إستفـــــــزاز....وفضول

ده واجب من عندي الجميلة نهي صالح
وانا الصراحة كنت شفت التاجات دي عند اكتر من  مدونة وكنت حابة اكتب عنها لكن بشكل تاني
لغاية ما لقيت نهي بعتالي الواجب ده ....
مجرد سؤالين ....اتنين .....لكن الاجابة عنهم ....امممممم
هل أنا فضولية وأتدخل في شؤن الآخرين..؟
أنا لا أحب أن يتدخل أحد في خصوصياتي وبالتالي لا اتدخل في خصوصيات أحد
لكني فضولية للمعرفة ....يعني بحب اعرف كل شيء ...يعني كنت بقرأ كتب انيس منصور عن الفرعنة والاشباح واحب اعرف زيادة عن اللي كتبه....ومبحبش التعليق ده...بس بحب اعرف من مصادر موثوقة مش مجرد معرفة غير آمنة....
لا أتدخل في شئون أي شخص الا اذا طلب هذا واذا تدخلت فبكل حياد ....حتي مع اخواتي ...وده شيء اتعودنا علية من صغرنا...
السؤال التاني .....
إية أكتر أسئلة بتستفزك...
الأول ....والله غريبة يعني اختك دي أصغر منك واتجوزت قبلك. ...وانت لية متجوزتيش لغاية دلوقت..." عادي جدا انا حرة وكل ده ربنا كتبه وماليش دخل فيه...وبعدين فيه اية لما اختي الاصغر مني تتجوز قبلي ...؟ حرام يعني والا حرام..."
التاني ...
انت بتلبسي كعب عالي لية ...عشان قصيرة...؟ يا سبحان الله ..وانت مالك ...ده شيء يخصني ...وتكمل بقي لما يقولولي انت مش زعلانة عشان انت قصيرة ....ده علي اساس ان الواحد بيختار من سوبر ماركت ....مش ربنا اللي خلقه كدة " برغم اني مش قصيرة اووي يعني مش قزمة يا جماعة ....وبرد علي اللي يقولي كدة بــ" ربنا خلقني كدة وانا مبسوطة ومستريحة بكل حاجة ربنا عطهالي ...
سؤال اكثر استفزاز ......لما حد يقرالي مقال او قصة ....." والله ...هو انت اللي كتبت الكلام ده....؟ مش باين يعني  عليك..." " طيب ممكن اعرف بيبان ازاي...؟
استفزاز تاني ...." لما اقول لحد كنت بطبخ او بغسل او بعمل اي شغل في البيت يقولي .....غريبة بقي انت بتعرفي تطبخي وتشتغلي في البيت ...؟....هو انا يعني مش بنت يعني والا اية...؟...منشبهش يعني ...." بس بيني وبينكم مش بعرف اطبخ انواع كتير يمكن لاننا في بلد ساحلي والاكلة الرسمية عندنا السمك المشوي "....
الاستفزاز والعصبية بجد بقي في السؤال ده ...." رحاب انا عايزاك في مشوار بكرة..؟ اية ده مينفعش مش عاملة حسابي ...؟! يا سلام يا ختي هو انت رايحة تتجوزي ..؟ لاء يا بنتي بس يعني اعمل حسابي احضر شنطتي فلوس وملابس وبعدين مينفعش لازم اقول  لأهلي الاول عشان يبقوا عندهم فكرة اني عندي مشوار مثلا بعد يومين والا حاجةمش فجأة كدة.......
في استفزاز تاني بالنسبة لي بيكون هيموتني ويجبلي شلل ...وهو اني لما اروح مع شخص عن دكتور والاقي الدكتور بعد الكشف يكتب روشتة ويلا مع السلامة ....ولا يقول في اية وعندك اية واعملي اية غير انه مكن يقول مثلا متاكليش كذا وكذا ....لكن انا بقي مش بسكت بسأل الدكتور في كل شيء وبيستغرب لما يلاقيني بناقشة وبكون عارفة  مش بس كلام  والسلام من بنت عاملة نافسها فاهمة  وهو يعني حرام لو  قلت  للمريض وفهمته اية عنده ....والا يعني كفاية انت تكون فاهم ....!!!
بس ده هو الواجب ...
واحول الواجب ده لمين ....للكسولة غادة محسن صاحبة مدونة بستان أفكاري
ولأختي ...شوشو اللي لسة بادئة التدوين من امبارح بس ...صاحبة مدونة مذكرات مدرسة مطحونة....ولمروة صابر صاحبة مدونة سنابل الامل ...وأنا اخترتهم لاني شفت التاج عند اكتر من شخص وخايفة اقول اسماء تكون كتبت التاج...فاخترت اللي انا متأكدة انهم مكتبوش التاج ده....
وعادي ممكن اي حد يعمل التاج لنفسة ويكتبه ...فيها اية يعني ...؟! عادي جدا ...
دمتم بكل خير ومساؤكم وروووووود وشتا خفيف لسة  بشايره النهاردة