الجمعة، 26 أكتوبر 2012

حفل توقيع " بطاقة هوية "


عيد سعيد عليكم كلكم
ويارب تكونوا بكل خير وسعادة ويكون العيد كان ومازال عيد سعد عليكم وتكونوا قضيتوه مع اللي بتحبوهم مش زي حالاتي كدة مع نفسي بتفرج علي الناس من البلكونة  ومخرجتش مع اني كنت ناوية اتمشي علي البحر بس  اعمل اية كسلانة
هو الحقيقة العيد السنة دي كان مختلف فيه حاجة غريبة احساس مختلف
الاحساس الاولاني كان حزين  لان " كان في حالة وفاة شخص قريبي وبنفس الوقت هو زوج صاحبتي  وقريبتي و كانت الصدمة قوية لانها كانت حادث سيارة وقبل العيد بيومين فقط "
الاحساس التاني  احساس جميل بمعني الصداقة  " لي اصدقاء لم اتواصل معهم بسبب سفرهم منذ سنوات وكان اتصالهم بي يوم العيد عيد بالنسبة لي ....الصداقة شيء نادر  فعلا وليس كل من تعرفه صديق ....
اخباري
مش عارفة ....
عادي الطبيعي مشغولة مطحونة ف الشغل ...خسيت بتاع خمسة كيلو ....اصبحت عصبية
اصبحت كئيبة .....مكتئبة .....مش طايقة روحي ....هو ده انا وهي دي اخباري ....بقول جايز لاننا داخلين ع الشتا وجو الشتا بيكئبني .....بقول جايز عشان حالة الوفاة دي ....وبتأثر بالموت انا اووي .......بقول جايز لاني مصدومة في بعض الاشخاص ....يمكن....بقول يمكن عشان  متوترة من ان كتاب صندوق ورق اللي مشاركة فيه خلاص قرب يخرج للنور ....وووراه كتاب المائة تدوينة التاني ....مش عارفة ......بقول جايز عشان صاحبتي الانتيم ف الشغل هتتجوز وتبعد عني وهتسيب الشغل  وهكون لوحدي تاني ....جايز لان جوايا حاجات كتير  ومش عارفة اقول حاجة .....
بس في حاجة عايزة اقولها .....ان كتابي الاولاني ......" بطاقة هوية " له حفل توقيع في طنطا يوم الجمعة الجاي 
ده اول كتاب اشارك فيه .....وله متعه خاصة لانه بيضم اصحابي الانتيم اصحاب الكلية اللي بجد بموت فيهم وبتمني ان علاقاتنا متنقطعش ابدا "غادة محسن ورانيا محسن ورضا العمري " ده غير" نهي صالح ومحمد متولي ومروة شوقي  وخالد ناجي واسلام كنفاش "  ده اول عمل جماعي لي مع اصحابي ...وبجد مش عايزة اقولكم احساسي اية وانا ماسكة الكتاب بإيدي ....

فيه شاركت بقصة بحبها اووي وكنت فيها برسم حاجة بنعيشها كلنا ....او بيعيشها معظمنا ....
فرحانة اووي بحفل التوقيع ده لانه اول حفل توقيع لي ...وأول كتاب ...وأول فرحة ....  بس اكيد فرحتي دي هتكون اجمل لما تشرفوني في حفل التوقيع الصغير اللي عاملينه ف طنطا  يوم الجمعة الجاي
ده الايفينت ....علي الفيس بوك هنا 
بتمني تنوروني ...واكيد انا هتواصل معاكم هنا  وع الفيس كمان عشان اللي حابب يحضر  
بحبكم اووي وعيد سعيد ومستنياكم

السبت، 13 أكتوبر 2012

شخابيطي ....6

0

 فاكرين  تدوينات الالوان ...؟
احنا عملناها كتاب واسمه " صندوق ورق " 
مع دار ليلي ان شاء الله  وان شاء الله هيكون موجود ف معرض الكتاب وجايز نعمل حفلة  توقيع قبل المعرض مش عارفة 
بس اللي اعرفه اننا عملنا دعاية للكتاب وانا بما اني مشاركة بقصتين ف الكتاب فكان في اتنين كوفر للقصتين بتوعي 
ده واحد منهم .......عن قصة " البنفسج عندما يبحث عن احلامه "
واللي عايز القصة او القصتين عموما يقولي وانا اسيب اللينكات 


1
زي كل سنة ....
تقولي" آية "بنت اختي ...خالتو ...؟
انا : متقوليليش يا خالتو 
آية : طيب ...بلاش خالتو ...طنط
أنا : متقوليليش طنط
آية : رحوبة ...ممكن تكتبلي موضوع تعبير عن حرب اكتوبر...؟
ونفسي مرة واحدة ميكونش الحوار بنفس الطريقة ولا نفس الميعاد
هما لية ميبتكلموش عن حرب 1967 ...النكسة واسبابها والدروس اللي استفدناها منها ووصلنا بعدها بسنين للنصر ...؟
نفسي  التعليم يتغير ...
2
رسالة ....لمن تعرف نفسها جيدا 

تعرفي  كنت محتاجة حضنك ده اووي 
وبجد كنت هموت واشوفك لانك وحشاني اوووي
بس لو متعمليهاش مرة وتقوليلي " حوبة انت خسيتي كدة لية ...؟ "
يا بنتي انا كويسة اووي ...مش حاسة اني خسيت اووي زي ما انت بتقولي  انا بس بعمل إعادة تأهيل نفسي  لنفسي وبنفسي واكيد هكون كويسة قريييييب جداااااا
بس حاااااااااضر هسمع كلامك وهاكل كويس والمرة الجاية لما تشوفيني ...هتلاقيني " كلبوظة " 

 3
مش غريب ان يجتمع تلاتة اربعة  وأكتر ان الشخص ده غير مرغوب فيه
بس الغريب إن الشخص غير المرغوب فيه ده يفرض نفسه عليكم كلكم كدة ويعمل البيت بيته ويعزم نفسه عندكم
ويقدم القهوة بنفسه للضيوف  اللي هو أصلا منهم ...وكأن زي  م المثل بيقول " البيت بيت ابونا والغرب بيطردونا " 
ده اللي حسيته  ومش لوحدي ....والشخص ده ..جرأه زيادة عن الحد ....فرض نفس ع الاخر ...نفاق واضح جدا ....طيب اتعامل ازاي مع الموقف ده .....يا ريت اجابة لو سمحتم
4
زمان لما كنت اسافر والعربية تقف ف كمين ....كان اللي امين الشرطة بينزله هو " الملتحي " والمنتقبة "  بطريقة عفوية 
الآن .....أمين الشرطة مش بيشوف لا الملتحي ولا المنتقبة وبيدخل شمال ف شاب هادي وعادي جدا ومفيهوش اي عيب ....
العيب بس انه عايز يعمل منظر ويعطلنا ...
ده الحاصل للاسف مع ان المفروض اني بوقف اللي شاكك فيه مش اي حد والسلام
يا مصر عليك السلام 
5
كنا ف نادي بنشرب نسكافية ومنسجمين ....
اندهشت من ان الملاهي اللي ف النادي  بيلعب فيها منتقبات وبألعاب الاطفال 
لما حققت النظر كويس ...صعقت
لان المنتقبات...ليسوا سيدات ولا حتي آنسات ...بل اطفال  ف العاشرة او الثانية عشر  تقريبا ...
هو مش ده برضه اسمه " هدر حقوق  الاطفال " 
والا هنقول برضه ده سمو وأدب ومش عارف اية ...؟
طيب سيبوهم يعيشوا حياتهم ...
والا لازم النقاب يعني حتي وانا طفلة وبلعب بالمراجيح والاسكوتر .....؟؟!!!
بجد انا مذهولة 

6
الشغل متعب بس بحبه
بقيت مش فاضية ومشغولة
بس بحاول اظبط حياتي
بحاول انسي اشخاص
واشيل من حياتي ناس
وناس جديدة بتدخل حياتي 
بس بحاول منساش اللي فات 
بخلق حياة جديدة بحاول تكون سعيدة 
سواء مع نفسي او مع اللي بتمناه

رحـــــــــــاب صالح

الأربعاء، 3 أكتوبر 2012

كتاب المائة تدوينة ....الاصدار الثاني



الحقيقة انا لم أكن أتخيل أن  أكون محظوظة هذه المرة في الكتاب
في الاصدار الأول لم يحالفني الحظ
انما هذه المرة ......
في حياتي لم أؤمن بالحظ اطلاقا
وآمنت انه توفيق من عند الله واجتهاد وجهد  وابداع وموهبة 
وبرغم اني ولا مؤرة آمنت بالحظ ....الا ان كثيرون جدا يجدونني محظوظة 
وأنا مش كنت بصدقهم ههه
عادي يعني مكنتش بشوف نفسي محظوظة 
بالعكس تماما
بس  اللي حصل في كتاب المائة تدوينة المرة دي خلاني احس ان الحظ جايز يكون له دور معايا في الفوز
بس لما فكرت لقيت ان القدر هو اللي  كان متحكم ....مش الحظ
شاركت في كتاب المائة تدوينة الاصدار الثاني بثلاث اعمال   كنت قد حددت مسبقا المقال والخاطرة ....لكني كنت محتارة بالقصة جدا 
ولدرجة اني كنت بدخل كل مرة عشان ابعت الاعمال ومبعتهاش 
ف الاخر استعنت بصديق....
صديق عزيز جداااا جدااا جدااا 
هي روح قلب ماما .....ماما بلوجر برغم سنها الصغير ...فاتيما 
وهي اللي اختارت القصة ....حتي هي قالت ....هي دي يا حوبة  انسي الباقي كله ...هي دي بس
وسمعت كلام فاتيما ....مع اني مش بسمع كلام اي حد " سوري يا فاتيما " 
والغريب اني كنت متوقعة ان حاجة تانية خالص اللي تفوز ان مكنش من أول مرة علي الاقل ف التصفيات 
المدهش ان  القصة اللي مأمنتش بيها هي اللي وصلت للتصفيات  واللي حسيت انه مكن يوصل خرج م المسابقة م الجولة الاولي 
حاجة غريبة ....صح 
الأغرب اني متابعتش المشروع خالص ....وأحمد أخويا هو اللي كان بيعرفني  بالاخبار 
واللي عرفني بالتفاصيل وان قصتي متأهلة للتصفيات هي العزيزة " د. ولاء صلاح " صاحبة مدونة دمعة حنين واللي قفلتها للأسف 
ولاء  وقفت جنبي بشكل مش مممكن كأنها معايا طول الوقت مش بينا مسافات ومحافظات  لاء بجد ولاء انسانة مش معقولة 
وبجد شجعتني كتير جدا وكانت بتديني أمل ف الفوز دايما
لما دخلت القصة التصويت خفت جدا ...والحقيقة حسيت اني مهما عملت مش هوصل ومش هفوز 
بس قلت لنفسي اني لازم اعمل محاولة واني لازم احاول النجاح وانا قادرة علي الفوز ....ومش بحب اليأس 
عشان كدة عملت دعاية لنفسي  وطلبت لأول مرة من أصحابي  يعملولي فوت ....وانا بتكسف اطلب  حاجة زي دي 
 الجميل اني اول مرة ادخل علي صفحة التصويتات  لقيت ناس   عملتلي فوت وكتبت كومنت من غير ما تعرفني ...وده اللي أسعدني جدا ....للأسف مش فاكرة كل الاسماء بس افتكر " ريتال " " افنان "  رونا  " 
طبعا غير أصحابي  ....رفقاء التدوين ....نهي صالح , غادة محسن , محمد متولي , مونتي , ضياء عزت ,  ومحمد غالية , وفتافيت وليلي الصباحي  وولاء صلاح  فشكول طبعا ....وغيرهم مش عايزة انسي اي اسم بجد   محدش يزعل لو نسيت 
غير أصحابي علي الفيس بوك  كمبس  ولميس , سمسمة, زهرة , وغيرهم  .... وأخص بالذكر " رانيا عامر "  صديقة اختي شيرين وزميلتها بالعمل وصديقتي بالطبع  ...رانيا بجد وقفت جنبي اووي وشجعتني كتير و بجد بشكرها كتير اووي وبقولها بحبك كتييييير 
طبعا في الوقت اللي كل اصحابي بيشجعوني وبيعملولي فوت ....اتحايل علي احمد اخويا  انه يديني صوته ....ولا عبرني 
الا بمحايلة ...ده حتي احمد ابن عمتي  عملي فوت ...وده ....؟؟؟!! بس بعدين  عملي فوت ....بس " نو كومنت " يظهر انه مؤمن اني منفعش  ومش عندي موهبة اصلا 
بس المدهش ....إن أحمد أخويا  هو أول واحد قالي ان قصتي  فازت ف التصفيات بالمركز التاني .... وساعتها اتصدمت  ومعرفتش اقول حاجة ....^-*
وأول شخص باركلي  واتصل بيا وهناني " نهي صالح " صاحبة مدونة كلام فاضي ...." بحبك يا نهي " ^-^
وطبعا الفيس بوك كان فرح ....بجد احساس جميل 
مبسوطة اني هكون مع ناس بحبهم اووي ...زي غادة محسن صديقتي الصدوقة ... وزي رحاب الخضري ورؤي عليوة ....وغيرهم 
وزي  مصطفي سيف ......برغم انا مش بنتفق مع بعض يا دكتور .....يعني هغتت عليك برضه ف الكتاب زي ما بغتت ف المدونة  هههه.....مبسوطة كتير ...وزعلانة ف نفس الوقت عشان في ناس  موصلتش  للفوز ...كنت بتمني  للناس كلها الفوز
مش عارفة بكرة مبدأ الخسارة ....والمكسب.....بحب كل الناس  توصل للي هي عايزاه
مش بحب يكون في خسارة
كنت بتمني ....حاجة تانية
ان في ناس تهنيني بالفوز
تفرح لي ...تبارك لي بقلب صافي 
كنت بتمني ....بجد قصة تانية اللي تفوز في المسابقة 
متمنتش القصة دي ابدا تفوز
ولا حتي  فكرت ابعتها بالعكس انا استبعدتها خالص ....بس فاتيما...والقدر
حتي فاكرة كويس اني مكنتش عايزة انشرها ف حملة التدوين ...وفضلت ركناها ف الدرافت فترة كبيرة ....
يمكن لغاية ما جه وقتها ....
كنت بقصد بيها حاجة
يمكن ...كنت أقصد بيها  بعض الاشخاص يمكن....ويمكن كنت أقصد بيها شخصية معينة....
يمكن....كنت بقصد بيها رسالة....يمكن....
وجايز جدا تكون الرسالة  موصلتش.....
جايز...ويمكن....أسئلة كلها .....من غير جواب

وف النهاية ......بحبكم أووي وبشكر كل الناس الحلوة اللي شجعتني ووقفت جنبي ....بحبكم اووي اووي اووي ^-^