السبت، 13 أكتوبر 2012

شخابيطي ....6

0

 فاكرين  تدوينات الالوان ...؟
احنا عملناها كتاب واسمه " صندوق ورق " 
مع دار ليلي ان شاء الله  وان شاء الله هيكون موجود ف معرض الكتاب وجايز نعمل حفلة  توقيع قبل المعرض مش عارفة 
بس اللي اعرفه اننا عملنا دعاية للكتاب وانا بما اني مشاركة بقصتين ف الكتاب فكان في اتنين كوفر للقصتين بتوعي 
ده واحد منهم .......عن قصة " البنفسج عندما يبحث عن احلامه "
واللي عايز القصة او القصتين عموما يقولي وانا اسيب اللينكات 


1
زي كل سنة ....
تقولي" آية "بنت اختي ...خالتو ...؟
انا : متقوليليش يا خالتو 
آية : طيب ...بلاش خالتو ...طنط
أنا : متقوليليش طنط
آية : رحوبة ...ممكن تكتبلي موضوع تعبير عن حرب اكتوبر...؟
ونفسي مرة واحدة ميكونش الحوار بنفس الطريقة ولا نفس الميعاد
هما لية ميبتكلموش عن حرب 1967 ...النكسة واسبابها والدروس اللي استفدناها منها ووصلنا بعدها بسنين للنصر ...؟
نفسي  التعليم يتغير ...
2
رسالة ....لمن تعرف نفسها جيدا 

تعرفي  كنت محتاجة حضنك ده اووي 
وبجد كنت هموت واشوفك لانك وحشاني اوووي
بس لو متعمليهاش مرة وتقوليلي " حوبة انت خسيتي كدة لية ...؟ "
يا بنتي انا كويسة اووي ...مش حاسة اني خسيت اووي زي ما انت بتقولي  انا بس بعمل إعادة تأهيل نفسي  لنفسي وبنفسي واكيد هكون كويسة قريييييب جداااااا
بس حاااااااااضر هسمع كلامك وهاكل كويس والمرة الجاية لما تشوفيني ...هتلاقيني " كلبوظة " 

 3
مش غريب ان يجتمع تلاتة اربعة  وأكتر ان الشخص ده غير مرغوب فيه
بس الغريب إن الشخص غير المرغوب فيه ده يفرض نفسه عليكم كلكم كدة ويعمل البيت بيته ويعزم نفسه عندكم
ويقدم القهوة بنفسه للضيوف  اللي هو أصلا منهم ...وكأن زي  م المثل بيقول " البيت بيت ابونا والغرب بيطردونا " 
ده اللي حسيته  ومش لوحدي ....والشخص ده ..جرأه زيادة عن الحد ....فرض نفس ع الاخر ...نفاق واضح جدا ....طيب اتعامل ازاي مع الموقف ده .....يا ريت اجابة لو سمحتم
4
زمان لما كنت اسافر والعربية تقف ف كمين ....كان اللي امين الشرطة بينزله هو " الملتحي " والمنتقبة "  بطريقة عفوية 
الآن .....أمين الشرطة مش بيشوف لا الملتحي ولا المنتقبة وبيدخل شمال ف شاب هادي وعادي جدا ومفيهوش اي عيب ....
العيب بس انه عايز يعمل منظر ويعطلنا ...
ده الحاصل للاسف مع ان المفروض اني بوقف اللي شاكك فيه مش اي حد والسلام
يا مصر عليك السلام 
5
كنا ف نادي بنشرب نسكافية ومنسجمين ....
اندهشت من ان الملاهي اللي ف النادي  بيلعب فيها منتقبات وبألعاب الاطفال 
لما حققت النظر كويس ...صعقت
لان المنتقبات...ليسوا سيدات ولا حتي آنسات ...بل اطفال  ف العاشرة او الثانية عشر  تقريبا ...
هو مش ده برضه اسمه " هدر حقوق  الاطفال " 
والا هنقول برضه ده سمو وأدب ومش عارف اية ...؟
طيب سيبوهم يعيشوا حياتهم ...
والا لازم النقاب يعني حتي وانا طفلة وبلعب بالمراجيح والاسكوتر .....؟؟!!!
بجد انا مذهولة 

6
الشغل متعب بس بحبه
بقيت مش فاضية ومشغولة
بس بحاول اظبط حياتي
بحاول انسي اشخاص
واشيل من حياتي ناس
وناس جديدة بتدخل حياتي 
بس بحاول منساش اللي فات 
بخلق حياة جديدة بحاول تكون سعيدة 
سواء مع نفسي او مع اللي بتمناه

رحـــــــــــاب صالح

هناك 11 تعليقًا:

  1. انا هتكلم عن الضيف الغتت ده اللي زي ده مايجيش غير بالصراحة

    يعني مع السلامة

    ورينا عرض اكتافك

    احنا مبسوطين منك ومتجيش بكرة

    تحيتي رحاب

    ردحذف
  2. ازيك يا رحاب :)
    ربنا يكرمك يارب :)
    إيمان :)

    ردحذف
  3. كلام جميل وصادق جدا
    بس فيه حاجة بسيطة جدا
    مين قال إن البنات الصغارالمنتقبات حد غاصب عليهم ؟!!
    مش يمكن شايفين أمهم كدة ف حبوا يكونوا كدة ؟!!
    هم أطفال أه بس هم فاهمين ؟

    ردحذف
  4. أولاً .. مبروك الكتاب وبالتوفيق يارب ..
    1- التعليم والثقافة العامة كلها تقريباً تحتاج لإعادة تأهيل وإنعاش ..
    2- غالباً عندنا في سوريا العكس هو الصحيح لما يتقابلوا تقول الواحدة للتانية إنتي سمنانة يا بنت .. هههه
    3- الضيف الثقيل ليس له إلا مضيف أثقل منه يوقفه عند حده ..
    4- بدون تعليق .
    5- صدقي يا رحاب الموضوع مختلف شوية عن نظرة حضرتك .. شخصياً بنتي من سن السابعة وهيه تطلب إنها تتحجب وأنا أمنعها علشان معنى الطفولة اللي حضرتك اتفضلتي بيه .. واتحجبت في سن الثانية عشر ولله الحمد وهيه عندها دي الوقت 14 سنة .. هما لما يلاقوا الكبار بيرتدوا النقاب بيبقوا حاببين يكبروا بسرعة فعلشان كده هما بيتشجعوا للنقاب أو الحجاب .. زي الاولاد لما تلاقيهم ماسكين سيجارة وبيدخنوا عاوزين يثبتوا إنهم صاروا رجالة .. بس مع الفارق بين الحالة الأولى الحسنة نوعاً ما والثانية (أقصد السيكارة) السيئة .. لكن كلامك يبقى في مكانه لو كان النقاب إكراه وإجبار ..
    6- بالتوفيق وأرجو لك السعادة ..

    ردحذف
  5. اهلا رحاب
    عارفة موضوع النقاب ده شوفتو قبل كده فعلا اطفال صغيرة وبتلبس نقاب وبيلعبوا مراجيح انا اول ما شوفت المنظر ده اتصدمت مكنتش عارفة اعبر ازاي ولا اقول اي حاجة كنت مذهولة جداااا حاجة غريبة ... طيب نربيهم كويس ما ممكن يلبسوا لبس ساتر وحجاب على ادهم ،،، حلوة شخابيطك ،، ادعوك لزيارة مدونتي
    http://memi2012.blogspot.com/
    تحياتي وكل الود

    ردحذف

  6. الشخص الغتت ممكن ميكونشى غتت
    ممكن يكون حاسس أنه مرفوض ووحيد أووى ونفسه فى حبة ونس

    بعمل إعادة تأهيل نفسي لنفسي وبنفسي واكيد هكون كويسة قريييييب جداااااا
    حلوة أوووى .. نتعلم من تجاربنا وأخطأئنا ونعرف طريقناالصح

    دايما خواطرك بتكون مليانة احساس عالى ومعانى جميلة
    وياريت تنزلى لينكات القصتين
    تحياتى لاحساسك الجميل

    ردحذف
  7. ميروك أخيييييييييرا الكتاب

    ولما يخرج للنور بلغينا
    ويا ريت يبقى على المعرض على طول
    هيكون احسن
    فى الدعاية
    والتوزيع

    وكمان أسهل فى موضوع حفلات التوقيه وحضورها

    ردحذف
  8. مبروك علي الكتاب
    انبسطت جدا من الخبر ده

    اما الضيف الغريب ده
    مابينفعش مع الناس دي غير الصراحه
    لازم تعرفوه انه غير مرغوب فيه
    لأ المشكله ان سكوتكم هيخليه يتمادي
    لحد مايتدخل في ادق شؤنكم الحياتيه

    ردحذف
  9. رحاب .. عجبنى اسلوبك البسيط فى الكتابة وانا بحب النوع ده من الكتابات .. الحقيقة ان كل فقرة محتاجة بوست لوحدها لأنها موضوعات مهمة فى حياتنا زى الاطفال المنتقبات دى لوحدها ثقافة كلها غلط من وجهة نظرى ولها اثار نفسية عالاطفال موضوعها كبير اوى .. كمان الضيف الغير مرغوب فيه مش فى البيت بس ده فى كل مكان حتى الشغل والشارع يعنى مش شرط يخبط علينا بابنا دى ابسط حاجة حلها مانفتحش الباب الي فى الشغل بقى حتعملى له ايه ؟؟ ... المهم مبروك الكتاب و ماتنسيش دعوة حفل التوقيع تحياتى بالنجاح

    ردحذف
  10. .....

    الف مبروك على حفل التوقيع

    بالنسبه للشخص الى فارض نفسه...احنا نتعامل معاه بالظبط زى ما بنتعامل مع المجانين فى مجانين كتير
    بيكونوا موجودين ايما فى العزومات او الافراح او حتى لقائات التدوين...الشخص ده الى تحسى انه حاسد الجميع على كل حاجه
    وعاوز يأخد كل حاجه..لانه شايف انه الاقرب والاولى من الجميع
    والى فارض نفسه
    والى حاشر نفسه
    بالرغم انه دائماً دائماً مؤنث
    الا انى اثرت الحديث عنه بصيغه المذكر


    طريقتك فى السرد روعه


    تحياتى

    ....

    ردحذف
  11. ربنا ييسر لك اللي فيه الخير يا رحاب ويفرح قلبك ويكرمك ويوفقك وينجح مقاصدك بإذن الله وكل سنة وانتي والأسرة الكريمة طيبين وبألف خير وصحة وسعادة إن شاء الله وألف ألف مبروك على الكتاب :)

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين