الاثنين، 9 أبريل، 2012

معطف من قيود....39

في لقاء المدونين كان حديثي مع الاستاذ ابراهيم رزق عن معطف من قيود ....وشجعني للكتابة في حكايا المعطف
واتمني ان تكون قصة جميلة
ولاني احب الارقام الفردية جاء دوري بــ رقم فردي 39
لم أقرأ كل حكايات المعطف  وحاسة اني هلخبط
بس القصة دي يمكن انا كتبتها من فترة قبل ما اقرأ حكايات المعطف
بس حاسة انها ممكن تكون مناسبة  لحكايات المعطف
خاصة انه من قيود
يارب بس ملخبطش سياق القصة
ترجعوا تقولوا منك لله يا رحوب انت وابراهيم رزق

معطف الذكريات 39 



وقفت مني امام دولاب ملابسهم وهي تضع الملابس الصيفية وتخرج الملابس الشتوية  وتوقفت يدها علي معطف كريمي اللون ناعم
غامت عينيها بالدموع وهي تضم المعطف الي صدرها وهي تتذكر
فلاش باك
 " مني"  قبل عامين
كانت تسير علي الشاطيء برغم جو الشتاء البارد فهي تعشق الشتاء وتعشق البحر في الشتاء
وقفت في مواجهة البحر وأخذت تتأمله  وهي تدندن  اغنية فيروزية للبحر
تنظر  حولها ...لا يوجد ناس  كثيرة علي البحر ....فقط عشاق متناثرون هنا وهناك
تبتسم.....تتمني ان تكون مثلهم
تسير مرة اخري علي غير هدي وهي تنظر الي الارض تعد خطواتها كما كانت تفعل وهي طفلة
ثم.....تصطدم بشخص ما ..... و...." محمد"
اخيرا قابلته وحده ....بعيدا عن العمل ودوشته....بعيدا عن الاصدقاء وتساؤلاتهم
يتحدثان ....يسيران
يأكلان الآيس كريم تحت المطر الخفيف المتساقط
يتبلل شعرها ويلتصق بجبهتهها  
الشتاء والجو البارد.....لكنها لا تشعر بالبرد  فدفء حديثهما  يكفيها
تتذكر يوم أن سار بعيدا بعيدا علي الشاطيء  يأكلان الآيس كريم  تحت المطر ولكن المطر أبي ان يكون لطيفا ككل يوم  وهبت رياح قوية  وذاد المطر وأصبح يهطل بغزارة ...ووقفا معا تحت احدي المظلات علي الشاطيء وهي ترتجف  من البلل والبرد
اما هو .....
فخلع معطفه الانيق ذو اللون الكريمي الناعم والبسه لها  وهي تعترض قائلة " كدة هتاخد برد  "
" مش مهم  انا ....المهم انت "
هو واسع علي فكرة ممكن ياخد حد تاني معاك...
احمر وجهها لتلميحه...
وضع غطاء الرأس  علي رأسها وهو يبعد خصلات شعرها الملتصقة بجبينها  ويضم المعطف عليها ليحميها من البرد ....
كم كان رقيقا ومحبا وقتها
وقتها شعرت بدفء الموقف  لا بدفء المعطف
شعرت بحرارة جسده مازالت في المعطف  تدفئها
كم كان رقيقا ومحبا وقتها

فلاش باك قبل عام

" مني اية رأيك نروح نتغدي ف كنتاكي  اهو تغيير وكمان عشان تتمشي شوية  عشان الحمل  مش الدكتور قالك اتمشي ...؟
" بس يا حبيبي الجو برد ...؟ "
" تقلي هدومك والبسي البالطو  ...وبعدين لما تتمشي هتحسي بالدفا ..."
في كنتاكي  وقفت معه وهو يطلب الوجبة .... ورجعت بذاكرتها الي ايام الخطوبة والزواج الاولي  عندما كان يسألها تحبي تاكلي إية واختاري انت يا حبيبتي والحب كان مالي حياتهم ......و
" مني .....إية سرحانة في اية بقولك خدي البالطو بتاعي عشان اعرف اشيل الوجبة ونطلع فوق..."
حملت المعطف  وسارت خلفه بخطوات متثاقلة
جلست علي المقعد امامه ووضعت البالطو علي ساقيها فهي برغم المكيف في المكان تشعر بالبرد 
كانت تأكل وهي صامته ....غير ذات شعور
تسرح فيما مضي ......و ...
" مني " البالطوا ع الارض يا هانم انت عارفة البالطو ده بكام ......؟    "
* * * * *
فلاش باك
قبل ثلاث أشهر
كانوا خارجين من عند طبيب الاطفال  تحمل هي " بسمة " ابنتهم   وهو يسير امامها  و...
" محمد  هات البالطو الجو برد ع البنت ...."
واخذت البالطو  منه  وقالت له "خد البنت  كدة "
واعطته  الصغيرة  ثم اخذت ترتدي المعطف ...و...
" اية ده يا مني انت هتلبسي البالطو....المفروض انك تغطي بيه " بسمة " مش تلبسيه  يا هانم ...."
صدمت لكلماته  وقالت وهي علي حافة البكاء " علي فكرة يا محمد انا كنت هلبس البالطو واخد بسمة ف حضني عشان تدفي كويس وانت عارف ان البالطو كبير وياخدنا احنا الاتنين ...."

فلاش باك
عودة للواقع
 تجلس علي الأرض تضم البالطو  الي صدرها وعينها مغرقة بالدموع .... ....و
" مني  انا عايز الـــ.................... "
ووقف امام دموعها صامتا وهو ينظر للمعطف ....و....
؟؟؟؟؟
في الصباح بعدما تركت بسمه مع  والدتها لتذهب لعملها  قررت ان تتسكع قليلا علي البحر  لعلها تنسي ...او تتذكر تلك الايام الجميلة التي كان فيها هو  يعشقها ولا ينسي ان يهديها وردة كل صباح قائلا صباح الحب ...تتساءل لما دوما يقولون ان الحب يموت بعد الزواج....
كانت تتمني ان يزيد الحب لا ان يموت ....كان عندها أمل .....
سارت بتثاقل علي البحر ....تري العشاق هنا  وهناك 
تبتسم  وتتساءل ... هل سيكون مصيرهم كمصيرها يوما  بعد الزواج ...
غام الجو ...واصبح منذرا بسقوط المطر ..........وهبت رياح قوية باردة  وشعرت بالبرد وتذكرت انها خرجت بدون معطفها  .......وتهكمت ...ماذا يفعل المعطف اذا كان داخلها متجمدا ....
وطفرت الدموع من عينيها وهي تتذكر ان عمر زواجهم هو عامان ....
وامطرت السماء كأنها تشاركها البكاء ...
وتبللت واصبحت تشعر بالبرد القارس ...فلفت ذراعيها حول كتفيها طلبا للدفء و...
" حبيبتي .....حد برضه ينزل ف الجو ده  من غير بالطو....."
كان هو بمعطفة ذو اللون الكريمي الناعم .....يضمه علي جسدها النحيل ويضع غطاء الرأس علي رأسها ويبعد خصلاتها الناعمة الملتصقة بجبينها  وهو يقبلها قائلا " أنا آسف ....."
يمسح دموعها المتساقطة  ويضمها الي صدره الدافيء ويقول " وحشتيني ....."
ترتاح علي صدره ولا يهمها انها علي البحر والناس حولهم ...ولا يهمها المطر المتساقط ...
فقط تشعر بدفء حبها قد عاد
بسبب معطف كريمي اللون ناعم


 رحـــــــــــاب صـــــــــــالح







هناك 32 تعليقًا:

  1. تحفه يا رحاب بجد كلها مشاعر واحاسيس وحب سردتيها بطريقه مشوقه قريتها كلها مره واحده ولم اتوقف حتى انتهت بنهايه مفرحه جعلتنى ابتسم فقد تمنيت ان تنتهى نهايه مفرحه
    اشكرك اضفتى قصه جميله لمعطف القيود واشكر استاذ ابراهيم لانه شجعك على الكتابه

    ردحذف
  2. جميلة يارحاب

    استمري في الكتابة

    اسلوب جديد في الكتابة طريقة الفلاش باك دي

    تحيتي

    ردحذف
  3. هبة فاروق
    الصراحة يا هبة انا كنت متوترة وقلقانة ومنشرتش القصة الا بعد ما اخدت رأي الاستاذ ابراهيم فيها الاول وقالي انها حلوة
    عشان كدة نشرتها
    مبسوطة اووي انها عجبتك
    انا كتبتها تحت الحاح من جوايا
    اننا كتير بنتغير برغم اننا جوانا نفس الحب
    وان كل اصحابي المتجوزين بيقولوا الحب بينتهي مع الجواز
    يعني بلاش تتجوزي يا رحوب خليكي كدة احسن
    هههه
    سعيدة بوجودك وبكلامك يا هبة اووووووي
    مساءك بنفسج

    ردحذف
  4. سواح في ملك اللــــــــــــــــــه
    الله يخليك بجد
    انت بجد بتقول كلام بسيط وقليل بس معناه كبير اووي
    بجد كلماتك اسعدتني جدا
    ميرسي لوجودك
    ومساءك بنفسج

    ردحذف
  5. البالطو ده وشه حلو..اتعرفت عليه وجابلها ايس كريم في جليم واتجوزته وراحو كنتاكي وخلفت ولبسته كذا مرة واتصالحو وانت كمان كتبتي قصة حلوة اوووي ...والله برافو عليكي

    ردحذف
  6. السلام عليكم
    جميل ان البالطو وصل اليك يا رحاب :)

    الحياة الزوجية بكل مافيها من مسؤلية واولاد ومشاكل منظومة كاملة تمر على كل البشر ههههه

    لكن الحب الحقيقى بيظل موجود بين ثنايا صراعات المسؤلية لكن اسلوب التعبير عنه بيختلف مع مرور الزمن

    ونظل نحتاج دائما للمسات الحنان والرقة وعذوبة الكلمة التى تروينا لنستطيع المواصلة بالحياة

    احسنت يارحاب ماشاء الله عليك حبيبتى
    تحياتى لك

    ردحذف
  7. راااائعه جدا بالتوفيق لك ..
    تحياتى
    نور

    ردحذف
  8. يا عيني على الرقة
    قصة في منتهى الروعة
    تسلم ايدك يا رحاب

    ردحذف
  9. انا طبعا سعيد بانضمامك الى المعطف
    بجد المعطف دخل مرحلة اخرى و نكهة اخرى من الجمال
    الحب دائما ما يكون موجود بعد الزواج
    و لكن التعبير عنه قد يختلف

    تحياتى

    ردحذف
  10. جميلة أوي بجد
    :)
    عرفتي تحبكيها كويس جداً
    أستاذة والله يا رحاب ، برافو عليكي بجد

    ردحذف
  11. راااااائعة

    ومكتوبة بطريقة جميلة
    تسلم ايدك

    والحب لايضيع بعد الزواج
    لكن بيقتل حبيبتي

    :)
    اصل اللي بيضيع ممكن يرجع لكن اللي بيموت مابيرجعش

    وعلشان الحب يعيش
    لازم الزوجين يتفقوا علي ده
    مش واحد علي طول يدي والتاني علي طول ياخد
    هو ده اللي بيقتل الحب

    ردحذف
  12. Tarkieb
    ممممم
    يعني افهم اية بقي
    ده ذم
    والا مدح
    والا الاتنين....؟
    ههههه
    حدد موقفك يا بني

    ردحذف
  13. ليلى الصباحى.. lolocat
    يااااااااة وحشتيني اووي
    والف سلامة عليكي
    وحمد الله بالسلامة
    فينك واخبارك اية...؟
    متشكرة لكلماتك
    وانت عارفة اد اية كلماتك بتأثر فيا
    شكرا لوجودك معايا ومعانا كلنا
    مساءك بنفسج

    ردحذف
  14. نور القمر
    شكرا يا نور
    المدونة منورة بيك

    ردحذف
  15. مصطفى سيف الدين
    ممممممم
    افهم اية يا دكتور...؟
    والا يعني معجبكش الكلام يوم اللقاء
    انا غلطانة
    المفروض كنت اقول ان الغدا كمان علي حسابك
    مش النسكافية بس
    ميرسي يا دكتور
    وميرسي علي الاهداء الرقيق
    علي الكتاب الرائع

    ردحذف
  16. ابراهيم رزق
    استاذ ابراهيم
    بجد لولا تشجيعك
    ورأيك ف القصة قبل ما انشرها هنا
    مكنتش نشرتها
    بجد متشكرة جدا لثقتك ف اني هكتب حاجة حلوة
    وميرسي بجد علي كل حاجة

    ردحذف
  17. P A S H A
    شريف باشا
    منورني
    اذيك انت واميرتك...؟
    وفينك مختفي...؟
    وبعدين يعني مش استاذة اووي كدة لا تخليني اصدق بجد واتغر ف نفسي
    هههه
    شكرا لتشجيعك دايما

    ردحذف
  18. شمس النهار
    فعلا معاك ف كلامك
    وكمان انا مش مع المثل بتاع اللي ينكسر ممكن يتصلح لانه مثل غلط
    واللي بينكسر ف الحب مستحيل يتصلح
    ابدااااااااا
    شكرا يا سموش انك دايما مشجعاني ومطمناني كدة

    ردحذف
  19. رحاب صديقتي الجميله
    سعيده جداً بالتعرف عليكي بجد :)

    الجزء في منتهى الروعه و فيه حبكة دراميه و مشاعر دافئه رقيقه جداً كعادة كتاباتك..بصراحه كويس إنه عزمها على الغداء اساساً دي متفاءله أوي لو كانت فاكره ممكن يرجع زي أيام الخطوبة :)
    النهاية دافيه و لو إنها مش دائماً واقعيه

    مشاركتك مميزه جداً تسلم إيدك

    و في إنتظار جزء تاني
    :)

    ردحذف
  20. شيرين سامي
    انا اللي مبسوطة اني شفاك بجد
    صحيح كان وقت قليل بس كان مؤثر
    سعيدة بيك جدا وبكتاب بنكهة مصر
    بجد رائع
    وميرسي علي الاهداء
    وميرسي علي تشجيعك وكلامك
    النهاية الصراحة مكانتش كدة
    بس انا قلت بلاش جو الكآبة اللي انا عايشة فيه ومعيشة فيه المدونة من فترة وخليني احلم شوية برومانسية وشوية فرح وامنيات
    شكرامرة تانية شيرين

    ردحذف
  21. حلوة
    لالا جميلة اوى اوى
    انا كنت متوقعة النهاية تكون حزينة بس انبسطت بيها كده

    ردحذف
  22. مممممممم

    يا نهار ابيض علي القصة
    لا روعة
    سرحت فيها جدا
    بقترح حاجة بقي
    ممكن تعكسي علي محمد بقي
    يعني تحكي عنه شوية
    هههههه
    عشان يبقي جزء تاني للقصة

    :)

    ردحذف
  23. مساء الورد رحاب

    سافر المعطف بين كثير من كتاب بلوجر

    فكان في كل موضع قصة تحمل في سياقها

    عبره مرة سعيدة ومرة حزينة حتى وصل

    غليك فلم يقل روعة عما سبقه من

    المبدعين هنا بل سردتيه بطريقة مبتكرة

    وجميلة تحسب لسجلك الجميل ...

    تحياتي وإحترامي

    ردحذف
  24. Noha Saleh
    انا اصلا كنت كاتبة نهاية حزينة
    بس الصراحة قلت خللي عندك زوق يا رووبي وخللي النهاية حلوة عشان الناس الحلوين اللي هيقروها
    منوراني يا نهي
    علي فكرة يوم التجمع السكندري كلهم حسبوني انت
    وكلهم اصروا اننا اخوات
    قلت لهم اننا اخوات مفيش مشكلة ههه

    ردحذف
  25. Haytham Alsayes
    مممممممم
    اه يا هيثم
    مش عارفة
    اذا ده هقدر اعمله والا لاء
    يمكن لان شخصية محمد بتحيرني شوية
    في سياق القصة يعني
    شوية بيحبها اووي ويخاف عليها
    وشوية بيكون العكس
    بس اوعدك اني احاول
    منورني

    ردحذف
  26. ريبال بيهس
    لاء لاء لاء
    بجد ده كلام انا مقدرش عليه
    انا كدة خجلانه بجد
    مقدر شاني اقول اني اضفت شيء مبدع لان بجد كل اللي كتب ف المعطف محترفين
    انما انا هاوية فقط واتب ما بقلبي وحسب
    ميرسي جدا لكل كلامك

    ردحذف
  27. مساء الغاردينيا رحاب
    رغم وصولي المتأخر وأعتذر جداً ياغالية ولكن يعلم الله أنني اصبحت أتغيب كثيراً رغماً عني ومع ذلك عدت إلى هنا اليوم لأجد المعطف بين أناملك المخملية وربي يارحاب ليس مجاملة حقاً أبدعتِ لأن المعطف كان دافئاً جداً بتلك المشاعر التي بدأت وأنتهت تحت معطف "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  28. ‏‎ ‎لا الزواج يقتل الحب ... ولا حتي يقلله

    السقوط في روتين الحياة هو ما يفعل

    لن أقول رائعة
    لأنها أكثر من ذلك بكثير

    ردحذف
  29. ريـــمـــاس
    ولا يهمك حبيبتي انا بجد اللي يهمني انك تكوني بخير وف احسن حال
    واطمن عليكي دايما
    وميرسي جدا علي كلامك
    بجد انت اخجلتيني
    ومكنتش اعرف بجد ان ردودكم هتكون كدة
    وتخلوني ابكي من الفرح اني قدرت اكتب شيء يلمسكم
    شكرا لك حبيبتي
    ومساءك بنفسج

    ردحذف
  30. الازهرى
    أسااااااااااااامة
    منورني
    معاك حق
    هو الروتين بغباوتة
    بس مش عارفة لية كلنا بنسقط فيه
    خصوصا اللي بيحب ويتجوز عن حب مش بيقدر يخرج من دايرة الروتين الي تخنق
    شكرا لوجودك اسامة
    سعيدة بكلامك
    مساءك بنفسج

    ردحذف
  31. يعني هو اخدها وخرجها وعزمها في كنتاكي وهي بتدور على البالطو ده تلاكيك بقى هههههههههه
    جميله يا رحاب الطريقه من الماضي للحاضر وترتيب الاحداث بالعكس
    وجميل اسلوبك
    تحياتي

    ردحذف
  32. eng_semsem
    يا اسامة
    يعني اعمل فيكم اية...؟
    كلكم يا رجالة سيبتوا الحكاية ومسكتوا ف كنتاكي
    الله يخرب بيت كنتاكي
    ده انا كرهتها والله
    هههههههههههه
    ميرسي يا سامة علي وجودك وتشجيعك يا بلدياتي

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين