الجمعة، 28 مارس، 2014

حجر الاساس ....!


كتب صديقي العزيز ياسين احمد سعيد علي الفيس بوك يقول ...
من فترة انتشر قوى المنشور دا:
-----------------------------------------
غاده عبد الرازق فى فيلمها الجديد ( حجر اساس )
عامله دور مدرسة فى اواخر التلاتينيات بتتجوز واحد ضعيف جنسياً وبتقرر تطلق للسبب ده وبتعجب بطالب فى اعدادى وبتعمل معاه علاقه وبتخلف منه

تفتكروا كام طالب بعد ميشوف الفيلم ده هيتخيل مدرسته وهيا معاه فى اوضاع زي كده ؟!!
----------------------------------------
ولأن هم يضحك وهم يبكى،اتشقلبت من الضحك من أحد التعليقات ف جروب على الكلام دا،تعليق من سطر واحد بختصر الحالة المأسواية:
- هااااااااااااااار اسود انا كدا هبطل تدريس دا انا عندي شحوطه..

 تعليقي انا ...
كان عبارة عن موقف افتكرته  في بداية شغلي في مدرستي  اني واقفة مع طلبة الصف الثالث الاعدادي  وطبعا هما ماشاء الله طولي مرتين وانا بتعامل معاهم  عادي كأنهم أصحابي ...وده خللي وكيل المدرسة يقوللي في يوم  متخليش العيال  بتوع تالتة يقفوا معاكي كتير  ...رد عليه المدير  ببساطة .... العيال فاكرين رحاب  بنفس عمرهم  عشان هي "حاجة صغيرة "  
وقتها ضحكت كتير بس متخيلتش اني ممكن اقابل كم المشاكل الي قابلته من بساطتي من التعامل مع  طلاب الاعدادي 
عشان كدة لما الموجه جه وطلب مني اني اتنقل لمدرسة ثانوي رفضت جداااا
اذا كنت مستحملة كل مشكلات الاعدادي بالعافية ومش بشتكي ...هروح الثانوي اعمل اية ...؟
ومعتقدش اني اتكلمت عن المشكلات دي مع اي شخص انا طبيعتي اصلا  مش بتحكي لحد بسهولة
لما قرأت الخبر عن فيلم غادة عبد الرازق  كان نفسي اولع في اي حد من بتوع الفن الهابط ده 
يعني بدال ما  نشوف مشكلة من المشاكل المهمة ونعرضها ونحاول نحط لها حلول    نحط احنا بنزين علي النار  ....
يا نهار اسوووود 
بصراحة  الاخلاق والرقي بالاعلام اصبح شي ء محال 
اذا كانت المدرسات بتعاني من  تعلق الطلاب بها  او في اغلب الاحيان ان الطالب يجي للمدرسة يقولها انه معجب بيها وبيحبها  ...واكيد بتكون صدمة ليها وكتير مش بيعرفوا يتعاملوا مع المواقف دي ...
انتم متخيلين  بعد الفيلم ده ممكن الطلاب يتعاملوا معانا ازاي ...؟
 لا انكر اني تعرضت لمواقف شنيعة  علي مدي الثلاث سنوات الماضية بسبب الطلاب ...كتير بسبب الفاظهم لاني واحدة  من القليلين الي مبتعرفش تتعامل مع الالفاظ نهائي 
صحيح خليت بيني وبينهم ود وبساطة تخليهم يحبوني اكتر من اي حد في المدرسة  الا اني كمان عاملة معاهم حدود  مش ممكن يتخطوها ...عارفين اني مش بحب اي لفظ اي كان عشان كدة مفيش حد فيهم بيقول اي لفظ حتي البنات 
الحمد لله قدرت اتخطي مشكلات كتير   مع ولاد وبنات 
لكن معتقدش ان بعد فيلم زي ده ان العلاقة  بيني وبين الطلاب  ممكن تفضل بنفس البساطة ...
أوقات كتير الاقيهم يقولولي " انت موزة النهاردة يا ميس " وانا بكرة الكلمة دي جدا ... 
ومننساش ان المراهقين بيبصوا لكل شيء وبيلاحظوا كل شيء 
صحيح ان  تعاملاتي معاهم  هتخلي العلاقة كويسة لكن التأثير السلبي اكيد له دور ...
والافلام تحديدا او الفن عموما له دور كبير جدا في التأثير علي الشباب  والمراهقين بوجه خاص 
انتم إية رأيكم ...؟


هناك 8 تعليقات:

  1. بعيد عن نقابة التمثيل الهابط فين دور نقابة التربية والتعليم ليه المدرسين ميعملوش حمله لوقف الفيلم ده
    وبعدين طول عمرنا لينا مدرسات احيانا كان بتبقى قريبه جدا فى الست لنا لو فى تدريب كليه وكان ليها إحترامها ومكانتها
    يا ريت بدل مالمدرسات تحاول تفكر إزاى هيتعملوا مع الطلاب بعج الفيلم ده يحاولوا يفهموا الطلاب انهم مهما كان سنهم فلهم قدسية الأم وليس هناك من شئ يولد ارتباط بين المدرسه وتلميذها لدرجة هذا النوع من الإرتباط العاطفه ولالا فانه مرض قد يرتبط طالب بمدرسته انه اتعود انها قدامه ديما أو كأمه أو أخته الكبيره اام ماعدا ذلك صعب لان سنه لم يصل بعد لفكرة وجود حب عاطفى
    لى تعقيب وإن كان مش من حقى لكن هقوله . لفظ موزه ده لفظ داخل على اللغه ومش بيتقال الا فى مواقف كلنا عارفينها يا ريت مش تسمحى لاى طالب او طالبه إنه ينتقدك فى شكلك أو شخصيتك سواء بالسلب او الإيجاب له فقط إنتقاد اسلوبك وطريقة تدريسه ان لم يكن يصله المعلومة هنا توضع الحدود ا.اما ان طالب يقول لفظ زى ده وأنتى بتكرهيه فده لازم توقفيه لانه بعد كده هيتقال لزميلته وبعدين لاى واحده
    أتمنى بجد نقابة المعلمين تتخذ اجراء قانونى ضد أى شخص يحاول ان يلوث المهنه باى شكل
    نقابة المحامين سمحت لعادل إمام من قبل أن يظهرهم بممظهر النصابين والحراميه وكان ليهم وجاهتهم فى المجتمع حتى اصبحت حقا تحوى الكثير منهم
    شكرا على البوست وأتمنى لو تبدأى أنتى حمله على الفيس لو على جروب معلمين لمنع هذا الفلم المسئ لمهنتكم
    تحياتى

    ردحذف
  2. مش عارفة أنا قلتلك الموضوع ده قبل كده ولا لأ
    بس أنا عايشت إحساس الحب ده مع طفل في تانية حضانة لحد ما كبر وبقى في ابتدائي
    والولد حبه ليا ملحوظ ومفضوح لدرجة خلت المدرسات يغيروا ويتريقوا من مشاعره
    وأنا كنت حساه بجد وعمري ما سخرت منه
    تخيلي لما طفل كل شوية يجيلك وسط المدرسات وينزل من حصته بحجة أنه يروح الحمام بس علشان ييجي يسألك "مش عايزة حاجة؟"
    ووقت المرواح مايرضاش يركب الباص غير لما يتأكد أن أخويا جالي وهيروحني!
    ولو روحنا رحلة سوا وماركبش في الباص اللي أنا فيه وكان الباص بتاعه سابقنا عينيه تفضل متعلقة ع الشباك بتدور عليكي علشان يشورلك ويعملك باي باي !
    الولد كان مصمم يعزمني عندهم وعمال يقولي تحبي أجيبلك إيخ وإيه الأكل اللي بتحبيه!
    أنتي متخيلة طفل 5 سنين ويفضل متابعك بمشاعره وكأنك حبه الأول بجد
    أمه جت في مرة مخصوص علشان تعرف عليا من كلام ابنها
    ومواقف كتير بقدر براءتها بقدر ما بتسيب ذكرى حلوة جواكي
    الجدير بالذكر أني كنت بحبهم يقولولي "ماما منى" وهو الوحيد اللي كان مصمم يقولي "مِس منى"
    تقولي مش معقول حد يفهم يعني ايه حب بالطريقة دي في السن ده أقولك بس ده اللي كان واصلني بالفعل
    نسيت أقولك حاجة مهمة "كان بيغير عليا بجد"
    مكنش يعرف أخويا ولما شافني معاه غار وفضل شوية مايكلمنيش ولا ينزل يسأل عليا
    كان بس ينزل ويتعمد يعدي من قدامي ويبص عليا ومايكلمنيش
    فلما ناديتله قالي ولما عرف أنه أخويا طار من الفرحة

    تعرفي أن ده الوحيد اللي حسيته بيحبني بجد.. مشاعر بريئة ونقية ومفيهاش مطمع من أي نوع

    فطبعا المدرس له تأثير كبير جدا
    زي ما فيه بنات أول حب في حياتها كان أستاذها مثلا

    فليه بقى يوصلوا الموضوع في الفيلم المذكور لزواج وخلفة وعلاقة حب :(

    مش كفاية توابع مدرسة المشاغبين اللي لسه بنعاني منها لغاية دلوقتي -_-

    ردحذف
  3. انا معكى يا رحاب
    حجر اساس ايه ونوايب ايه فين الاساس اللى هيحطوا عليه الحجر ليه منحطش احجار كريمه فوق اساسنا
    بقينا نكتب كلام فارغ ونسمع كلام افرغ ونشوف كلام الافرع الفاضى
    عليه العوض يا رحاب

    ردحذف
  4. الافلام اللى من النوع ده سياسة كبيرة مصدرها من بره البلد عشان يننشرو الفساد نوع من انواع الحرب القذرة عشان يشغلو دماغ الشباب باشياء اخرى

    ردحذف
  5. ماهى غاده عبد الرازق واشكالها وافلام السبكى وخالد يوسف هى اللى بتحط النار جمب البنزين وكمان بيفتحوا عنين الاولاد الصغيرين وبيسوؤا سمعهمصر طبعا
    بس يا رحاب انتى بتدرسى لاولاد فى سن مراهقه حاولى تاخدى بالك ومتخليش حد منهم ياخد عليكى ابدا
    كمان التدريس للصبيان شىء محتاج لحزم خصوصا ان الاطفال فى مصر معادوش اطفال
    مشكله بجد موضوع ألفيلم ده فعلا معاكى حق اى طالب لازم هيتخيل نفس الوضع مع الاستاذه بتاعته

    ردحذف
  6. السلام عليكم

    طبعا سيبك من الفيلم وقصته بس أبسط حاجة هي مين اللي بتقوم بدووور البطولة ؟؟؟!!!!!!!!!!!!!!!!!
    ربنا ينتقم منهم بقى أغلب الأفلام حاليا عن بلطجي بيحب رقاصة ومخدراات وخمرة .. وعرض لأحط الأخلاق

    حجر الأساس ... فعلا هو حجر الأساس .. علشان كده هيدمروا الأساس والحجر وسيشيدوا الخراب والخزي والأخلاق القذرة والمنحطة .. يارب سترك


    بجد بوست ولا أروع وربنا يحفظك من كل مكروه وبنات المسلمين .
    دمتم بخير أختنا .

    ردحذف
  7. في وجهة نظر هتطلع تقولك انهم بيتناولوا المشكلة من ناحية تانيه هم بيعيشونا مشاكل المجتمع ويظهروها علي السح عشان احنا نعلم اولادنا وناخد بالنا منهم
    .. وناسيين انهم بكده بيزودوا المشكلة خاصة وان الغالبية العظمي من متابعي الافلام والسينما هم الاولاد بسن المراهقة ..
    يعني بيولوعوا الدنيا ويقولوا بنعالج ودي الديمقراطية واسلوب التعليم بالحوادث ...
    الله يحرقهم بقي لان مبقاش نافع معاهم كلام ولا منع ورقابة نايمة علي نفسها ..
    ربنا معاكي ويعينك خاصة وانك غنونة زيي وده لوحده مشكلة صعبة جداااااااا مع السن ده لانهم فعلا مهما عملتي حدود بينك وبينهم بيتخطوها في لحظة ويرجعوا ياخدو بالهم .. كلنا بنعاني
    تحياتي لاثارتك الموضوع

    ردحذف
  8. فن مقزز مش هقدر هقول غير كدا..

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين