الأربعاء، 3 أغسطس 2011

محاكمة ...علي الهواء...............مباشرة

يمكن كنت متغاظة لدرجة اني سيبت المذاكرة وقمت أكتب
بعد ما سمعت محاكمة الباشوات
سمعت مش شفت ....لاني كنت بسمع وانا بذاكر مش ببص خالص علي المشهد الجميل
بس انا اتضايقت لية...........؟
المحامون الاعزاء  كل واحد لية كان جاي بمطالب معينة وعن فئة معينة ....؟
محامي عن شهداء الاسكندرية ومحامية عن شهداء وضحايا شمال سيناء و......كل واحد عن محافظة معينة
طب لية كدة....؟
لية متفقش كل المحاميين علي مطالب معينة  لان الشهداء شهداء في كل محافظة وفي كل مكان
لية كان كل واحد بيطالب بمطالب معينة ومبالغ معينة
لية المحاميين مكانش في ترتيب وتنسيق بينهم
لية حسيت انهم همجيين أووي ومش عارفين يتعاملوا مع ثقل المهمة اللي قايميين بيها
لية مكانش في نوع من اللباقة واللياقة في التعامل والكلام والطريقة
بصراحة انا اتضايقت واتغاظت جداااااااا
ده شيء ....
الشيء التاني اللي دار في دماغي  وانا بسمع المحاكمة
وخلاني اتغاظ أكتر  إن الرئيس أنكر هو واولاده كل التهم الموجهه ليهم بطريقة " اخبط دماغك ف الحيط انت وهو ....أو اشرب من المحيط ....علي أساس ان النيل معادتش فيه مية بقي"
الطبيعي انهم ينكروا كل التهم دي ...بس الغريب البرود والهدوء  ده اللي كانوا فيه............؟؟؟!!!!
الشيء الغريب التالت...المحامي اللي قال ان الرئيس اللي ف القفص ده ...مش الرئيس...لان الرئيس مات من سنيييييييييين ....ضحكت اوووي اووي اوووي
أصل أنا كنت بفكر ان ده مش الرئيس  وده مش جمال ولا علاء....لاء ده شبيه أو بديل للرئيس وأولاده ومش هما دول اللي ف القفص....الصراحة مش مصدقة......
مش مصدقة ان دي محاكمة...وان هو ده الرئيس...وان ده جمال وعلاء.....
لية حاسة ان كل ده حلم ......وان ده فعلا بديل...وان الرئيس واولاده عايشين في مكان تاني وبيضحكوا علينا ...وبيطلعوا لسنهم وبيقولوا لنا .....هههههه عليكم واحد....
ممممممممممم......هو انا سوداوية....؟
لاء  بس بجد بقول اللي حاساه
بجد هو ده اللي انا حسيته....محاكمة صورية ....بديل أو بدلاء ....ل حسني وجمال وعلاء....ويمكن للعادلي كمان
محاميين بيتعاملوا بغباء للأسف ...بهمجية للأسف بعدم تنسيق وعدم وعي وبلا تمكن وبلا هدف  ومش عارفين ثقل القضية اللي بيدافعوا عنها ......محاميينا للأسف مش فالحين بس غير يكفراوا اللي قلعت الحجاب أو يحللوا دم واحدة عملت فيلم مش محترم....
لكن انهم يقاتلوا بنفس الطريقة في القضية المهمة دي....للأسف لاء فشلوا جدااااا
بيتهيء لي ان المحامين اللي رفعوا قضية علي ساويرس بسبب رسوم ميكي  كانوا أشطر من محاميي محاكمة مبارك وأولاده ...للأسف
وهذا رأي الشخصي

هناك 18 تعليقًا:

  1. عارفة...محامين التعويضات بتوع زمان
    اهه دول كده
    وكترهم وطريقتهم ومطالبهم هى اللى هتبوظ القضية

    كل سنة وانتى طيبة ورمضان كريم
    انا تليفونى مش شغال كويس هكلمك قريب ان شاء الله بس انتى ذاكرى وسيبك من التلفزيون:)

    ردحذف
  2. صباح الورد رحاب

    في البداية كذا أنا كذلك رأيت المحاكمة تمشي على غير ما يرام رئيس لا يعلم من هم الموكلين عن المتهمين اللي بالكوم داخل قفص الإتهام ومحاميين كل واحد منهم يتكلم بشكل منفرد وفوضوي لدرجة أنني قلت في نفسي كيف ستستمر هذه المحاكمة بتلك الطريقة الفوضوية لعدم قدرة رئيس المحكمة وعدم تهيئة المكان بشكل مناسب ليعرف كل محامي وعن من يترافع
    ودخول كل المتهمين بهذه الطريقة كان غريب فالرئيس كان يجب أن تفرد له محاكمة لوحده لأنه الراس الكبيرة فلماذا تم جمعه هكذا بطريقة تشتت الفكر مع كم المتهمين هؤلاء ؟
    سيدتي هناك سيناريو أعتقد أنه سيكون لأقرب مبارك سيتم وقف محاكمته بسبب ظرفه الصحي وهذا معمول به وخصوصاً أنه ظهر بحالة صحية يرثى لها أما جمال وعلاء فلن تزيد مدة محكوميتهما عن عشر سنين مع إنكارهما للتهم أما العادلي فاعتقادي المؤبد سيكون مصيره ورغم كل هذا الكلام أعود وأقول المحاكمة تحتاج لتنظيم أكثر من ذلك وقد سائني شيء وهو تركيز المحامين على التعويضات المادية أكثر من أي شيء ثاني ...
    أتمنى أن تسير المحاكمة بحيادية وتنظيم أكثر

    تحياتي وإحترامي

    ردحذف
  3. رحاب يا رب يكرمك في الامتحانات يا رب بالمجموع الكبير والتخرج يا صحفية المستقبل وأتمنى أن تقومين بتغطية حية للموضوع برأي بناء لصحفية شابة من داخل الشعب
    ولا تحزني فالمحامين كل ما يهمهم التعويضات وقيمتها ونصيبهم فيها أما المتهمون مهما كانوا لا يعترفون بجريمتهم
    أخوك هشام

    ردحذف
  4. فعلا اسوأ ما كان فى محاكمة امبارح
    المدعين بالحق المدنى
    الميكرفون
    مبارك لما لعب فى مناخير :)

    بالتوفييق يا رحاب

    ردحذف
  5. للاسف يا رحاب..
    نفس الاحساس ونفس الاحباط كان عندي..
    وسألت نفسي سؤال: هو احنا ليه بقينا شعب همجي وغير منظم قوووي كده ..؟؟
    من الكبير للصغير..
    عدم لباقة وعدم احترام وكأنه سوق كبير..!!

    كمان موضوع المطالبات المادية وعدم التنظيم والاتفاق على راي واحد..
    ياترى لو كانت انتخابات نقابية ولا حزبية كانت ها تبقى بنفس عدم التنظيم وعدم وضوح المطالب..؟؟

    حاسس اننا بنتفرج على مسرحية محبوكة ، واللي اكد لي الاحساس ده مشهد جمال وعلاء بعد المحاكمة واكبر القيادات بيسلموا عليهم، لأ وكمان ضحكة حبيب العادلي المستفزة..!!
    ربنا يستر على مصر.

    ردحذف
  6. معلش يا ري اخدتني المشاعر ونسيت اقولك كل سنة وكل رمضان وانت بكل الخير.

    انا عارف اني باغيب كتير ودي حاجة مزعلاني مني ..!!

    صباحك ورد وبنفسج :)

    ردحذف
  7. ده الطبيعي في اول جلسة

    كلة بيبقي متخبط

    خاصة مكنش حد متوقع حضور المخلوع

    فالصدمة دوشت الناس مع الصيام

    ردحذف
  8. مش انتى بس يارحاب اللى اتغاظتى

    انا كمان ... وحسيت انى بتفرج ع مسلسل كوميدى هابط جدااااااااً

    بجد لو المحامين دول استمروا يتكلموا بلسان الشهداء

    يبقى قولى ع المحاكمات السلام

    ردحذف
  9. اللى قال مبارك مش هو مبارك ده منتحل صفة محامى و الامن هو اللى دخله..ده اللى رافق قضية اسقاط الجنسية عن البرادعي

    ردحذف
  10. في ناس كتير و أساتذة كبار ماعرفوش يدخلوا المحاكمة للاسف ..
    و غالبية التصاريح بتاعت الدخول طلعت للمحامين اللي انتي شوفتيهم .. الجهلة يعني !
    أعتقد المرة الجاية هتكون أحسن .

    ردحذف
  11. شوفى ده

    http://www.youtube.com/watch?v=u8a9rN4B2zI

    ردحذف
  12. للأننا للأسف نهتم بالمصالح الشخصيه عن العامه
    وهو ما يعتمد عليه فريد الديب فى فشكلة القضيه
    يعنى للأسف.......... بمبه

    ردحذف
  13. كلنا حسينا اننا بنتفرج على مسرحيه كوميديه وخصةصا كمان بعد كل دا حبيب العادلى خارج فرحان ومبتسم وبيسلم على رجالته من الشرطه العسكريه والمدنيه وكأنه مازال وزير وكان رايح يفتتح محكمه فى الكليه
    مسرحيه كوميديه
    كل سنه وانتى طيبه
    رمضان كريم

    ردحذف
  14. الموضوع كله من ضرب الخيال

    ومش بقول الا الحمد لله

    المصريين اهمه
    :))

    موضوع المحاميين شكله هيتحل وهيعملوا جبهت دفاع مشترك
    وماتقلقيش الحق مش بيضيع

    كل سنة وانتي طيبة
    وربنا معاكي ويعينك علي المذاكرة

    ردحذف
  15. تهنئتي لكم بالشهر المبارك تأخرت بسبب السفر
    كل عام وانت بخير
    كل عام وانت الي الله أقرب

    مودتي وتقديري

    ردحذف
  16. السلام عليكم
    عارفة انا كنت متغاظ جدا من شلة المحامين اللى عاوزين يبانوا فى الاعلام وكل واحد يقول انا محامى الشعب ومحامى الثوار واسمى مكتوب ولا لا
    فى الوقت اللى المحامى اللى ضدهم فاهم وعارف هو عاوز ايه بالظبط
    لك الله يا مصر

    ردحذف
  17. عاملة ايه فى الامتحانات

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين