اليوم أتكلم عـــــــني.....؟

اليس بتشبهني
 
الـيوم الـ 15 فى حملة التدوين ان شاء الله هيكون يوم تدوينى موحد
مجموعة من الاسئلة كلنا هنجاوب عليها
وياريت كل واحد فى مدونته ينوه على اليوم ده علشان كلنا نلتزم بيه
ويارب الاسئلة تعجبكم :)

1/ عرف نفسك ؟

 مش عارفة ....احيانا بحس اني مش عارفاني ....
بس اللي مكتوب في البطاقة اني رحاب احمد  احمد صالح  و بكالريوس اعلام وكمان اقل من عشرين يوم هكون اتممت الـــ31 عام ....ومش متجوزة ولا مخطوبة ولا مرتبطة...ومش عايزة عريس ... وبشتغل في مدرسة اعدادي ...." صحيح انا كنت صحفية قبل سنتين لكن تركت الصحافة من بعد قيام الثورة ولأجل غير مسمي ....لكن من الممكن أن أعود قريبا ...دعواتكم بقي  "
حساسة جدااااااااااااااااااا  بس كدة والا عايزين تعرفوا لون شعري وعيني وطويلة والا قصيرة كمان ما كفاية كدة 
2/ ما أكثر ما يميز شخصيتك ؟
 معرفش بس جايز يكون ....التناقض

التناقض.....انا شخصية متناقضة  ...بيقولوا ان ده صفة من صفات برج الاسد اللي هما مغرورين ...مع اني مش مغرورة والله...بس في ناس مصممة اني برج السرطان زي فاتيما لانها حاسة اني برج السرطان ده بيحب اووي او بمعني كلمات فاتيما بيحب علي روحه زي حالاتي كدة بالظبط بحب الناس لدرجة الهبل  ....المهم اني متناقضة وبس انا برج من دماغي راح...انا نهاية السرطان وبداية الاسد ....يعني برج ملخبط ...عموما مش بؤمن بالأبراج ...بس ممكن اقولكم بجد ان رحاب دي رقيقة اووي وعصبية أووي  ومتسامحة اووي ومش بتسيب حقها ابدا.... صبورة اووي بس اتق شر الحليم اذا غضب ....حد فاهم حاجة
مش بسيب حقي .....وعنيدة جدااااااا...ومش بحب حد يفرض قراراته عليا ولا يمشيني علي مزاجه...ولا حد يديني اوامر...انا محبش حد يتحكم فيا.....يمكن بابا بيتخنق مني كتير عشان  عنيدة  ومش بقتنع بحاجة بسهولة 
هادية وعصبية ازاي معرفش .... ممكن اتعصب بسهولة وممكن اروق بسرعة اووي
فاكرة مواقف كتير كنت فيها عصبية ورورقت بسرعة ومواقف العكس تماما يعني احيانا الشخص اللي بيزعلني مستحيل يعرف يصالحني ابدا... بس مقدرش اقول ولا موقف ...يعني خللي الناس تاخد فكرة حلوة عني بقي
3/ ما هى اهم نقطة تحول فى حياتك ؟

عندما أحبطوني ...فصممت أن أكون أنا....
بيتهيئلي  دي واضحة مش عايزة كلام 

4/ كيف دخلت الى عالم التدوين ؟

الصراحة في الاول كنت عايزة اعمل زي اصحابي  مروة وصالح وعمرو ودعاء ...ومكنتش اعرف اعمل مدونة بس كنت بدخل اعلق عندهم ده كان عام 2007 تقريبااو 2006  ...بس بعدها لقيت ان العالم ده هو اللي كان المفروض انتمي له من زماااااان وده كان تقريبا ان لم تخني الذاكرة  2008 بمساعدة صديقتي غادة محسن صاحبة مدونة بستان افكاري

5/ ما اسم مدونتك ولماذا اخترته ؟

مدونتي ...حياتي لكن مش حرة فيها....انا كنت هخليها حرة فيها .....بس لقيت ان فعلا احنا مش احرار  لو كنت حرة صحيح كنت عملت حاجات كتير  بحرية هتضر ناس بحبهم عشان كدة انا مش حرة حتي في كلامي ....وقصصي وحتي اللي احيانا بكون عايزة اقوله....
6/ صف مدونتك ؟

هي حياتي ....برسم فيها احلامي وعالمي ....من يريد أن يعرف رحاب صالح ....يدخل مدونتها ويفتش فيها يشوف كل حرف  مش كل كلمة....وعلي اد ما هتلاقي تناقض واختلاف ...هتعرف رحاب
7/ من هم أكثر ثلاث شخصيات أثروا بك من داخل عالم التدوين ؟ ومن خارجه ؟

من داخل عالم التدوين مقدرش اقول تلاتة لانهم كتير ....بس ممكن مثال لا حصر ...ماجد القاضي.. فاتيما .. ابراهيم رزق ..مصطفي سيف ومارو قلب القطة وشيرين سامي وكارولين وهبة فاروق والفاروق و نهي صالح وكارمن ومحمد متولي وعمرو يسري .... واخويا احمد طبعا ....لالالالالا كتير الصراحة يعني
من خارج عالم التدوين ....معرفش بس انا بتأثر بكتير من الاشخاص ...يعني مثلا في الكتابة الساخرة  بتأثر جدا بصديقي السينارست صالح سعيد ....وصديقي السينارست وكاتب الكوميكس عمرو الطاروطي ....لكن  كتأثر في الكتابة بشكل خاص  مفيش كتاب قرأته الا وتأثرت بيه لكن يمكن الاكثر تأثيرا في هو المرحوم عبد الوهاب مطاوع ....مقدرش اشوف كتاب له الا واشتريه  برغم اني تقريبا قرأت 99% من كتاباته 
8/ ما هى طقوسك الخاصة عند الكتابة ؟

طقوس اية ؟ ولية بس الاحراج ده ...؟....والله انا كتير مش بحب حد يقعد معايا وانا بكتب ...بس احيانا بلاقيني بكتب واي حد معايا  " لما الوحي يطب عليا فجأة "بس عموما بحب اكتب وانا بشرب مج الشاي بالنعناع  او النسكافية وأكون لوحدي وبسمع اغاني تبع حالاتي المزاجية.....
احيانا كتير بحب اكتب وانا قاعدة فوق التربيزة  " مع ان عندنا كراسي كتير والله " لو بكتب ف كراسة او اسكتش مثلا عشان الكهربة قاطعة او الكمبيوتر عطلان او مشغول  اقعد فوق الترابيزة واكتب ودي بصراحة حاجة بتجنن احمد اخويا ...مش عارفة لية  ,,, حتي ف الشغل برضه احب اقعد فوق المكتب مش ع الكرسي ....مجنونة انا 
لما اكون مخنوقة بقعد ف البلكونة  واكتب الي يجي ع بالي ...بس غالبا محدش بيشوف اللي بكتبه
 
9/ ما هو الاسلوب المفضل لديك فى التدوين ؟
غالبا أنا أتأثر بكل موقف يمر بي او يمر بأحد ممن أعرفهم وحتي ولو بالصدفة ....وكم ينبت قصص وخواطر من مواقف شاهدتها من بعيد لبعيد او من قريب ...
فأنا خيالية جدا....خيالية الي حد مرعب احيانا
10/ فى رأيك ما أهم ما يميز تدويناتك ؟
مش عارفة....بس جايز هي طفولية الي حد كبير
11/ ما هو تقيمك لعالم التدوين فى الفترة الاخيرة ؟
" لية الهجر يا حبيبي "
تمت رحلات هجرة جماعية  لأهل بلوجر الي الفيس بوك وتويتر   وبقي فقط القليل للأسف ...ده هو الواقع...مع اني لما دخلت بلوجر حبيته اكتر من الفيس 
 المدونون انتقلوا الي الفيس بوك....وده خللي التدوين في خانة اقل من اهميتها الفعلية ...بلوجر له خصوصيتة المقدسة ...وده غير اني ممكن اكتب التدوينة واحط اللينك ع الفيس بس المدونة اكيد افضل ...بس كتير للأسف مش فاهمين ده
12/ اختر اقرب تدويناتك الى نفسك وضع رابطها وحدثنا عنها ؟
مش عارفة ...كدة انتم بتخيروني بين بناتي ....وتدويناتي هي بنات افكاري معرفش افضل حاجة عن حاجة....أول ماي سنس علي رأي ارثر ميلر....
13/ استعرض اهم المواقف الغريبة او الطريفة التى صادفتك مع التدوين ؟
كنت كتبت تدوينات تحت مسمي يوميات هو وهي ...وكانت رومانسية اووي وكان فيها بوست اسمه بحبك تتجوزيني ....ساعتها لقيت ناس كتير كتبت لي تتجوزيني يا رحاب ...فيها ناس اعرفهم  كانوا واخدين الامر مجرد مزحة وفيها غير معروف كتييييييييير ... يعني كاتب التعليق بدون اسم...والحمد لله اني عاملة اشراف علي التعليقات
واحيانا كان بيوصلني تعلقات لما انشر قصة رومانسية علي المدونة اني انا صاحبة القصة وكدة يعني ...كنت بضحك اوقات واوقات بتضايق 
14/ هل أحدث التدوين تأثيرا عليك ؟ وكيف ؟
طبعا ...وتأثير جميل اووي مقدرش اقوله ف كلمة او سطر ...بس اللي ممكن اقوله انه عرفني علي اصدقاء بجد ....وخلاني اطور من نفسي ومن اسلوبي وخلاني بجد احس اني بدأت اكتب بشكل جيد  احسن م الاول
 15/ اختر اى مدون ووجه له سؤال ؟
معرفش ....بس ممكن اقول لـــ صاحب المدونة دي وجع الفلسفة أنا بحبك أوووي
وعايزة اسأله سؤال واحد بس " يا تري انا دلوقت بعرف اكتب احسن م الاول  والا لسة عند رأيك  اني مبعرفش اكتب  قصص خالص ...؟" بس مهما كانت اجابتك فأنا بحبك اوووي اوووي اوووي