الجمعة، 13 يوليو، 2012

ثلاث طلاقات....وخطوبة


 1
 هــــو 
 
علي البحر
ف نهاية الشتا  بيكون البحر أكثر من رائع  والشمس حلوة أووي
كنت انا وصديقتي خرجنا من المدرسة نتمشي شوية ع البحر 
الشيبسي وشويبس  فاكهة استوائية كانوا  أفضل صديقين معانا
وعلي الشاطيء جلسنا بجوار فتاتان ....احسست بأني اعرف احداهما ....
كانوا علي مسافة متران  ولكن الملامح وان اختلفت قليلا الا انني عرفت فيها  ملامح صديقتي فادية ...ولكن لم أعرف اذا كانت هي ام لا ...فملامحها تغيرت كثيرا فأنا لم اراها منذ تزوجت منذ خمس سنوات تقريبا ...
لم تكن تنظر لي  ....ولم أستطع  أن اتكلم معها بدون أن اتأكد أنها هي ....

ولكن الله أرسل لي الحل سريعا عندما طارت الاوراق التي كانت تتصفحها  وشرعنا انا وصديقتي وصديقتها نجمع الاوراق ...
وعندما كنت أعطيها الاوراق ....
رأيتها تنظر لي بتأمل  وتساؤل ..." رحاب " 
وبعد الاحضان والقبلات وشوية كلام مع بعض  والتعارف بين صديقتينا قلت لها واحنا في طريق العودة ...." ها علي فين ...شرق والا غرب ....كناية عن بيت ابيها وبيت زوجها...."
قالت بسخرية " خلاص مفيش غير شرق بس ....الغرب ده خلص من زمان....كان غلطة اصلا...."
كانت تنظر لي بعيون جفت دموعها " رحاب ...اياك تتجوزي  واحد بيقولك انا بحبك وانت مش بتحبيه ....اللي يقولك خدي اللي يحبك وسيبي اللي تحبيه كلام فاضي ....كان نفع معايا....لان اللي بيحبني ده ورسملي جنة قبل الجواز خلاها جحيم بعد الجواز  ومصبرش عليا ف حاجة ابدا...حتي لما ربنا رزقنا ببنت زي القمر سافر وسابنا ....وبعدها طلقني من غير سبب....
تعرفي بنتي اد اية ...عندها خمس سنين ونص يعني السنة الجاية هتدخل المدرسة....تعرفي  في الخمس سنين دي  هو مشافهاش غير مرتين بس....في الخمس سنسن دي هو اتجوز وخلف ولد وبنت....في الخمس سنين دي هو مكانش بيسأل عليها غير بس عشان كان عايز يقلل النفقة اللي بيدفعها ليها.....في الخمس سنين دي بابا اتوفي ....هو مكلفش خاطره وجه عزي فيه زي الناس الغريبة حتي .......هو لا يعني لي شيء ....وهو لا يعني لبنتة اي شيء  ولا حتي اسمه اللي في شهادة الميلاد....دي حتي كل ما اقولها انت اسمك "........" تقول لاء انا اسمي " ......" باسم خالها مش باسم باباها.....
كنت مصدومة " طيب " ...." قلت اسمه فقالت لاء متنطقيش اسمه....هو بس ...كفاية انك تقولي عنه هو ...لآنه نكره وميستاهلش انه يتقال عليه غير ...هو....

2 كلام الناس 

تعرفي يا رحاب غلطتي كانت اية ...؟
اني مسمعتش كلام الناس .....لأني كنت مغفلة ....بحبه....
وبيقولوا مراية الحب عامية ....بس انا كنت عامية وطارشة وخارسة كمان
عرفته وحبيته....ومشوفتش عيوبه ولا عيوب اهله....هتقولي اهله مالهم ومال الجوازة ....
اقولك اللي بيتجوز  مش بيتجوز الشخص وبس لاء بيتجوز اهله كمان لانه بيعيش معاهم  وف وسطهم....
الغريبة ان الناس كها اجمعت ان الشخص ده مش كويس ولا اهلهم كويسين ...بس انا زي العبيطة كنت ماشية وراه 
زي النداهة.....مكنتش بشوف تصرفاته الغلط ولا بشوف غير بس اللي انا عايزة اشوفه....
الناس حذرتني كتير ....بس انا قلت كلام الناس مش صح دايما.....
الغريبة ان مش واحد وبس لاء ....عشرة ....عشرين .....خمسين ....حتي اقرب جيران ليهم....بس انا كنت غبية ....الحب ده غبي  فعلا
واتجوزت......كان هو صعب جدااااااااا وكنت مضطرة استحمل لآني بحبه
اهله كانوا عايزيني ...عامية ...طارشة ....خارسة...
مستحملتش ....طلبت الطلاق.....
وبكل بساطة قالي ....انت الي طلبت الطلاق يعني مالكيش حاجة عندي .....
ساعتها صدقت كلام الناس و انه فعلا " واطي "

   3   براحتك....

رحاب انا هسافر لجوزي ف السعودية وهاجي بعد العيد  تحبي اجيب لك اية م السعودية...؟
" انا مش عايزة غير انك تنبسطي مع جوزك وولادك .....وبس ادعيلي وانت ف الحرم ...وترجعيلي بالسلامة ...عشان انت صاحبتي وبحبك اووي "
" لاء انا هدعي لك انك تتجوزي واحد زي جوزي ...جوزي ده بلسم ...."
وكنا علي اتصال دائم .....تذهب في اجازات ما بين مصر والسعودية ...تأتي لتجتاز فترة الامتحانات  ثم تعود لزوجها وابنائها واستمر الحال هكذا  ....لمدة عامين ....وفي العام الثالث....انقطعت الاخبار ..... وحاولت ان اعرف اي خبر عنها عن طريق اختها والتي قالت لي " هي عندها ظروف خاصة شوية " ...
وبعد مرور شهور   اتصلت بي  قائلة بعد سلام خفيف "رحاب ...انا اتطلقت ...."
استغربت .....فقد كانت سعيدة جدا ومتزوجة عن حب ....وتتكلم عن زوجها بكل خير وحب ...فماذا حدث....
" عايز يتجوز.....سيبت تعليمي عشانه....وسافرت وسيبت اهلي عشانه...ورجعت كملت تعليمي عشانه.....ودلوقت عايز يتجوز عليا...مع ان مفيش سبب مقنع ....هو بس عايز يتجوز وخلاص........هو بيحبني ...وبيحب ولادنا...وعارف انا ضحيت عشانه اد اية....بس عايز يتجوز.....شايف ان ده حقه ...وربنا قال كدة....وهو قادر يصرف علي عشرين لية بقي ميتجوزش تاني...؟
الغريبة اننا اتكلمنا واقنعته ان ده هيكون ضرر علي الولاد وهيتأثروا جدا خصوصا ان اللي عايز يتجوزها سعودية  ومن اسرة لها نفوذ 
وانتهي الكلام علي كدة.....
وكان وقت الزيارة السنوية لي انا والاولاد لمصر ....نزلنا وهو فضل ف السعودية عشان شغله وقال هبقي اجيلكم كمان كام يوم.....
بعد وصولي لمصر بيومين.....
وصلتني ورقة طلاقي....
وكان هو بيقضي شهر العسل مع زوجته التانية.......؟؟؟!!!
 " رحاب ....متصدقيش اي راجل بيقولك بحبك....وانا بجد زعلانة اني كنت كل مرة اصلي ف الحرم ادعي لك انك تتجوزي واحد زي جوزي ....قصدي اللي كان جوزي......"

4 خطوبة 

كنت في العيادة النسائية مع اختي ....
والتقيتها هناك.....
صديقتي  الممرضة التي كنت اقول لها دوما" بتخوفيني يا مني  منك....هو انت يعني ملقتيش غير معهد التمريض اللي تدخليه ..."
كانت منذ خمس سنوات تعشق احدهم بصمت.....
وعندما عرف بحبها ....
لعب بمشاعرها بكل قسوة.....
ولكنها عرفت كيف  تبتر  العضو الذي نخر فيه السوس  بدون مخدر ....حتي يصح باقي الاعضاء.....
التقيتها  صدفة وانا علي  باب العيادة النسائية  مع اختي ....
ملامحها كما هي ....طفلة شقية ...
لا تصدق انها ممرضة فهي رقيقة....
بنفس الابتسامة الرقيقة التي تقابلك بها تغرس المشرط في جسدك ....لأن هذا عملها....
التقيتها .....وبعد احضان وقبلات امسكت يدي تقرصني كما كانت تفعل دوما ....فلمعت دبلتها الذهبية في بنصرها....
" اية ده ...؟
ابتسمت بخجل " اتخطبت .... من سنة وهنتجوز بعد العيد الصغير ...اياك تقولي مش جاية ...انت هتبقي معايا في كل خطوة  كفاية اني مقدرتش اوصلك  السنين الي فاتت بسبب تغيرك لرقم موبايلك ....اياك تغيريه تاني....
الا قوليلي ....انت مش ناوية تفكي الاضراب ده وتتخطبي وتتجوزي ...؟؟؟!! "

هناك 8 تعليقات:

  1. والله يا رحاب في الاول والاخر هو نصيب
    بس فعلا مشروع الزواج دا لازم يبقي الاختبار فيه بعنايه جدا عشان دي حياه كاملة والحب وحده فعلا لا يكفي
    يلا ربنا يفرحنا فيكي قريب

    ردحذف
  2. كلام واقعى 100% وعندك حق فى كل كلمة قولتيها يارحاب الدنيا مش فيها أمان

    ردحذف
  3. بلا جواز بلا نيلة
    نسبة الفشل في الجواز اكبر بكتير من نسب النجاح النادرة
    تحياتي

    ردحذف
  4. ممممممممم
    بتكتبي إجابة لسؤال .. لماذا لا اتزوج.. وبتحاولي تبرري لنفسك ولغيرك الأسباب
    أو بتطلقي صيحة تحذير للبنات .. إياكن والجواز D:
    وفكرتيني بمشهد محمد صبحي في تخاريف .. وهو بيحكي لصاحبه عن واحدة طلبته في الأوضة وف الاخر بتقول لأبنها لو ماشربتش اللبن هتبقى زي عمه.. هنا برضه بتقولي كدة .. لو اتجوزتو هتبقو زي دول

    الحقيقة يا رحاب انتي بتعرضي صور أحادية الرؤية وماتقنعش حد إلا اللي عنده اقتناع مسبق بالموضوع.. او حد مفيش في دماغه غير الفكرة دي وطول الوقت عايز ياكدها بأي حاجة

    سمعتي من صحابك وسمعنا معاكي كلامهم .. بس ماسمعناش الطرف التاني .. واللي غالبا برضه هيدافع عن نفسه ويلقى باللوم على الآخر

    فشل الجواز مش مسئولية طرف والتاني لاء.. خصوصا لو فيه أولاد

    متفق معاكي في نقطة .. إن الجواز مش اتنين بيتجوزو .. لكن دول عيلتين بينصهرو في بعض .. وعلشان كدة بيطلق على النسيب .. صهر

    شكلي طولت ^_^

    تحياتي وبالتوفيق دايما

    ردحذف
    الردود
    1. لاء خالص علي فكرة
      لو دهراي كنت كتبته علي طول
      انا بس حبيت اوضح ان كتير بيكون الاسباب مختلفة وحكيت قصص واقعية اعرف اصحابها جدا ومقولتش تفاصيل
      بس كان الرجل فيها قاسي جدا لدرجة غير معقولة
      لكن ....
      هو الطلاق بيخلينا منفكرش ف الجواز...؟
      واذا كان في ثلاث حالات طلاق كل دقيقة ففي حالة زواج ايضا ...
      زيها زي المولود الجديد واللي بيموت
      واحد يتولد والتاني يموت
      واحد يطلق واحد يتجوز
      هي دي الحياة

      حذف
  5. كما قال بيوتفول مآيند .. هَو نصيب الله يرزق عباده و على الشخص أن لا تكون نظرته الوحيدة
    للأشخاص الذين فشلوا في حياتهم الزوجية فيوجد الكثيرين من يعيشوا في سعادة و هناء
    و الحب ليس كافياً أبداً لتعيشي حياة سعيدة مع رجل فلكل رجل مفتاح معين و طريقة
    عندما تعرفها الأنثى تستطيع أن تأتي بالذي تريده و صدقيني لن يتركها و لن يتزوج عليها
    لا تفكري هكذا و ربي يرزقكِ الرجل الذي يسعد قلبك و يفرحك و تعيشي معه حياة ملئها الود و الرحمة
    لروحكِ النقية طوق فرح
    طبتِ

    ردحذف
  6. كلام واقعي ومنطقي ..

    ولا عزاء للمتزوجين :)

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين