الخميس، 14 أبريل، 2011

تـــــــــــــــــــــــ الثورة ــــــــــــــــــــــاج

لفت نظري عند متابعتي للمدونات باليومين الماضيين  بوست تاج الثورة  , والحقيقة انا مكنتش اعرف مين صاحب الفكرة لغاية ما قرأت بوست الاستاذ ماجد القاضي وعرفت  صاحبة الفكرة " مجداوية"  ودخلت المدونة فعلا بس وجدت انها لا تفتح بسهولة ثقيلة ف التحميل ...يمكن من كثرة الفيديوهات.....وانا اصلا لا احبذ مشاهدة الفيديوهات
المهم....اني أعجبت جدا بالتاج
وإليكم ما لفت نظري بالتفصيل
أولا ....من قرأت  لهم هذا التاج جميعهم لم يذهب ولم يشارك في الثورة....!!!
لآسباب....
صحية.....
اغتراب .......
ثانيا....جميعهم  تكلم من وجهه نظره.....
ودي شيء مش غلط....لكن.....
ثالثا....لاحظت أن اجابتهم متشابهه في اشياء عدة....
وده برضه مش غلط...
دلوقت اكيد كل واحد فيكم حاسس اني بلعب ف الوقت بدل الضايع ومش عارفة اجيب جون....
محدش فاهمني انا لية مضايقة....؟؟؟؟!!!
صح....صح انا مضايقة......
تعرفوا لية......؟؟؟؟؟
لان كل اللي قرأت لهم التاج بتاع الثورة نسي اهم شيء  في سؤال " لو أصبحت رئيسا لمصر ما هي اول ثلاث قرارات  لك؟
يعني اختلفت الاجابات بالاهتمام بالبحث العلمي وحد ادني للاجور والاهتمام بالقضاء علي الفساد ....وغيره وغيره....لكن مفيش اي شخص فيكم فكر في شيء مهم جدا ....واللي هو العلم والتعليم.....انتم ناسين ان التعليم ده هو اساس اي دولة...؟ لو صح صحت الدولة كلها ولو  فسد فسدت الدولة كلها....للأسف مفيش حد من اللي قرأت لهم التاج فكر في التعليم خالص لما يبقي رئيس دولة....انا بجد زعلانة منكم......زعلالالالالانة
هحكي لكم موقف ظريف خالص عن التعليم
انا في عام 2004 عملت في مدرسة ابتدائية ....لمدة عام دراسي وبجد كان من أجمل فترات عمري ...واللي مش قادرة انساها ابدا برغم اني نفسي انساها عشان صديقتي " رحمها الله"
في يوم كنت مع الاولاد في غرفة المكتبة....وجدت "أيمن " وهو طفل ذكي جدا وموهوب  للغاية ومحب للقراءة جدا....أيمن  أخد قصة وراء قصة وراء مجلة ....وفجأة لقيته جاي يقولي ...." يعني اية علاقة جنسية غير شرعية "
أنا ذهلت ....بس سالته " لية بتسأل السؤل ده...؟" لقيته بيديني كتاب  بيتكلم عن الايدز .....كتاب عن الايدز في مدرسة ابتدائي ....؟؟؟
عرفتم لية انا بقول الاهتمام بالتعليم والعلم كان المفروض تفكروا فيه .....؟؟؟
وللأسف أحبطتوني جدااااااااااا
أنا محبطة

هناك 16 تعليقًا:

  1. السلام عليكم حبيبتى

    انا الان اكتب بموضوع تاج الثورة بعد ما احاله على اخى مصطفى سيف
    واشكرك انك نبهتينى للسؤال ده :)
    فعلا لم اقرأه عند مصطفى
    وان شاء الله ارد عليه بمدونتى سلما للسماء فى بوست تاج الثورة
    ربما تقرأى البوست بكرة او بعده بالكتير ان شاء الله


    اشكرك على تعقيبك الجميل هنا اؤيدك جدا فيه

    دمت بكل خير غاليتى

    اعود انا بقى للبوست بتاعى ادعيلى :)

    تحياتى لك

    ردحذف
  2. السلام عليكم رحاب
    قرأت معك
    واتفق معك فى ان هناك الكثير اتقدته الاجابات وليس عيبا فكل يتكلم وفق اولويات يضعها وفى الغالب بتبقى دى اللى ظاهرة فى بالها وهو بيكتب
    شكرا على طرحك

    ردحذف
  3. السلام عليكم
    طبعا التعليم والعلم من اهم الحاجات اللي بتتبني عليها الدول
    بس السؤال كان عن اول 3 قرارات يعني قرارات فورية مش خطط مستقبلية
    يعني في مهم وفي اهم في حاجات مهمة زي التعليم بس لو قدمتها ولسه الفساد موجود ولسه الاتفاقيات الخارجية موجودة هيبقى لسه بابني التعليم على اساس باطل يبقى الاولى اصلح القاعدة اللي هابني عليها علشان يبقى الاساس ده متين بعدين يبقى يتم وضع خطط مستقبلية
    الاساس ده هيتبني ازاي اول حاجة لازم القضاء بتاعك يبقى مستقل علشان احكامه تبقى عادلة وتقدر تنضف وانت متطمن ان في قضاء عادل غير موجه
    تاني حاجة اتفاقياتك الخارجية كلها تتعدل علشان محدش يتدخل في شئونك لما تحط خططك
    تالت حاجة تبقى بقى حملة التطهير في الوزارات وانت متاكد محدش هيضغط عليك خارجيا وان في عدالة داخلية
    خلاص نضفنا نبدا بقى نحط خطتنا مش في التعليم بس لا في كل المجالات التعليم والزراعة والصناعة وغيره وغيره
    ده كان قصدي
    اشكرك واحييكي اختي العزيزة انك ذكرتينا باهمية التعليم التي كلنا نؤمن بها وبانه لا يقوم اي مجتمع الا بالعلم
    تحياتي

    ردحذف
  4. السلام عليكم أختي رحاب..

    صراحة أختي الكريمة أنا كتبت تحديدا (تطوير التعليم والبحث العلمي) في إجابة السؤال الذي أشرتِ إليه؛ فأنا خريج علوم وأدرك تماما أن أزمتنا الحقيقية هي أزمة أسلوب التعليم الخاطئ والإهمال المتعمد للبحث العلمي..!
    لكني غيرت الإجابة عندما رأيت صياغة السؤال (أول 3 قرارات) فجاء في ظني أن المقصود القرارات سريعة النتيجة!!! بينما التعليم والبحث العلمي من القرارات بعيدة الأجل في النتيجة...!!!

    بس هو ده الموضوع.. :)

    أنا كده لحقت نفسي وخرجت من المغضوب عليهم :) أصلي حاسس من شدة زعلك إنك ناوية تعملي حاجة في المدونين اللي مكتبوش تعليم!!!!

    عامة هي دي الفايدة من تجميع إجابات متنوعة.. أعتقد أنها نوع من العصف الذهني غير الممنهج!

    تحياتي أختي الكريمة على غيرتك المحمودة على مستقبل مصر.. حبيبتنا كلنا.

    ردحذف
  5. اخيتى
    عندك حق
    التعليم
    لوحده مصيبه
    واذى كبير عمله فينا المخلوع ده
    هنقدر نغيره ان شاء الله الى الافضل

    ردحذف
  6. الفاضلة الاستاذه رحاب
    انت على حق والحق فيما كنا فيه راجعا الى من وضع السؤال والذى أ راد اجاباتنا -غير قاصدا- محبوسة رهن ثلاثة اختيارات لا نتجاوزها
    وان كان الجواب قد غفل للعلم ذكرا فانه لم ينقصه قدرا
    وأه لو كان العلم محصنا بمكارم الاخلاق وهذا ما اشرت اليه تلميحا فى ذكر تحاورك مع تلميذك النجيب
    وهنا اذكر بعض الابيات الخالدة لشاعر النيل حافظ اباهيم
    فالناس هذا حظه مال وذا
    علم وذاك مكارم الاخـــلاق
    والمال ان لم تدخره محصنــا
    بالعلم كان نهاية الامــلاق
    والعلم ان لم تدخره شمائـل
    تعليه كان مطية الاخفـــاق
    لا تحسبن العلم ينفع وحـــده
    مالم يتوج ربه بخــــــــلاق
    وشكرا على تتويجك للعلم مع شمائل الاخلاق
    (فاروق فهمى)

    ردحذف
  7. ازيك يا رحاب

    لا تحبطي يا فتاتي فإجابتنا جميعا كانت تريد الخير العام لمصر والخير يعم ليشمل التعليم والصحة وووووووووووو

    انظري لإجاباتي:




    *** لو أصبحت رئيسا لمصر ما هي أول ثلاث قرارات لك ؟

    محاكمة كل رؤوس الشر

    مصر دولة إسلامية رغما عن أنف من يتحدانا

    العدالة الاجتماعية
    =====================

    داه يعم ولكنه يشمل الكثير الكثير من الخير لمصر و من ضمنه التعليم قطعا


    تسلم إيدك

    ردحذف
  8. حلو التحليل دة يا رحاب

    و صدقينى عارفه هتيجى لوحدها الأهتمام بالتعليم

    هتيجى تلقائياً لأن لما هيجوا يظبطوا اى حاجةهيلاقوا الأساس غلط فهيهتموا بالتعليم من الصفر

    تحياتى

    ردحذف
  9. انا لسه واخد التاج ده من مصطفى سيف ايضا و اعتبر محظوظ انى اتأخرت فى كتابته

    و محظوظ ايضا انى شاركت فى الثورة

    اما موضوع التعليم ده فده السبب الاساسى اللى بيخلينى اميل للبرادعى رغم ميلى العاطفى لحمدين صباحى و ميلى العقلى لهشام البسطويسى

    خالص تحياتى

    ردحذف
  10. التعليم فعلا حاجه مهمه واساسيه ومن الحاجات اللي مفيش خلاف فيها وفعلا مهم انه يتذكر في اي برنامج انتخابي لانه هيبقى اساس للجيل
    تقبلي تحياتي

    ردحذف
  11. أول مرة أزور مدونتك القيمة .. تهنئتي لك على المجهود المبذول والرائع..

    ردحذف
  12. كل واحد بيجاوب من وجهة نظره ياجميل واكيد مش كلنا هنتفق ع شئ واحد

    ردحذف
  13. اعود مرة اخرى واطلب منك الرجوع الى مدونتى فقد تركت تعليقا على تعليقك لما كتبت فقد يروقك بالنسبة لعبد الوهاب

    ردحذف
  14. مساء الورد أضم صوت الى الاخ ماجدأزمتنا الحقيقية هي أزمة أسلوب التعليم الخاطئ
    -----------------------------
    هذا ربط فيديوا لي سيدة الإعلام التونسي الاولى
    http://youtu.be/qLEtuRU-rus

    ردحذف
  15. حبيبتى رحاب انتى فعلا عندك حق التعليم مهم جداااااا جدا وانا اتعرضت فعلا لمواقف كتيير بالنسبة للتعليم تضاف للموقف اللى انتى حكيتيه تخلينى اقول حسبى الله ونعم الوكيل فى اللى وضع المناهج دى وقال انه بيطور التعليم بيها

    اتمنى ان الرؤية تتغير فعلا فى التعليم

    ويتم انقاذ مصر من كل اللى فيها يارب

    لك كل الود والتحية

    ردحذف


  16. السلام عليكم
    بداية , جميل جدا غيرتك على التعليم والتعليم بالذات ولكن أنا وضعت عند الأستاذ ماجد مدونات أصحابها أجابوا بأن أول همهم اصلاح التعليم
    فأرجو أن تتفقديه

    وكلنا نعلم أهمية التعليم وأكيد اصلاح مصر سيكون من خلاله لكن فيه خطط عاجلة وخطط آجلة اصلاح التعليم في مصر سيأخذ سنوات ويجب أن يبدأ بمحو الأمية ولكن الفقراء المعدمين حالهم لن يستطيع الإنتظار أكثر من ذلك أو القضاء على البلطجة والإنفلات الأمني أو تعيين العاطلين أو رفع الأجور ,مصر كانت قبل الثورة فساد وطلعله دولة فكل شىء في مصر يحتاج للاصلاح وبصورة عاجلة ولكن تخصيص ثلاثة أشياء فقط هو من باب الرمز وأيضا لاختلاف الرؤى سوف يجتمع عندك في النهاية عشرات الأشياء التي يجب على رئيس الجمهورية الإهتمام بها
    سعيدة بالتعرف عليك خصوصا لما عرفت إننا بلديات , نعم فأنا كمان من اللي كفروا الشيخ :)
    وفي انتظار اجاباتك عن التاج لطفا وليس أمراً
    :)
    وأدينا عرفنا إن أول شىء حتعمليه بعد توليكي الرئاسة إنك حتصلحي التعليم , عايزين نعرف الباقي بقى رغم إني مش حانتخبك لأنك واحدة ست

    :)

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين