لو الزمن يرجع

كتير ناس في حياتنا ميستحقوش أنهم يبقوا موجودين فيها 

ولو عاد بينا الزمن هنغير طريقنا عشان منتقابلش معاهم 

بنندم أو مش بنندم

لكن بيظل الألم موجود 

ألم الخذلان 

الدهشة 

والانكسار 

أنه ليه عملوا معانا كدة 

كنا طيبين معاهم لكن هنا كانوا قاسين غادرين 

ميستحقوش وجودنا معاهم 

ريان 🥹

أد اية الحياة مفاجأة 

وصعبة 

وقاسية 

والبني أدم بيروح ف ثانية ويبقي مش موجود ومجرد ذكري

شوية ذكريات وكلام ومواقف وصور 🥺🥹 بس كدة 

الحياة مش مستاهلة نسيب ذكري وحشة أو نزعل بعض  

مع السلامة يا ريان 🥹 هتوحشني اوي 

ربنا يعلم كنت بحبك اد اية واني مكنتش بعتبرك طالب عندي وخلاص 🥹🥹 الله يرحمك ويغفر لك ويسكنك فسيح جناتك ويصبر اهلك 

🥹🥹🥹

إنا لله وإنا إليه راجعون 

ابن مدرستنا ريان محسن الغباشي في ذمة الله إثر حادث سيارة 

اللهم اغفر له وارحمه واسكنه فسيح جناته ويربط على قلب والديه

27/7/2025

#للتوثيق🥹 حتي لا انسي 

مع السلامة يا مروة

امبارح اول ما فتحت الفيس لقيت صورة ف وشي لمروة جمعة وزوجها علي جروب القراءة مكتبة وهبان

مروة كاتبة ومدونة جميلة وزوجها كاتب وباحث 

فتيات أنهم هيعملو مناقشة كتاب مثلا 

متخيلتش أنه نعي ل مروة 🥹 

حادثة أدت لوفاة مروة 

وربنا يشفي زوجها واولادها 

حبيبتي يا مروة 🥹 

كانت صداقة من سنين حتي لو مش بنتكلم بسبب الانشغال 

لكن محدش ينكر لطف مروة 

ولا عمري شوفتها ف خناقة مثقفين ولا غيره

كانت زي النسمة 

حبيبتي يا مروة الله يرحمك ويغفر لك ويسكنك فسيح جناته 

ويصبر اهلك وزوجك وأولادك 

ادعو ل مروة 🥹 

هل تسامح من خذلك ؟

استغربت من نفسي اني قدرت لأكتر من اربع سنين اني أقاطع  بعض ممن كانو يوما ما اصدقائي 

استغربت اني فضلت مصممة ع رأي ومبدأي اني مش هكالمهم وإني لو شوفتهم ف مكان همشي منه عشان منتكلمش 

أن مهما حصل مش هسامح أو أضعف أو احن ليهم 

البداية كانت صعبة جدا 🥹 

بس كنت بقول لنفسي دائما أن الخيانة والخذلان من الاصدقاء مستحيل تتنسي 

الخذلان شئ صعب 

ف كنت لازم اضغط ع نفسي عشان افضل ع موقفي اني متكلمش معاهم تاني 

بس انا كنت زعلانة من تفسير اني تغيرت كدة واني بقيت شخصية جامدة بيتحكم فيها عقلها والغت عواطفها تماما 

اللي كانت السبب ف المشاكل 

انا حاليا حاسة اني شخص تاني واتعلمت من اخطائي 

من كام يوم في تدريب شغل شوفت شخصية كانت صديقة وزميلة شغل في يوم ما وعملت معايا موقف قذر بمعني الكلمة 

واتسببت لي في اذي نفسي كتير

وقتها انا عشان انجو بنفسي نقلت شغلي لمكان تاني 

وكنت كل ما بتتصادف طرقنا واشوفها اغير طريقي عشان مكلمهاش ولو اتقابلنا  فيس تو فيس كنت برفض اني اتكلم معاها

بعد اكتر من اربع سنين شوفتها تاني 

حاولت اهرب عشان مكلمهاش ونجحت فعلا 

بس قبل نهاية اليوم لقتها واقفة ورايا بتحضني من ضهري وبتقولي وحشتيني اووي اول ما شوفتك قلت لازم اسلم عليك

:( :( :( 

وقتها كلمتها عادي بس بدون مشاعر حرفيا بدون مشاعر ,

لما كنت بقرأ في رواية جملة انه الشخص اصبح بدون مشاعر مكنتش اعرف اني هجرب الاحساس ده

قالت لي جملتين لسة لغاية دلوقت بيترددو في ودني 

وقتها عرفت ان ربنا بيعوضنا بالخير مهما مرت الايام ومهما اتأخر رجوع حقنا 

دلوقت مش مستغربة نفسي بالعكس فخورة بنفسي اني قدرت انجو بنفسي من الاذي واني متسببتش في اذية اي حد اذاني  بالرغم من اني كنت اقدر جدا  اعمل كدة بس كنت مش عاوزة ابقي شخص متدني المشاعر 

لما روحت وقعدت مع نفسي حمدت ربنا كتير 

حمدت ربنا اني انسانة طبيعية من حقها تزعل وتاخد ع خاطرها ومن حقها انها متسامحش اللي اذاها مهما كان حتي لو مر الوقت والجرح طاب بس بتفضل علامة  تفكرك ان كان في حياتك شخص مؤذي  لازم يخرج منها