروع النشر لمن يستحق ...عشان محدش يزعل واولهم كتاب آية حماد ومروة زهران  واستاذ ماجد القاضي وماما زيزي اللي كانت فرصة اني اشوفها هناك واتعرف عليها  من اجمل الصدف والفضل يرجع ل ابراهيم رزق واسامة الازهري  الي عرفوني عليها
في ناس كانت غائبة حاضرة ...زي فاتيما روح قلب ماما وشمس النهار وليلي الصباحي ورامي 
وزي اصحاب اتصلوا واعتذروا  لظروف 
وناس  كنت اتمني انهم يكونوا معايا بس للأسف ....." ايموشن مش عارف اية كدة "
المهم انه كان يوم جمييييييل 
ودي الصور

طبعا غادة محسن  وشيرين سامي وميج ريان  " ساليناز "وابراهيم رزق واحمد اخويا 
شروق ومحمد غالية  وبسنت خطاب  ورامي زمحمد الناغي  ونهال حمدي ونيفين كمال واحمد موسي

شرين سامي وانا وسلمي هشام وطبعا انا مش واضحة خالص
بس متنسوش ان السفر اربع ساعات وانت تعرفوا انا مش واضحة ليه مع اني حاسة ان وزني زاد....^_^



دعاء عمرو وشروق الهامي  ونهي صالح وانا وشرين سامي وطبعا انا فظييييييييعة خالص هههه
انا ومحمد سامي وفرق شاااااااااااااااسع جدا 
وبنفسج وقلم بنفسج للتوقيع ^_^

البنفسج اول قصة ف صندوق ورق يا رب الناس تعجبها القصة وميدعوش عليا ويكملوا قراءة المجموعة ....
سعيدة كتير وبتمني اني اشوف الناس دي مرة تانية وتالتة وعاشرة والي مشوفتهومش اشوفهم تاني وتالت وعاشر 
ويكون معااي اخويا حبيبي اللي كنت عارفة ومقدرة اد اية هو تعب  كفاية اني اصلا متعبة بجد انا مشفقة علي اي حد يعرفني ...مابالكم بأخويا الي اصلا عايش معايا "ربنا يكون ف عونك يا حبيبي " 
بحبكم كتير وبتمني يعجبكم صندوق ورق 

رحاب صالح    

هناك 68 تعليقًا:

  1. وما أجملها من صُحبة :)

    بالنسبة لفرق الحجم والطول مع أستاذ محمد سامى أحب أقولك أنى عمرى ماهتصور معاه ^_^

    ردحذف
    الردود
    1. ههههههههههه
      مني انا قاومت قاومت قاومت كتيييييير
      ثم مقدرتش اصلا محمد سامي عنده كاريزما مش معقوله بجد
      ومتزعليش مني نست اقول اني اشتريت خبايا نسائية
      وانت عارفة رأي طبعا يلا اعملي حفلة تانية عشان اشوفك انت وآية
      بحبك كتيييييييييييييييييير

      حذف
  2. بالتوفيق يا رحاب
    و ان شاء الله فى تقدم مستمر

    ردحذف
    الردود
    1. ميرسي يا محمد وكنت اتمني تيجي بس عارفة انك كنت مشغول

      حذف
  3. الف مليون مبروك حبيبة قلبى
    واد ايه حسه بمشاعرك الجميلة وسعادتك الكبيرة
    يارب يديم عليك الفرح والسرور ياغالية
    وانت طبعا عارفة ظروفى وعذرى :) ويعلم الله انى كنت اتمنى اكون معاكى فى الوقت ده
    ربى يسعدك والف مليون مبروك

    وتحياتى لك ولكل الاصدقاء بحجم السماء

    ردحذف
    الردود
    1. عزيزتي ليلي
      بيكفيني كلامك وتشجيعك ونصايحك لي
      بجد كنت معااي بروحك
      ودعواتك اللي انا عارفة ومتأكدة اها مبتنقطعش ابدا لي
      رربنا يخليك لي ^_^

      حذف
  4. مبرووووووووووووك يابنفسج :)
    ااتبسطت انى شوفتك ويارب دايماااااا موفقة

    ردحذف
    الردود
    1. مــــــــــــــحــــــــــــمــــــــــــــد الجيزاوي
      هههههههه والله بجد معرفتكش
      بس كويس انك عرفتني من يوم حفلة اسمندرية ما شاء اله عليك انت شكلك اتغيرت
      هو اية اأ\لأخونة دي ههههه
      انا الي انبستط اني شوفتك بجد ويارب يسسر الاحوال واشوفك تاني قريب ^_^

      حذف
  5. انا قرات كلام كتير عن اليوم دا .. وزعلت جدا انى ماعرفتش آجي .. :(((((

    ردحذف
    الردود
    1. ولا يهمك تتعوض ان شاء الله
      احنا ناوين نلف المحافظات كلها
      وان شاء الله الفرصةو تكون متاحة للجميع انه يحضر اي حفلة منهم
      والترتيبات قائمة بين الاعضاء حاليا
      واكيد هكتب عن كل حفلة وهتكون امتي وفين عشان الناس كلها
      نورت " حياتي لكن مش حرة فيها "

      حذف
  6. مبرووووووووووك يابنفسج
    ويارب دايماموفقة
    مبسووووووووووط انى شوفتك
    ..
    محمد الجيزاوى

    ردحذف
    الردود
    1. صباح البنفسج
      طبعا كان شكلي وحش جدا لما معرفتكش ههههه
      بس بجد كنت ملحبطة معلش انت عارف الحفلة كانت جامدة
      ميرسي يا محمد انك جيت *_*

      حذف
  7. بالتوفيق يارحاب واعذرى غياب آل الفاروق واقبلى عذرهم القاهر فقد غاب عنهم الكثير والكثير والكثير وكل كتاب وانتى طيبه

    ردحذف
    الردود
    1. آل الفاروق غابوا عن الحضور بأجسادهم
      لكن أرواحهم كانت معنا
      يكفي دعواتكم وكلماتكم الطيبة يا ابي العزيز

      حذف
  8. مبروووووووووووووووووووووووووووووووووووك


    وآسف جدا لعدم الحضور

    ظروف قهرية :(

    أحوال مش تمام

    بس كدا

    وربنا يوفقك يارب ومن نجاح لنجاح دايما يارب

    شاب فقري

    ردحذف
    الردود
    1. ولا يهمك يا كريم
      انا عارفة وانت شرحتلي ظروفك وبيكفي انك قلت مبروك
      الله يبارك فيك وعقبالك

      حذف
  9. سعيد انك قضيتي وقت حلو
    كان نفسي اكون موجود
    لكن خيرها في غيرها ان شاء الله

    ردحذف
    الردود
    1. كنت اتمني تكون موجود بس عارفة ظروف سفرك
      وتتعوض قريب ان شاء الله
      بس في ناس كتير سألت عليك

      حذف
  10. الف مبروك ياقمر
    وان شاء الله من نجاح لنجاح

    تحيــــاتي

    Asmaa Fathy

    ردحذف
    الردود
    1. الله يبارك فيك وميرسي اووي اووي اووي

      حذف
  11. طبعااااااااا حاقده عليكم جداااااا

    كل الشخصيات اللي ذكرتيها شخصيات رائعه
    وسلمي دي جميله
    ومبسوطه انكم تعرفوها وتعرفوا دقة جديدة

    ان شاء الله اكون معاكم المره الجايه

    ردحذف
    الردود
    1. كنت معانا بروحك الحلوة وان كنت اتمني اشوفك
      طبعا انا كنت حاقدة علي كل الناس اللي حضرت حفلات قبل كدة
      وبيني وبينك مبسوطة باللي بيحقدوا عليا دلوقت عشان مجربة ههههه
      يا رب تيجي فرصة تانية واشوفك

      حذف
  12. مبروك يا رحاب ومبروك لشيرين ومبروك لكل
    من شارك في هذا العمل الجميل
    ربنا يوفق الكل
    تحياتي

    ردحذف
    الردود
    1. الله يبارك فيك وعقبالك
      وانت معانا دايما بكلامك ودعواتك
      وربنا ما يحرمنا من الاصدقاء اللي زييك

      حذف
  13. الف الف مبروك الكتاب و عقبال كتابك رقم 99
    و متسالنيش ليه 99

    هى جات كده
    ههههههههههههههههه

    تحياتى

    ردحذف
    الردود
    1. متتخيلش سعادتي بوجودك انت وسالي
      وربنا ما يحرمنا من وجودكم دايما
      وبالنسبة 99 انا اصلا بموت ف الاربقام الفردية وبموت ف رقم 9 ^_^

      حذف
  14. الف الف الف مبرررررررررررروك ويدوم عليكم هذه الفرحة.. وتلك الذكريات..

    ردحذف
    الردود
    1. ربنا يبارك فيك
      وعلي فكرة انا دورت علي روايتك بس للأسف ملقتهاش بس اكيد هجيبها

      حذف
  15. ألف مبروك يا رحاب
    إنبسطت إني شوفتك
    و زعلت إني مالحقتش أقعد معاكي
    كان يوم جميل بيكم :)

    ردحذف
    الردود
    1. المهم اني شوفتك واتكلمت معاك
      وعرفتك اخيرا علي احمد
      بجد يوم فات هوا كأنه ثواني
      بس يوم ميتنسيش

      حذف
  16. شوفى يا رحاب كلامك جميييل
    وبجد هى حاله جميله وصعب نوصفها
    عن نفسى كانوا يومين حلوين اوى لكن لسه مكتبتش عنهم معرفش ليه

    بس كده هتشجع واكتب بقى :)

    دمت بخير

    ردحذف
    الردود
    1. اصلا انا كتبت وحذفت مليوم مرة الكتابة عن اليوم ده مستحيل توصف المشاعر
      الأصدقاء عملة نادرة مش ممكن تقدري تكتبي عنهم ابدا وتوفيهم حقهم
      كان نفسي اشوفك
      بس تتعوض
      كتابك حاليا مع احمد انا قراته خلاص جميييييل اووي اووي اوي وعقبال كتابك المليون

      حذف
  17. انا فرحانة جدا علشان انتى مبسوطة
    يارب دايما سعيدة كدا
    وجميلة اوى الصور <3

    ردحذف
    الردود
    1. بلدياتي العسولة ربنا يخليك ليا وكنت اتمني تكوني معانا
      بس الجايات اكتر
      كتابك تحفة يا آية
      حاليا بردو مع احمد هههههه بس طبعا بعد ما قرأته

      حذف
  18. كان يوم حلو فعلاً :)

    و إن كنت أتمنى لو كنت لقيتك بس :)

    ألف مبروك ع الكتاب

    عقبال كتابك المنفرد :)

    ردحذف
    الردود
    1. الله يبارك فيك
      الحضور كان كتير عشان كدة كان في ناس متعرفش اصلا اني موجودة ومشيوا من غير ما يشوفوني
      تتعوض ان شاء الله

      حذف
  19. ألف مبروك الكتاب و عقبال كتابك المنفرد ان شاء الله :)

    كنت مبسوطة في اليوم دا فعلاً .. كان يوم جميل

    بس للأسف ما عرفتش ألاقيكِ :(

    ان شاء الله متعوضة المرة الجاية

    تحياتي

    و بالتوفيق

    :)

    ردحذف
    الردود
    1. ولا يهمك تتعوض بس انا فاكرة اني شوفتك بس يمكن متكلمناش او انا سألت عليك و وسلمت بس انشغلت بعدها ومتكلمناش
      تتعوض تاني اكيد

      حذف
  20. رحاااااااااب العسل جدااا
    كان نفسي اشوفك بس نزولى المتاخر وامى الله يباركها

    تتعوض بإذن الله
    سعيده بسعادتك وبإذن الله اقرأ صندوق ورق واقولك اخبار البنفسج إيه


    وصحيح اين كتاب نوافذ مواربه وباقي مشاركتك من الموضوع :)

    ولنا لقاء نتجمع فيه :)

    ردحذف
    الردود
    1. نوافذ مواربة ده حكاية تانية
      بجد كان نفسي اشوفك بس انا كمان مشيت بعد الحفلة بساعة واكتر والحضور كان كتير عشان كدة في ناس متعرفش مين جه ومين مجاش انا حتي في ناس جات مخصوص عشاني وقالولهم اني مجيتش فمشيوا بس اشتروا الكتاب هههههه وده نقطة ف صالحي

      حذف
  21. انا مبسوطة انى شوفتك اوى وانتى اكيد عارفة كده
    بقولك ايه
    ماتيجى تسكنى فى القاهرة علشان اشوفك على طول

    ردحذف
    الردود
    1. لالالالالالالالالا تعالي انت هنا القاهرة دي وحشة وحر وخنقة وهواها مش صحي علي الاقل انت تضمني هنا انك تشمي هوا البحر واوعدك انك مش هتقولي اروح القاهرة تاني ههههههههه
      انا اللي اسعد بجد يا نهي ومش من حق الناس تتلخبط بينا لانك عسولة خاااااالص وكمان طويلة ههههه

      حذف
  22. انتي شوقتيني يارحاب اني اقرا الكتاب وعايزه نسخه ماليش دعوه
    مليووون مبروووووووووك
    بالتوفيق دايما ان شاء الله
    تحياتي

    ردحذف
    الردود
    1. حبيبتي يا سمسمة
      انت اكيد ليكي نسخة عندي بس يلا قوليلي نتقابل فين ؟؟؟؟

      حذف
  23. أختي العزيزة رحاب ،،

    والله مبسوطة قوي بلقائك وكلامى معاكي .. ربنا يخليكي يا رب .. كان يوم جميل بيكم جميعا .. ومعرفة كلها خير يا أجمل ناس
    :)

    ردحذف
    الردود
    1. انا الي اسعد يا سلمي انت متتخيليش انت بجد اسعدتني اد اية انت تدخلي القلب بدون استئذان

      حذف
  24. ألف مبارك يا رحاب .. وعقبال كتاب يكون خاص بيك لوحدك ..

    والله الواحد كان نفسه يكون معاكم في الاحتفالية العظيمة هذه .. واللمة الحلوة .. بس يلا ان شاء الله في المستقبل ليش لأ ؟؟

    حسيت من كلماتك قديش انت سعيدة وفرحانة وانبسطت كثير بشوفة الصور والأصدقاء والصديقات كلهم ..

    وعلى فكرة انا من الناس اللي برضه لسه بتلخبط بينك وبين نهى .. ؟؟!! ههههههه

    في انتظار رأيك بـ " حد الوجع " ..

    ردحذف
    الردود
    1. ههههههههههه لا الفرق بين وبين نهي كبير علي الاقل نهي اطول مني كتير
      وكمان اجمل بكتير
      انا متأكدة ان حد الوجع رائع قبل ان اقرأه
      منوراني

      حذف
  25. كنت مبسوطة جداً في اليوم ده أكتر مما تتخيلي رغم الفترة القصيرة اللي قعدتها معاكم. صحبة جميلة فعلاً.
    وإن شاء الله نكرر لقائنا ده :)

    ردحذف
    الردود
    1. انت عسولة يا رضوي وتدخلي القلب علي طول
      وسعيدة اني شوفتك واتكلمت معاكي

      حذف
  26. الف مبروك وبالتوفيق يارحاب ويارب دايما أيامك كلها فرح وسعادة
    وانا كان نفسى أسمى يبقى مكتوب النهاردة مع الحاضرين لكن تتعوض إن شاء الله وأسف ان فوتت الحفلة وده لظروف الشغل انتى عارفة أجازة نص ااسنة موسم بالنسبة لنا وأنا لوغبت ساعة مش هيبقى فيها رفت هيبقى فيها إعدام
    على أى حال إن شاء الله هيكون فى مناسبة حلوة قريب عشان نتجمع كلنا فى الخير.وأنتى ماتخنتيش ولا حاجة والصور بتاعت الحلفلة كلها حلوة
    وأنا مبسوط انى بشوف فى مصر شباب لسة بيعطوا اقصى ماعندهم من ابداع ويارب دايماً إلى الأمام انتى وصحابك كلهم

    ردحذف
    الردود
    1. ربنا يخليك يا محمد
      وانا عارفة انه لو مفيش عندك شغل كنت جيت انت واحمد وعمو كمان
      انا عارفة غلاتي عند الاسرة كلها
      واكيد هتتعوض مرة تانية
      وعلي فكرة انا مش ناسية الرواية الي انت طلبتها مني بس النسخة الي لقتها مش اصلية عشان كدة مجبتهاش بس اكيد هجيبلك نسخة اصلي لما نتقابل قريب ان شاء الله
      ومتنساش سلامي لكل الاسورة وقبلاتي لــ " يوسف ويحيي "

      حذف
  27. فرحنالك موت يارب ديما تبقى فرحانه ومبسوطه كده الصور تحفه
    وانتي زي القمر اصلا

    ردحذف
    الردود
    1. منة ربنا يخليك يا رب
      ووحشاني مووووووت
      وسعيدة اني اتكلمت معاك ونفسي اشوفك قريب

      حذف
  28. ألف ألف مبروك عليكم كلكم ..
    ويارب من توفيق ونجاح لتوفيق ونجاح أكبر ..
    أكيد أنها كانت لحظات رائعة تفوق الوصف ..
    تحيتي وتقديري لك ولأحمد ..
    مع التحية الطيبة ..

    ردحذف
    الردود
    1. الله يخليك استاذنا العزيز
      انها لحظات لا تعوض ولا توصف
      تحياتي انا واحمد لك دوما

      حذف
  29. الف مبروك يا رحوبة والف مبروك لجميع الكتاب
    اجمل شىء فى حفلات التوقيع اننا بنشوف بعض وبنشارك الفرحة
    ربنا يسعد ايامك يا جميلة

    ردحذف
    الردود
    1. اكيد يا هبة
      وربنا يبارك فيك
      وعارفة انك روحت مع شيرين سامي بس قبل ما نروح بيومين كنت اتمني اشوفك
      بس تتعوض وربنا يبارك فيك

      حذف
  30. الف مبروووك يارورو يا جميلة
    كان نفسي اكون موجودة معاكم واشوف كل الناس الحلوة دي
    بس طبعا انا مش من القاهرة فكان صعب جدا الموضوع دا
    بس الحمد له انك كنتي مبسوطة ومن تقدم لاخر ان شاء الله
    ياحبيبتي

    ردحذف
    الردود
    1. الله يبارك فيك ويخليك
      هي دي مشكلة غير القاهريين
      بحقد كتير علي الي عايشين ف القاهرة

      حذف
  31. مبروك أخت ريحاب، مبروح اصدار كتابك.
    ويبدو أن اللقاء كان ممتعا، فوفقكم الله جميعا.
    تحيتي

    ردحذف
    الردود
    1. اللقاء كان ممتع بوجود الاصدقاء حولي
      والله يبارك فيك ابو حسام الدين

      حذف

  32. السلام عليكم
    باختصار... سعيد جدا لمدى سعادتك اللي تقريبا بتتفجر في كل البوست.. :)
    والدليل إني سعيد جدا إني بقالي 213232 سنة مادخلتش مدونة..
    بجد ربنا يزيد سعادتك دايما كمان وكمان.
    تحياتي اللانهائية.

    ردحذف
    الردود
    1. استاذ ماجد
      استاذي القدير
      والله انه ليشرفني وجودك وتعليقك هنا
      سعادتي لا توصف ولم تصفها الصور
      وسعادتي تكونت من وجود اخي احمد بجواري واختي شيرين ايضا برغم تعبها ومن قبلهم والدي الذي وافق علي حضوري " ربنا يخليه لينا ويبارك في صحته اللهم آمين "
      وسعادتي بوجود هذا الكم الهائل من الاصدقاء الذين سعدت بهم جدا سعادة لا توصف

      وسعادتي هنا ايضا لا توصف بوجود
      وحقيقي سعادتي لا توصف لاني احضرت كل قصص الاصدقاء ولو انني نسيت البعض غصب عني

      حذف
  33. انا كنت معاكم والله نستينى والا اية ^_^
    مبسوطة اووووى انى شوفتك
    وكنت نفسى اتصور معاكى بقى :(
    وكمان اديتك كتابى توقعيلى وسبحان الله لما روحت مش لاقيت توقيعك
    انا عايزة اشوفك تانى بقى :))))
    مبسوطة لينا كلنا بجد <3

    ردحذف
    الردود
    1. دندن
      ازاي انساك
      يا بنتي ما انا اتكلمت معاك وكمان اتصورنا بس انت مبعتيش الصور
      وهطيتك كتابك وقعتيلي عليه ب سانا أسامه نده علي ونسيت خالص اوقعلك علي كتابنا
      معلش تتعوض
      سعيدة بجد ان شوف تك ومعلش بجد انا نسيت ناس كتير :)

      حذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين