السبت، 5 يونيو، 2010

التاج السلطاني


مش عارفة لية حاسة اني مش هقول كلام حلو او مهم


اصل الحكاية صعبه بجد


ممكن الشخص يتكلم عن نفسه مع أصحابه أو ف وسط شلته لكن يكتب عن نفسه ...اممم صعبة الحكاية .......وبعدين انا بحب الغموض ...برج الاسد بقي


الأول اللي بعت لي التاج ده  بنوتة عراقية عسولة  هي قطرة وفا أو مدونة " قطرة من بحر الحياة "


المفروض هنا اني اتكلم عن ستة أسرار عني اللي يقابلني للمرة الأولي قد لا يكتشفها في


امممم سته أسرار فقط ...انا ممكن علي فكرة اتكلم عن اسرار اكتر


أولا


يشوفني أي رجل يقول بنوته رقيقة وهادية , وتشوفني أي بنت تقول لطيفة وعسولة


لكن يتفقوا علي اني ضعيفة لاني بتعب بسرعة اوووي وممكن اكون وسط الناس وبتكلم وبضحك وفجأة يلاقوني وقعت علي الارض أو دايخة ...وده نابع عن ضعف جسماني يعني باختصار كدة عندي نوع من ضعف المناعة بيخليني ضعيفة نسبيا ....وكدة اظهر ادامهم اني ضعيفة اوووي وطيووووووووووبة وساذجة


لكني مش ضعيفة ابدا ....بل العكس تماما


ثانيا


اللي ممكن يشوفني ويتكلم معايا للمرة الاولي يقول اني متحررة


يمكن عشان انا بحب اتكلم بصراحة ومش بخاف اتكلم ف شيء واكلم أي حد بس بحدودي وطريقتي انا ...عشان كدة في شباب كتير قالولي اني غريبة جدا


وبقول علي أي كلمة متعجبنيش انها مش عجباني ومش بحب الكلام الروش والا اللي بيقحم الانجليزي ف الكلام برغم اني احيانا بقول كلمة بالانجليزي بس يمكن عشان بتكون اوضح


ثالثا


الحب ...... في شيء غريب ف موضوع الحب


ممكن أي شاب يتخدع فيا ويقول اني سهلة جدا وساذجة وينضحك عليا بسهولة...بس ميعرفش الحقيقة اللي هتواجهه ...تقريبا كل اللي حبوني قالولي نفس الكلمة " انت صعب اوووي " لاني بتعامل بطريقة تانية ...بعطي اللي انا عايزة اعطية مش اللي انت عايزه مني بتعامل بطريقتي مش بطريقتك بمزاجي مش بمزاجك انت ...يعني تنبيه لأي حد عايز يستولي علي قلبي " خطر ...احذر ...اقترب بخطوات محسوبة " وبرضه مش هتنجح مية بالمية لو اتبعت أي طريقة من الطرق الرجولية المعروفة


رابعا


بيقولولي اني جميلة ...برغم اني مش شايفة ده ......ومش غرور ولا تواضع او ادعاء لكن " رحم الله امرؤ عرف قدر نفسه"....دايما الاقي ناس كتير تشبه عليا !! وطلعلي ولا اربعين مليون شبيهه وف كل محافظات مصر , يعني كل ما اروح مكان واقابل ناس تشوفني لأول مرة الاقيهم يبحلقوا فيا ويشبهوني بحد يعرفوه ووالله بكون ماشية ف الشارع والاقي اللي بيوقفني ويقولي " فلانة " آه ...آسف والله اصل انت تشبهيها اووي ...من بنات وشباب ورجال ونساء ...حتي صاحبيتي الاسكندرانية زوجة عمها الهولندية اول ما شافتني قالت بدهشة " كرستين " ودي تبقي صاحبيتها ف هولندا يعني برضه طلعلي شبيهه في هولندا...!! لاء والادهي كمان انهم بيشبهوني بالفنانة الرقيقة "مني ذكي " بس طبعا انا بقول " انا احلي طبعا " مش غرور بس هزار ...يعني كله بيكون حابب يشبه نفسه بفنان انا لاء خالص....لاني شبه نفسي وبس


رابعا


انا مدمنة .....آة مدمنة لحاجات غريبة مش هيلاحظها في أي شخص يقابلني للمرة الاولي


مدمنة للكتب اعشق الكتب واحب الاحتفاظ بها , مدمنة شراء المجات لاني احب اشرب شاي كتير وف مج كبير , مدمنة للنحافة ...برغم اني مش تخينة ولا حاجة بس بموت لو وزني زاد كيلو عشان كدة بلاحظ أي شيء اكله واحب اكون نحيفة ومتبعة حمية....مدمنة شراء ادوات ميك اب برغم اني مش بستعملها الا قليلا جدا ف خروجي , بصراحة انا ممكن اكون مسرفة بعض الشيء لكن في طبع حلو اوووي اني بعرف امشي حالي باي مبلغ واعيش اخر انبساط , يعني مدبرة برضه والفضل يعود لأمي وأبي لأنهم ربوني بجد علي الأفضل


خامسا


عمري ما كنت وحشة مع صحباتي بس منهم كتير فهمني غلط ودايما احب يكون لي صديقات كتير لكني كنت بفقدهم ولأسباب غريبة , بس كل صحباتي اللي خسرتهم خسرتهم بسبب انهم اتخطبوا والمثال جاي في السطر اللي بعد ده


عمري ما حسيت اني مغرورة بس اتقالتلي الكلمة دي كتيييييييييييييير جدا ومن مين بقي من خطاب صديقاتي ...كل واحدة من صديقاتي المخطوبات خطيبها بيعاكسني ولما اتعامل معاه بشكل يخليه ميعرفش يرد عليا يقولي " انت مغرورة " عشان متقبلتش كلامهم البايخ , حسيت اني لازم ابقي ادعي ربنا اني صحباتي ميتخطبوش عشان مخسرهمش برغم اني حابة يكون لهم دنيا وبيت وزوج صالح


سادسا


بحب اسمع لأصحابي اووي والحمد لله بيثقوا في جدا وتقريبا انا قريبة منهم جدا لاني بلاحظ انهم بيقولولي علي أي خبر يخصهم الاول قبل أي حد تاني من الجروب وعمري ما تعديت علي خصوصيات حد لاني مش بحب أي حد يتدخل في خصوصياتي يعني ماشية بمبدأ عامل الناس كما تحب ان يعاملوك به,احب التأمل واني الاحظ الحاجات والناس وانا معاهم وممكن اتكلم واكون انا ملكة المناقشة مع أي جروب واحيانا العكس , بتكلم بحرية وجريئة وخجولة جدا جدا جدا ....شخصية متناقضة اوووي ,بحب اعرف كل شيء عن أي شيء , مغامرة جدا جدا جدا ومش بخاف من أي شيء وحتي لو كنت خايفة بداري خوفي واقوي نفسي بنفسي عشان اتغلب علي خوفي حتي لو بقيت ف موقف صعب جدا , انا برج الاسد ...يعني رومانسية اوووي وبتحب تكون ملكة في وسط الناس بيقولوا برج الاسد بيميلوا للغرور وانا بقول اننا فينا من كل الصفات لكن بنسب مختلفة


عمر ما حد هيفهمني بسرعة ولا هيعرفني بسرعة , كتير من اصحابي شباب وبنات بيقولوا اني كتاب مفتوح لكن ميعرفوش انهم فتحوا الكتاب غلط ....


سابعا


انا قولت سابعا لاني بحب الارقام الفردية واكره الارقام الزوجية هههههههههه


شوفوا اللي عايز يعرف حاجة عني ما في مشكلة خالص خالص انا صريحة جدا واللي طلبوا انهم يشوفوا صورتي علي المدونة معلش مش هينفع لان اخويا قالي لاء


بس انا عادية جدا وصفي عادي اووي يعني اميل للقصر مش تخينة عيني ملونة علي رأي رانيا محسن وانا كنت حابة عيني تكون سودة بس هي عسلي وبتتغير تبع الشيء اللي ادامي يعني لو عيني في الشمس بتتلون لون وادام البحر لون تاني ويا سلام لو بعيط بقي او متغاظة وبتخانق بتقلب الوان ...مش بقولكم متناقضة حتي ف لون عيني وبحمد ربنا علي كل شيء فيا , وبموت ف الكتابة والقراءة وبكتب قصص قصيرة وحاليا بكتب رواية , انا صحفية منذ اكثر من خمس سنوات وكتبت في صحف معروفة ومشهورة جدا لكن صحفية متدربة مش صحفية ممارسة وادعولي انا وصحباتي ننهي فترة التدريب وندخل النقابة بقي ... وبتمني بجد اني اكون كاتبة وصحفية مشهورة زي ما بتمني لصديقات كتير ده , بهتم بصحة اصحابي واسرتي جدا علي عكس اهتمامي بصحتي
سألتني قطرة وفا عن رأي في .....
الزواج المبكر ....انا ضده جدا وارفضه تماما
الغرب .....اتطلع له واخذ فقط ما يناسبني منه وما يناسب ديني
عمل المرأة .....انا معه قلبا وقالبا ما دام لا يضر الاسرة والزوج
زواج المرأة ام اكمال دراستها.........اممممم مينفعش الاتنين ...؟ الاتنين مهمين جدا وياريت كل بنت تقدر توفق بينهم لانهم مهمين جدا ....بس الاغلبية مبيعرفوش يوفقوا بينهم
حاجتين بيزعجوني ولا يعرفهم احد عني ......اممممم صعبة اوووي بس ممكن اقول الكذب والنفاق
امران يريحانك ......امممممم...... رضي اهلي عني ....ووتقربي من الله
ثلاث اسرار اخري عني .......طبعا لاء لاني رغيت كتييير جدا


ياريت مكونش دوشت دماغكم .....


جينا بقي لإية للمدونات اللي بتلفت نظري ....في كتير جدا وبحب اتابع لكني مشغولة وبحاول اتابع لكننا مقسمين الوقت بينا انا واخواتي عشان هو كمبيوتر واحد بس ف البيت


لكن في مدونات كتيرة حلوةوفي حلوة بس بتخنق من البهرجة الكتير فيها بجد في مدونات بتعجبني وبحب اتابعها حتي لو مكتبتش تعليق فيها


عايزة اقول ان المدونة برغم انها بتنقل شخصية صاحبها لكن احيانا بتغلب الكتابة الكاتب يعني مش كل شخصية زي ما بتكتب , احيانا بيكونوا مختلفين تماما


عايزة التاج ده اهديه لمين


لمدونة دموع قد تكون حزن او فرح


لانها بجد مدونة تستحق المتابعة وكمان لاني معرفش أي شيء عن شخصية صاحبة المدونة برغم اني متشوقة جدا لاعرفها لان واضح جدا انها شخصية حبوبة اووووي ومرموقة وراقية جدا


كمان مدونة خواطر شابة


لانها من دولة اخري وانا بحب اعرف الاماكن الاخري والاتفاقات والاختلافات والحضارات


ومدونة بجد اعجبت بيها مش فاكرة اسمها بس هي مدونة دكتور عمرو فاروق


وفي اكيد غيرهم لكن لو كدة هقول كل المدونات ومنهم مدونات اصحابي لكني مش عايزة أنسي أي حد منهم عشان ميزعلوش


وبس كدة عشان انا اتكلمت كتير كدة يعني ............... كدة يعني

رحاب صالح

هناك 22 تعليقًا:

  1. والله يا رحاب التاج عندك حلو قوي انا بقي لبسته قبلك هههههههههه

    ردحذف
  2. كلها مواصفات تنبأ برئيسة تحرير جريدة جريئة و معارضه :)

    ربنا يوفقك

    ردحذف
  3. ايميل يجعلك من اصحاب الملايين

    بقلم الدكتور محسن الصفار

    جلس سعيد أمام جهاز الكمبيوتر اللذي اشتراه حديثا وتعرف للتو على عالم الانترنت الواسع , اخذ يقرا بريده الالكتروني وأخذ يتفحص الرسائل الواحدة تلو الأخرى حتى وصل إلى رسالة باللغة الانجليزية عنوانها (شخصي وسري للغاية) فتح سعيد الرسالة وقرأ نصها فكان مضمونه أن المرسل هو ابن لرئيس أفريقي سابق خلع من السلطة وأن والده أودع مبلغاً وقدره 100 مليون دولار في أحد البنوك وأن الأسرة لا تستطيع استخراج المبلغ إلا عن طريق حساب مصرفي لشخص ثالث ويعرض مرسل الرسالة على سعيد أن يعطيه 40% من المبلغ أي 40 مليون دولار فقط إن كان هو مستعداً لتقبل هذا المبلغ على حسابه الشخصي. لم يعر سعيد أهمية كبيرة للرسالة في باديء الأمر ولكن الفكرة في امتلاك 40 مليون دولار دون أي جهد بدأت تحلو له شيئاً فشيئاً واخذ الطمع يتغلغل في نفسه , أرسل سعيد رسالة رد إلى المرسل وسأله: - هل هنك من مخاطر في هذه العملية؟ جاء الرد بسرعة: - لا لا أبداً ليس هناك من مخاطر أبداً أبداً ولكنك يجب ان تحافظ على السرية الكاملة ضمانا لنجاح العملية . ردّ سعيد على الرسالة: - هل من مصاريف يجب أن أدفعها؟ جاءه الرد: - لا لا أبداً فنحن نتكفل بكل شيء أرجوك يا سيدي ساعدنا وستصبح أنت أيضاً من أصحاب الملايين. من أصحاب الملايين!! كم هي جميلة هذه الكلمة وأخذ سعيد يحلم بأنه يسكن قصراً ويركب أفخم السيارات ويمتلك طائرة خاصة وو...... وفجأة وجد سعيد نفسه وقد أرسل رسالة فيها رقم حسابه المصرفي واسم البنك، وبعد يومين جاءه بريد الكتروني مرفقة به رسالة عليها أختام حكومية تفيد بأن وزارة المالية في ذلك البلد الأفريقي لا تمانع من تحويل المبلغ إلى حساب سعيد.... باقى القصة و المزيد من مقالات الدكتور محسن الصفار الهادفة الخفيفة الظل موجودة بالرابط التالى

    www.ouregypt.us

    و لا يفوتك الذهاب لصفحة من الشرق و الغرب بنفس الرابط و فيها الكثير من المقالات الجيدة.

    ردحذف
  4. بقا كدة يا ريرى ؟
    تطلعى كريستين ؟
    ههههههههههههه
    مكنش العشم
    حلو التاج معاكى تفصيلى جدا
    وياستى واضح جدا ان روحك حلوة
    بجد يا رحاب بتمنالك تبقى احسن صحفيه فى احسن جريدة فى مصر

    تحياتى يا قمر

    ردحذف
  5. الله عليكي يارحاب
    بجد والله احنا عرفناكي كويس جدا
    اجابتك فعلا بتعبر عنك بكل بساطه
    ربنا يوفقك في حياتك
    ويبعد عنك كل شر
    تحياتي

    ردحذف
  6. أزال المؤلف هذا التعليق.

    ردحذف
  7. جميل اوووي الكلام ده....

    بشكر ال عملك التتاج... ودبسك.. هههههههههههه....

    ردحذف
  8. فكرة التاج تصل للغرض المقصود منها عندما يتكلم متلقي التاج بكل صدق وصراحة وهذا ما أحسسناه من كلامك
    اكيد تعرفنا عليك تصورنا شكلك اي اصبحت لكل من صورة ذهنية عنك ايضا تعرفنا على جوانب من نفسيتك ومن افكارك
    شكرا انني كنت من فكرت في اهدائم التاج هكذا في يوم واحد اكون قد تلقيته من شخصين انت وصاحبة مدونة جنة فشكرا لكما
    تحياتي وودي

    ردحذف
  9. هوبتي
    نورتيني وميرسي خالص

    ردحذف
  10. tears
    ربنا يخليك بجد علي زوقك بس مش اووي كدة يعني احنا لسة بالبداية ومتنسيش بجد نفسي تقولي حاجة عنك ده لو تسمحلنا طبعا

    ردحذف
  11. سهر
    ميرسي يا قمراية
    علي فكرة كنت بكلم احمد اخويا عن الكافية امبارح وقالي خليها بس تخلص بسرعة كدة وانا هكون زبون دائم عندها

    ردحذف
  12. beautiful mind
    ميرسي خالص خالص
    وبجد انا اللي مبسوطة بيكم برغم معرفتي البسيطة بيكم وبتمني انها تزيد علي مرور الوقت ان شاء الله

    ردحذف
  13. ابو علي ...سمع هوووص
    والله متابعة مدوناتكم كلها بس بجد عيني بتوجعني اووي اليومين دول مش عارفة لية وكمان قربت امتحاناتي ومشغولة اوووي
    ومن ناحية التج فهي كانت تدبيسة حلوة يمكن عشان خليتني افكر في حاجات كدة يعني

    ردحذف
  14. خواطر شابة
    الحمد لله اني صريحة معاكم ومع نفسي اوووي وبجد انت تستحقي ان الناس تعرفك وبجد بتمني اني اعرفك اكتر لاني لمست فيك حاجات مفتقداها
    بتمني تزيد الصداقة والصدق بينا دايما يا رب
    ومستنية التاج

    ردحذف
  15. عسوووووووله والله ياحوبه

    بجد أحلى حاجه فيكي إنك عفويه وتلقائيه في كلامك وتصرفاتك ...

    تعالوا إسألوني أنا عن حوبه حبيبتي
    إنتي الطيبه والرقه والطموح والعزيمه والإبداع وصاحبة صاحبك جدعه يعني وحاجات تانيه كتييييييير تخلي الواحد يتمسك بصداقتك وإخوتك ...
    :)
    ربنا يخليكي ليا ياصديقتي الصدوقه
    ... ;) ,,, ;) ...

    ردحذف
  16. تسلمي حبيبتي على الوصف يا رب اكون قدو :)


    تعرفي اني استمتعت اوووووي بقراءة الكلام اللي كتباه...بالاول افتكرت هتكتبي سطر او سطرين بس لاا...كفييتي و بجد بتفكريني بصاحبتين ليا برجهم الأسد :)

    شخصيتك حلوة بجد و عجبني كلامك و ثقتك بنفسك...خدي بالك من نفسك ربنا يحميييكي يااا رب

    و اكثر شي عجبني لما رفضتي توري صورتك لان اخوكي موافقش...احترمتك اكتر بجد :)

    يالله طولت بالكلام...بس بجد تسلميي على قبول التاج وعلى الكلام اللي كتبتيه

    سلاام :)

    ردحذف
  17. الله عليكى يا بنتى
    ما اروع التاج الواضح وضوح الشمس للقاصى و الدانى

    أحسنتى
    و ربنا يوفقك و تبقى حتى رئيسة مجلس إدارة النيويورك تايمز ... يمكن تكتبى عنا حاجة كويسة

    دمتى بألف خير

    ردحذف
  18. حلوة اوى اجاباتك على التاج

    ردحذف
  19. غادة
    حبيبتي انت كدة بتكسفيني بجد
    بس انا احمد ربنا اني بجد عرفتك وعرفت كتير من المدونين اللي حتي معرفهومش معرفة شخصية بس بجد لمست فيهم الصدق والثقافة والادب وهو ده معني الصداقة ..بتمني ربنا يقربنا من بعض اكتر واكتر وبدعي ربنا دايما للي اعرفهم واللي معرفهومش بان ربنا يهدينا للي فيه الخير دايما ويوفقنا اللهم آمييين

    ردحذف
  20. قطرة وفا
    ميرسي علي اية يا جميل انت بجد خليتيني افكر واطلع حاجات من جوايا والحمد لله اني بتكلم بصراحة وبتمني اني اكون وصلت لكم شيء جميل عني ...ربنا يكرمك يارب ويكرم ذوقك

    ردحذف
  21. الشاعر الفنان احمد فتحي فؤاد
    ازيك اخبارك اية
    ميرسي علي مرورك الجميل
    وبلاش رئيسة النيويورك تايمز خلينا ف حاجة متواضعة شوية
    وان شاء الله ربنا يكرمنا للخير جميعا
    شكرا لمرورك مرة تانية ونورتني

    ردحذف
  22. had-befham
    اهلا وسهلا ونورتني
    علي فكرة جميل انك عام الديك انا كمان نفس العام
    ان شاء الله لي زيارة حالا دلوقت لمدونتك وميرسي لمرورك الكريم

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين