الأحد، 29 أبريل، 2012

زمان احلي والا.....؟

كان ياما كان
ان اختي ف يوم من الايام
راحت مشوار
ولان الاخوات لبعضيهم
فالهانم سابت ابنها  " محمود "عندنا
وكان الوضع كالتالي .....
شيرين اختي بتسكت فيه  وهو مش بيسكت
راحت غنت له  اغنية " ماما زمانها جاية ...."



وروحت انا كملت الاغنية .....
لقيت  هشام ابن اختي " هشام ده ف اولي اعدادي "  قالي اية يا خالتوا اللي انت بتقوليه ده انت مألفاه ...؟
استغربت وقلت له دي اغنية اطفال مشهورة جدا
قلب شفايفه كدة وقالي " وهي دي اغنية اطفال طب جيبي علي طيور الجنة والا كراميش والا .......شوية اسماء كلاكيع كدة  لقنوات اطفال  اول مرة اسمع عنها  واغاني اغرب من الخيال ....ومفيش فيهم اغنية مصري لاء كلهم  خليجي يا تركي مدبلج طبعا للهجة السورية .....ده كله ومحمود سكت مرة واحدة كأنه بيسمع الحوار ده .....والا مستني لما يسمع اغنية جديدة والاقديمة المهم انه يسمع اغنية وخلاص
وبعدين فضلت انا اقول ف اغاني وراها اغاني وانا بق يكنت حافظة الاغاني بتاعت الاطفال كلها  ولغاية دلوقت برضة حفظاها  سبحان الله فعلا ...

مش عارفة هو فعلا زمان  كان احلي والا دلوقت بس اللي اعرفه ان اغاني الاطفال زمان فعلا كانت اغاني اطفال  واللي فيها مراعين شعور الاطفال و بجد كانت جميلة جدا واختيار المطرب او المطربة واللحن والكلمات والتصوير كان مذهل  مش زي دلوقت اللي  خللي اشخاص مالهومش اصلا ف الفن يغنوا للأطفال  بس لمجرد الغيرة والمنافسة  وبكلام مالوش لازمة
ف الاخر هشام قالي  اغاني الاطفال بتاعتكم كانت وحشة اووي يا خالتو
حد فاكر  اغاني الاطفال زمان .....؟



واية اكتر اغنية دايما بتفتكرها وتدندن بيها ....سواء مع نفسك او مع اولادك ..." ملحوظة المتجوزين وغير المتجوزين برضه يجاوبوا السؤال ده اجباري "
طيب لو افتكرت الاغاني دي تفتكر  حد من اصحاب زمان  بأي اغنية منهم ...؟ " السؤال برضه اجباري
السؤال الجاي بقي اختياري ....تحب تهدي اغنية اية من اغاني الاطفال زمان لأي شخص دلوقت....؟
علي فكرة عادي ان اي حد منكم يهدي لي الاغنية مش هعتبرها رشوة هههه
وعلي فكرة انا كدة غششتكم بالصور كمان *_^  ايموشن بيغمز

هناك 10 تعليقات:

  1. اه والله يارحاب فكرتينا باللذي مصي

    اعنية ماما زمانها جاية جميلة

    وكان فيه سلسلة اعاني لعفاف راضي

    كل حاجة زمان كانت جميلة

    عارفة ليه

    دلوقتي بيعملوا اي اغنية في ساعتين زمن واقلب

    الاول الاغنية كانت زي اللوحة اللي بتترسم

    يفضل الفنان يبص عليها ويضيفلها رتوش والوان

    لحد ميحس انها هتطلع في اجمل صورها

    ممكن تاخد معاه شهور

    ردحذف
  2. طبعا اغانى زمان لها طابع خاص ..
    ولها ذكريات جميلة ..
    ومن الاغانى القديمة
    سوسة كف عروسة لعفاف راضى , انا ابريق الشاى لسيد الملاح , وهم المم لعفاف راضى
    واغانى صفاء ابوالسعود
    واغلب الاغانى كانت من مسلسلات واوبريتات وبرامج الاطفال .
    ما احلى الذكريات ..

    ردحذف
  3. والله عندك حق الاغانى دلوقتى ماسخة ومالهاش طعم
    ايامنا كانت احلى فى كل حاجة
    انا بخلى بنتى تسمع اغانينا بتاعة زمان
    بس برضه بتحب الحاجات الجديدة وده طبيعى اكيد
    انا عاوزة اهديلك اغنية الفراشة بتاعة نيللى فاكراها

    ردحذف
  4. ياااه يا رحاب
    أنا بعتبر أغانى أطفال زمان هى دى أغانى الزمن الجميل :)

    أغانى نيلى ولبلبة وعبدالمنعم مدبولة وفؤاد المهندس ومحمد ثروت ممكن تودينى معاهم لدنيا تانية خالص :)

    ردحذف
  5. انا بحب اغاني زمان وبحس انها احلي من دلوقتي وتصوري لسه فاكرة منها لحد دلوقتي
    وانا بحب اغنية يا "اخواتي بحبها" واغية "امورتي الحلوة" برضة لصباح
    وبهديلك الاغنية الاخيرة ياحبيبتي ريري
    لو تسمحيلي ادلعك طبعا
    وبصراحة مش رابطة اغنية بحد معين من اصحابي بتوع زمان
    بارك الله فيكي

    ردحذف
  6. :))))

    انا طالب معايا اغاني الاطفال دي بقالي كذا يوم

    واحمد مكي كمان فكرني بيهم فيه عنده اغنية اسها ايام زمان
    وفيها حتت من الاغاني دي

    انا كمان غير دول كنت بعشق صاء ابو السعود وحافظة كل اغانيها
    وحشاني اوي

    والله كانت طفولتنا حلوة

    ردحذف
  7. انتى كده هتخلينى اغطس غطسة للاطفال

    الاغانى كثير جدا جدا اللى فى بالى
    كفاية اغانى برنامج غنوة وحدوتة لابلة فضيلة

    انتى عارفة مين اللى كان بيكتب الاغانى جاهين و حسين السيد و سيد حجاب
    و مين اللى بيلحن محمد فوزى و محمد ضياء و عمار الشريعى
    اعتقد ان اخر البوم حقيقى للاطفال كان البوم ليلى نظمى و عمارالشريعى و سيد حجاب
    و مش هحرق ليكى الغطسة
    هههههههههههههههه

    تحياتى ليكى و لاولاد اختك

    ردحذف
  8. شوفي ياستي اغاني الاطفال في مصر ازدهرت لما كان مهرجان القراءة للجميع قبل كده كان حاجات علي مسؤلية مغنيه زي الفنان الرائع المهضوم حقه طلعت عطية
    ومن بعدها بقت اغاني ماسخة زي الاغاني الغريبة بتاعة دلوقتي ودي من ضمن الغزو الخليجي لثقافتنا وياريتها ثقافتهم همه
    دي يااما صيني ومدبلج ياتركي ومبدبلج يامكسيكي ونادرا امريكي

    انا بحب ماما زمنها جايه وبحب يااصحاب وصحباتي هنا ومحلك سر:))
    وكل اغاني صفاء علشان بيفكروني ببناتي وهمه صغيرين
    وبحب اغاني داده اللي كانت بتغنيهالي وبعدين غنتها لبناتي الله يرحمها
    هي دي اغاني الفلاحة المصرية لولادها
    واهديكي انتي سوسه كف عروسة:)

    ردحذف
  9. فعلا لزمان اغاني رائعة ما زلنا نعيش معها ونحس ان اعمارها اطول ولو ان هناك اشياء جميلة الان لكن لاادري احس ان عمرها قصير
    ربما وجهة نظر فقط لكن ثقي اني اتفق معك رحاب في طرحك
    بوركت

    ردحذف
  10. فعلا يا رحاب كانت ايام واغاني ومشاعر مفتقدنها دلوقتي
    انا بحسد نفسي اني عشتها
    وبيصعب عليا اولادي وهما بيتفرجوا علي القنوات دي دلوقتي ولما بقولهم او اجيب لهم علي النت اغاني زمان او حتي كرتون بيتريقوا عليا وبيقول عليها مش حلوه الكلمات والتصوير حتي الالوان مش عجباهم
    يلا بقا هنقول ايه ربنا يستر عليهم من الاغاني الهابطه بتاعت اليومين دول
    &
    &
    &
    اما بالنسبه للاغاني اللي دايما في باللي وفاكرها صدقيني كلها معايا دلوقتي وفاكرها
    لو عايزه واحده مميزه بالنسبه ليا فكانت
    بتقول
    هنروح الجنينه ونشبك ايدينا وندور سوا علي الارض الخضره والارض تدور بينا يا سمانا يا بنور العصفور بيدور واحنا كمان بندور ونغني يا لمونه دوخينا يلا بينا يلا يلا بينا دي الشموسه طلعه طلعه وبتنده علينا
    ههههههههه تقريبا دي كانت اصلا المقدمه بتاعت برنامج للاطفال
    يمكن لخبطت بس كنت بحبها واعيشها كدا كاني قال ايه رحت الجنينه بقا




    بوست جميل يا رحاب رجعتينا فيه للماضي
    ودي واحترامي

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين