الثلاثاء، 30 مارس 2010

دعوة ....لترتيب حياتك


منذ حوالي الثلاثة أشهر كنت اقلب في القنوات الفضائية أحاول ان اجد شيء يعجبني أشاهده والصدفة قادتني لمشاهدة برنامج كنت اتابعه من فترة لاخري , وجلست اتابع ماذا يقولون هذة المرة فكان هناك شخص يشرح فكرة طرحها في كتاب وحققت نجاح ملحوظ وبعيدا عن اسم الشخص أو اسم كتابه او حتي اسم البرنامج , خلينا بس في الفكرة نفسها اللي بتقول ببساطة انك زي ما بترتب دولابك او غرفتك ممكن ترتب حياتك لكن بشكل حيوي ومرن وانك تنسي كلمة فشل دي خالص والمهم انك تحاول تحدد اهدافك في الحياة وتحاول تحقيقها مثلا ممكن تقول انا عايز اذاكر عشان اجيب تقدير كويس اوك ذاكر ولو مجبتش التقدير ده حاول تاني ومتقولش لية زميلي برغم اننا جاوبنا زي بعض اخد تقدير احسن مني ؟ اعمل اللي عليك وحاول ومتخافش من الفشل لان خوفك من الفشل هو اللي بيخليك تفشل , حدد اهدافك وقول لنفسك انا هنجح مش مهم انجح امتي المهم اني قررت النجاح ......

عارفة ان الفكرة مش جديدة واعتقد اني في سن السابعة عشر من عمري قد قرأت كتاب مشابه لكاتبة فرنسية لا اذكر اسمها عن الكراكيب اللي ممكن نرتبها في حياتنا كلها مش في البيت او الشغل وبس , وبرضه مقال لأحمد بهجت عن نفس الفكرة ....


طيب اية الجديد يا حوبة ...؟


الجديد اني مش عارفة اية حالة عدم الاستسلام اللي عندي وحالة النشاط اللي جوايا بعد ما سمعت الكلام ده في البرنامج خصوصا انه قال انك بس المهم تحدد اهدافك ممكن تكتبها مثلا في مذكرة او علي الكمبيوتر او حتي ممكن بس تحددها في دماغك وتحاول انك تحققها ومتخافش من الفشل بل العكس خللي الفشل ده يكون حافز لك انك تحاول من تاني وكل مرة هتفشل فيها هتستفيد من اللي عملته لان مفيش حاجة بتعملها من غير ما تستفيد بل العكس هتشوف اخطائك وتحاول انك تتفاداها في المرة الجاية ....


في البرنامج ذكر صاحب الفكرة قصص نجاح بعض الاشخاص واللي زي ما بنقول عندنا بالعامية نحتوا في الصخر عشان يوصلوا للنجاح بعد محاولات كتيييرة جدا واصبحوا اشخاص مشهورين جدا , مش بقول لازم انك توصل لشهرتهم لكن بقول انك تسأل نفسك انت عايز تعمل اية ؟ او هو اية هدفك في الحياة ؟ امنياتك واحلامك, تحاول تبدأ تحقق هدف من اهدافك واذا مقدرتش حاول مع مرة تانية او ممكن تسيب الهدف ده دلوقت وتحاول مع هدف تاني وكل ما تحاول وتنجح دور علي هدف غيره وحققه ...


بالنسبة لي شخصيا كنت في الفترة دي بمر بظروف نفسية سيئة جدا لدرجة اني كنت مش طايقة نفسي ولا أي شيء ولا حتي عارفة اكتب كلمة انفس بيها عن اللي جوايا لكن بعد ما شفت وسمعت الكلام ده لقيتني برتب واحدد اهداف في دماغي كان اولها اني اذاكر عشان كان عندي امتحانات والحمد لله عدت علي خير , بعدها كان في مسابقة للقصة القصيرة كانت صديقة لي تلح علي ان اتقدم اليها وفرغت نفسي للكتابة وكتبت عدة قصص احسست اني وضعت بها الكثير من ما اريد وكنت اجلس بالساعات امام الكمبيوتر لاني قد صممت ان ادع افكاري وكلماتي تنساب علي عبر الكيبورد براحتها خالص ....بدون ازعاج والحاح مني , رتبت مكتبتي وطلعت كام كتاب اقراها لستيفين كينج ولافكرافت وفالنتين راسبوتين ومحمود السعندي وطبعا احمد خالد توفيق والقراية في حد ذاتها عالم عميق تستفيد منه كل وقت, حددت هدف اخر وقررت ان انجح فيه برغم كل شيء وهو ان ادخل عالم المدونات ....


وكنت منذ ثلاث سنوات قد انشئت مدونة واهملتها تماما بل قد نسيت اسم الدخول والباسورد ولكني بعد ان شاهدت مدونة صديقتي الصدوقة " غادة محسن " قررت ان اعيد التجربة مرة اخري وادخل عالم التدوين وساعدتني " غادة " كثيرا لترتيب مدونتي واعادة الكتابة مرة اخري فيها _ شكراااا غدغودة حبيبتي _ بدأت اطل واشوف المدونات واقراها بعمق واستفيد من المكتوب سواء قصص او خواطر او اشعار , مقالات او حتي مجرد كلام ومذكرات , لقيتني اغوص في عالم جميييل خصوصا اني معرفش حد من المدونين معرفة شخصية غير غادة محسن ودعاء عمرو واسامة امين وطبعا ميادة مدحت وعلا بركات والاستاذ وائل حمدي اللي صحيح مكتبش في مدونته كتير بس كانت عجباني اوووي ....


وعلي صعيد الحياة الشخصية بدأت اهتم بصحتي خصوصا ان وزني وصل ل45 ك وعلي رأي الدكتور اللي متابعة معاه مشاكل الجيوب الانفية عندي انه وزن مش محترم خالص _ علي اساس ان الوزن برضه بقي فيه محترم وغير محترم _ بدأت اخد العلاج علي شبه انتظام , وحاولت اني احسن من شهيتي ولكن بدون ان ازيد وزني زيادة مفرطة والحمد لله حاسة اني بدات اكون احسن بكتير , كمان اقنعت نفسي اني اسيب شعري في حاله وبلاش اقصقصه تاني وتقريبا ما صدق واهو عمال يطول ويرجع للونه الطبيعي تاني ....


ولاني كنت قررت ان اتدرب في جريدة بس الموضوع ده فشل فشل زريع لان كل جريدة كانت اوحش من اللي قبلها لانها جرايد داخل المحافظة ومهما كان مش هتكون قوية مثل الجرايد القاهرية والادهي انها برضه ماشية بالكوسة قلت لنفسي بلاش تدريب دلوقت خليني ابعت للجرايد باستمرار لغاية ما الاقي اني اقدر اسافر كل يوم القاهرة عشان التدريب هناك


اتفرغت للكتابة والحمد لله حسيت اني بكتب افضل من الاول , كنت قررت ان اخذ دروس في اللغة الانجليزية طبعا عند اختي " شيرين " لكن اتأجل الموضوع لحين ميسرة عشان " شيرين " بتاخد دورة أي سي دي ال عشان المدرسة اللي بتشتغل فيها .........بدأت احاول اني اتمشي نص ساعة كل يوم عشان رياضة المشي مفيدة جدا ده غير انها بتصفي دماغك وبتخليك تفكر بهدوء .......


شايفين الموضع مش مستحيل ولا حاجة خصوصا انكم هتستفيدوا وتحققوا اللي انتم بتحلموا بيه بس لو كانت عندكم الارادة وعدم الاستسلام وحب الحياة برغم صعوبتها, مش مهم انك تحقق نجاح كبير المهم انك تحاول للوصول للنجاح ده وتحس بطعم السعادة وانت بتحقق جزء من احلامك


ممكن بقي كل واحد فينا يحاول المحاولة الجميلة دي اللي بجد هتخليك تحس انك مفيد ومستفيد ......






رحاب صالح

هناك 10 تعليقات:

  1. مبروك على عودتك للتدوين :)

    بالنسبة للوزن فالقضية مش فى 45 لان المهم الطول...يعنى لو طولك 150-160 ده يبقى كويس اوى اما لو اكتر يبقى زيدي شوية ولو بالشيكولاته لكن مش كتير لان السمنه دى كارثة و معاناه و انا عرفت قيمة نحافتى لما شفت بلاوى الناس اللى عندها سمنة

    دمتى بخير دايما

    ردحذف
  2. رحوبة يا قمر
    البوست ادانى حافز لا يستهان به
    حاسة انى عاوزة اعمل مليون حاجة
    وفضلت افكر فى اهمية المليون حاجة لاقيتنى
    بلخصهم فى 17 حاجة بس
    فهمانى طيب

    هحاول واوعدك بمحاولات جادة
    بوست قيم جدا يا رحاب

    واجمل ما فيه انة قدر يوصل الفكرة بطريقة سلسة

    تحياتى ليكى يا قمر

    وعلى فكرة موضوع الوزن دة ثعب يارحوبة
    اتخنى شوية يا بنوتة
    ههههههههههه
    حبيتك فى الله

    ردحذف
  3. بجد مش بمّل من قراءة كلماتك ياحوبه ...

    بجد إسلوبك قريب للقلب ...

    وعارفه ... أنا كل ماراح أحس بياس بسيط .. راح أفتح كلماتك دي وأقراها ...
    عشان بجد إنتي ماعندكيش فكره بتعطيني طاقه قد إيه ...

    وشوفتي ياستي .. أهو كل الناس بيقولولك إتخنى شويه ... إسمعي الكلام بقى :))) ...

    ربنا يسعدك دايما ويفرح ويطمن قلبك على طول ياحووووبه ياقمر

    ... ;) ,,, ;) ...

    ردحذف
  4. ازيك يا رحاب اخبارك ايه واحشنى بجد فانتى نعم الصديقة ونعم الاخت بس على فكرة انتى مش نحيفه معلش انا مكنتش معاكى فى الموضوع من الاول لكن انتى جسمك معقول جدا ولو زى اخر مرة شوفتك فيها يبقى لازم تخسى شويه مش كتير ممكن 5 كيلو وانتى تبقى صارخ بشرى.....سلاااااااااااام يا ريرى

    ردحذف
  5. السلام عليكم
    انا سعيد بروح التفائل الى انتى حاسة بيها والى غمرتنى انا كمان لما قريت كلامك وهبداء التغيير انى هحاول ارتب دولابى الاول عشان من ساعة مبقى عندى دولاب عمرى مرتبتة رغم ان ولدتى بتتحايل عليا اطبق هدومى مبرداش هههههه وجميل انك تطرقتى لموضوع الوزن دة لانه عاملى تربنة شوية لانى فى الكام سنة الاخرانيين دول وزنى زاد وعاوز اخس وانتى عاوزة تزيدى تيجى نبدل....فين ايام كمال الاجسام والجسم الجميل قلبتى عليا المواجع بس ان شاء الله هحاول ارجع تانى للعبة.... بشكرك على الامل الى انتى ادتيهولى وعلى روحك الجميلة وبتمنالك كل توفيق

    ردحذف
  6. tears
    ازيك واخبارك اية
    الله يبارك فيكي وان شاء الله منقطعش عن التدوين تاني, وبالنسبة للوزن انا بخاف اتخن عشان انا اساسا قصيرة والحمد لله عمري بزعل علشان وزني بينزل بالعكس بفرح اووي جنون النحافة بقي وكويس انك متفقة معايا في موضوع السمنة ده لانها كارثه بجد

    ردحذف
  7. سهر
    انا مبسوطة ان الكلام جاب نتيجة معاكي ومش مهم 17 او مليون المهم انك تحاولي تنفذيهم , وعلي فكرة الوزن ده مشكله انت متعرفيش كام واحدة من جيراننا بيجوا البيبت عندنا عشان يستشيروني في موضع الوزن ده عشان يعني انا مهتمية جدا بالمحافظة علي وزني وعدم زيادته , فرحانه جدا بيكي ويارب دايما تنوريني بزياراتك

    ردحذف
  8. غادة
    حبيبتي ابدا مش ممكن اتخن عمري ان شاء الله والحمد لله اني وزني مش بيزيد بافراط وده لاني واخدة بالي من ده كويس, بالنسبة للكتابة انا بجد مش عارفة بحس اني مش كلام لا سلس ولا حاجة ولا لاعاجبني ولا مقتنعة بيه 50% حتي بس بحاول اني اتحسن كل مرة وانت بتعطيني دفة وتشجيع دايما ربنا يخليكي ليا

    ردحذف
  9. ssalas
    لو انت هو يعني سلس , اقصد سلامة الشهير بسلس اقولك ازيك واخبارك اية واعتقد انك مش شفتني من ثلاث سنوات واللي كنت بعتبر نفسي فيها كلبوظة مع ان وزني كان 53 ك بس كنت مش حابة نفسي , عموما انت بجد واحشني وعايزة اعرف اخبارك

    ردحذف
  10. الارموطي
    وعليكم السلام ورحمة الله وبركاته
    والله انا نفسي مستغربة حالة التفاؤل اللي انا فيها , بس بجد لقيت الحزن مش بيفيد ولاني مش من النوع اللي بيستسلم حبيت اعلن التمرد والحرب علي اليأس والاكتئاب وخلافه, مشكلة الوزن دي راجعة لتفكيرك وارادتك حاول وان شاء الله مش هتخسر وابقي طمني

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين