السبت، 16 يونيو 2012

مش خايفة م الاخوان....

 كل الناس خايفة م الاخوان .....؟؟؟؟!!!!
طيب لية ؟؟؟
ممكن حد يقولي مخاوفة دي عبارة عن اية ...؟
يوصفهالي...........
انا مش خايفة م الاخوان .....
مش معني كدة اني مثلا هنضم للأخوان او غيره لالالالا انا اصلا طول عمري رافضة موضوع الاحزاب وعمري ما هنضم لحزب ابدااااا
بس شايفة ان خوفنا م الاخوان يعني مبالغ فيه اوووي
الأول عايزة اقول اني كان ومازل في صدام بيني وبين الاخوان
ومش معني اني ادافع عنهم اني موافقاهم علي كل حاجة  , بالعكس انا كدة ابقي منافقة جدا
بس  انا بتناول الموضوع معاكم ....
خلونا نشوف اية هي مخاوفنا  بالنسبة للاخوان
 غالبا لما اتكلم مع بنوتة  تقولي .." الحجاب والنقاب والعباية السودة ...دول عايزين  يرجعونا لورا ...هو احنا هنرجع لزمن التخلف تاني ؟ "
وانا الصراحة مش فاهمة اية دخل اللبس في التقدم والتأخر والتخلف والازدهار ....
مع اني شايفة ان اللبس المفروض يكون له تقاليد واعراف ...لان الصراحة انا لابيعجبني لبس البنات ولا حتي الشباب ...
في ناس هتقولي بس دي حرية ....هقول بكل بساطة ان الحرية انك متضريش غيرك  وبما انك بتلبسي شيء بيضرني نفسيا علي الاقل فده  مش من حقك ........وده رأي انا ووجه نظري انا
بالنسبة للستات مخاوفهم تنحصر في "  والله يا استاذة بيقولوا ان لو الاخوان مسكوا البلد هيخلوا الرجالة تتجوز اربعة ...
يا لهوي يعني جوزي هيتجوز عليا  تلاتة ...؟؟؟!!! ده انا كنت قتلته ..."
طيب حاجة بالعقل كدة اية اللي هيخلي الاخوان تفرض حاجة زي دي في ظل الظروف الاقتصادية المنيلة  اللي بنعيشها , طيب يجوزوا الشباب اللي مش عارف يتجوز ومقضيها يوتيوب ودي في دي
وده غير طبعا ان في ناس اصلا عندهم الجواز من اربعة عادي جدا وبيعملوها عادي بشكل طبيعي ومش اخوان ولا حاجة  علي فكرة دي قبائل منتشرة في سيناء والواحات ومطروح ....وحتي في المدن  بتلاقي كتير من الرجال متجوزين من اتنين   وتلاتة واربعة ...
نيجي بقي للشباب " اطرف التعليقات اللي بقابلها لما اسأل شاب عن راية في الاخوان انه يقولي بكل بساطة " لو الاخوان مسكوا البلد هيقطعوا المية والنور عننا يرضيكي كدة يا موزة " يعني مش عايزين الاخوان يمسكوا عشان ميلبسوش البنات طويل وواسع وحجاب او نقاب ..... امال هيتفرجوا علي البنات ازاي طول اليوم في الشارع
مع ان في شباب علي العكس شايفين ان " الاخوان لو مسكوا هيعملوا حاجات كتير حلوة ويا ريت لو يقدروا فعلا يخلوا البنات تلبس لبس معقول شوية , مع اننا شايفين ان ده مش هيقدر عليه الاخوان لان  اصلا الحاجات دي مطلوبة من الاهل مش من الرئيس  واذا كان الاهل موافقين ان بناتهم يخرجوا بالشكل المريب ده فهم اللي هيتحاسبوا  مش الاخوان اللي هيحاسبوهم ...
يا تري فعلا الاخوان ممكن يقدروا يغيروا من شكل الناس او يغيروا من دواخلهم...؟
يا تري ممكن نتغير من الداخل الاول ...ومنبقاش نسخة من السعودية وايران ....
الغريبة اني الناس بترفض الدين كأنه  " وحش قاتل "  شايفين ان الدين هيغير  حاجات كتير واسس كتيرة برغم ان مفيش امة بتقوم من غير دين 
واذا كنا شايفين ان الدول الغربية قامت وتحضرت من غير دين نبقي غلطانين جدا لان الدول دي بتعاني  من نواحي اخري في غاية الاهمية واقرأوا صفحات الحوادث  كم حالة انتحار وكم حالة الحاد  وغيره ...طيب شوفوا الافلام اللي مأخوذة عن قصص حقيقية عن مشاكل التبني والاولاد خارج اطار الزواج والافلام اللي بتحث علي  الاجتماعيات والتجمع الاسري ...كلها حاجات مفقودة في العالم الغربي المتحضر اللي احنا  عايزين نبقي زيه  ونسخه منه ....
لية احنا بقي كارهين " الدين "
في كتير من السيدات العاملات خايفين   م الاخوان بيقولوا " ممنوع عمل المرآة " ساعتها انا هكون اول واحدة تخرج ضدهم ...
لان مفيش نص قرآني قال الكلام ده " ولنا في حديث الشعرواي  وقصة بنات شعيب  حكمة "
محدش يقول انا خايف م الاخوان ....محدش يكدبهم ....ولا حد يحاسبهم غير لما الاول نشوف عملهم اية ...
انا مش خايفة م الاخوان لاني معتبراهم زيهم زي اي حكم تاني له مميزات وعيوب  واتفق او اختلف معاه
النهاردة  ادليت بصوتي وانتخبت محمد مرسي ودعيت ان لا يخيب املي  لو نجح  واصبح رئيس
الدكتور محمد مرسي شخصية احترمها ...وان كنت فقط اخشي كغيري اخرون انتخبوا مرسي ان يكون انتمائه للحزب وبال عليه وان يضع  اهمية الحزب قبل اهمية مصر والشعب
وهذا رأي الخاص

هناك 8 تعليقات:

  1. كلام جميل بس عموماانا مش خايف من الاخوان عشان الاسباب السطحيه اللى ذكرتيها ديه ولا خايف من الدين لان مافيش دين يخوف لكن السؤال هل الاخوان بتوع دين اصلا لو الاقى واحد من الاخوان بيعمل مخالفه فى انتخابات او غيره ويرد يقولى ما الكل بيعمل دا بتاع دين لو الاخوان هيطبقوا الدين ماحدش هيعترض عليهم لكن لما الاقى واحد افاق ويقول انا بتاع دين ماخافش منه هو مش بتاع دين اصلا قبل مانقول الاخوان بتوع دين عايز اعرف من اول ما ارادوا الحكم ايه تصرفاتهم التى تدل انهم بتوع دين انا اخاف من الاخوان من طريقتهم فى المعامله يعنى فى الاستفاء لما يطلع شيخ ويقولى غزوه الصناديق وفى الانتخابات لما يطلعى صفوت حجازى ويقعد يكلم باسم الدين ينفع اثق فى جماعه توظف الدين لمصلحتها السياسه وهل بهذا الشكل يكون الدين انا اخاف على الدين من الاخوان لان لما الشيوخ تنزل تخدم الجماعه وتقعد تنزل فى فتاوى لخدمه مرسى وتسئ لمن يقاطع او ينتخب شفيق ويقيدنى باسم الدين لصالحه لا اعتقد انى سوف اؤمن بهذا الدين اعترف ان فى الاخوان ناس كويسه تساعد الناس واخلاقهم رائعه لكن اخرهم الاعمال الطيبه لان مش كل جمعيه خيريه تنفع تمارس السياسه او تكلم فى الدين وللاسف المحترمين فى الاخوان هما اللى مابيظهروش ولا بيجروا وراء سلطه
    اسف على التطويل

    ردحذف
  2. كلامك جميل وان كنتي فقط تناولتي الجانب الاجتماعي,و ربما هذا ما يشغل معظم الناس و الشاهد على ذلك الامثلة اللي انتي ذكرتيها,و لكن هناك جوانب اخرى يجب التساؤل حولها ومن أهمها,اولا في حالة فوز مرسي ماذا سيكون مدى تعاون أجهزة الدولة معه علما بأن جميع قيادات أجهزة الدولة الحيوية,و غير الحيوية,هي قيادات النظام القديم و على رأسها وزارة الداخلية,خاصة بعد التبرئة الجماعية التى حصل عليها مساعدي العادلي و هم الان يطالبون برجوعهم لمناصبهم,ثانيا ماذا سيكون تصرف رجال الاعمال,و هم قوة لا يستهان بها في صلب اقتصاد البلد,مع دكتور مرسي و الوزارة التي سيأتي بها؟ فالخوف هو حدوث نوع من العناد أو المشاغبة ضد مرسي و بالتالي حدوث بلبلة في أجهزة الدولة و ربما يتم وقتها الاستعانة بالجيش و بالتالي تكون فرصتهم لفرض أجندتهم لمرسي للسير عليها أو خلعه من الاساس!!
    قد تكون هذه احتمالات بعيدة او مستحيلة و لكن ما مررنا به يؤكد احتمالية حدوث أي شئ..و تذكري ان الدستور لم يكتب و صلاحيات الرئيس لم تحدد,فربما لو فاز أحمد شفيق لوضع له في الدستور مكانة اله في الارض,و ان فاز مرسي جعلوه رئيس بلا صلاحيات و أعطوا للبرلمان و رئيس الوزراء صلاحيات أكبر و في حالة حل البرلمان كما قد يحدث لن يجد الاخوان لهم في البرلمان الجديد أعضاء مثل البرلمان المنحل فقد ساءت صورة هذا البرلمان بقصد او بدون قصد,و تبدأ اللعبة من جديد.

    ردحذف
  3. كلامك جميل وان كنتي فقط تناولتي الجانب الاجتماعي,و ربما هذا ما يشغل معظم الناس و الشاهد على ذلك الامثلة اللي انتي ذكرتيها,و لكن هناك جوانب اخرى يجب التساؤل حولها ومن أهمها,اولا في حالة فوز مرسي ماذا سيكون مدى تعاون أجهزة الدولة معه علما بأن جميع قيادات أجهزة الدولة الحيوية,و غير الحيوية,هي قيادات النظام القديم و على رأسها وزارة الداخلية,خاصة بعد التبرئة الجماعية التى حصل عليها مساعدي العادلي و هم الان يطالبون برجوعهم لمناصبهم,ثانيا ماذا سيكون تصرف رجال الاعمال,و هم قوة لا يستهان بها في صلب اقتصاد البلد,مع دكتور مرسي و الوزارة التي سيأتي بها؟ فالخوف هو حدوث نوع من العناد أو المشاغبة ضد مرسي و بالتالي حدوث بلبلة في أجهزة الدولة و ربما يتم وقتها الاستعانة بالجيش و بالتالي تكون فرصتهم لفرض أجندتهم لمرسي للسير عليها أو خلعه من الاساس!!
    قد تكون هذه احتمالات بعيدة او مستحيلة و لكن ما مررنا به يؤكد احتمالية حدوث أي شئ..و تذكري ان الدستور لم يكتب و صلاحيات الرئيس لم تحدد,فربما لو فاز أحمد شفيق لوضع له في الدستور مكانة اله في الارض,و ان فاز مرسي جعلوه رئيس بلا صلاحيات و أعطوا للبرلمان و رئيس الوزراء صلاحيات أكبر و في حالة حل البرلمان كما قد يحدث لن يجد الاخوان لهم في البرلمان الجديد أعضاء مثل البرلمان المنحل فقد ساءت صورة هذا البرلمان بقصد او بدون قصد,و تبدأ اللعبة من جديد.

    ردحذف
  4. أنا انتخبت مرسي و هذه أسباب خوفي من الإخوان
    1- ينصرون الإخواني و لو كان على خطأ ضد غير الإخواني و لو كان على صواب، و هذا عن تجارب شخصية لي و لمقربين مني أثق فيهم، و يمكنك متابعة شبابهم على تويتر أو فيسبوك و تسمعي تبريراتهم الدائمة و خصوصا بعد الجمعية التأسيسية الأولى و كيف أنهم على صواب ثم انقلب رأيهم 180 درجة حين أعلن مكتب الإرشاد أنهم كانوا على خطأ.
    2- يسعون للتكويش و لست أقصد بذلك الحكومةو البرلمان و الرئاسة، فهذا حقهم طالما أنهم حزب سياسي أن يسعوا للوصول لكل المناصب السياسية. ما يقلقني هو رغبتهم في السيطرة على المناصب الغير سياسية مثل النقابات و السماح لأعضائهم بدخول الجيش و الشرطة. لا أريد التعمق في هذه النقطة فالشرح يحتاج لصفحات ربما، لكن حضرتك ترين بنفسك في المرحلة الانتقالية نتائج تسييس مؤسسات يُفترض أن تكون غير سياسية مثل الجيش و القضاء.
    3- لا أؤيد فصل الدين عن السياسة، لكن لا أؤيد كذلك طريقة الإخوان في المزج بينهما! الإخوان يُكثرون من نشاطهم الدعوي و الخدمي وقت الانتخابات، لماذا؟ أليس من المفترض أنه خالصا لوجه الله و لا يرتبط بالانتخابات؟
    4- طريقة نظرتهم لغير الإخوانيين فيها استعلاء شديد و تقدري تراجعي تصريحات أشخاص مثل صبحي صالح و المقالات التي تُعرض على موقعهم و يتم حذف معظمها بعد أن يطالها النقد.
    5- يحبون العيش في دور المضطهد دائما خصوصا إعلاميا. نعم الإعلام العلماني يشن عليهم هجوما شديدا، لكنهم يملكون قناة خاصة و صحيفة و موقعا إلكترونيا، فلماذا لا يتابعهم أحد؟ لو حاول أحدهم الإجابة بإنصاف لعرف أنهم لا يقدمون شيئا مفيدا. و يمكن لحضرتك أن تحاولي متابعة قناتهم و لست أظن أنك ستتحملينها لأكثر من ساعتين.
    6- تطويع الآيات و الأحاديث الدينية لما يخدم أغراضهم. مثلا حديث الإمارة فيما معناه لا يتولى من يطلب الإمارة و الذي استخدموه للترويج لمرسي لأنه لم يطلبها، و تجاهلوا -عمدا- حديثا آخر ينهى فيه الرسول صلى الله عليه و سلم أبا ذر عن طلب الإمارة لأنه لا يقدر على تحمل مشقاتها و لم يقل له أنه سيكون معك فريق رئاسي من كبار الصحابة يا أبا ذر فلا تقلق. إن مرسي ضعيف الشخصية و لا يقدر على تحمل قيادة بلد بحجم مصر و هذا سيجر مشكلات عديدة في المستقبل، لكنهم يروجون له باعتباره سيكون موظفا قائدا لفريق رئاسي، هكذا بلا أي رؤية خاصة به.
    7- يدعون الديمقراطية و لا يطبقونها، محمد مرسي لم يأتِ لرئاسة حزب الحرية و العدالة بانتخابات لماذا؟ هل أعضاء الحزب قاصرون لا يستطيعون الاختيار؟
    ____
    هناك الكثير غير هذا مما لا يتسع المقام لذكره، لكن أعتقد أن هذا يكفي. أعلم أن باقي الأحزاب و القوى السياسية فيها مثل هذا و أكثر ربما، لكن كون الإخوان أحسن الوحشين أو أجمل الموجودين لا يعني ألا أخاف من حكمهم.

    ردحذف
  5. اعجبني مقالك جدا يارخاب

    فقد استعملتي عقلك في التفسير

    تطبيقا لآيات الله التي تحث علي التعقل

    ((افلا تعقلون))

    وليس استسلاما للشائعات والتخويف

    مقال رائع احييكي عليه

    ردحذف
  6. انا مش خايفة منهم ياحبي انا متأكدة انهم بتوع مصلحتهم وخلاص وده اثبتوه بوضوح من اول انتخابات البرلمان .. هتقولو احسن من شفيق ومافيش حل تالت .. انا بقي مش مقتنعة ان مافيش حل تالت وان حد يحصرني في الاتنين دول .. ماكان مبارك ماسك الحكم لمدة30 سنة والناس كانت متخيلة ان مافيش حل تاني وجم اللي اثبتو ان في حل تاني وتالت ورابع .. اتمني تكوني فهمتيني :)
    واخيرا وحشتني ع فكرة :)

    ردحذف
  7. مع احترامي الكامل لرايك
    انا شايف قصة الاخوان عامله زي قصة امنا الغوله اللي بتتحكي للعيال الصغيره وهم في وهم في كدب
    هما يهم افكار ممكن نتفق معاها ومكن نختلف ضدها انما في قصص كتير بيتهموا بيها كدب قوي يعني زي بتاعت عمل المراه ده اذا كان اول ست نجحت في مجلس الشعب كانت من الاخوان اذا كان زوجاتهم بيعملوا وبيشتغلوا يبقى هيحرموه ليه بعد كده
    ربنا يستر ان شاء الله وارجع اقول ده فصيل الناس بتحاربه وتناقشه من سنين انما الحزب الوطني محدش كان يقدر يناقشه او يعارضه والا مصيره يبقى امن الدوله
    تحياتي

    ردحذف
  8. Hello! After visiting your blog, I invite you to join us in the "International Directory Blogspot"
    For this is the very simple, just follow our blog, enter your Country, your blog url, and you will automatically integrate into the Country list.
    We are fortunate to be on the Blogspot platform that offers the opportunity to speak to the world to share with us the different passions, fashion, paintings, artwork, photos, poems and so be able to find in other countries people with similar passions.
    I think this community could also interest you.
    We ask that you follow the blog "Directory"
    Follow our blog gives you twice as many possibilities of visits to your blog! Thank you for your understanding
    Please follow our blog is very appreciate
    Have a great day with the hope that you follow our blog "Directory".
    After your approval to join us, you will receive your badge
    Regards
    Chris
    I follow your blog, I hope you'll like
    To find out, click on the link below:
    http://world-directory-sweetmelody.blogspot.com/

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين