الثلاثاء، 9 أبريل 2013

تكرار....


 0
تستيقظ من النوم فيقابلها وجهه الوسيم فلا تملك سوي تقبيله بنهم
وعندما يستيقظ ويجدها علي سجادة الصلاة تصلي الصبح يسألها " بتعملي إية ..؟"
- بابتسامة ...بصلي الصبح
- لية ...
- عشان أنا مسلمة 
- والمسلم لازم يصلي ....؟
- المسيحي  واليهودي كمان بيصلوا ...
يسكت قليلا ...ثم يستكمل تساؤلاته  إية الي ف إيدك ده ...؟
- دي اذكار...
- يعني إية ...؟
- ده كلام بقوله لــ ربنا  عشان ياخد باله مني 
- طب ما انا باخد بالي منك 
- لا بس ربنا بياخد باله مننا كلنا ...عشان كدة بنصلي  ونقوله أذكار
- يعني لازم أصلي وأقول أذكار لربنا ...لية ...؟
- عشان بنحب ربنا  لازم نعمل كدة ...وعشان ندخل الجنة ....
- هي الجنة دي حلوة ...؟
- حلوة جدا يا حبيبي ...... فيها كل حاجة انت بتحبها
- فيها شوكليت كيك ولبان فواولة @_@



 تجلس معه علي مائدة الافطار  وتبدأ بتناول الطعام وهي تطعمه بيدها 
- هو إية ده ...؟
- ده الفطار 
- هو يعني لازم  تفطري ...
- أه عشان اكون كبيرة
- بس انت كبيرة ...؟
- آه  بس عايزة اكبر كمان 
- اكبر كمان أد إية ...؟

2

تقف أمام المرآة لترتدي حجابها
- انت بتلبسي إية ...؟
- ده حجاب ...
- بتلبسيه ليه  ...؟
- عشان أنا مسلمة.....
- طيب انا كمان مسلم  مش بلبس حجاب لية ...؟
- حبيبي انت ولد ....الولد مش بيلبس حجاب 
- لية البنت بتلبس حجاب  والولد مش بيلبس حجاب .....؟؟؟؟ @_@ 

3 

- انت رايحة فين ...؟
- رايحة الكلية ...؟
- تعملي إية ...؟
- اتعلم  فيها ...
- هو انت لازم تتعلمي ...؟
- اه طبعا عشان العلم حاجة مهمة 
- طيب ولو خلصت الكلية   اتعلم اية تاني ....؟
- اتعلم حاجة متعلمتهاش  عشان اعرف حاجات جديدة ....
- طيب لو اتعلمت كل حاجة ف الكلية  يبقي كدة اتعلمت كل حاجة ...؟
- لا طبعا لان في حاجات كتير ف الدنيا بنتعلمها  مش بس ف الكلية ...
- طيب لو اتعلمت كل حاجة ف الدنيا  ومفضلش حاجة ف الدنيا اتعلمها ابقي كدة اية ....؟؟؟


كنت زمان دايما اسأل اسئلة غريبة محدش يقدر يجاوبني عليها
دلوقت لقيت اللي يفضل يزن عليا ف الاسئلة ومعرفش اجاوب عليه بنفس  طريقته...
كأن الزمن بيتكرر تاني ...
والاقي زياد ابن اختي بيعمل  نفس الي كنت بعمله :)
هو في حد ممكن يعرف يجاوب علي الاسئلة دي :(

هناك 12 تعليقًا:

  1. اسئلة الغيال الصغيره ده بتكون صعبه ورخمه في نفس الوقت امال الجنه ليه تحت اقدام الامهات
    تحياتي

    ردحذف
  2. عجبا لما نشعر ..عجبا لما نكتب ..عجبا لما نحس ..انكتب لكى نريح قلوبنا بالكلام ام لكى نترك قليلا الايام ونعيش فى دنيا الخيال .....جميل انى اكتب ..وجميل انى ارسم ابتسامتى على الورق....بس بجد الاجمل انك تلاقى الل يسمعك ويحس بيك ويبعتلك لينك ويقولك ..:يا واد يا خامد.....

    ردحذف
  3. ربنا يحفظه يارب ويجعله ذرية صالحة يارب
    كل الأطفال بتسأل الأسئلة اللي احنا نفسنا ما نقدرش نسألها ولا نعرف نرد عليها لأننا بنخاف لنوقع في المحظور رغم ان الفطرة هترجعنا للحقيقة بسرعة بس برضه بنخاف

    تحياتي

    ردحذف
  4. جميلة اووووووووووي ههههههه عقبالي يارب

    ردحذف
  5. ماشاء الله
    ربى يبارك فيه ويحفظه يارب
    وعقبال ما اشوفك كده وانت بتشدى فى شعر من اولادك :)
    رزقك الله حبيبة قلبى الزوج الصالح والذرية الصالحة يارب

    تحياتى بحجم السماء

    على الهامش / فى انتظار تعليقك على اعترافاتى فى سلما للسماء :)

    ردحذف
  6. طبعا الموضوع جميل جدا . طريقة السرد عجبتني ببساطتها . وخفة الدم الموجودة فيها . والفلسفة الكامنة بين طياتها . اما عن الأسئلة . فهي شيء أكيد وطبيعي وصحي . ولولا وجود تلك الأسئلة لم تكن للحياه طعم أو معنى .
    اما عن الاجابة والوصول الى نهاية ربما مسدودة . فطريقة الاجابة وتوالي الاسئلة تتغير وتتغير معها الاجابة .
    والاسئلة بكل تأكيد تستطيعي بطريقة ما أن تجاوبيها . هي موجودة لها الاجابة . سوى ان المشكلة تكمن في انه ما زال صغيرا ربما لا يستوعب الاجابة . وخصوصا ان هناك اشياء صعب ان نبسطها . هي بطبيعتها معقدة . ولكن تبقى هناك طريقة ما .

    تشكراتي . كامل احترامي وتقديري . دعواتي . تحياتي .

    ردحذف
  7. هههههههه
    ربنا يخليهولك يارب ويفضل يزن ويسال
    ده الطبيعى فى السن ده الاسئلة اللى ملهاش اجابة
    بس ممكن توصلى لاجابة بسيطة ترضيه او يقتنع بيها
    ربنا معاكى يا بنتى :)

    ردحذف
  8. طبعا فيه إجابه السؤال الاول يكفى انك تقوليله اى حاجه تطلبها فى الجنة بتجيلك

    أما إذا كلمك على الفطار ممكن تقوليله إنك تكبرى وتبقى زى مامته وممكن تحولى عليه الكلام يعنى تقوليله عضلاتك تبقى قويه

    أما سؤال الحاجب ليه البنت بتلبسه والولد لا ففمكن تقوليله لان ربنا أمرنا بكده لان شعر البنت طويل وممكن يبوظ لو ملبستش الحجاب والولد شعره قصير ولو قلك طيب ليه مبتقصروش قوليله علشان هى بنت


    سؤاله إنه لو اتعلم كل حاجه فى الدنيا هيتعلم ايه
    ممكن تقوليله إن العلم فى الدنيا مش بيخلص ومهما حاول يتعلم هلاقى الجديد وانه يبقى ذكى لو اتعلم حاجات أكتر من غيره

    طبعا دى اجابات عفويه جدا ولكنها ممكن تكون مرضيه للطفل

    ردحذف
  9. الاسئلة كتيرة من اولادنا وياريت لما نعرفهلهم يكون فى تفعيل للمعرفه
    كتير قوى معارف عرفناها وكتير قوى بعض ما نعرفه لا ننساه ولكن نتناساه
    طريقتك فى الحوار والسرد مدهشه وجذابه وكنت اتمنى الا ينتهى هذا الحوار وتنتقلى لغيره ونحن دائما فى الانتظار يا رحابنا الرحب
    الفاروق

    ردحذف
  10. ههههههههههههه حبيبي ربنا يخلهووولكم يا رب ويتربى بعزكم ...

    اسألتو عسل، وبيقولو الذكي هو اللي بيسأل كتيـــر

    استمتعت جداً هنا

    ردحذف
  11. هههههههههه رحاب من اعمالكم
    واااااه يا خوفى ده لو حد عمل فيا اللى كنت بعمله هتجنن بس هموت من الضحك

    جميله اوى الطفوله الذكية ومبحبش الطفل الهادى الساكت بحسه دمه تقيل

    جاوبى يا فالحة بقى :)


    دمت بخير

    ردحذف
  12. مش كل سؤال له جواب:)
    صباح الورد

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين