السبت، 30 يونيو، 2012

غنوة وحدوتة...اللون الأبيض


 البنت الصغيرة بتحب اللون الأبيض

البنت الصغيرة سرحانة بتفكر في السما
بتحب غزل البنات ...الابيض
بتحب السحاب الابيض.....
  اللي زي غزل البنات  اللي بتحبه
البنت الصغيرة بتحب تحلم بالسما ...تطلع لفوق ...فوق السحاب  الابيض ...تاخد منه غزل البنات 
وتغرق ف نعومة السحاب ...

وتلف لفة صغيرة م السحاب اللي زي غزل البنات وتاخد لصاحبتها الصغيرة....
البنت الصغيرة غرقانة في الاحلام .....
بتحلم بأصحابها  معاها فوق السحاب ....
ماسكين ايدين بعض ...عشان ميقعوش م السما....
 البنت الصغيرة بتحب التوت الأبيض....
البنت الصغيرة فوق السحاب ....
بتحلم بشجرة توت أبيض مزروعة ف السحاب ....
والبنت الصغيرة غرقانة في الاحلام.....
بتحلم بحصان أبيض .......

ويخطفها  علية فارس أبيض .....
والبنت الصغيرة ....بتحلم باللون الأبيض يكون بس هو اللون الموجود ف الدنيا 
مش عايزة اي الوان....
البنت الصغيرة بترسم علي السحاب الابيض.......
بقلم أبيض......
وقالت لأصحابها " إية رأيكم في الرسمة "
والاصحاب مشفوش غير سحابة بيضا عادية.... عشان كدة كان ردهم ....سحابة بيضا  عادية...
والبنت الصغيرة زعلت من أصحابها ازاي مشافوش  البحر والشجر والسما وهما باللون الابيض....؟
ازاي يكون اي شيء حلو وهو مش لونه أبيض....؟
ردت علي أصحابها ازاي مش شايفين الشجر والسما  والبحر  وهي بس شايفاهم...؟ 
انتم بتكدبوا لية عليا....انتم مش أصحابي ...أنا مش بحبكم...
والبنت الصغيرة زعلت من أصحابها....
البنت الصغيرة أصحابها حاولوا يفهموها  ان في ألوان تانية غيراللون الأبيض...
بس هي كانت عنيدة ....وقالت ان بس اللون الأبيض هو المهم ومفيش اي الوان تانية تهمها....
عشان كدة أصحابها سابوها فوق السحاب لوحدها.....
والبنت الصغيرة فوق السحاب الابيض مع شجرة توت أبيض و حصان أبيض علية فارس أبيض ....
والبنت الصغيرة بترسم ع السحاب الابيض باللون الأبيض....
وتحول كل شيء حواليها باللون الأبيض....
البنت الصغيرة فرحت باللون الأبيض.....
بس مع يوم والتاني حست بفراق أصحابها 
وحنت للشمس الدافية
والبحر الأزرق...والشجرة الخضرة....
والبنت الصغيرة مع حصانها الابيض وفارسها الابيض وسحابتها اللي بالون الأبيض....
البنت الصغيرة مش سعيدة....
البنت الصغيرة بس فكرت ف اللي بتحبه ....
البنت الصغيرة مفكرتش ف غيرها....
ومشافتش غير أوهامها....
البنت الصغيرة بصت للسحاب الابيض اللي رسمت عليه احلام....
البنت الصغيرة ملقتش بس غير أوهام....
البنت الصغيرة نزلت م السما ...من فوق السحاب....
دورت ع الاصحاب....
دورت ع الالوان ....
البنت الصغيرة فكرت .....
فكرت في غيرها مش بس ف نفسها....
البنت الصغيرة 
بترسم  علي ورق أبيض...
سما زرق....وشجر أخضر....
البنت الصغيرة بترسم مع أصحابها....
البنت الصغيرة خلاص مبقتش بس تفكر ف نفسها
ونسيت كل الاوهام 
عرفت ان الحياة مش بس اللي هي عايزاه
عرفت ان الحياة ألوان
ومش ممكن تتبني علي أوهام...
البنت الصغيرة فهمت واتعلمت...
البنت الصغيرة حبت واتكلمت 
عشان كدة فرحت وكملت 

واقولكم اية توتة توتة فرغت الحدوتة 
حلوة والا ملتوتة


ملحوظة
معرفش إية فكرني النهاردة بأبلة فضيلة.... غنوة وحدوتة حد فاكرها...؟ 
عشان كدة لقتني بكتب الحدوتة الملخبطة دي

 





هناك 11 تعليقًا:

  1. على فكرة الملحوظة دى لو كانت فى الاول كنت هتخيل انى بسمعها فعلا من ابله فضيله كده هقراها تانى هههههههه


    عجبتنى جدااااا بجد

    متخيله لو بنتك جت حكتلك الحكاية دى وهى متأثرة هتقوليلها ايه

    متهيألى وقتها لازم تفهميها انه عشان الابيض يبان لازم خلفيه غامقه وبيزيد جمال الابيض كل ما الخليفه كانت اغمق هى دى حياتنا

    دمت بخير

    ردحذف
  2. اللون الابيض هو بياض قلبك الراقى بالكلمات الرقيقة والحدوته الحلوة ........

    ردحذف
  3. مساء الصفـاء و النقـاء
    " رحــاب "
    :
    لأن الأبيض هو اللون الوحيد
    الذي إذا امتزج باي لون فقد جماله
    فقد بريقه وصفاءه و نقاءه ،
    حكاية ظريفة تلامس روحك النقية
    تحية ندية ووردة زكية

    ..
    ..
    ..

    أحمــ سعيــد ــد

    ردحذف
  4. حلسنا نرسم الأحلام فى زمن بلا ألوان

    الأبيض لون النقاء

    وباقى الألوان تجمع الصورة

    تحياتى للقلم المبدع


    وأبلة فضيلة لها معايا تاريخ طوييييييييييييييل

    ردحذف
  5. دائما احساسك بالالوان مختلف
    دايما تربطى ما حولك بالالوان
    الحياة اية غير الوان

    اما ابلة فضيلة فدى حكاية

    يا ولاد يا ولاد
    تعالوا تعالوا
    علشان نسمع ابلة فضيلة
    و هتحكيلنا حكاية جميلة
    هههههههههههههههههه

    ايااااااااااااااااااام

    تحياتى

    ردحذف
  6. كتبتيها زي ابلة فضيلة فعلا :)
    البنت بتحب اللون الأبيض علشان ده لون فانلة الزمالك
    صباحك ابيض بخطين حمر مليان احلام و امنيات و حاجات بيضا كتير
    عجبتني التدوينة

    ردحذف
  7. جميلة جميلة جميلة
    انا مش كنت بحب ابلةفضيلة الصراحة
    بس كده ممكن احبها على فكرة :))
    تحياتي :)

    ردحذف
  8. رائع أن تكتبى ما تشعرين به دون اى ايدلوجية فكرية

    ردحذف
  9. ايه حكاية ابلة فضيلة معاكو النهاردة مش اول واحدة تفتكرها
    جميلة اوي الحدوتة عجبتني جدا فيها رقة ونقاء تحياتي

    ردحذف
  10. مساء الفاردينيا رحاب
    كم جميلاً لو بقينا أطفال لان الحياة حينها بيضاء والقلوب بيضاء
    ولكن حافظي على قلبك الابيض لترين الدنيا صافية نقية "
    ؛؛
    ؛
    حدوتة حلوة زيك :)"
    ;;
    ;
    لروحك عبق الغاردينيا
    كانت هنا
    Reemaas

    ردحذف
  11. حكاية بلون قلبك رحاب

    جميله جدا عجبتني

    وبالنسبه لأبله فضيله
    فأكيد اكيد اكيد فاكرها
    وكنت بحبها جدا

    سلمت الانامل رحاب
    وشكرا لانك بتفكرينا بالذكريات الجميله
    ودي ومحبتي واحترامي

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين