الخميس، 30 ديسمبر، 2010

وداعا.....واهلا .....

عام جديد .....
لعله يكون سعيد....

بتمني ان العام الجديد يكون عام سعيد علينا جميعا.....
يوم واحد فقط يفصلنا عن العام الجديد ....
يوم واحد فقط قد لا يفرق مع اناس كثيرين فهو عام وفقط ....عام جديد من الشقاء والتعب ....
وبالنسبة لآخرين احتفال وهيلمان وكثيرا من الطعام والشراب والرقص وعدم الاهتمام....
وبما اناا وسطا بين هؤلاء وهؤلاء ......والحمد لله....
دعونا نفكر بما مضي فمن لا ماضي له ليس له حاضرا ولا مستقبل ...
العام الماضي ماذا فعلت فيه....؟ هل كان سعيدا ؟ ام تعيسا...؟
هل انجزت فيه وحققت نجاحات ....؟ أم فشلت وتكاسلت ....؟
وماذا تفكر للعام الجديد .....؟
ويا تري ماذا اخفيت له من العام الماضي من سراء وضراء......؟
بالنسبة لي ......
انا لا احب الارقام الزوجية وبرغم هذا بدأت سنة 2010 لي  سعيدة يغلفها البكاء .....
اصبت فيها بالكثير من التعاسة ....
ولكني اصبت بقدر ايضا من السعادة ......
وقد ينسيني القليل من السعادة هذا الكثير من الحزن .....
فالاحداث السعيدة قليلة دوما .....ولكني احب ان استغلها وان اعيشها بكل لحظة فيها واستمتع بها جدا......
مش عارفة المفروض كان احسن حاجة اية في 2010 .....
ولنبق في المنتصف.......
ففي شهر يوليو 2010 شرف  الحفيد السادس لعائلتنا .....زياد اسماعيل .....ابن اختي .....
كنت سعيدة جدا بيه وبرغم انه جه قبل امتحاناتي  ومش كنت بعرف اذاكر منه الا اني كنت سعيدة بيه جدا جدا جدا .....
امتحاناتي كانت صعبة  شيء ما .....
كنت  مريضة الي حد كبير .....
لم اشعر بعيد ميلادي ......بسبب امتحاناتي ومرضي....
بعد الامتحانات  غادة ورانيا ورضا عملولي احلي حفلة عيد ميلاد بجد وبدن نفاق كان احلي يوم .....واحلي هدايا  جاءتني منذ فترة ...
في عام 2010 اخيرا شفت دكتور احمد خالد توفيق  الطبيب المغمور والدكتور المعروف في عالم الادب ....ادب الرعب ....واشهر من كتب ادب الرعب في العالم العربي .....وطبعا اشهر من ان اتكلم عنه.....
شفته اخيرا بعد مراسلات سنين طويلة جوابات وايميلات وتليفونات ......
واخيرا في لقاء شفته وتحدثت اليه كثيرا ايضا ووقع لي علي كتاب له  اعتز به جدا .....للتوقيع ولانه هدية عيد ميلادي عام 2009 من صديقتي العزيزةالشمال سيناوية مديحة البياضي .......
اية تاني حلو في 2010 نجاحي بتقدير جيد برغم اني كنت خايفة جدا وقلقانة .....وكانت احلي مفاجأة لي ف 2010.....
اية تاني......دخلت مسابقة للقصة القصيرة وفزت فيها .....
الحلو  اني اول مرة احضر لقاء مدونين  كان في 2010  واتعرفت علي مدونين بجد الله عليهم  ....
الحلو تاني اني عرفت معني التدوين ودخلت  العالم ده وحبيته اوووي....
الاحلي بقي ان البنت ساسو ....سارة بنت اختي هتكمل سنتين بكرة يوم 31/12 اصلها اتولدت يوم 31 ديسمبر 2008 ....يعني عندنا عيد ميلاد وتورتة انا اللي هعملها يعني اللي مستغني عن نفسه يبقي يجي يا كل منها .......
اية ده كله حلو حلو .....وهو فين  الوحش بقي......؟
الوحش كتيييييييير .....بس يا ريتني اقدر اتكلم عنه.....
خسرت حد من اصحابي كنت بعتبره صديق .....لكن اتضح انه انسان تافه مبيحبش غير نفسه وفقط.....
خسرت صديقه كنت بعتبرها فعلا صديقه بس مش عارفة لية البنات بتتغير بعد ما تتخطب وتتجوز .....؟؟!!!
عرفت اد اية انا انسانة طيبة ومهما عملت مش بعرف اغير طبعي وطيبتي دي .....يا ناس نفسي ابقي شريرة ......
لسة زي ما انا متمردة ......حرة ......عنيدة......لا اقبل بأنصاف الحلول......وهو ده اللي مغلبني ومخللي العام الجديد زي العام اللي قبله تمام......
يا تري اية اللي انت مخبيه لينا يا 2011...؟
بتمني يكون خييييير ....
وعام جديد سعيد علينا كلنا.....
كل سنة وانتم طيبين وبخير وسعادة وحب

هناك 52 تعليقًا:

  1. أجمل حاجة انك رجعتى تدونى باستمرار و تزورى المدونات

    كل سنة و انتى بصحة و عقل و حب :)

    ردحذف
  2. كل سنة وانتى طيبة ياحوبه
    والواحد اصلا مش بيتعلم بالساهل لازم يخسر ناس .. وناس تبان بأصلها عشان يعرف الحلو من الوحش
    وان شاء الله السنة الجديدة تبقى كلها سعادة وخير

    ردحذف
  3. كل عام وانت بخير ويارب عام 2011 تكون فيها بداية للنجاح واستمرار للسعاده وتكون السنه الجديده احلى من اللي فاتت وبالنسبة للتورته مش كنت تقولي بدري عشان نحضر حالنا ونيجي يللا بقى نخليها في 2011 تجربي فيهم السنه ده وناكل احنا السنه الجديد
    ادام الله عليك السعاده وابعد عنك كل سوء

    ردحذف
  4. كل سنه و انت طيبه و بألف خير عجبني أوي انك بتبصي على النص المليان أكتر من النص الفاضي
    و متتمنيش تبقي شريره لأن الطيبه اللي فيكي هي اللي مخليه روحك حلوه و كلامك من قلبك
    تحياتي ليكي و سنه سعيده عليكي و على أسرتك الجميله

    ردحذف
  5. كل سنة وأنت طيبة

    و كل سنة و ساسو طيبة (:

    أهم حاجة ان اسعادة بتطغى على الحُزن

    ربنا يحقق لك كُل أمايكى السنة اللى جاية

    ردحذف
  6. مش عارف انا علقت و النت فصل هل التعليق وصل

    ردحذف
  7. كل سنة وانتي طيبةوجميلة يارحاب
    انا زيك مش بحب السنين الزوجية علشان كدة متفائل خير بالسنة الجاية دي
    مبروك نجاحك ومبروك تشريف زياد
    على فكرة انا كنت سعيد جدا اني شوفتك يوم ابو الريش رغم اني ماتكلمتش معاك كتير لكن حسيت انك انسانة طيبة وودودة وان شاء الله يحصل لقاءات اخرى واشوفك فيها
    وبخصوص تغيير البنات مش محتاج اقولك ماتخديش في بالك واللييتغير من تجاهك يبقي مايستاهلش اصلا انه يعرفك
    سنة جديدة سعيدة عليك تحققي فيها كل احلامك وامانيكي

    ردحذف
  8. السلام عليكم أختي رحاب..

    أجمل حاجة إنك تكلمتي عن الحلو...

    والله كنت سعيدا وأنا أقرأ عن سعادتك... خلي الوحش دلوقتي واسترجعيه فقط لما تعوزي تسترجي درس من دروس الحياة... ماشي؟ :)

    طبعا باحقد عليكي حقد لن تتصوريه... لأنك قابلتي خالد توفيق...!!!! :)

    ربنا يجعل أيامك كلها سعادة..

    تحياتي أختي الكريمة.

    ردحذف
  9. كل سنة وأنتي طيبة وبألف خير وصحة وسعادة إن شاء الله
    وبإذن الله يكون عام سعيد عليكي تحققي فيه ما تتمنين
    ‏:) ‏

    ردحذف
  10. كل سنة وانتى طيبة وبخير يا رحاب


    سنة سعيدة يارب ان شاء الله عليكى وعلينا كلنا

    ردحذف
  11. كل سنة وانتى طيبة
    يارب تكون سنة سعيدة عليكى
    هقولك على موضوع منع النسخ ده دلوقتى فى تعليق تانى

    ردحذف
  12. رحاب انا مش عارفة ابعتلك الكود هنا
    هبعتهولك على الماسنجر على الياهو

    ردحذف
  13. رحاب

    كل سنة وانت طيبة
    وماتبصيش لورا خليك دايمما شايفه قدماك الشمس بشرق من قدامنا دايما

    تحياتي

    ردحذف
  14. السلام عليكم
    هاااااااااااااا
    كل سنة وانتى طيبة
    ويارب تحقق كل طموحك

    ردحذف
  15. كل سنة وانتى طيبة ويارب تبقى سنة سعيدة عليكى وتحققى كل ما تتمنية

    ردحذف
  16. كل سنة وأنت بالف خير..


    كنت هنا..

    ردحذف
  17. طيب بما انك بتراسلى وبتتصلى بدكتور احمد خالد توفيق وكمان شوفتيه شخصياً
    قوليلى بجد هو شخصيته قريبة من رفعت اسماعيل ولا بعيدة عنها؟

    ردحذف
  18. كل عام وانت طيبه
    انا سعيد جدا بمرورك الطيب على مدونتي المتواضعه
    وارجو ان يدوم الود
    اسمحيلي باضفت الربط لدي
    وكل عام وانت نجمه فى سماء التدوين

    دمت بكل ود
    مدونتي الاخرى
    http://ngtah.wordpress.com/

    ردحذف
  19. كل سنة وانتي طيبة يا رحاب
    وان شاء الله سنة سعيدة..
    رغم كل اللي حصل :(

    ردحذف
  20. إزيك يارحاب وحشتينى جدا نفسى أكلم معاكى والله بس معلش أنا مشغولة والله قوى حقك على فى الأجازة هاجيلك بإن الله على فكرة الشكل الجديد لمدونتك رائع ممتاز بجد وبجد إنتى إنسانة رائعة ولكنك أتيت فى زمن غير مناسب إطلاقا

    ردحذف
  21. كل سنة وانت طيبة يا رحاب
    وانشاء الله يكون العام الجديد فتحة خير عليك يا رب

    ردحذف
  22. http://amiralcafe.blogspot.com/2011/01/07.html
    لنصلى جميعاً ليلة الخميس 07 جانفي في جميع الدول العربية

    ردحذف
  23. Tears
    فعلا دي اجمل حاجة بجد
    وكل سنة وانت بخير وحب سعادة

    ردحذف
  24. رحــــيـل
    ان شاء الله يا سارة
    وكل سنة وانت بألف خير ويارب السنة الجاية مع امجد في بيت الزوجية السعيد

    ردحذف
  25. eng_semsem
    ابو مـــــــلك
    يارب كل خير ليك في كل ينة ومش السنة دي وبس
    ويارب يرجعلك ملك بالسلامة لحضنك ويوفقك
    وانا دايما بجرب فيهم وهو انا لو مجربتش فيهم هجرب ف مين يعني....؟

    ردحذف
  26. شيرين سامي
    والله انا بحاول دايما اني ابص للحاجة من شكلها الحلو مش من شكلها الوحش
    ومهما حصل بقوم من وقعتي تاني
    ربنا معانا كلنا ويارب عام جديد سعيد عليك وعلي اسرتك

    ردحذف
  27. كل عام وانتي بخير
    وسنه سعيدة عليكم ان شاء الله

    مدونتك بجد رائعه جدا
    مزيد من التميز والابداع

    واشكرك على الزيارة الكريمة

    اتمنى لك التوفيق
    تقبلي مروري وتحيتي
    ^^

    ردحذف
  28. جميعا بداخلنا احلام واحلام والكل يتمنى ان يحقق احلامه صحيح ان بعض الاحلام تكون مستحيله لاكن المهم اننا بنحاول اتمنى من الله عز وجل ان يوفقك فى تحقيق احلامك كى تصبح حقيقه . اتشرفت بوجودى بمدونتك وارجو ان اكون ضيف خفيف يشرفنى زيارتك ويهمنى رايك تقبلى تحياتى الاحــــــــــــــــــلام

    ردحذف
  29. كل عام وانتي طيبة يا قمر ..

    حلوة اوي المدونة ما شاء الله عليكي

    ،،

    بالنسبة للبوست فبجد عاجبني اوي تفكيرك وتلخيصك للحلو والمؤلم


    ربنا يوفقك

    ردحذف
  30. الأخت الفاضلة
    كل عام وأنت بخير ودائماً فى سعادة وهناءة

    تقبلى مرورى وتقديرى واحترامى
    بارك الله فيك وأعزك

    ردحذف
  31. Ramy
    وكل سنة وانت طيب وبخير يا رامي برغم كل ما حصل....
    والسعادة مهما كان وقتها قليل وساعتها قصيرة بس بتطغوا علي الاحزان يمكن لاننا شعب مش بيحب الحزن اصلا
    ربنا ما يحرمني من طلتك ولا كلام يا رامي

    ردحذف
  32. رامي
    التعليق وصل وربنا يخليك
    وكل سنة وانت بالف خير وصحة وسلامة وسعادة وحب

    ردحذف
  33. mostafa rayan
    والله يا مصطفي انك الوحيد اللي اتكلمت معاه كتير يومها وكنت سعيدة جدا ومازلت بمعرفتك وبمعرفة المدونين
    وبجد لاول مرة اكلم شخص بالسرعة دي يومها وكنت انت الشخص ده
    شكرا لكلامك واليوم ده ف ذاكرتي باسعد ايام حياتي

    ردحذف
  34. ماجد القاضي
    احقد عليا اوووي
    ده انا كنت بحقد علي اصحابي حقد عشان هما شافوه قبلي .....هههه
    وعايزاك تحقد اووي بقي عشان غادة محسن صديقتي العزيزة صورتني من غير ما اعرف يومها صورتين حلوين اووي بس انا بقي اتكسفت انشر الصورة وبعدين خايفة علي جمالي وحلاوتي .....هههه
    لاء بجد اخويا ميوافقش انشر الصورة وبعدين انا خفت عليكم لا تتخضوا من شكلي .....ههههه

    ردحذف
  35. P A S H A
    شريف باشا
    يوم ابو الريش حسيتك انسان مألوف ليا يمكن ببساطتك وعفويتك
    ربنا يجمعك علي خير انت واميرة ويارب السنة دي متكونش السنة الجاية وتعملوا فرحكم الضهر زي الاجانب عشان نعرف نيجي كلنا .....هههه
    كان نفسي اكتب لك كلام حلو اووي عل هجايص بس انت قافل التعليقات

    ردحذف
  36. Noha Saleh
    وانت طيبة وبخير يا نهي انت واسرتك يا رب دايما
    ماشي يا حبيبتي مستنية
    ولما تكوني فاضة عادي يعني

    ردحذف
  37. Ms Venus
    حبيبتي كل سنة وانت بخير وسعادة وسنة سعيدة علينا كلنا وكل السنين يا رب

    ردحذف
  38. شهر زاد
    وكل سنة وانت بكل خير
    وكل ليل له نهار وكل ظلام له شمس تبدده
    شكرا لكلامك الجميل

    ردحذف
  39. مدونة رحلة حياه
    وانت كمان يا رب تحقق كل طموحك وامانيك
    كل سنة وانت بكل خير

    ردحذف
  40. هبة فاروق
    سنة سعيدة عليك وعلي اسرتك
    ويارب تحققي فيها كل ما تتمني

    ردحذف
  41. خالد أبجيك
    كل سنة وانت بخير وسعادة

    ردحذف
  42. موناليزا
    حبيبتي انا مدمنة مراسلة وياما كلمت دكتور نبيل فاروق واحمد خالد توفيق
    وغيرهم
    فعلا شخصيتة قريبة منه جدا وشكله كمان
    بس انت متملكيش اول ما تشوفيه غير انك تحبيه فعلا
    شخصية بجد رهيبة في كل شيء
    عظيم دكتور احمد وبجد انسان انسان انسان
    بتمني اني اشوفه تاني واكلمه تاني
    واتمني انك تتيح لك الفرصة وتشوفيه

    ردحذف
  43. ابو فارس
    اهلا بالسيناويين
    والله انا اللي سعيدة بمعرفتك جدا
    كل سنة وانت بكل الخير
    وكل سينا بخير

    ردحذف
  44. فتافيت
    رحاب يا قمرة انت كمان
    برغم كل شيء بنحب حياتنا وبنحب نكملها
    بتمني لك كل خير

    ردحذف
  45. مروه صابر
    مروة يا حبيبتي والله انت وحشاني كتييييييييير
    هستناك يا قمر وربنا معاك
    كويس ان الشكل الجديد للمدونة عجبك

    ردحذف
  46. حلم
    ويكون فتحة خير علينا كلنا يارب
    شكرا لمرورك الطيب

    ردحذف
  47. amiralcafe
    كل سنة وانت طيب وبخير وسعادة
    وشكرا لدعوتك الجميلة التي تدل علي حسن اخلاقك

    ردحذف
  48. قلم رصاص
    شكرا لمرورك الطيب الذي اسعدني جدا
    وكل عام وانت بخير وبصحة وسعادة

    ردحذف
  49. الاحلام
    تشرفت بتعليقك
    وبوجودك بالمدونة وان شاء الله لي زيارة
    وكل عام وانت بخير

    ردحذف
  50. تخاريف مترجــِــمة
    ميرسي لذوقك يا جميل والله انت اللي مدونتك بجد رائعة
    كل سنة وانت بكل خير وسعادة

    ردحذف
  51. محمد الجرايحى
    كل عام وانت بخير وسعادة وشكرا لكلامك ووجودك هنا

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين