الخميس، 1 ديسمبر، 2011

مـــــصر تنتــــحب

لم أجد أفضل من هذا العنوان لأكتبه ولأصف ما رأيته بعيني وشعرت به وعايشته يومي الانتخابات
وحقا لم أصدم أو يفاجأني ما حدث لأنني كنت متوقعة ما حدث ولكني فعلا لم أكن أتوقع أن يكون الشعب مغيب إلي هذا الحد
في البداية اتسغرب طريقة الانتخاب نفسها ......فردي وقائمة حزبية  تجعل  الفرد يدخل في متاهه لا يستطيع الفرار منها
صحيح في إعلانات  تعليمية لطريقة الانتخاب  وحتي بعض المرشحين عملوا  دايلوج لشرح طريقة الانتخاب لكنه لا يمنع من أن نصف المنتخبين ان لم يكن أكثر من هذا أصواتهم باطلة لآنهم أخطئوا في وضع العلامات
طبعا الدوائر الانتخابية كانت باتساع مهول  في المحافظات .....
والناس مش فاهمة مين علي الفردي ومين علي الحزب .....
الاخوان مكتسحين بجدارة وإمتياز ......
لكن هل فعلا  بنزاهة ....؟
هل فعلا  بدون تزوير ....؟
هل فعلا مصر كانت تنتخب بنزاهة وشرف وبدون تزوير ....؟
ما معني النزاهة والشرف....؟
ما معني التزوير ....؟
هل معني النزاهة والشرف ان أضغط علي الاشخاص ليعطوني صوتهم بحجة ما....؟
هل معني الشرف أن أخرج الناس من بيوتهم ليدلوا باصواتهم لي  بحجة معينة ...؟
هل معني النزاهة والشرف أن أقول للناس انتخبوا شخص معين  بجحة معينة ....؟
بحجة أنه الاصلح
أو بحجة أنه " راجل بيعرف ربنا "  أو " أنه سيطبق شرع الله "
كان ما يحدث هوز أن يمروا علي المنازل  يسألونهم  هل أدليتم باصواتكم ام لا ...؟
لن لم يكونوا أدلوا باصواتهم يقولون لهم أن يذهبوا لينتخبوا علامات معينة ....
وحتي ان كانوا لا يريدون ان يدلوا بأصواتهم   فهناك أكثر من طريقة لإقناعهم
أنا حقا مندهشة  من هذا ....فكيف هي انتخابات حرة ونزيهة وشريفة  وكيف يحدث هذا ...؟
مندهشة من كلمة مصر تنتخب .....!!!
مندهشة من كم الاشخاص  المادحون لما حدث في الانتخابات ....
وأنا  لأأري أن ما حدث مجرد لعبة سخيفة .....
نعم لعبة سخيفة ....
فليس هناك حرية ...ولا نزاهة ...ولا شرف ....
إذا كان هناك حرية ونزاهة وشرف ما كان  أي شخص من النظام السابق رشح نفسه وقبل المسؤلين أن يدخل البرلمان مرة أخري  والا أحنا زي ما المثل بيقول " القط يحب خناقة " ومش بنتعلم من الاخطاء اللي حصلت قبل كدة ....؟
لا أفهم كيف أننا قمنا بثورة ضد الفساد وندخل المفسدين مرة أخري لإدارة شئون البلاد مرة أخري ...؟ !! لا أفهم ....
لا أفهم كيف يغيرون فقط اسم الحزب  الوطني الديمقراطي لاسم جديد فقط وكان شيء لم يكن ....!!!
يعني إحنا بندل الاسماء وخلاص....!!!!
بصدق لا أفهم .....
لا أعترض علي أن الاخوان  يكتسحوا بجدارة بنزاهة وشرف وبلا تزوير ....هم أو غيرهم....ولكني معترضة علي  أن هذا لم يحدث وأنه لم يكن هناك أي نزاهة  أو شرف أو حرية  في الانتخابات .....
قولوا لي أين هذه الحرية وأنا  آتي بك من بيتك لتدلي بصوتك لشخص لا تعرفه لمجرد أنه يعرف الله ....علي أساس انه لا نعرف الله أيضا ....
أعترض علي أنني لا أعرف  من مرشحي دائرتي سوي شخص واحد فقط .....فهل هذا يكفي ...؟
متي سيعرفني المرشحين الآخرين بأنفسهم ......بعد الانتخابات ...؟؟؟!!!!
فليقل لي شخص عاقل إن لم يعرف المرشح السياسي نفسه لجمهوره ودائرته الانتخابية قبل الانتخابات فمتي سيعرفهم بنفسه....؟
يوم الانتخابات كل من قابلني يقول لي فلان وفلان وحزب الحرية والعدالة .....بلاش ثوريتك واعطي صوتك ولو مرة صح...
وأنا ذهبت وأدليت بصوتي ولكني لم أقل انا أعطيت صوتي لمن ولآي حزب ...
من الممكن لآنني لم اكن أعرف احد من المرشحين ولم اعرف اي من المرشحين سوي ثلاثة أشخص  فقط ....
أما الاحزاب فبالطبع أعرف احزاب عديدة ولي أصدقاء بهم ...ولكن هل هذا كافي لآعطي صوتي ...؟
ولنفترض انني لم اكن مقتنعة باي من المرشحين فماذا أفعل ...؟
فهل يقوم شخص ما بإقناعي  بنفسه كمرشح يستحق صوتي....؟
في النهاية لم تكن من وجهة نظري  أن مصر تنتخب ...بل تنتحب لما حدث ويحدث فيها .....

رحاب صالح

هناك 12 تعليقًا:

  1. السلام عليكم

    مصر تولد من جديد وهى فى فترة مخاض
    اى ان هذه الفترة سيكون هناك تداعيات و متاهات كثيرة امام الناس
    لكن لو استسلمنا لكلمة مين عارف ويمكن يبقى مش هنعمل حاجة
    ننتظر القادم ونسعى له حسب قناعاتنا الشخصية وفى ايدينا عجلة التغيير دائما


    بوركت اختى الحبيبة
    كونى دائما بخير

    ردحذف
  2. والله يارحاب عندك حق جداااااً

    لسه مفيش انتخابات عندنا احنا اخر مرحله

    بس عارفه مش جايلى اى نفس للانتخابات ومش حاسه انها بتعبر عن ارادة الشعب ولا حاجه

    ناس كتير بسيطه مش عارفه اى حزب وناس معينه هى اللى بتشكل رايها ودماغها

    ده غير انى اصلا مش واثقه اطلاقا فى المجلس العسكرى يبقى هثق فى انتخابات هو رقيب عليها ازاى ؟

    ديمقراطيه بلااا وعى ... كااااارثه

    لانها مش هتكون ديمقراطيه ده هيكون توجيه

    عندك حق هى مصر تنتحب

    ردحذف
  3. رحاب إزيك و حشتيني :)

    أنا مش حاسه إن مصر بتنتحب يا رحاب بالعكس حاسه إن ده عرس للديمقراطيه لو تعرفي قد إيه الدول العربيه و العالم فخور بنا و بإصرارنا رغم طزابير الإنتخاب الطويله و المطر حتى كبار السن و المعاقين كانوا بيصوتوا.
    أنا معاكي إننا منعرفش معظم المرشحين و غالباً بنختار حسب معرفتنا بأفكار الحزب نفسه و غالباً النتيجه مش هتيجي مرضية للجميع..لكن مننساش إن دي خطوة أولى للديمقراطيه اللي لسه بتحبو و غداً إن شاء الله تسير بكل ثبات.

    أنا كمن ضد إننا نتهم غيرنا بالتزوير أسوة بالإنتخابات الماضية..أولاً دلوقتي مش زي زمان و اللي بيغلط عارف إن فضيحته هتكون على صفحات الإنترنت..ممكن في تجاوزات في الدعاية مش أكتر..ده غير إننا مشوفناش اللي يخلينا نترعب و نخاف من الإخوان و نخونهم..أنا مانتخبتهومش على فكرة..لكن مزعيلتش إنهم كسبوا لأن ده إختيار الناس و لازم نوافق عليه كأولى خطوات الديمقراطيه.
    و ده مجرد رأي

    تحياتي ليكي رحاب و بوست دسم :)

    ردحذف
  4. فعلا يا رحاب كانت من اجمل الايام اللي شافته في حياتي وتابعته وفاجاتني اكتر ما اتفاجات بخلع الرئيس كنت خايف من الصدام لاقيت الشعب المصري الواعي اقوى واكبر واعقل كانت دليل على ان الناس ده فاهمه وداخله تختار وصور جميله اتنقلت للعالم كله سواء المعاق او الست العجوزه الناس ده رايحه وعارفه هتختار مين مش مستنيه حد يقولها او يفهمها
    كم اتمنى ان تستمر الانتخابات في نفس مجراها وسلوكها الجميل اللي بدات بيه
    تحياتي

    ردحذف
  5. رحاب ارى يا رحاب انه لن يفوز فى الانتخابات سوى مصــــــــــــــر فمصر كما ذكرت اختنا ام هريرة ستولد من جديد
    فلنرضع مصر لبنا لم يصبه العفن والفساد
    ونسقيها ماءا نقيا لا آسنا وأجننا
    ونطعمها مما رزقها الله من خيرات ارضها ذكرت فى كتاب الله
    ننتتظر القادم وعلى اقل تقدير لن يكون اسوء مما فات
    مع احترامى وتحياتى
    الفاروق

    ردحذف
  6. رحاب صالح انا اضم تعليقى للاخت الفاضلة ام هريرة ففعلا الذى سيفوز فى هذه الانتخابات هى مصر وسنحضر جميعا يوم مولدها الجديد ونطعمها

    ردحذف
  7. أم هريرة.. lolocat
    اختي العزيزة معاك في كلامك
    بس المفروض انها لو فترة مخاض يبقي ناخدب النا كويس عشان ميحصلش تسمم وانتكاسة...
    وانا شايفة من خلال دائرتي الانتخابية انه لا شيء كان بحرية او شرف
    انا لا اعترض علي حزب معين او شخص معين بل اعترض علي الطريقة نفسها
    تخيلي انه كانت هناك سيارات لنقل الناخبين تابعة لاحزاب معينة ولو سألوا شخص عن من سينتخب واتضح انه لن ينتخب مرشحه قام بإنزاله من السيارة...؟!!!
    فهل لديك تعليق علي هذا وبدون ذكر هذا الحزب من قبلي ...؟
    هل هذا معقول ما يحدث

    ردحذف
  8. دعاء العطار
    انا بجد كنت بتمني الاقي شخص فعلا يستحق اني اعطيه صوتي
    بس للأسف
    ولو حتي معرفوش طيب يعرفني بنفسه
    طيب كان عندنا مشكلات كتيرة قبل الانتخابات مفي شولا مرشح جه البلد وقعد مع الناس وحل المشكلات دي
    يبقي ازاي انتخب اللي معبرنيش؟

    ردحذف
  9. صراحة احنا فى حاجة قرف

    جميلة اسماعيل و جورج اسحاق يخسروا و اللى كانوا بيحرموا الخروج على الحاكم و بيكفروا اللى فى التحرير ينجحوا

    يبقى اشرب يا شعب الذل و الفقر اللى ح تشوفه

    ردحذف
  10. انا معاكى فى خوفك على بلدنا واللى بيحصل فيها بس اكيد فى ضؤ ابيض شفاف موجود وسط الظلام والظلم

    ربنا يحفظ بلدنا وشعبها واشوفها دائما الى الافضل


    مع خالص تحياتى

    ردحذف
  11. الناس اللى بيقولو ان الدول الاخرى فخورة بالثورة و بالانتخابات دى ناس مغيبة من قبل وسائل الاعلام جميعها ؛ اما انا شخصيا (و اقسم باللة العظيم انى صادق فى كل حرف اكتبة) فكنت مسافرا للخارج خلال شهر اكتوبر و نوفمبر 2011 لدولتين اوروبيتين و احد الدول العربية و سمعت باذناى عن الثورة و الانتخابات التى ستقام فى مصر اسواء ما يقال عن الخمر ذاتة اى انها ثورة فاشلة لم تجنى مصر منها سوى الخراب ؛ اما عن الانتخابات المقبلة فستكون انتخابات باطلة و اكثر تزويرا من اى انتخابات سابقة لها ( فيا 1000 خسارة عليكى يا مصر )

    ردحذف
  12. مصر فى خراب مستعجل بسبب الناس اللى هيمسكو البرلمان . الحقو مصر يا شرفاء مصر و يا اللى خايفين عليها من ناس عايزين يرجعوها مئات السنين للخلخ . ربنا يستر عليكى يا مصر يا حبيبتى

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين