الأحد، 7 فبراير، 2010

Pray for me thank you









ادعي لي شكرا ....ما هو في كلمني شكرا , اشحنلي شكرا , وسلفني شكرا ...ليه ميبقاش في ادعي لي شكرا ...!!؟


ما هو انتم عارفين إننا في معمعة الامتحانات اللي لازم يكون فيها الدعاء من قلبك ومحايلة من اللي حوالبك عشان يدعولك , هتقولولي ذاكري هو يعني هندعيلك وانت مش بتذاكري ....! طيب كدة هتنجحي ازاي...! يا جماعة انا بذاكر والله وقاتلة نفسي مذاكرة بس اعمل اية وانا بقي عاملة زي المثل اللي بيقول قليل الحظ يلاقي العضم في الكرشة


ييييععع اية الامثال الوحشة دي , ما هو يعني اعمل اية وانا كل تيرم يطلعلي حاجة تقلق تفكيري وتخليني قلوقة ومش عارفة اركز حلو في المذاكرة , يعني مثلا التيرم اللي فات مش ممكن انساه ابدا وهو ده يتنسي فاكرة ان كان عندي امتحان وكنت تعبانة وقلت انام واصحي الفجر اصلي وافضل اذاكر قبل السفر للكلية وكنت عند اختي لان جوزها مسافر وهي حامل وعلي وشك الولادة وماما بقي قالتلي مينفعش تسيبي اختك لوحدها ونسيت ماما اني عندي امتحان _ تقولي اياكش يولع الامتحان المهم اختك تقوم بالسلامة _ وطبعا بنت اختي اللي هي عاصفة اصرت ايما اصرار الا ان تيجي للدنيا المهببة دي ليلة امتحاني وكانت ليلة لا نمت فيها ولا ذاكرت وروحت الامتحان وانا نايمانة خالص وشربت قهوة ونسكافية بلاك وشاي وكابتشينو ولا أي حاجة خلت النوم يروح مني ودخلت الامتحان مش فاكرة غير عياط البنت المفعوصة عاصفة العصوفة اللي بيقولوا ان عنيها حلوة زي عيني _ آه بيثبتوني _ طييييييب


ماشي التيرم ده الحمد لله ما في حالة ولادة ولا حالة جواز بس في حالة خطوبة وحالة سفر , بنت خالتي بتتخطب , وابن عمي جة من قطر بعد غربة ثلاث سنوات ..................


ماما بتقولي : هاه خلصتي غسيل , هتكوي الهدوم دي النهاردة والا بكره , كنت عايزاكي تروحي تشوفي رشا كدة متنسيش انها حامل ابقي اشتري لبن وزبادي وبيض وانت رايحة لها


انا عايزة اصرخ بس بقول مينفعش دي ماما , مسكت نفسي وحاولت اقول بهدوء: انا مش فاضية انت ناسية يا مامي اني عندي امتحان بعد بكرة ...!!؟؟


ماما: لاء مش ناسية , ابقي ذاكري بالليل , انت بتسهري وبتقومي من النوم بعد العصر


آه كسفتيني يا ماما طيب حاضر يا ماما


ماما : طيب هتروحي لبنت خالتك دي خطوبتها بكرة , وكمان عايزاكي تيجي معايا تشوفي ابن عمك


انا : ما تخليها الاسبوع الجاي يا ماما ابارك لبنت خالتي وابقي اروح اشوف ابن عمي واقوله مع السلامة ...قصدي حمد الله بالسلامة........... كل كلامي بقي ملخبط


ماما : مينفعش ....هو بعد العيد بينفتل كحك...هتروحي تباركي بعد الخطوبة باسبوع ..! واللي جاي من السفر تروحي تشوفيه بعد اسبوع ..! اية قلة ذوقك دي


امممممم يعني هو ميحلاش الخطوبة الا دلوقت , ويعني ابن عمي مكانش ممكن يجي الشهر الجاي , مش كفاية بنتك شيرين مش راضية تترجم لي التدريبات دي


شيرين : يا سلام مش انا ترجمتهالك قبل كدة والا هي شغلانة يعني


انا : يا بنتي دا انت بتشرحي للجيران وجيران الجيران ولحد عندي وبتقفي والا يعني هو باب النجار مخلع


شيرين: لاء يا ماما ابقي احفظي الكلمات انت بس بتحفظي كلمات الاغاني لكن المذاكرة لاء


اوووووووف ماشي يا ست شيرين, طيب مش هتدعيلي يا شيري


عبير اختي قالت لي انت عارفة ان دعوتي مستجابة وكمان ممكن احلم لك حلم ويتحقق وتجيبي بلاش ممتاز خليها جيد جدا بس كله بتمنه , هاتيلي تورتاية وانت جاية وانا ادعيلك دعوة كدة تنجحك والله واما بقي اذا مجبتيش حاجة انت عارفة دعوتي مبتنزلش الارض ابداااااااا


اهيء اهيء اهيء اهيء


قلت اكلم احمد اخويا , ميدو حبيبي شايف اختينك عبير وشيرين عاملين فيا اية


ميدو: متقلقيش ذاكري يا حبيبتي وربنا يوفقك, بقولك اية ابقي اشحنيلي علي خط فودافون الا مفيهوش رصيد وكمان موبينيل يا حوبة يا قمر ....اتصالات بقي مش مهم مش بستعمله كتيييير


عاااااااااااااااااااعاااااااااااااااااااااعااااااااا


النهاردة الجمعة فضلت ادعي ربنا كتير وقبل ما بابا يخرج يصلي ف المسجد حلفتة بكل عزيز وغالي يدعيلي كتير ده يوم مفترج وفيه ساعة استجابة


وبقيت حاسة ان كل حاجة ملخبطة


واول ما بابا دخل البيت بعد صلاة الجمعة ...جريت استقبله واسأله بسرعة ...هاه يا بابا دعيتلي


واول ما ماما خلصت صلاة سألته نفس السؤال


اية يا حوبة اللي جرالك , هي دعوتهم يعني اللي هتنجحك والا هي بس اشتغالات


امممممممم لا والله بس برتاح لما الاقي حد بيدعي لي دعوة حلوة وبنت حلالالالالالالالالالال


ادعولي والنبي






حوبة


السبت 6فبراير 2010

هناك 14 تعليقًا:

  1. دمك خفيف اوى

    شوفى هو واضح ان اللى حواليكى مزودنها شوية مش عارفه ليه...جايز مش عاجباهم الكلية او مش حاسين انك ح تشتغلى او اى حاجة تانية

    بس انتى مش لازم تستسلمى و دافعى عن حقك فى الهدوء

    تحياتى و ربنا يوفقك فى الامتحانات
    :)

    ردحذف
  2. انا كنت هكتبللك كومت كبير اوى بس رجعت فى كلامى ومش هكتب غير ربنا يوفقك ي رحاب يا بنت الناس الطيبين وان كان على طلباتى لانى دعيتللك هو طلب واحد اكون اول واحد يعرف النتيجه بعد ماما وبابا اللى اكيد دعوللك يوم الجمعه قشطه كده

    ردحذف
  3. يارب يوفقك وتنجحي وتجيبي التقدير اللي بتتمنيه ان شاء الله بس انت ابقي خذي بالاسباب وذاكري كويس

    ردحذف
  4. ربنا يوفقك و ينجحك و تبقى من الأوائل ...يارب
    لكن الأهم إنك تاخذى بالأسباب ...
    و إوعى تعملى بالمثل اللى بيقول .. نام و إرتاح يأتيك النجاح ...
    ربنا يوفقك

    ردحذف
  5. حوووووبه
    انتى وحشااااااانى اوى

    ويلا الحمدلله هااااانت وهانخلص اهو
    والحمدلله لحد دلوقتى خيييير
    ربنا يوفقنى انا وانتى وكل زمايلنا وكل اللى بيمتحنوا يااااارب

    حلوووو اوى اسلوبك
    ... ;) ,,, ;) ...

    ردحذف
  6. معلش ما عنديش فكرة
    وعوة متأخرة بس يمكن تلحق

    ربنا يوفقك

    ردحذف
  7. Tears
    ازيك الاول , هما مش مزودينها ولا حاجة بس بيحبوا يشاغبوني ولانهم عارفيني لما بتوتر , بس انا بجد مش بستسلم ابدا خصوصا لما اكون حابة اللي بعمله لاني دخلت الكلية عن اقتناع تام وحتي اسرتي كلها كانت معترضة بس انا اللي صممت والحمد لله نجحت , عارفة مفيش يوم من الامتحانات بيعدي غير لما يتصلوا يطمنوا وختي من قبل اخرج من اللجنة بلاقيهم اتصلوا اكتر من مرة برغم انهم عارفين اني بعمل الموبايل صامت وحتي اخواتي المتجوزين لازم يجوا يطمنوا عليا وانا عملت اية ربنا يخليهملي يارب

    ردحذف
  8. عليوة
    شكرا علي كلامك وانا اساسا بملا الدنيا بخبر نجاحي والحمد لله الامتحانات كانت يعني معقولة والحمد لله عملت اللي عليا وزيادة حبتين تلاتة

    ردحذف
  9. خواطر شابة
    نورتيني بجد وشكرا ليكي والحمد لله الامتحانات عدت خلاص علي خيييييير والحمد لله كنت بذاكر كويس

    ردحذف
  10. الشاعلا الفنان احمد فؤاد فتحي
    انا ابدا عمري ما باخد بالمثل ده ولا بمبدأ الغش والحمد لله , بذاكر كويس وبدعي ربنا وبعمل اللي علي وبحاول اني مسيبش الورقة فاضية والحمد لله برغم اني احيانا باخد تقدير اقل من اللي متوقعاه بس الحمد لله خير من عند ربنا وبمجهودي

    ردحذف
  11. غادة حبيبتي
    الحمد لله اخيرا بجد استريحنا
    والحمد لله خير بجد من عند ربنا هو كان في حاجات طبعا غير متوقعة زي العلاقات والاعلان كدة , وحتي الانجليزي اللي كنا خايفين منه كان بجد احسن امتحان
    يارب يوفقنا جميعا والنتيجة تكون حلوة

    ردحذف
  12. Sal
    الاول اهلا وسهلا بيك ونورتني بجد وشكرا ليك والدعوة في اي وقت المهم تكون من القلب والاهم ربنا يسمعها ويحققها يارب امييييييين
    وشكرا ليك مرة تانية واكيد هزو مدونتك اتعرف بيك

    ردحذف
  13. واضح ان عائلتك مش عاوزاكي تكملي تعليم هههههههه وكله بيحاول يبتزك مقابل انه يدعيليك هههههههه
    انا عندي فكره اوفر من التورته وكارت الشحن انتي زي الشاطرة كده تنزلي الشارع معاكي خمسه جنيه وتكون فكه معدن يعني وتدوري علي خمس ناس غلابه كل واحد تديه جنيه بس خدي بالك لازم تطلبي دعوه محدده يعني مش يضحك عليك ويقولك ربنا يعمر بيتك ربنا يسلك طريقك لالالا انت تطلبي دعوة ربنا ينجحك وممكن تهديها برضه لكل اصحابك معاكي في الامتحان ههههههه

    ردحذف
  14. mo7md s3d
    لاء مش كدة بس بالظبط بس شايفيسن ان التعليم مش جايب همه
    المهم فكرة حلوة بس اكيد هيضحكموا عليا اصل انا طيبة

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين