الأحد، 31 أكتوبر، 2010

أربعة وعشرون ساعة رئيس جمهورية

لو حضرتك رئيس الجمهورية لمدة أربعة وعشرين ساعة , تقدر تعمل إية ...؟
ما هي أمنياتك ...؟ أحلامك ...؟ التغيرات التي تحلم بأن تكون في البلد وتفعلها ...؟ فقط في أربعة وعشرين ساعة ....
هذه ليست كلماتي أنا بل هي كلمات دكتور جامعي يدرس اللغة العربية لطلاب كلية الآداب قسم الاعلام , ومعروف عن هذا الدكتور ثقافته الواسعة وإستحواذه بالكامل علي عقول طلابه وقت المحاضرة , ومعروف أيضا بأسئلته الغير متوقعه تماما ....
هذا الاستاذ الجامعي يرفض أن يعطي طلابه مفاتيح الاجابة ان سألوه ويقول دوما " وماذا ستستتفيد إن لم تتعب في البحث عن الاجابة ..؟" يرفض أن يناقشه طلابه بمبدأ السؤال والجواب أو ان يوجهوا له نفس السؤال الذي سأله لهم ...
ففي اليوم الذي سأل الطلاب " لو اتيحت لك فرصه ان تكون رئيس الجمهورية لمدة أربعة وعشرين ساعة ماذا تفعل ...؟
كانت إجابات الطلاب " هغير كل الوزاء" " هلغي الثانوية العامة " " هغير نظام التعليم  بنظم تتوافق مع البلد" ولما واحد قال ان الوقت ده قليل جدا  كان رد الدكتور " أنت لا تتميز بالذكاء , لابد أن يكون لديك من الذكاء وسرعة البديهة لتكون دوما اجاباتك حاضرة "
وعندما أراد بعض الطلاب  في المحاضرة أن يوجهوا السؤال للدكتور كان رده لهم " في علم التنمية البشرية لا يجب أن ترد السؤال لسائله " يعني مينفعش تقلب السؤال وتسألهولي....
تعمل اية لو انت رئيس الجمهورية لمدة اربعة وعشرين ساعة ...؟ ده كان السؤال وانا شفت السؤال عند صديقة علي الفيس بوك وهي من قالت لي كل هذا الكلام عن هذا الاستاذ الجامعي وطلابه لانها اساسا من هؤلاء الطلاب....
تعمل اية لو أنت رئيس الجمهورية لمدة اربعة وعشرين ساعة .....سؤال سألته لناس أعرفهم .....مدرسين قالوا هنغير مناهج التعليم الزفت دي , ومدرسين قالوا " أول حاجة اعملها لو بقيت رئيس جمهورية اني هرفد احمد ذكي بدر " وشباب في ثانوي قالوا " هنلغي الثانوية العامة ونعمل ثانوية عامة علي مزاجنا " صديقة تعمل طبيبة منذ ثلاث سنوات  قالت " هقتل وزير الصحة "
ناس بسطاء كان ردهم " هنرخص كل السلع الاساسية "
واحدة لا داعي لذكر اسمها قالت لي " هقتل الشخص المتسبب في كل مشاكلنا دي .....ولا داعي هنا أيضا لذكر اسمه..."
حبيب قلبي وعمري وروحي وكل حاجة لي ولا داعي لذكر اسمه ايضا لما سألته قالي كلمتين " هغير الدستور "
تفتكروا لو  لو بجد أتيحت لك فرصة ان تكون رئيس جمهوريتنا المصرية الجميلة دي لمدة أربعة وعشرين ساعة هتعمل إيييية...؟
رحاب صالح

هناك 18 تعليقًا:

  1. ح اغير الدستور والغي كل الاحزاب واعمل احزاب جديدة ..الغي القنوات الدينية ...امنع الاخوان من العمل في السياسة ... واجيب حكومة من برة اشمعني الكورة عايزة مدرب ...لما باشوف ان المواصلات في المانيا بالدقيقة رغم ان السواقيين والركاب اجانب بقول يبقى العيب في مصر عيب السيستم مش الناس....

    ردحذف
  2. أزيك يا رحاب

    الموضوع صعب جداً

    مش هاعرف أجاوب

    الصعوبة مش انى ابقى رئيس لمدة 24 ساعة

    الصعوبة فى تحقيق أحلام أتكسرت و أتشوهت على مداااار سنييين

    صعب انها تتظبط فى يوم واحد

    و لكن لو مُصرة يبقى لازم أغير نفوس الناس لازم نحب بلدنا و كل دة هيتظبط لوحده

    صدقينى انا مش حاااالم و لا رومانسى

    بس لا أظن ان بلاد كتيييير فى اسيا مش احسن مننا غير بحبهم لبلدهم

    شكراً لل 24 ساعة (:

    ممكن طلب شخصى

    ممكن اسافر لبنان قبل ما اموت (:

    ردحذف
  3. هبيع عربيات الوزارات
    هغير نظام التعليم
    وهخلى الاطفال يفكروا فى هدف لحياتهم من الصغر هدف بجد مش الحاجات المحفوظه ديه
    استخدم مشاريع كليه الهندسه فى حاجه مفيده
    هنفذ القوانين الموجوده بحزم
    اعمل عداله اجتماعيه بجد
    هلغى الضرائب واخلى جمع الاموال عن طريق معاقبه المخطى بالغرامات الماليه
    هلغى القنوات الدينيه وقنوات الاغانى
    هسجن اى فنان عمل عمل تافه ملوش معنى وكله مناظر
    هحاول اوصل المكافات لمستحقيها
    وبعد كده اقدم استقالتى

    ردحذف
  4. السؤال هو ياترى لو مسكت الحكم اربع وعشرين ساعة ياترى حأسيبه ولا لا أيا كانت انجازاتي في هذه المدة ياترى حأحترم أجل الاربع والعشرين ساعة ولا حأغير القوانين وأفرض قانون يخليني العمر كله
    مع ودي عزيزتي

    ردحذف
  5. سؤال صعب جدا جدا 24 قليله جدا
    لكن ممكن نقول انا ممك اغير انلحاجه اللى بتخلينى انا نفسى اطمع فى الكرسى وما امشيش وبالتالى هاضمن ان فى يوم فى واحد هايجى بعدى يصلح البايظ

    معنى كده انى لازم حد يحاسبنى انا شخصيا يبقى نغير النظام المعمول به وبدل ما رئيس الجمهورية هو رئيس الحكومة وهو الاعلى سلطه يبقى مجلس الشغب هو اللى اعلى سطلة وهو اللى بيحاسب الريس والحزب اللى ينجح اغلبيه هو اللى يشكل حكومة زى ما تركيا واسرائيل بيعملوا وبالطبع هما الاتنين شبه امريكا

    وبكده لو انا فاسد هالاقى حد يحاسبنى والحكومة لو فاسده هالاقى حد يحاسبهم ويشيلهم من مكانهم اما بقى لو مجلس الشعب نفسه فاسد فادينى كمان 24 ساعه وانا اعدلهولك
    :(

    ردحذف
  6. ح عدل الدستور لضمان تدول السلطة اقرار محاسبه المسئوولين و ح فصل الفسدة فى المناصب العليا و ح ادعم البحث العلمى و ح ترجم مناهج اليابان التعليمية و ح امنع ان حد يجيب اكتر من طفلين او يجوز اكتر من واحدة عشان الانفجار السكانى

    و ح فصل السلطة عن الثروة لان ماينفعش رجل اعمال يبقى وزير و ح طهر جهاز الشرطة

    ردحذف
  7. اول امر ليا بالرئاسة لأني بقيت رئيسة اني امدد ال24 ساعة لشهر على أقل تقدير ... عشان أعمل كل حاجة :)

    و بعد كدا ... استلم حاجة حاجة ... و اغير كل القوانين والعب بكل حاجة ... عشان تناسب الكل وخصوصاً الغلابة ... و طبعاً هحط نظام خاص بالرشاوي بحيث اذا حد اشتكى انو في حد بياخد رشوة بيترفض من الشغل بعد ثاني شكوى ولو من نفس الشخص دا طبعاً بعد التحقق من دا

    و لو كنت رئيسة العراق ...

    هخرج كل محتل من بلدنا ... مش عايزة اي انسان غير عراقي يبقى مسؤول عننا ... و هعزل كل اللي اخدوا مناصب مش مستحقينها ... لو متقتلتش قبل دا هههههههه ... و كمان ادي المنصب بعدي لحد اثق فيه و اختياراتو صائبة عشان اضمن انو البلد بأمان و انا ست مش بتاعة ادارة بلد :)

    ردحذف
  8. اخد الناس كلها للصحرا واقسمهم مجموعات وادربهم على الحياه النضيفه

    وفى نفس الوقت اكون هديت البلد ورشيت بالطيران كلور ومساحيق وانضفها وابنى بقى على نضافه وصح

    يلا احلام باحلام بقى يارحاب

    ردحذف
  9. موضوع
    فى الجون
    يا رحاب
    اقولك انا بقه
    هعمل ايه

    من وجهه نظرى
    المشكله ان الشباب عنده كبت
    وعاوز يتجوز نجوزه ونخف العونه اللى فى البلد
    وبعد كده لو فى وقت
    طبعا
    هنسجن كل اصحاب النظام السابق كله من رقم واحد
    لغايه اخر موظف فاسد والم اراضى الدوله اللى ببلاش دى وفلوس التأمين الصحى
    والم فلوسنا اللى فى سويسرا
    بس ده كله مش هيجى فى يوم واحد
    يا رحاب المهم اتجوز واكون ضمن الشباب دول
    هههههههههههههههه

    ردحذف
  10. Tarkieb
    ده كله في يوم واحد بس...؟
    اللي انت بتقوله ده محتاج وقت كتير وبعدين مينفعش تلغي الاحزاب كلها والقنوات الدينية كلها
    من وجهه نظري احنا المفروض نعدلها ونخليها تتوافق مع مجتمعنا
    اما المواصلات دي بقي مشكلة مش عارفة بجد حلها صعب اووي ومحتاج وقت فعلا لكن مش مستحيل انها تتغير بس الاكيد الالتزام حلو اووي ولو حطينا قوانين اكيد كل شيء هيكون جميل

    ردحذف
  11. رامي
    هو اكيد انت معاك حق اني في حاجات كتير اتكسرت جوانا
    لكن احنا لسنا عندنا امل اننا نغير اللي اتكسر ده ونحقق احلامنا
    بس مقولتيليش اشمعني لبنان يعني...!!

    ردحذف
  12. عمرو يسري
    احييييييييك بشدة علي انك جاوبت بإيجابية وليس سلبية زي ما عمل ناس كتير من اصحابي علي الفيس بوك وعلقوا علي الموضوع ده بهزار
    كلامك عجبني اوووي

    ردحذف
  13. خواطر شابة
    كلامك منطقي جدا عزيزتي
    خاصة ان النظم العربية متشابهة تماما في نقطة انهم يدخلوا لكن ميخرجوش الا علي الموت فقط...
    عجبني كلامك جدا
    تحياتي

    ردحذف
  14. محمد حجاز
    امممممممم
    كلامك كبير جدا
    بس منطقي برضه

    ردحذف
  15. تيرز
    كلامك تمام زي كلام ميادة صديقتي وكلام حمادة زميل دراستي
    تحياتي يا عزيزتي واتمني ان تنالي هذه الفرصة واعتقد انك تستحقيها بجدارة وان فترة رياستك ستكون ممتعة

    ردحذف
  16. قطرة وفا
    حلو اووي الكلام ده خصوصا اول قرار
    منطقي جدا
    وكلامك عن العراق بجد حسسني بمرارة جامدة اووي

    ردحذف
  17. richardCatheart
    هههههههه
    واهو كدة نكون عمرنا الصحرا

    ردحذف
  18. محمود
    ههههههه
    ماشي اتجوز وبعدين يحلها ربنا

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين