الخميس، 12 أغسطس 2010

التفكير المتعصب

كل عام وانتم بخير ورمضان كريم ...انا كنت هكتب عن رمضان بس الاحداث فرضت نفسها ف الفترة الاخيرة وده موقف حصل معايا وعايزة رأيكم فيه يار يت بوضوح ....
كنت مع أختي بتعمل كشف طبي عشان التأمين الصحي لآنها مدرسة يا جماعة وانتم عارفين المدرسين كل شوية يطلبوا منهم حاجة ..المهم اني روحت معاها المستشفي وهي مستشفي العبور بكفر الشيخ ..الصراحة انا قلت تبقي فرصه لو لقيت اي تجاوزات او زحمة وعدم تنظيم وكلام من ده يعني الحاسة الصحفية بتاعتي اللي كانت بتمشيني .....
لما روحنا المستشفي بالعكس كل حاجة كانت تمام التمام ونظام اية والمراوح شغالة والتليفزيون علي قناة ازهري والكراسي منظمة وكل حاجة بجد كانت مرتبة ومنظمة جدا حتي في دخول الكشف الطبي ...المهم اني قعدت مع اختي لغاية ما ندهوا اسمها وبدون خوض ف تفاصيل مملة وخلينا ف المفيد أول حاجة كانت التحاليل ودخلت مع اختي وانتظرت ف غرفة غريبة وظهر استغرابي ودهشتي علي وجهي لدرجة جعلت ذلك الطبيب يسألني : في اية مستغربة من اية ...؟
قلت : اصل شايفة كلمات " مورفين , ماريجوانا ...." حاسة اني في غرفة مخدرات مش تحاليل ...!
قال بلهجة عليمة لفتاه جاهلة مثلي في نظره : طبعا دي غرفة المخدرات ..انت اول مرة تدخلي مستشفي والا اية ...؟
قلت له : لاء دخلت واخدت مخدر المورفين كمان ...لكن ماريجوانا ده ...انا حاسة اني لو فتشت شوية هلاقي حشيش وبانجو ...
قالي : انت جاية تعملي كشف التأمين الصحي ؟
قلت : لاء ...انا جاية مع اختي
قال: وانت بتشتغلي اية ...؟
قلت بفخر واعتزاز: صحفية
وساعتها كأن ابواب جهنم انفتحت ولم استطع ايقافها ...." صحفية ..اهو انتوا اللي مضيعين البلد ...والله الصحفين دول شغلهم حرام ...انت بس غاويين شهرة واسفاف وحرام وبس
انا ذهلت ...في اية يا دكتور ...؟ هو اناقلت لك اني بشتغل اية يعني طيب لو قلت لك ممثلة والا مطربة  كان اية اللي حصل بقي ...!!!
قال وكأنه يتقاتل معي : يا هانم الصحافة دي لابد تكون مسؤلة وانتم مش مسؤلين والا مكونتوش تعملوا البلاوي اللي بتعملوها دي ...
قلت بدهشة : واحنا عملنا اية ...؟؟؟!!
قال " جريدة اليوم السابع اللي عاملة مقال بتحاسب فيه الرسول وبالخط العريض كدة محاكمة النبي محمد والليالي الحمراء للرسول والنبي محمد يغتصب الاطفال ....
بصراحة انا قلبي وقف  واتخضيت اووي ومبقتش عارفه اقول اية  لكني حاولت اني اتمالك نفسي وسألته : ازاي  حضرتك تقول الكلام ده اليوم السابع جريدة محترمة جدا وبتكتب دايما عن الدين حلو اووي ....يبقي ازاي تقول الكلام ده انت اكيد غلطان ...!!!
قال : لاء مش غلطان اقري  اليوم السابع  اللي من اسبوعين فاتوا وانت تعرفي
قلت كأني احدث نفسي : صحيح انا اشترتها بس مقريتهاش عشان امتحاناتي ...لكن انت متأكد ...
قال : طبعا متأكد وكمان  في ناس هترفع عليهم قضية ده كمان غير وقف اصدارها ومحاكمتها
و...ساعتها اختي خرجت من غرفة التحاليل ومش هقول معرفتش اكمل معاه لانه كان مصمم لكني قلت له " انا هحاول اشوف الموضوع ده اكيد لكن انا متأكدة انك غلطان "
قال : لاء مش غلطان بس انتم اللي غاويين شهرة ....
خرجت مع اختي لباقي الكشف وهو بين الحين والاخر يخرج ليراني ويستفزني بابتسامته ....
اول ما جيت للبيت فضلت ادور علي اليوم السابع والموضوع ده ...لقيت اييييييييية ....ان في كاتب مغمور اسمه انيس الدغيدي عامل رواية  ممكن نقول عنها فانتازيا او مستقبلية  مأخوذه عن الاحداث الاخيرة ف الدانمارك والرسوم المسيئة للرسول ...وبطل الرواية محامي ...حاول انه يدافع عن الرسول بالحجج والبراهين والادلة ...ف محاكمة ف الدانمارك ....ادي مختصر الرواية هو صحيح المستفز فيها العناوين ...وده شيء طبيعي جدا لكاتب مغمر  من خلال قاعدة خالف تعرف ...والاستفزاز هو اللي بيخلينا نتشهر .... ده كله من اليوم السابع وموقعها ومواقع اخري طبعا ...
شايفين ...ده تفكير ...ده شخص متعلم غير كونه طبيب ...؟؟؟!!! مؤكدا لي انه مقال مسيء للرسول وللسيرة النبوية كلها ...وانا الان اعرف جيدا انه لا قرأ ولا اي شيء ...هو كمعظم المصريين يعوم علي الموجة ...يعني واحد قاله الكلام ده وهو بيردده زي الببغان وبس ...محاولش زي ما انا حاولت اني اعرف اية اصل الحكاية عشان اعرف احكم ...لاء اختارالطريق السهل اللي اخرته ظلم الناس وبس ...ومن المواقف دي كتييييير ...بس بجد ساعتها قلت يا ريتني كنت عرفت الطبيب ده واسمه اية عشان ارجعه تاني وافهمه بس للاسف اني مش كنت اخدته اسمه ومش فاكره شكله ....واهو ده تفكير كتير من المصريين .....
كل  عام وانتم بخير ومضان كريييييييييم
رحاب صالح

هناك 21 تعليقًا:

  1. كلامك صح المشكلة ان دة بقي تفكير معظمنا حتى المثقفين مننا-او اللي المفروض انهم كده-بقنا بنركب الرايجة للاسف
    *********
    كل سنة وانتي طيبة بمناسبة رمضان وينعاد بالخير عليكي

    ردحذف
  2. السلام عليكم

    التفكير الضيق والفكر الضئيل اللى يعمم حكم على الناس علشان شاف شخص من فئه سىء اصدر الحمك على الفئه باكملها
    يعنى فى اطباء كتير بتعمل عمليات اجهاض وبيع اطفال واللى بينسى الفوط فى بطن الستات فى العمليات واللى بينسى المقص وكمان اللى كان عامل عيادته لتسهيل الدعاره
    ده غير اللى فشل فى طب وعمل عياده فى قريه وكتب عليها مدرس مساعد بطب عين شمس عشر سنين وبعديها اكتشفوا انه اصلا مأخدش البكاليوس
    مش شرط مش معنى كده ان الاطباء كلهم وحشين
    وفضيحه دكتور الاسنان اللى كان بيصور المريضات بصور مخله وسى ديهاته فى مصر كلها
    مش معنى كده يبقى نصدر الحكم باعدام الاطباء او حرقهم بالنار فى ميدان عام
    ده فكر ضيق
    والصحافه فيها
    والمحاماه فيها
    والهندسه فيها
    كل شغله فيها الكويس والوحش بس بلاش نعمم
    مش يعنى قابلنا واحد من المنوفيه من كفر مصيلحه وحش يبقى كل اهالى الكفر والمحافظه وحشين
    ابدا بلاش نعمم
    كل سنه وانتى طيبه

    ردحذف
  3. كل سنه وحضرتك طيبه وبصحه وسعادة

    بوست هايل وربنا يجازيكى كل خير

    رمضان كريم

    ردحذف
  4. كل سنة وأنتِ طيبة وبألف خير وصحة وسعادة إن شاء الله

    :)

    رمضان كريم

    ۩

    ردحذف
  5. السلام عليكم
    رحاب
    دى مدونه نهى صالح
    http://kalamfaddy2.blogspot.com/

    ردحذف
  6. و افرضى كان معاكى اسم الطبيب و عنوانه و فهمتيه مين ح يفهم باقى الناس

    مش بس الموضوع ده انما كل موضوعات حياتنا تقريبا اللى واخدينها سماعي و بيرددوا فيها كلام و بس لما المجتمع بقى مجرد قطيع و الناس ثقافتها..ان جاز التعبير...ثقافة سمعية

    ده يا بنتى دينا البسيط السمح ذو الخمس اركان فقط كل يوم يزودولة فرض جديد و مع الوقت يصدقوا كدبتهم لما عقدوا الناس

    ردحذف
  7. عارفة حكاية الغازية لازم تنزل ؟ لما واحد يلم عليه الجهلة ....وهم وراه.....الناس دلوقتى بقيت كدة ....امة اقرأ لاتقرأ رغم التدين.....كل سنة وانت طيبة

    ردحذف
  8. رحاب

    أزيك

    كل سنة و أنت طيبة

    التعصب حتى فى اللى المفروض أنهم متعلمين

    أو متفتحين و قادرين يقيموا الأمور بموضوعية

    دى أقل حالات التعصب من مثقفين انا شفتها

    طبعا موقف يحرق الدم

    بس صدقينى أحنا تعليمنا بيؤدى لده

    أى أنسان عنده قدر من التفتح و الفهم للأشياء اللى حواليه

    بيكون من أهله و تربيته صدقينى

    و لسه ياما هنشوف

    رمضان كرييييم (:

    ردحذف
  9. هذا هو حال الناس ..الحكم السريع والقفز على عقول الغير واتهامهم بوجهة نظر مختلفه تماما عما يقصده الكاتب انها العقليه الاشتباهيه بتاعة أمن الدوله ...تغرس رويدا رويدا فى عقول الجيل فتجعله لسوء النية أقرب وللمخالفة أدعى ....لكنى من ناحية أخرى أعيب على كاتب المقال المغمور اندفاعه فى اتجاه شائك بالغ الحساسيه واستخدام الفانتازيا فيى غير محلها
    هذا وبالله التوفيق ...احنا عاوزين نهدى النفوس
    كل عام وانتم بخير

    ردحذف
  10. ههههههههههههههههههههههههههه
    اى حد يسألك كدا تقولى له صحفية ؟
    عادى كدا ؟ مش خايفة يحرص منك ولا يقلق منك
    دا انا لو قلت لاى حد انى مدون
    بيمسح رقمى من عنده
    بيقولى عشان لما يقبضوا عليك متطلعش ليه اى علاقة بيك
    ههههههههههههههههههههههههههه
    سيبك انتى
    بما انى كنت زميل ليكم فى نفس الكلية
    رمضان كريم :)
    شاب فقرى

    ردحذف
  11. رحاب

    كل سنة و إنتى طيبة و بخير

    رمضان كريم

    الصحافة تاج على رؤوس الصحفيين ... ده رأيى من زمان ... الصحفة شرف
    لكن انا أحب أقولك إن مش كل متعلم مثقف ... و مش كل أمى جاهل ... العبرة بالشخصية و الرغبة و الرؤية و الإرادة
    ماتدخليش نفسك فى مهاترات إنتى فى غنى عنها

    دمتى بخير


    دم

    ردحذف
  12. مصطفي
    ازيك عامل اية ف رمضان...؟
    ده تفكير معظمنا للاسف بس مش كلنا والنسبة القليلة اللي بتفكر صح مسيرها تكبر ...لكن للاسف ان اعلامنا كمان هو اساس المشكلة دي بعدم نشره للحقيقة وانحيازه للبعض

    ردحذف
  13. محمود
    اكيد مش لازم نعمم
    بس مشكلة المصريين انهم بقوا يعمموا وبس من غير ما يعرفوا وحتي المثقفين منهم اصبحوا منقاديين ..وانا الحمد لله مش بنقاد لأحد لكني دايما احب اعرف الحقيقة ولا اقول جزافا ...امتي بقي نبقي صح او علي الاقل نسبة الصح فينا اكتر م الغلط

    ردحذف
  14. اميرات الا سرار
    ربنا يخليكي يا قمرة
    ورمضان كريم

    ردحذف
  15. باشا
    شريف
    ازيك ورمضان كريم ويارب رمضان الجاي تكون مع اميرتك

    ردحذف
  16. تيرز
    معاك حق طبعا
    وده بيفكرني بحكاية جحا اللي معناها اننا منقدرش نرضي الناس كلها ...لكن لو كل واحد فينا فهم حد اكيد هنلاقي الحياة اختلفت برغم صعوبة الموضوع ده ...والمشكلة الاكبر ف الاعلام للأسف

    ردحذف
  17. Tarkieb
    معاك حق امة اقرأ لا تقرأ ولا تفهم ايضا
    بس العيب فييين ...؟ عندنا والا عند الاعلام والا اية ...؟

    ردحذف
  18. رامي
    معاك حق طبعا
    لان التربية بتفرق ...لو انا متربية علي اني احاول اني ابحث عن الحقيقة بغض النظر عما يقال فلن اظلم احد ابدا ولن اسرق ولن انهب ...لكن مع كل التغيرات المحيطة بنا تجد ان حتي الاخلاق والتربية لها مقايضات اخري

    ردحذف
  19. maxbeta3zaman
    اولا اهلا وسهلا ونورتني
    الحكم السريع والقفز الي نتائج اخري
    عقلية الاشتباه والنظرة الضيقة للاشياء والحكم فقط بالمظهر ..كلها آفات للاسف منتشرة ف مجتمعنا ونعاني منها ونحن ف القرن الواحد والعشرون والعالم يتقدم ونحن خير الامم ...ف المؤخرة

    ردحذف
  20. شاب فقري
    نورتني
    هههههههه مشكلة فعلا بس بجد بقولها وعارفة مشكلاتها بس اعمل اية انا اللي اخترت ولازم اتحمل نتيجة اختياري ...والحمد لله بستعمل شغلي ف الحقيقة والصح والحمد لله اني مش بستخدمها لآهواء شخصية رغم ميلي ف بعض الاحيان لهذا لشعوري بالظلم ولكني احتسبها عند الله
    نورتني مرة تانية

    ردحذف
  21. الشاعر الفنان أحمد فتحى فؤاد
    انا معاك طبعا ان مش كل متعلم فاهم ومثقف ومش كل جاهل او امي غبي ومش بيفهم احيانا بلاقي العكس ....بس المشكلة ان الجهلة المتعلمين كتيييير ومدعين الثقافة وحب البلد والدين اكتر ...وكل ما تحاول تفهمهم بيزدادوا غباء فوق غبائهم ...انا صحفية ولي الشرف وافخر بهذا وسأظل ما دمت ادافع عن الحق ...ميرسي لمرورك ورمضان كرييييم

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين