دعوة التدوين اليومي هنا ....
الحكاية حصلت مع صديقة لي
& & &
الاخصائية الاجتماعية فين...؟؟؟
صرخ المدير في المدرسين والمدرسات اللي واقفين
ايوة يا حضرة المدير انا هنا ...رديت علية
رد كأنه بيصرخ في وشي " خدي البشاوات دول من ادامي ..اتصرفي معاهم .....المهم ان اللي عملوه ده ميتكررش تاني ..."
شاروت للولدين وقلت بهدوء " تعالي يا احمد انت وشادي "
واخدتهم لأوضة الاخصائية الاجتماعية اللي اساسا معرفش فيها حاجة لاني لسة متخرجة واصلا المفروض اني مساعد اخصائي اجتماعي يعني لسة بتدرب ع الشغل , بس الاخصائية الاجتماعية هانم بنت باشا مبتجيش الشغل الا بمزاجها يوم اه وعشرة لاء
ومن أول يوم جيت فيه المدرسة وهي مبتخلنيش اعرف اي حاجة عن الشغل ولا خليتني اتعامل مع مشكلات الطلبة عشان اعرف ازاي هما بيفكروا واتعامل معاهم , ومن اول يوم جيت فيه المدرسة وانا خايفة وقلقانة اني معرفش اتعامل مع المشكلات اللي هتقابلني لانها مدرسة اعدادي مشتركة والبنات والولاد في فترة مراهقة والتعامل مع الجنس الاخر بيكون من أول اهتماماته وعلاقات الحب كمان بتكون اهم شيء عنده
دخلت الاوضة وانا بفكر في كل ده وبصيت للولدين حسيت انهم هادين خالص ومش بتوع مشاكل ,,,, يا تري عملوا اية خللي المدير يتنرفز كدة....
قلت لهم وانا بشاروا علي الكراسي ..." اتفضلوا....اقعدوا ....هو اية اللي حصل ....؟؟؟
رد احمد بساطة " والله يا ميس ما في اية حاجة ....المدير مش عارف بيعاملنا كدة لية......
قلت " مش معقول يكون بيعاملكم كدة يعني من غير سبب ...؟؟"
اخرج شادي مشط صغير واخد يصفف شعره باهتمام وقال " والله مش عارف ...بس المدير بيقول ان في بنات هنا في المدرسة بيقولوا اننا بنعاكسهم...... ونظر لي وهو يبتسم ببراءة مع اننا والله مش بنعاكس خالص ومؤدبين جدا
واكمل احمد " وبعدين احنا ليه نعاكس ...؟ انا عمري ما اعاكس بنت ابدا ...
وابتسم شادي في غرور " وبعدين انا مش بعاكس بنات ابدا ده هما اللي بيعاكسوني لاني احلي من كل البنات اللي موجودين في المدرسة , ده حتي البنات الي في المدرسة هنا وحشين جداا "
نظرت له وابتسمت فهو وسيم حقا ويشبه نجوم السينما
" وبعدين والله ده هما اللي بيبعتونا الاضافات علي الفيس بوك وكمان هما اللي بيتكلموا معانا ....يبقي ازاي نعاكسهم ويقولوا اننا بنضايقهم ع الفيس بوك..." احمد "
" ولعلمك بقي انا بضيفهم عندي وبكلمهم بس عشان ميزعلوش ...اصلا مفيهمش بنت حلوة تستحق اكلمها ...والله هما اللي بيعكسوني " شادي بغرور أشد
ضحكت وقلت " شوفوا انتم الاتنين ...مش هقولكم ان ده غلط وابعت لأولياء امركم وكدة ...لاء ...احنا هنتكلم ونتناقش لانكم كبار ...اتفقنا...؟
" اتفقنا " ردوا الاتنين في نفس واحد
بدات اتكلم وانا مش عارفة المفروض اقول اية ...وبعدين في المشكلة دي .... هحاول اتعامل معاهم بنفس طريقتهم.... يا رب ساعدني
" هي البنات الي معاكم في المدرسة دي مش زي اخواتكم ...؟
وبعدين بقي محدش فيكم يتفزلك ويقول معنديش اخوات بنات ...ولما اقوله زي والدتك يقولي ماما ماتت وجدتي ماتت وماليش بنات اعمام ولا اخوال ولا خالات وعمات .......
ابتسم احمد وكان اقل حذر من شادي " والله يا ميس ...انا مش بعاكسها ...بالعكس انا بحبها ...هو الحب غلط...؟
سايرته " لاء طبعا ...مين اللي قال الحب غلط..؟ بس لازم يكون صح ومبني علي اسس صح
" ازاي يعني ...؟
بدأت العب لعبتي " يعني انت في سنة كام دلوقت ...؟ في تانية عدادي ..هتتجوز وانت في تانية اعدادي ...؟
" عادي ممكن اخطبها " رد احمد
" طيب تفتكر ان اهلها هيوافقوا انك تخطبها وانت طالب ومعندكش شغل ...؟"
" لالالا من ناحية الشغل اطمني احنا بنشتغل في الاجازة ومعانا فلوس كتير وبعدين انت عارفة ان بابا عنده معرض عربيات .." شادي
" طيب ولنفرض ان عندك اخت انت توافق ان اختك تحب وهي في تانية اعدادي وتقول لحبيبها انه يجي يخطبها ...هتوافق علي الخطوبة دي ...؟
شادي سكت خالص بس احمد قال " والله يا ميس انا معنديش مشكلة ما دام الحب ده بريء وطاهر ونهايته الجواز ..."
" ومنين تعرف ان الحب ده اخرته هتكون الجواز ...وبعدين انت بتقول كدة عشان اختك مش في نفس موقف البنت اللي انت عملت معاها علاقة حب ..... لو اختك انت والا هو اللي في نفس العلاقة دي هتلاقي كل كلامك ده بيتغير ....
مفيش حد منهم رد ..وحسيت ان احمد شكله اتغير ....بس شادي كان عادي خالص جايز لانه مغرور وشايف ان مفيش بنت تستحق انه يحبها عشان كدة كان بيعامل البنات باستعلاء وتكبر....
" عموما انا مش هعاقبكم علي اللي انتم عملتوه عشان انا عارفة انكم هتفكروا في كلامي كويس ومش هتعاكسوا بنات تاني ...وبعدين لسة المشوار طويل لسة في ثانوي وكلية وساعتها هتشوفوا بنات تانين وهتحبوا الحب الحقيقي ...اما دلوقت فكل ده مجرد اعجاب وبس لانكم في مرحلة نمو ,, ومرة تانية بقولكم فكروا ان البنت اللي بتقولها بحبك او بتعاكسها هي اختك..وساعتها الوضع هيتغير ...
* * * * *
المدير اتعصب عليا وقالي اني طريقتي غلط في التعامل مع الموقف وكان لازم اني اعاقبهم او علي الاقل ابعت استدعاء لولي امرهم عشان اخوفهم , بس انا كان رأي اني اتكلم معاهم بطريقتهم عشان احتوي الموقف ...بس المدير هددني اني لازم اخد قرار بخصوص احمد وشادي عشان يكونوا عبرة لباقي المدرسة ....
وخرجت من عند المدير مخنوقة ومش عارفة اعمل اية .....
* * * * * *
بعد يوم كان في خناقة في المدرسة بين احمد وشادي
ومجموعة من اصحابهم ماسكين كل واحد فيهم وهما الاتنين بيشتموا بعض
" بقي انت بتحب اختي .....بتلعب بيها زي البنات التانين وانا اللي كنت فاكرك صاحبي " احمد
" يووة يا احمد مش كنت بتقول للميس امبارح انه مفيش مشكلة ان اختك تحب ما دام حب بريء ..اية اللي غير رأيك ...؟؟؟ " شادي
"خلاص ما دام انت بتحب اختي ...انا كمان بحب اختك ....هتوافق اني اخطبها انا كمان ...وانت تخطب اختي عشان اتأكد انك مش بتلعب بيها....؟؟" احمد
" لا طبعا انت لسة طالب و...." سكت شادي .....
وتذكرا الاثنان كلمات الاخصائية الاجتماعية ولم يستطع اي منهم ان ينطق بعدها
ملحوظة
تفتكروا الاخصائيين الاجتماعيين في المدارس بيعاملوا الطلاب ازاي ..؟
صلى على النبى
ردحذفزيدى النبى صلاه
اعجبنى اسلوبك فى حل الموضوع
بلدنا مش هتتقدم فى اى مجال
الا لمت نشعر بدور الاخصائى الاجتماعى فى التعليم
و الاخصائى الاجتماعى فى اى شركة
هو من اهم الوظائف فى الخارج
تحياتى
اصلأ معندناش قناصة في الداخلية و لا عندنا اخصائيين اجتماعيين في المدارس
ردحذفبس في واحد كده في كل مدرسة بييجي الصبح معاه سندوتشاته و يشرب قهوته و يفضل في اوضته و بعد كام ساعة يروح
القصة جميلة يا رحاب تسلم ايدك
اسلووووب راقي يسلموو الايادي ..
ردحذفاسلوب راقي يسلمو الايادي ..
ردحذفولا بيعملوهم اصلا
ردحذفدول علشان الرحلات والحفلات وبس
بس برافوا عليكي
الاخصائي الاجتماعي في مصر لو اتحرك دوره يعمل استدعاء ولي امر ويجيب ابو الطالب ويقوله حصل كذا وكذا وحاول تحل المشكله
ردحذفتحياتي
مساءالنرجس
ردحذفقصه واقعيه وهدافه بجد اننا ازاي نواجه المشاكل اللي حولينا
انما بالنسبه للاخصائين فدا للاسف زي العفريت بنسمع عنهم لكن محدش شافهم طول فترة المدرسه
سلمت الانامل رحاب
ودي واحترامي
عارفه المشكله ان مفيش تكامل بين البيت والمدرسة
ردحذفبقى غريب اننا نلاقى حد بيتعامل بأسلوب علمى
الحل كل ن صح والاسلوب كمان لكن لو احنا فى مجتمع بيحل الشماكل بطريقه صح
هى اصلا بقت معضله للاسف
عموما اى حل بيكون صاحبه فاهم انه صح
ويستمر فيه
دمت بخير
مساء الغاردينيا رحوبه
ردحذفهههههههههههههه
بصراحة معليش والله ضحكت أصلهم خفاف دم اووي وخاصة شادي الي شايف نفسه ومش مصدق يامصيبتي يسمعني فارس ههههههه دا كان يقتلني حتى لو في اعدادي :)
بصي ياستي الأخصائي الإجتماعي لازم يفهم الولاد ويناقشهم مش حكاية عقاب وبس زي الطفل في البيت لو مش بتسمعيه عمرك ماتقدري تحلي مشاكله بجد صاحبتك أسلوبها حلو وربنا يوفقها ويوفقك بعريس حلو زي شادي هههه"
؛؛
؛
لروحك عبق الغاردينيا
كانت هنا
reemaas
عايزه اقولك ان عندي ف المدرسه الاخصائيه الاجتماعيه مش بتيجي اساسا حتي لو موجوده مش بيبقي ليها دور خالص .
ردحذفعجبتني اوي طريقه حلك للمشكله غعلا برافو عليكي
رمضان كريم