الخميس، 1 يونيو، 2017

عيون بتلمع ...

دائما ما اعتبر صديقتي هذه ساذجة جدا في الحياة لكنها طيبة جدا وذات قلب رحيم
ثم انها رويتر ...اي خبر ميعديش من تحت ايديها واي شخص تعرفه وتعرف عيلته كلها واذا مكانتش تعرفه تجيب لك قراره تاني يوم
في الشغل سميناها رويترعشان كدة
أول مرة مشيت معاها في مشوار اترسخت جوايا فكرة انها ساذجة اووي متعرفش تتعامل مع الناس  وعندها حسن نية رهيب
برغم ذلك مكانتش تعرف حد الا وكان يحبها ويحب سذاجتها ويحب معرفتها بأصول الحكايات والناس 
لما حد يحب يعرف مين الشخص الجديد ده معانا في الشغل بسرعة يجروا عليها وف خمس دقايق يكونوا عرفوا تاريخ حياته حتي من قبل ما يتولد 
مشيت معاها واحنا راجعين م الشغل وأدام بيتنا وقفنا وابن عمي عدي عليا وبص  وضحك ومشي 
وبعد ما دخلت سألني مين ام عيون خضرة بتلمع دي :) عيوونها حلوة اووي 
كنت بشوف عيونها دايما حلوة مع ان  كنت من فترة قررت محبش العيون الخضرة لأنها كانت بتفكرني بصاحبتي الانتيم اللي ماتت 
وللأسف ان هي دي كمان كانت عيونها بتشبهها 
نفس العيون الخضرة الواسعة اللي بتلمع كأن شمس جواها علي بشرة قمحي وشعر اسود تستغربه ...المزيج غريب بس جميل 
مرة واحدة صاحبتنا رويتر اتنقلت من الشغل لمكان تاني ....زعلنا اووي بس فضل التواصل بينا 
كانت نفسيتها سيئة جدا ومش مرتاحة ف شغلها الجديد برغم انهم كانبوا بيحبوها وبيوفرولها كل سبل الراحة 
بس فضلت نفسيا تعبانة لغاية مرة واحدة وقعت فلريسة المرض ...
اتشخص المرض غلط وأخدت علاج غلط خللي قلبها يضعف 
نفسيتها ساءت جداا وجسمانيا اصبحت جلد علي عظم 
أول مرة شوفتها في مرضها قلت مش ممكن تعيش اكتر من اسبوع ...
بس هي عاشت مع المرض سنين .... متحملة بصبر  وسخرية 
كنت بشوفها وابص لعيونها  الاقيها مطفية  ومحمرة ومجهدة م التعب والعلاج والمرض 
احيانا في وسط الضلمة كان بيجي شوية نور وتبقي كويسة وكنت اقعد معاها ندردش وتحكي عن الناس الجديدة في الشغل 
لغاية ما رجعت تاني لينا في الشغل ...صحيح كانت معظم الوقت تاخد اجازات مرضية بس كان الوقت اللي بتكون فيه كويسة كانت في الشغل شعلة نشاط وسخرية وتبص لعيونها من تحت النقاب تلقيها بتلمع وتقول انا هنا لسة عايشة 
جسمها كان بينحل  ووشها كان بينكمش لكن عيونها فضلت زي ماهي  خضرة وبتلمع كأنها شمس جواها 
عدي كام رمضان وانت تعبانة في مرضك ...؟ 
عدي كام سنة ...؟
مات ناس 
وناس اتولدت 
وانت لسة بتضحكي بسخرية  وبتقولي هو الي مات احسن او اغلي مننا ...اللي ماتوا اخدوا الحلو فينا وسابونا نترحم عليهم يا ريت بس  لما نموت نلاقي اللي يترحم علينا .....
في الشهر الكريم ده بدعيلك ربنا يفرج همك وكربك ويشفيكي  
وتلمع عيونك اكتر كأن ألف ألف شمس جواها

هناك تعليق واحد:

  1. ربنا يشفيها ويخليها...انا حبتها م الكلام فمابالك باللي يشوفها...احسنتي يا اديبة البنفسج...ورمضان كريم

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين