الخميس، 25 فبراير، 2010

وانتهت زوبعة الامتحانات ...لكن منتهتش حكاية النص رغيف....؟!



في كل الامتحانات لازم يكون في حاجات غريبة بنعملها بنسميها طقوس وتعود وكدة يعني بس انا بقي الغريبة ان طقوس الامتحانات ثابته عندي علي اشياء واشياء بتتغير ....يعني بحب اذاكر في السرير والكاست جنبي وممكن اتمشي وانا بذاكر في الاوضة او البلكونة الساعة اتنين بعد نص الليل , بشرب شاي علية نسكافية وكاكاو , وممكن اغني وانا بذاكر ....واحب اذاكر وانا فاردة شعري علي كتفي .....


واذا كانت دي طقوس المذاكرة طقوس الامتحانات اية ظروفها ..؟


اممممم بلاقي نفسي في حالة ملل وعندي خوف ورعب من الامتحانات وبحب اكسر أي حاجة ازاز عشان كدة ماما بتخبي أي حاجة ازاز لما تلاقي جنونة الامتحانات بتعتي طلعت , بس ده كله كوم وان طقوسي قبل الامتحانات تكون قص شعري كوم تاني ومكنتش ارتاح ابدا الا لما اقص شعري .........لاني قبل الامتحانات ومن التوتر بحس شعري شكله غريب ومش حلو بالمرة


المرة دي والحمدلله رحمت شعري ومش قصيته يمكن عشان انا كنت مذاكرة كويس والا يمكن تغيير في الطقوس والا اييييييية ....؟ بصراحه صعب عليا شعري اوووي


المشكلة الكبري كانت بجد لا في المذاكرة ولا الامتحانات ولا حتي في قص شعري المشكلة اني مش كنت بعرف اكل خالص لدرجة اني مش بعرف اكل غير نص رغيف ..!


اكون جعانة جدا جدا جدا واقعد حوالي ساعة اكل ووفي الاخر الاقيني اكلت نص رغيف , طيب اية المشكلة ..؟ المشكلة ان لما رحت الامتحان اصحابي معرفونيش ولولا انهم عارفين المخبأ السري اللي كنا عاملينه انا وحسام وحسن وايزيس نذاكر فيه قبل دخول اللجنة مكنوش عرفوني , المشكلة اني ملاحظتش ابدا اني اتغيرت ولا اني خسيت كدة لدرجة ان ملامحي اتغيرت زي ما بيقولوا وكنت بقول يمكن عشان مشفناش بعض من كام شهر , لكن لما دخلت اللجنة والمراقب يصمم ان مش اشبه الصورة اللي في الكارنية خلاني افكر هو انا صحيح اتغيرت ..؟ لكن صدقت بجد وامنت لما شفت بنت عمي وانا خارجة من الكلية ومعرفتنيش ...!!! بنت عمي مشفتهاش من الصيف اللي فات وبرغم اني عرفتها وهي كمان اتغيرت بس انا عرفتها ..ازاي هي متعرفنيش ...؟ مش معقول فعلا اكون اتغيرت اوووي.....................


وكل مرة في الامتحانات يحصلي موقف طريف اووي المرة بقي كان مع الامن علي بوابة الكلية مهو مش معقول يا جماعة مش فاهمة انا اية لازمته اني ادخل من بوابة واخرج من بوابة تانية والبوابتين جنب بعض ...!!؟ اليوم الاول وانا بدخل الكلية رجعني عسكرثي الامن وقالي م البوابة التانية يا انسة قلت له لية ما هي أي بوابة وخلاص رد قالي واللله معرفش ابقي قولي لحضرة الظابط ........بصراحة مكنتش رايقة وكنت قلقانة فقلت استسلمي المرة دي وعديها يا حوبة وبلاش مشاكل من اولها واهو كنت لسة مدخلتش ولا حاجة يعني , ودخلت وانا بقول لنفسي يمكن بوابة للدخول صغيرة عشان بيكون كل واحد جاي لوحده وبوابة الخروج كبيرة عشان الطلبة ما بيصدقوا يخرجوا من الكلية ...ههههه


وتاني يوم كنت نسيت حكاية البوابة وبعد ما دخلت ومشيت يجي مترين لقيت اللي بيقوللي ارجعي يا انسة وادخلي من بوابة الدخول انت دخلتي من بوابة الخروج ...يا سلام انا دخلت خلاص لسة هرجع تاني يا عم عديها مش مشكلة المرة دي ....مينفعش يا انسة ....بصراحة كنت هسمع الكلام واعديها , لكن لقيت ناس تانين داخلين وسايبهم وماسكني انا....ف بصيت له بتحدي ولقيت نفسي بعمل زي ما عملت سعاد حسني للاولاد في فيلم صغيرة علي الحب لما كانت متقمصة دور بنت صغيرة وطلعت له لساني .......ودخلت من بوابة الخروج وسيبته يبرطم زي ما هو عايز....
وفي اخر يوم امتحانات حبيت اكافيء نفسي بالايس كريم اياة وشوية مجلات كدة مقريتهمش من زمااان من ايام ما كان احمد ابن عمي بيشتغل في مصر للطيران لما كان يجيبلي مجلات اشكال والوان افضل اقرا فيها لغاية الشهر ما يخلص ويجي احمد تاني ومعاه مجلات تانية , بس مالقيش للاسف غير مجلة واحد بس هي زهرة الخليج اللي بجد اتغيرت كتيير بس للاحسن بجد وساعتها اتحسرت علي حال الصحافة عندنا
خلاص عدت الزوبعة بتاعت الامتحانات وبقيت رايقة وفايسقة للافلام الاجنبي والنت والمدونة والنوووووم الله ع النوم
بس للاسف لسة برضه مش عارفة لية كل ما حد يشوفني يقولي انت اتغيرتي وخسيييييتي اوووي كدة لية مع اني مش حاسة بده خالص , وبرضه لسة مش عارفة لية مش بعرف اكل غير نص رغيف

رحاب صالح





هناك 10 تعليقات:

  1. اولا الف مبروووووك على نهاية الامتحانات

    كل دى معاناه ليه يعنى...انتى تخصصك طاقة ذرية؟ :))

    ماتزعليش انك خسيتى و اعرفى ان دى نعمه فيه ناس مش لاقياها...انا شفت ناس حواليه بيعانوا من موضوع الوزن ده و بيسببلهم مشاكل فى الشكل و ده خلانى احمد ربنا اوى على ان وزنى مناسب و عشان كده عايزة اقولك مهما كنتى خسيتى فمش مشكلة لان مع السن وزنك ح يزيد لوحده

    اهم حاجة تنامى و تستمتعى و نصيحة من واحدة درست كتير اوى فى تخصصين ايام الجامعه و كمان ماجستير و حاليا بتدرس لطلبة بكالوريوس ان افضل شىء تذاكرى اول باول لان تراكم الاعباء هو اللى بيعمل حالة الهلع و فقدان الشهية دى قبل الامتحانات

    تحياتي

    ردحذف
  2. Tears
    صباحك ورد يا جميل
    علي فكرة انا مش رفيعة ولا حاجة انا الحمد لله هو بس بيبان عليا اووي لو وزني نزل ولو حتي نص كيلو واصلا انا مشكلتي فعلا اني مش باكل لا وقت امتحانات ولا غيره , لاني اكلي قليل بس بحب صحيح اشرب عصائر والفاكهه والشاي والقهوة والنسكافية ده اساسي مع الامتحانات او لاء , بس بجد كانت ايام صعبة عليا بس الحمد لله خييير خصوصا اني ذاكرت من اول ما اشتريت الكتب , مش من قبل الامتحان باسبوع لا حاجة والحمد لله اني كنت بذاكر بجد مش زي كل تيرم وعلي فكرة انا مش زعلانة اني خسيت بل العكش بكون مبسوطة جدا لما احس ان خسيت شوية لاني مش بحب الوزن الزايد خاصة اني قصيرة , انت علي فكرة افدتني بمعلومة جديدة انك بتدرسي وده لاني معرفش عنك الا قليل جدا وان كنت اتمني اعرف المزيد ...بجد حبيتك اووي واتمني لك كل خيييير...والله يبارك فيكي وعقبال ما النتيجة تظهر

    ردحذف
  3. الحمد لله ان الامتحانات رت على خير عقبال ما تفرحي بالنتيجة ان شاء الله
    فكرتيني بنفسي في مووع الشعر انا كنت وانا باذاكر من غير ماأحس بلعب في شعري واجيبه قدام وجهي خصلة خصلة فكانت امي لو دخلت عليا تقول لي يا بنتي ربك حيحاسبك على اللي بتعمليه في شعرك والله فكرتيني بايام على قد ما كانت صعبة على قد ما بأحس بالحنين ليها
    تحياتي

    ردحذف
  4. خواطر شابة
    صباحك ورد الحمد لله مرت الامتحانات بحلوها ومرها والحمد لله بخير وبجد برغم الجو ده كله بس بتكون ايام حلوة برغم صعوبتها علينا, ويارب يسمع منك ربنا وتكون النتيجة حلوة ادعيلي بس

    ردحذف
  5. لولولولولولولولولى ..
    اهى دى زغروده ليا وليكى ولرانيا ولرضا ولكل اللى كانوا معانا ...

    وطبعا لو قولتلك على طقوسى ممكن تضحكى عليا ههههههههههههه

    عارفه قص الشعر بجد بيبقى مريح نفسيا احيانا ...
    زمان كنت افكر انى لو قصيت شعرى ممكن انتحر .. بس بجد اكتشفت بعد تجربه انى برتاح مش عارفه ليه ... بس عمرى ماعملتها ايام الامتحانات هابقى اجرب هههههههههه ...


    وياااااارب زى ماقولتلك نصف الرغيف يبقى رغيف الا ربع على الاقل ..

    ربنا يسعدك دايما يااااارب
    ... ;) ,,, ;) ...

    ردحذف
  6. sal
    ميرسي علي مرورك ونورتني

    ردحذف
  7. غادة
    اللي بتمناه دلوقت بجد لا نص رغيف ولا قً شعري ولا حاجة خالص
    انا عايزة اعرف نتيجة المذاكرة والامتحانات الوحشة دي اية ؟ والتقديرات يا تري علي اتد تعبنا في المذاكرة والا

    ردحذف
  8. ان شاء الله نااااجحة و بتفوق برضو


    وصاحبتي زيك...بتجيلها حالة فقدان الشهية...وهي قلقة ومتوترة اووووي

    بس شاطرة اوي ما شاء الله


    بالتوفييق

    ردحذف
  9. قطرة وفا
    ربنا معانا بجد وانا ذاكرت كتير وعملت اللي عليا وان شاء الله ربنا يكرمني انا واصحابي , وصاحبيتك ربنا يحفظها ويكرمها يارب انت وهي واتشطري انت كمان

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين