واجـــــــــب تدوينــــــي...اتنيــــــــــــن ف واحــــــــــد

  الواجب الاولاني من العزيزة خواطر شابة

حياتك الدراسية في جملة

أولا درست ما لا أحـــــب لظروف معينة....ثم درست ما أحب ....قهرا لتلك الظروف

حياتك اليومية في جملة

أحيانا مملة ...وأحيانا سريعة ...وأخري مرتبكة ...مرات مغامرة
يعني احيانا بالبيت شغل ومذاكرة وكمبيوتر وتليفزيون ...والباقي ده عايزحكايات

حياتك العاطفية في جملة

حــــب قلت بنهايته فقدت كل شيء ...ولكني اكتشفت أنه بداية كل حياتي .....وأدين لهذه التجربة بتغيير كل حياتي للأفضل

لخص ما عشت في جملة

عشت حياتي كما يقولون كما احب وبحرية بدون أن اسمح لنفسي بالخطأ وحافظت علي كل اخلاقي ومباديء الي الان والي ان اموت

ارسل الواجب لاربع مدونين

اعرف ان الكثيرين حلوا هذا الواجب لهذا انا محتارة لمن ارسله ..ولكن مهلا ...فهناك اسلام ومحمد ...مدونة كلام مجانين 
و...ممكن وداد ....صاحبة مدونة شوق وحنين ...ومييييين ممكن اي حد عادي حل الواجب انا مش عارفة بجد...
الواجب التاني من عند الدكتورة ولاء صلاح ...صاحبة مدونة دمعة حنين
 ولاء عايزة مني اجاوب علي الاسئلة دي

• تعريف مختصر بالمدونة

اقول اية عن مدونتي والا عني انا....انا انسانة للأسف حساسة لابعد الحدود , متناقضة جدا بس مش وحش يعني ممكن تلاقيني خجولة جدا احيانا واحيانا جريئة جداهادية جدا واحيانا نرفوزة جدا كدة يعني  .....انا عندي 29 سنة وآنسة ولا اخجل من ذكر سني ابدا " محدش ليه دعوة بيا وبعدين احنا بنتولد عشان نكبر مش عشان نصغر " اية تاني ...بدرس في جامعة القاهرة للتعليم المفتوح كلية الاعلام الفرقة الثالثة وكانت حلمي الذي لم احققه في بداية تعليمي لظروف معينة لا اريد حكيها ...ولكني حققته الان والحمد لله بشتغل صحفية ....
 انت لية بتدون...؟
عشان افضفض , عشان احكي عن اللي حوالياو عشان اقول اللي مش عارفة اقوله, عشان اكتبت قصص واعرف اراء الناس في ككاتبة , عشان حاجات كتيرة .....

• , مكانتك العلمية التي وصلت اليها والتي تستطيع من خلالها ان تفيد الناس
• انا اعمل صحفية وفي مجالي هذا احاول بقدر ما استطيع ان افيد الناس ولو بقدر ضئيل ....فلعينني الله فقط
• متي كانت البداية ف التدوين بالتاريخ...؟

الاول عملت المدونة يوم 1/6/2008 ولكني لم ادون ولم اكتب شيء غير اهلا وسهلا فقط, ثم بدأت اكتب موضوعات يوم 27/7/2009 ولكني لم اهتم في بداية الامر لاني كنت مدمنة فيس بوك...
وفي بداية 2010 بدأت اهتم واكتب وازور مدونات اكثر .....

• كيف كانت البداية في التدوين

في البداية كنت عايزة اعمل مدونة وخلاص زي اصحابي , بس لقيتني اني معرفش اعمل حاجة زي حد , وكمان لاني بحب الاختلاف ولا احب التقليد, قلت اكتب قصصي فيها , بس برضه مكتبتش لاني دخلت عالم الفيس بوك وسيبت المدونة من غير ما اكتب فيها ...ونسيتها وبعدين فكرت تاني ارجع للمدونة وادون ...وفعلا بدأت وكنت ببعتها لناس اعرفهم لكن مكنتش اعرف ازاي المدونين يلاقوا مدونتي ويدخلوها ...لغاية ما عرفت اعلق ف مدونات وازور مدونات وخلاص الناس بقت تزورني وبدأت اعرف المدونين واحب العالم ده بل واعشقه جدا.....

• لية انا مدون...؟

بعترف اني مش مدونة زي باقي المدونين لان المدونة عايزة تفرغ وانا دائمة الانشغال وبحاول بقدر الامكان المتابعة .....ولكني احاول ان اعرض بعض القضايا المهمة من وقت لاخر  حتي اعرف ردود الافعال ولأكون مؤثر في مجتمعي ولو حتي عن طريق المدونة

• وما هي طموحاتك في هذا المجال...؟

مش عارفة ...؟ بس يمكن بتمني اني استمر في مدونتي لغاية مماتي , وكمان بتمني اني انشر روايتي واعمل حفل توقيع وادعو فيه كل المدونين اللي عرفتهم معرفه شخصية او عن طريق المدونة فقط...

• الي اي مدي ارغب في التدوين...؟

مش عارفة ....بس حابة استمر الي النهاية

• الكتابة عن شيء  تحبه...؟

مش عارفة اكتب عن اية بحبه ...يمكن لاني بحب كل حاجة وكل شخص وكل الناس وكل اهلي واصحابي ....بس يمكن اكتر حاجة بحبها ولاد اخواتي كلهم بدون تمييز خصوصا الثلاثة الصغار سارة ونسمة وزياد...بحب كل شيء ف الحياة يمكن لاني بحب الحرية ومش بحب القيود....

• المواقع المفضلة لدي وازورها باستمرار....

اكيد طبعا مواقع الجرائد المختلفة وكمان مواقع تحميل الكتب وانا بدور علي الموقع واخللي اخويا يحمله لاني بمل بسرعة من حكاية التحميل دي كمان لاني مش بحب قراية الكتب علي النت الا مضطرة...كمان بحب مجلة اطفال اووي لكن لما بيفوتني عدد منها بتابعها ع النت ....لسة بحب ميكي و ميمي وماجد وبندق ....

• ومدي ما استفيده منها...؟

مفيش حاجة انت بتشوفها الا وبتستفيد منها ....مهما كانت, حتي لو كانت مجرد جريدة بتقرا من علي موقعها مجرد خبر .....
اعتقد اني كدة كملت الواجب وبرضه بحول الواجب ده ...لاسلام ومحمد ووداد ...
بس كفاية كدة ده كتير جدا ....