الأربعاء، 21 أغسطس 2013

حاجات ....

0
ساعات
اقوم الصبح قلبي حزين ....
اطل ...علي مصر ....
الاقي كل البشر  مش فرحانين 
" يارب  يارب  يارب ....انت عالم بنفوسنا  والي جوه قلوبنا ...ارحمنا يارب واهدينا جميعا ...اللهم آميييين "
1
خلينا نقول خبر حلو الاول
صحبتي الانتيم ف الشغل .....اخيراااا وصل ولي العهد " محمد " 
اينعم مكنتش عايزة  انه يكون ولد  وكنت عايزاه  بنوتة حلوة اعرف العب بيها  بس يلا تتعوض المرة الجاية  :)
قلت لصاحبتي .....المهم ان " محمد " ميطلعش مهندس زي باباه ...والا هرتكب جناية ....
مبسوطة اووي عشانك يا نوسة 
2
مع حظر التجول  الي حصل 
احمد اخويا عملي حظر تجول انا كمان 
لدرجة اني عايزة اروح للدكتور العظام و اعمل صورة اشعة لإيدي   مش موافق   " قلقان جداا من الاحداث "
لدرجة اني روحت مشوار ميبعدش عن البيت عشر دقايق عملي محضر وسين وجيم " مش عارفة لو قلت له انا عايزة اروح المحافظة  مع صاحبتي هيعمل اية ...؟ "
مع ان كفر الشيخ يعني مش من ضمن المحافظات بتاعت الحظر
3
كل يوم انام اكتر من اليوم الي قبله 
بقول جايز اصحي من النوم الاقي ان ده كله كان كابوس
وان مفيش  اي حد اتقتل ولا حد اتجرح ولا في اي حد اعرفه من اي اتجاه مات او حصله حاجة ...
بس بصحي والاقي في حد اعرفه " مات "
في حد اعرفه"  اتجرح "
في حد اعرفه " اتسجن "
في حد اعرفه " كان هنا ...وبقي هناااك "
4
اسطوانة كل يوم
وطول النهار والليل ....
علي اليمين " ساندي ولميس " بنوتات ولاد عمي   " لميس سبع سنوات  وساندي ثلاث سنوات "
شغالين علي الطبلة " ارحل ياسيسي مرسي رئيسي "
ومع كمية اغنيات مهولة  عن مرسي 
علي الجانب الاخر  ..." لوجي ولوسي ...ريماس وريتاج  توءم ابن عمي التاني البالغين من العمر ثلاث سنوات "
علي الطبلة  بردو ...ارحل يا مرسي  ارحل يا مرسي  وتسلم الايادي ..
حتي الاطفال اصبحوا بيتكلموا ف السايسة ...
5
" انت مع مين ...؟"
سؤال اتسألته ملاييين المرات 
" مديري " ف الشغل  قالهالي " واحدة زييك كدة فكرها ليبرالي   مش ممكن تكون مع الاخوان "
زميلي الاخواني ف الشغل " لا طبعا رحاب معانا "
زميل اخر " لا رحاب  ليبرالية علمانية  مش اخوان "
@
برة البيت 
سؤال لأختي " هي رحاب فين ..؟ طلعت مع الاخوان ...؟"
لماما " رحاب طلعت مع مسيرة السيسي صح ..؟ "
بابا " رحوبة ...متتكلميش ف السياسة 
#
أنـــــا
انا علي فكرة مش مع ولا ضد حد بعينة...
انا ضد القتل ..سفك الدماء ....
انا مع السلوك الصح وضد السلوك السيء 
أنا  مع مصر 
مش مع شخص 
أنا  بتشتم من الفريقين لاني من وجهه نظرهم فلول  لما بقول الكلام ده
اووووك 
انا حرة ...ومحدش هيقدر انه يحجر علي رأي ...انا مازلت مصرة اني مش مع فرقة من الاتنين لا ده ولا ده 
انا مع مصلحة البلد  ...مع مصر 
عايز تعرف بني ادم صاحبك  علي حقيقته  " بنت سواء او ولد "
اعرف اتجاهه السياسي ثم ناقشه ......
اذا  تكلم معك بالعقل والمنطق والدليل  واحترم رأيك....فهذا يستحق ان يكون انسان  وان يكون صديق حقيقي
اما اذا تكلم معك بمبدا الجدل الغير مجدي والسباب والشتائم  فتأكد أنك أمام " لا شيء "  فهؤلاء لا شيء وما أكثرهم للأسف
فقدت كثيرون  علي الفيس بوك  بسبب " الفاظهم وجدالهم الغبي ....لست نادمة انني  قاطعت بعضهم ...لست مهتمة بمن  حذفني من قائمة اصدقائه  ...فمن لا يعرف كيف يتحدث معي بدون حشر الفاظ  " غبية " فأنا لا أريد أن اعرفه 
فكل فرقة تريد أن تقتص من الاخري ...تصر علي انها كافرة ...تصر علي انها المسؤلة الاولي عن الاحداث 
لماذا تنسي الفرقتان أننا  مصرييون  وحسب ....؟؟؟!!!
7
يقع بيتنا  علي قارعة الطريق ...
اقف في شرفة منزلنا أري مسجدنا  الذي لا يبعد  اكثر من عشرة امتار تقريبا 
طوال شهر رمضان  علي مدي سنين عمري كنت اذهب لذلك المسجد لأصلي .....التراويح والتهجد 
هذا العام ....لم اذهب سوي مرات معدودة  تعد علي اصابع اليد الواحدة ....لانني بكل بساطة  خنقت من جدل  المصليات  السياسي 
خنقت انه لا يوجد  " من يصلي بنا  " فاختزلوا  عدد الركعات ....
خنقت انه لم تعد تللك السكينة والروحانية التي كنت اجدها هناك ...." يا الله  هل اصبح بيتك  لا سكينة  ولا هدوء فيه !!! "
للأسف  
انه وبعد كل تلك الاحداث فوجئت  أن إمام المسجد  يدعو في كل صلاة   علي الجيش والسيسي وعلي اسماء بعينها 
والمصليين يأمنون خلفه ...فكيف يخالفون إمامهم ......؟؟!!!! سؤال صعب 
هذا كان يحدث مرارا   والدعوات جهارا نهارا   في كل الصلوات ....
بالطبع اثار هذا  الناس ...خاصة المحايدين ....
ولكن الامام لم يرجع عن دعواته الا  بعد حين ....
لا أعرف هل هي سياسة  من الامام ...أم من .....
وأصبح الامام يدعو " علي من أراق دماء المصريين جميعا  , علي من أحرق  كنائس الاخوة المسيحين ,  علي من نشر الفتنة في مصر ....واللهم اجل مصر بلدا آمنا  ...وأصلح بين مسلمي ومسيحي هذا البلد ......"
" أه  بعد ما خربت مالطة جاي تصلحها .....؟؟؟!!! 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
حسبي الله ونعم الوكيل 
هي دي الاغنية الي المفروض نعمل بكلماتها

هناك 6 تعليقات:

  1. رحااااااااب .. عجبتنى جدا جدا خرجتينى من المُود اللى كنت فية على الرغم ان الواحد زاهد وتعبان من اللى بيحصل فعلا :))

    ردحذف
    الردود
    1. ميرسي يا علا
      انا بحاول افضفض بس
      لان بجد الجو ف مصر ميشجعش
      بس ربنا ييسر الامور
      بدعي دايما ان البلد تستقر

      حذف
  2. أنا معاكى فى كل الكلام ده
    لكن ما يحدث هو أمر طبيعى جدا جدا فى حياة الأمم يكتر الباطل وبعدين يجى الحق ينتصر عليه فيبقى الحق ضعيف فى البداية فيعود بعض الباطل ويقوى الحق وينتصر ويسود ومع مرور الأيام يبدأ الباطل فى الظهر مره أخرى هى دائرة وتدور بين الحق والباطل

    وكونى على يقين أن مصر بلد أمن ليوم القيامة وهذا وعد الله فىالقران الكريم

    ليس المهم أنتى مع مين لكن المهم الحق ينتصر فى النهاية وطبعا الكل حزين على القتلى ولكن حزنى الشديد على من ماتوا وليسوا مع احدى الفريقين

    بالنسبة لكون ان الى مش اخوان ليبرالى فاعتقد اننا مسلمين مش اخوان ولا ليبرالين وكلمة ليبرالى دى دخلت بعد الثورة لكن مفيش ليبرالية فى مصر

    أعتذر على الأطالة

    ردحذف
    الردود
    1. لا اطالة ولا شيء
      المهم ان كل واحد يعرف الحق فين
      يارب يحمي كل بلادنا العربية وكل بلاد المسلميين اللهم آمييين

      حذف
  3. الردود
    1. والله ايدي دي مشكلة
      بعد ما قلت ان مش فيها كسر ولا حاجة رجعت تاني وتوجعني وشكلي كدة فيها حاجة تانية غير الكسر
      بس مع الجو القلق ده مش عارفة اروح لاي دكتور للأسف

      حذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين