الأربعاء، 18 أغسطس 2010

رمضان ...أول مــــــــــرة



امتي عرفت رمضان ...؟ امتي حسيت بيه ...؟ امتي اول مرة صومت ...؟ اول مرة فطرت غصب عنك ...؟



اول مرة اعرف رمضان ...كنت مصممة اعرف مين رمضان ولية نصوم بالنهار مش بالليل ...؟ ولية يعني مش ناكل الا اما المغرب يأذن ....كنت فضولية لكل حاجة ومتعديش عليا حاجة كدة بالساهل لازم اعرف اصلها وفصلها


كنت عايشة مع جدتي لأبي ....زمان بعرف اني كتير عشت مع اقارب لي مش مع اهلي ...والسبب بكل بساطة اني كنت عجباهم اووي لدرجة ان كل واحد عايزني اعيش معاه ....


كنت عايشة مع جدتي ...كنت احبها اوووي ....كنت مصممة اني اصوم ...فاكرة ان الجو كان برد جدا ...فاكرة الكلب اللي لونة اصفر ....اللي كان بيحرس البيت ...الكلب ده ياما اكل السندوتشات اللي جدتي كانت تعطيهالي وانا رايحة المدرسة وتقولي " انت لسة صغيرة مينفعش تصومي ...وانا كنت اصمم واقولها لاء هصوم ...وهي تضغط علي وتحوطلي السندوتشات ف الشنطة " وطبعا انا كنت بعطيها للكلب ده ......اللي الحرامية قتلته ....هو ينفع اني اقول الله يرحمه ...بجد مش عارفة اذا كان ينفع والا لاء


اول مرة احس برمضان ...وانا ف بيتنا وسط اهلي .......المسحراتي لما يجي يصحي الناس بالطبلة ...مش فاكرة اسمة كان اية ....توضيب الفطور ...الفانوس اللي عمتو جابته لي ...واحد لي وواحد لاحمد وواحد لعبير ......الهيصة واللمة وحالو يا حالو بعد الفطار ف الشارع والفوانيس منورة .......زينة رمضان اللي كنا نعلقها ف الشارع ......والورق الملون والفوانيس الكبيرة


فاكرة لما صممت وانا ف ثالثة ابتدائي لما حبينا نسلي صيمنا بعد المدرسة ونخللي اليوم يعدي بسرعة عشان منحسش بالجوع ....كان نفسي اشوف ابو قردان ف الاراضي اللي علي البحر ....روحت مع اصحابي من غير ما اقول لأي حد م البيت ...وكاااانت مشكلة فضلوا يدوروا عليا بابا عمل مشكلة ف المدرسة " يعني ازاي بنتي تكون ف المدرسة ومترجعش البيت ......والبيت اصلا ميبعدش عن المدرسة عشرة متر ...البنت رااااحت فييييين " ماكنش باقي غير انهم يمشوا كدة بمايك ويقولوا بنت تايهة يا ولاد الحلال قصيرة ورفيعة وعينيها واسعه وشعرها احمر .....هههههههه ...لما رجعت البيت قلت لهم اني كنت بلعب مع اصحابي طبعا مش قولت اني كنت رايحة اشوف ابو قردان....المهم انها عدت علي خير .....ههههه بجد لسة فاكرة اليوم ده اصلي كمان شوفت عصافير كتيرة وحاجات عمري ما شوفتها ...بابا كان صعب اووي انه يخليني نروح عند اي حد خروجنا قليل جدااااا


فاكرة ..اول مرة قريت ف المصحف ...وان كل كلمة مش فاهماها اقول لأختي الكبيرة تقولي اية معناها ...وتشرحلي وطبعا اصحابي خلصوا وختموا القرآن وانا لسة ف الجزء الاول ....مكنتش اعرف اقرا وبس لازم افهم ...محبش اجري وخلاص علي اي كلام ...ما بالك بكلام ربنا ....


فاكرة ف اولي اعداي اول مرة نبعد عن بيتنا ف مدرسةبعيييدة شوية .......كنا نفضل نتمشي ساعتين تلاتة عشان نعدي اليوم ...فاكرة اني رجلي اتكسرت ف السنة دي واني فطرت ايام كتيرة ف رمضان ده ومعرفتش كام يوم لاني كنت باخد مسكنات كتيرة وادوية كتيرة وكان الدكتور بيقنعني اني كدة صايمة لان دي ادوية .... بعدها صومت ايام كتيرة وكل ما اصوم ايام غير الفروض ادعي ان اكون قضيت الايام دي لاني بجد مش كنت فاكرة كام يوم ......


فاكرة من سبع سنين فاتوا ...ان تعبت ف يوم سبعة وعشرين رمضان تحديدا اليوم ده ...الدكتور قال اشتباه ف الزايدة واني لازم اخد الادوية دي وقالي متصوميش ....بس علي ميييين ...قالي ان الحقن دي مش بتفطر ....بس علي مييييين .......كنت تعبانة جدا وقاومت وكل اللي ف البيت يتحايلوا علي اني اخد الابرة دي وانا مستحيل افطر...كنت تعبانة كتير وقاومت وقاومت وقاومت ...ولغاية قبل الفطار بنص ساعة بس ....حصل اللي كنت متوقعاه طبعا ....حالة قيء شديد ....قالولي اني كدة فطرت والمفروض اني اخد الابرة بس انا برضه قلت لالالالاء


وبرغم الاختلاف ف نقطة اني كدة مع القيء فطرت او لاء بس انا برضه اعدت صيام اليوم ده ....


لية بفتكر زمااان ومش بفتكر دلوقت ...؟ لية دايما نقول زماان احسن من دلوقت .....لية ..؟


يمكن زماان كان الناس بيهتموا بالاجتماعيات اكتر ....يمكن عشان الطبيعة والبساطة اللي ف كل شيء من بداية المسحراتي والفانوس العادي ...مش دلوقتي نصحي علي رنات الموبايل وفانوس هيفاء وهبي ونانسي وكرومبو


يمكن عشان حتي زينة رمضان بقي فيها تكلف ونوع من الاستعلاء بين الناس وبعضها حتي ف زينة رمضان ....يمكن عشان احنا كبيرنا والزمن اتغير ....يمكن ...بس نفسي ف يوم من ايام زمان ...بنوتة صغيرة ...وبتلعب حالو يا حالو بفانوس جميل بينور مش بيغني ....بتعلق زينة ملونة ع البيت مش نور بيزغلل العين ويعميها .... يمكن الحاجة الوحيدة الباقية من رمضان زمان ودلوقت هي صلالالالاة التراويح وصلاة الفجر ف الجامع ...بكل متعتها وخشوعها ...ضحكنا ولمتنا ....بنلم بعض واحنا رايحين نصلي وبرضه نرجع تاني بلمتنا ...هي هي نفس اللمة بتاعة صلاة العيد وبوسات وحضونات مع اننا كنا مع بعض لسة ف صلاة الفجر .....وعيدية ...وخروج ع البحر ....وزيارات ....وفسح ...احنا اكبرنا اووي .. ....


بس لسة بنحن لأيـــــــــــام زمـــــــــــــــــــــان


رحــــــــــــــاب صــــــالح

هناك 33 تعليقًا:

  1. فعلا طعم الاشياء تغير وافضل احساس هو احساس الطفوله والصبا .. تغير طعم رمضان والاعياد وكل المناسبات .. زمان وانا صغير كان نفسي ابقي كبير ولما كبرت قولت ياريتني فضلت صغير ...

    ردحذف
  2. السلام عليكم
    رحاب ازيك كل سنه وانتى طيبه
    رجعتينا للزمن الجميل
    اللى عمره ما هيرجع تانى بس ممكن نعيده تانى فى اولادنا مع اللى يفهمونا من اصحابنا من اخوتنا بجد بس احنا كبرنا قوى قوى وممكن نكون الوحيدين اللى بنفكر التفكير ده
    مش عارف ليه كأننا بنعوم ضد التيار
    اقولك على حاجه الذكريات الجميله دى ليه ريحه حلوه بنفتكرها بريحتها بنغمتها
    بطعم اكلها
    بالابتسامه اللى كنا بنشوفنا فى عيون اصحابنا
    بقولك ايه ده عاوز كلام كتير لو كتبنا مهما كتبنا مش هنعرف نوصف واتذكر اننا كنا بنتلم على ليالى الحلميه وكنا نغنى اغنيتها
    والمال والبنون وكمان ذئاب الجبل
    وكمان كنت بانزل قبل الفطار بنص ساعه اجيب عرسوس وعصير قصب علشان كنت باحبه قوى وارجع على الاذان والناس يدونى بلح وعجوة
    ذكريات جميله
    رحاب
    كنت اتمنى الاسهاب فيها
    كل سنه وانتى طيبه
    ياريت تكبرى الخط شويه
    النظر ضعف
    ههههههههههههه

    ردحذف
  3. تعيشى وتفتكري...يرحم زمان وليالى زمان

    ردحذف
  4. عيشتينا معاك في ذكريات جميلة
    بس سؤال دائما محيرني معرفش ليه دائما احنا بنحن لايام زمان اللي يمن وقت ماكنا عايشنها مكناش راضيين عنها والايام دلوقت اللي مش عاجبانا برضه بعد كام سنة بنرجع نحن ليها احنا ليه مش قادرين نستمتع بحاضرنا ليه?
    دمت بكل الود عزيزتي

    ردحذف
  5. كل سنة و انت و العائلة الكريمة بخير

    على فكرة كلنا و احنا صغيرين عندنا تساؤلات كتير

    و كلنا برضه وقعنا قلب أهلينا بعد المدرسة (:(:

    دة تقريبا عنصر مشترك فى كل الأطفال فى اى مكان و زمان

    الذكريات ما أجملها بتدينا أحاسيس جميلة و بتفكرنا بأوقات أجمل

    صحيح انا مش مسلم بس رمضان ليه ذكريات جميلة جدا معايا

    بس يمكن دلوقت مش زى زمان بس على ما أظن لأن الناس اتغيرت مش رمضان

    موضوع جمييييل (:
    ربنا معاكى و يوفقك دايما

    ردحذف
  6. كل سنه وانتى طيبه ياقمر

    ويارب رمضان كريم عليكى وعلينا كلنا

    دمتى بخير
    زهراء

    ردحذف
  7. تعرفي انا كمان بقالي سنين مش حسيت برمضااااااااااااااااااااان
    بس السنه دي مختلف شويه يكمن لان المره دي انا مسؤله عن بيت وحياة وبعزم والكلام دا ؟!

    ردحذف
  8. كل سنة و إنتى طيبة و بصحة و خير

    تعرفى إنك لما تسافرى بره مصر ... تلاقى إن رمضان مختلف بره مصر ... و لازينة و لا إحتفال و لا أولاد تغنى فى الشوارع و لا سهر مع أصحاب أو عائلة لحد السحور ... و لا تعرفى إن رمضان جه غير من ليلة الرؤيا و الصوم ... و محاولتك متابعة تلفزيون مصر كل ما تقدرى ...
    غير كده يجيلك الزهايمر و تنسى كل حاجه

    ربنا يعينا

    كل سنة و إنتى طيبة ... تانى و تالت

    دمتى بخير

    ردحذف
  9. مبارك عليك الشهر

    وكل عام وانتم بخير :)

    ردحذف
  10. تعيشى وتفتكرى احلى ايام يارب

    ذكرياتك جميلة اوى ع فكرة

    ادامها ربى عليكى نعمة تحلى بيها

    الايام اللى مش حلوة :)

    كل سنة وانتى طيب وبخير دايما حبيبتى

    ردحذف
  11. ذكريات جميلة استمتعت بها كثيرا..

    سعيد أني كنت هنا..

    دمت بود وسعادة..

    ردحذف
  12. السلام عليكم ورحمة الله زكريات كل رمضان بيسيب ذكرى جميله كل عام وانتى بخير رمضان كريم

    ردحذف
  13. لاول وهلة قريت فيها عنوان المدونة جات على بالي اغنية اصالة:
    (حياتي اجمل ما فيها اني بعيش..
    من غير ما افكر في حاجة ما تهمنيش"

    ولما قريت البوست لقيتني اتخطفت على اجمل احساس..
    زمااااان وذكريات الزمان..!!
    انت عملتي من ذكرياتك في رمضان شريط زمني راااائع وخلتينا نشوف ذكرياتك وانت بتكبري وبتتغيري من مرحلة للتانية
    والزمان بيتغير بيكِ ...و...معاكِ..!!

    وشوية شوية..
    لقيتني في نهاية البوست باغني مع صوت الملائكة:
    "ضحكات الصبيان..
    وليالي زمان..
    ردت لي كتبي ومدرستي والعمر اللي كان
    وينساني الزمان..
    على سطح الجيران"

    ردحذف
  14. كل سنة وكل رمضان وانت بكل الخير والسعادة :)

    ردحذف
  15. غير معرف
    احساس الطفولة عمره ما يتعوض لانه احساس بريء حقيقي مفيهوش اي شبهه من تفكير او كره ...هنفضل نحن له بكل براءته وحتي لما نكبر نلاقينا بنقول ذكرياتنا دي لاولدنا ..بس ياريتنا برضه نعمل حاضر حلةو عشان نفتكره

    ردحذف
  16. محمود
    كل سنة وانت طيب ورمضان كريم
    الزمن الجميل ده هو زمنا والزمن اللي هنعيشه برضه مع ولادنا ...وكل وقت نعمل فيه خير هنلاقيه حلو برضه ...بس نعيش صح وعمرنا ما هننسي ذكريتنا بادا لانها محفورة جوانا
    كلامك انت بجد اللي خلانا افكر ف حاجات مكتبتهاش لانها خاصة اووي

    ردحذف
  17. محمود
    حاضر من عيوني الاتنين معلش الخط بجد كنت مستعجلة شوية ...حاضر المرة الجاية اوعدك مش هنسي واكبره شوية
    سلامة نظرك

    ردحذف
  18. Tarkieb
    ههههه
    اعيش وافتكر ...هو انا اصلا كنت نسيت
    كل يوم بيعدي علينا حلو ومر بنفتكره وبنقول ياااه كان زمااان حلو اوووي ويارب يحللي ايامنا كلنا ...رمضان كريم

    ردحذف
  19. خواطر شابة
    نفس السؤل بيلح عليا ويمكن علينا كلنا ...لية زمااان نحن ليه ومش لدلوقت ...برغم اني زماان كنت افضل اقول نفسي اكبر ..وكنت دايما اكبر سني ..ونفسي ف حاجات كتيرة ولما وصلت للمرحلة دي رجعت اقول يا ريتني كنت فضلت صغيرة ...دايما نحن للماضي لانه راح ...مش هنقدر نرجعه تاني ..لكن الزمن الحاضر والمستقبل ممكن نقدر نغيره ...الاهم نحاول نخليه احسن ويارب يكتب لنا الخير جميعا ...دمت بخير ووحشتني بجد

    ردحذف
  20. رامي
    والله بجد انا اول مرة اعرف موضوع انك مش مسلم دي ...وعادي جدا انا لي اصحاب بعزهم واحبهم جدا ومش مسلمين ...الاهم التعامل الحسن
    طبعا كلنا وقعنا قلب اهالينا واحنا صغيرين بس احنا كنا بنات مشاء الله علينا عساسيل ويتخاف عليهم ...وبابا كان مفضل اننا منخرجش ابدا الا للمدرسة اللي هي اصلا جنب البيت يعني انا بعدي الجنينة بتاعتنا الاقينا عند حوش المدرسة ..يعني اتوه ازاي ..اكيد اتخطفت ...وكنت بقي امورة وعسولة كدة مش زي دلوقت شعنونة وغلباوية ..يعني زمان بجد حلو اووي وبرضه دلوقت حلو اووي بناسه واهله واصحابه وبرغم كل مشكلاته

    ردحذف
  21. اميرات الاسرار
    رمضان كريم يا جميلات
    ويارب دايما بخير

    ردحذف
  22. هوبتي
    اهلا وسهلا ورمضان كريم
    تعرفي ان رمضان كل سنة وكل وقت تلاقيه متغير ..الحمد لله ربنا يكرمنا فيه ويعفو عنا ويرحمنا

    ردحذف
  23. الشاعر الفنان أحمد فتحى فؤاد
    اجمل حاجة ف مصر حبها للفرحة
    تلاقيها دايما تحب الفرح ومش تحب الحزن تحب تحتفل بكل شيء وعمرك ما تلاقي حد بيحتفل زي مصر باي شكل او باي شيء ...ياااة بجد وكل مكان وكل بلد وكل محافظة او مدينة وحتي كل قرية وحي تلاقي ليهم نظام وطقوس ياااة بجد تحفة رروعة ...رمضان بجد بيقرب الناس من بعضها وبيتهيء لي اي مكان تاني غير مصر مش هنحس فيه بطعم رمضان ولا العيد ولا اي فرحة برغم كل المساويء والمشكلات
    دمت بخير ورمضان كريم وحمدالله بالسلامة

    ردحذف
  24. اقصوصة
    اهلا وسهلا ونورتيني
    رمضان كريم وكل عام وانت بخير

    ردحذف
  25. мαησηα
    رمضان كرييييييييييييييم
    ويارب دايما بخير
    كل واحد فينا عنده ذكريات حلوة وبرضه وحشة بس احنا بنحب نفتكر الحلو ودايما رمضان ذكرياته حلوة
    دمت بخير

    ردحذف
  26. خالد ابجيك
    نورتني
    ودمت بود وسعادة وشكرا لمروك واتمني مرورك مرة تانية ولا تنقطع زيارتك

    ردحذف
  27. الحنين
    اهلا وسهلا شرف لي مرورك الجميل
    رمضان كريم ويارب بكل خير دايما

    ردحذف
  28. Timo
    يا هلا يا هلا
    وانا لأول وهلة شفت الاسم تبادر لذهني اغنية راائعة لمطربة اسمها جينا ..بس بجد بموت ف الاغنية دي...ميرسي علي مرورك وميرسي علي زوقك وكلامك الحلو كتير ....ويارب اكون فعلا كنت خفيفة وقدرت اني اقول كلام حلو يدخل القلوب
    شكرا لمرورك ويارب متنقطع عن الزيارة

    ردحذف
  29. أزال المؤلف هذا التعليق.

    ردحذف
  30. فكرتنى ذكرياتك بذكرياتى كانت ايام ياريتها تعود
    كل سنه وانتى طيبه
    رمضان كريم

    ردحذف
  31. رمضان دلوقتى مش زى زمان
    بصى اغنية رمضان جانا تحديدا بتفكرنى بكل ذكرياتى الحلوة مع شهر رمضان وببكى كل مرة بسمعها
    انا صومت اول مرة وانا فى رابعة ابتدائى وكنت طفسة شوية يعنى قبل الاذان بساعة واكل اى حاجة تقابلنى ولو حتى عيش
    لكن اول مرة صومت الشهر كله كنت فى خامسة ابتدائى ومن ساعتها والحمد لله بصوم على طول
    رمضان كريم
    وزيارتك لمدونتى اسعدتنى جدا ومدونتك بجد رائعة
    كل سنة وانتى طيبة
    وسامحينى على الرغى الكتير

    ردحذف
  32. عمرو يسري
    اهلا وسهلا
    نورتني
    ورمضان كريم

    ردحذف
  33. noha saleh
    اهلا وسهلا
    رمضان كريييييم
    طبعا كلنا ذكرياتنا بتكون مليانة حاجات مستخبية بس ذكريات الطفولة دي هي الشيء البريء واللي حتي كانت اخطأنا فيه مش اخطاء مقابل دلوقت
    نورتيني

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين