الاثنين، 20 سبتمبر 2010

واجـــــــــــب تدويــــــــــــــــــــــــني

الواجب ده من  الاخ العزيز عمرو يسري صاحب مدونة فضفضة
وعايزة اشكره جدا لأنه فكر فيا واني  اكون عند حسن ظنه.....
انك تخليني اتكلم عن الكتب عشقي وعشقي وعشقي......
عايزة اقولكم اني زمااان مش كنت بلعب مع بنات اعمامي بسبب اني كنت بفضل ماسكة القصة لغاية ما اخلصها وهما بيلعبوا وبعدها اكتشف انهم خلاص هيروحوا وانا ملعبتش حاجة ......لغاية دلوقت بفكر اني معرفش العاب كتير من العاب الطفولة بسبب حبي للقراية .....ده برغم اني كنت مجنونة وحابة الغنا والتمثيل وماكنش في بالي اني اكون صحفية خااالص .....خالص
بلاش دوشة بقي ونحل الواجب
ما هي كتب الطفولة التي بقيت عالقة في ذاكرتك ......
يااااااة كتير طبعا ...لكن تبقي سيندريلا وسنو هوايت وعلاء الدين وقصص الف ليلة وليلة للأطفال ......يعني بمعني اصح كل الخيال وكل الاشياء الغريبة والخيالية اللي تخللي الطفل يفكر ويفضل يقول انا عايز انا كمان اقوم بالمغامرات دي ... وده كان في الابتدائية برغم اني في نهاية الابتدائية ككل مواليد سنة الثمانينات عشقوا ادهم صبري ونور الدين محمود يعني رويات مصرية للجيب بكل اصداراتها ......وكنت متعلقة بكل الابطال بشكل مستحييل وصفه ...
من أهم الكتاب الذين قرأت لهم ........؟
ياااااة كتير جدا ....الحمد لله تقريبا مش كنت بسيب كتاب في مكتبة المدرسة الا اما اقراه لدرجة اني كان امين المكتبة كان بيشك في اني مش بقرأ الكتب دي وسألني مرة بيحكي اية الكتاب ده ....لاقاني حافظة الكتاب ......من احسان عبد القدوس ليوسف السباعي للدكتور مصطفي محمو لانيس منصور .......ده في بداية الاعدادي ....وكرهت ساعتها نجيب محفوظ لسبب يمكن مش غريب علي حد ...استاذي قالي انه ملحد وكافر ....!! لما سألته هو اخد جايزة نوبل لية ...؟ بعديها حبيته لاني قرأت له ...
في الوقت ده كنت اقرأ كل شيء واي شيء يقع تحت ايدي ...قرأت كتب مترجمة كتيييييرة جدا ولكتاب عرب ومصرين وانجليز وفرنسين وروسين وقرأت مسرح برغم اني مش بحبه ...يعني تقريبا كدة مش هقول اني مسبتش حد الا وقرأت له لكن يعني تقريبا الاغلبية قرأت لها ....
من هم الكتاب الذين قررت الاتقرأ لهم ....؟
حاليا ....مفيش لاني بحب اقرا كل شيء ومش بحكم علي الكتب من اول كتاب ...لكن زمااان ....كرهت اجاثا كريستي جدا ....برغم انها روووعة جدا ...بس اتضح لي ان المشكلة في الترجمة مش في الكاتبة ....يعني كانت ترجمة القصة وحشة بشكل خلاني اكره اجاثا كريستي الرائعة ....لكني بعدها قرات لها ومازلت اعشقها ...
في صحراء قاحلة اي الكتب تحملها معك...؟
طبعا بعد القرأن الكريم , اخد اي كتب صدرت مؤخرا ولم اقرئها بعد ...واكيد حاجة لعبد الوهاب مطاوع وكمان احمد بهجت واحمد رجب واحمد خالد توفيق
ما هو الكاتب الذي لم تقرأ له من قبل وتتمني قراءة كتبه....؟
اكيد عبد الوهاب المسيري لاني مش بلاقي كتبه الا في القاهرة ....وحتي اول مرة واخر مرة اشوف كتاب له كان بالصدفة وساعتها مكانش معايا فلوس كفاية لاني كنت اشتريت كتب كتيرة ومقدرتش ارجع اي منها , وغير المسيري اكيد المخزنجي ....وناس تانية كتير من العرب اللي مش بقرأ ليهم الا في مجلات عربية زي مثلا انيسة عبود وليلي العثمان ...وغيرهم ...القائمة تطووووووووووول
ما هي قائمة كتبك المفضلة ....؟
يا خبر ......معرفش اقول ...لاني بحب كتب كتيرة جدا جدا جدا , انا دودة كتب ولو معايا ملايين الجنيهات اخلصها بثواني في شرا الكتب والكتب والكتب
اللي بعت الدعوة....
العزيز ...عمرو يــــــــــــــــسري صاحب مدونة فضفضة
ارسل الدعوة لآخرون ....
اكيـــــــــــــــد للعزيزة تيرز صاحبة مدونة دموع قد تكون حزن أو فرح
لحبيبة قلبي .....غادة محسن صاحبة مدونة بستان افكاري ...
للغالية عليا ...فاتيما ..صاحبة مدونة روح قلب ماما .....

ملحــــــــــــــــــــــــــــــــوظـــــــــــــــــــة
بجد كنت اتمني اني اقرأ كتب دينية اكتر لكني للأسف بلاقيها عايزة شرح او اي حد يفسرلي الكلام ....الله يرحمك يا شعراوي ...

استمتعت اوووي لاني بحب الكلام عن الكتب ...وعايزة اقولكم ان ماما متخانقة معايا اليوم بسبب انها مش لاقية مكان في غرفتي تحط فيه رجلها بسبب اتلال الكتب والمجلات ...
دمتم بود وخير وحب وسعادة ....
حـــــــــــــوبــــــــة

هناك 30 تعليقًا:

  1. البوست جميل بس اجمل ما فيه

    اننا اطمنا عليكي يا رحاب


    دمتى بخير

    ردحذف
  2. السلام عليكم
    ده بقه اللى اسمه ثقافه فعلا

    قصص وروايات
    وكتب
    وفكر

    بس فى واحد مش بحبه من اللى قريته احسان عبد القدوس مش بحبه بصراحه
    يارب يبارك ليكى يارب
    كتب دينيه
    بصراحه اقولك على حاجه
    محدش يعرف يقرأها
    الا المتعود عليها مثلا ازهرى واتعود على الكلام وتفسيراتها
    او
    تربى على يد خطيب كده فى المسجد
    او اجتهد
    وتعب فى القرأه الكتب دى
    يارب يبارك فيكى يارب
    ويجازيكى خير
    يارب
    تعالى زورينى
    فى
    باحث عن حب
    سلام

    ردحذف
  3. سعيدة بالتعرف على مكتبتك انا ايضا مثلك كنت وانا أضع عشرة خطوط على كلمة كنت كنت دودة للكتب قبل ان يجرفني تيار الحياة
    الان عندي شوق للقراءة لاحلام مستغانمي تعجبني المقتطفات التي اقراها لها في المدونات
    تحياتي وودي لك عزيزتي

    ردحذف
  4. شكرا لتلبيه الدعوه
    وحمد الله على السلامه
    بوست جميل
    الواحد يتضائل جنبك بعد البوست ده
    بس بصراحه استاذك اللى قال على نجيب محفوظ انه كافر وملحد مستفز معلش اصلى مابحبش اللى يقعد يكفر الناس حتى ولو كان السبب قصه اولاد حارتنا ومافيها معلش اصلى بحب القصه ديه جدا رغم مافيها بس ماتقوليش لاستاذك ليكفرنى ههههههه
    تحياتى

    ردحذف
  5. الطفولة

    الشيىء المشترك بين كل اللى بيحبوا القراية

    حبهم للقراية من الطفولة

    يعنى أتزرع جوا منهم الحب دة لغاية ما بقى أدمان (:

    تعرفى انى حبيت ملف المستقبل

    لحد ما أتمنيت دة يكون حقيقى

    أتمنيت ان نكون بالعظمة دى فى يوم

    طفل بقى (:

    بالنسبة للترجمة كرهتنى فى كتب كتير

    و ندمت انى اشتريت من مكتبة الأسرة مجموعة قصص مترجمة لسوء الترجمة

    تااااج هايل (:

    احيييك بشدة واشد علي يديكِ مصافحة

    (:

    نفس الجملة فاكرة (:

    ربنا يوفقك

    ردحذف
  6. البوست حلو اوى اول مرة ازور مدونتك وان شاء الله مش الاخيرة مدونتك حلوة تقبلى مرورى ..........منه

    ردحذف
  7. كل الحاجت اللى انتى قرأتيها دى انا بعتبرها ثروة ماتتقدرش بفلوس
    ماشاء الله كتب كلها هايلة

    ردحذف
  8. ازيك رحاب اخبارك اية

    واسف على تاخيرى فى الحضور هنا لانى كنت غايب الفترة اللى فاتت عن التدوين


    القراية جميلة بتخدك عالم تانى واكيد طبعا عالم مفيد
    وكمان اللى عايز يكتب لازم يكون قارىء

    ربنا يوفقك ويكرمك

    مع خالص تحياتى

    ردحذف
  9. ياسلااااااااام عليكي ياحوبه الجميله

    بجد ماشاء الله عليكي
    يمكن تكوني إتحرمتي شوي من متعة الطفوله في اللعب والكلام ده
    بس إعرفي إنك عوضتي نفسك بكنز من المعرفه راح يفيدك دايما لأيامك دلوقتي وأيامك إللي جايه ...

    إٍتمتعت كتير بقراءة البوست الثري ..
    وبشكرك على التدبيسسه إحم إحم قصدي على التاج هههههههههههههه

    ربنا يخليكي ليا ياااااارب
    ^_^

    ردحذف
  10. حاضر يا رحاب بس اسمحيلى احله فى التعليقات هنا

    ما هي كتب الطفولة التي بقيت عالقة في ذاكرتك؟

    قصص الف ليلة و ليلة...المكتبة الخضراء



    مَنْ أهم الكتاب الذين قرأتَ لهم ؟
    د.طارق حجى
    د.علاء الاسوانى
    د.خالد منتصر



    من هم الكتاب الذين قررت ألا تقرأ لهم مجددا؟
    كل الارهابيين مدعي فضيلة اللى عاملين نفسهم اوصياء على المجتمع



    في صحراء قاحلة ، أي الكتب تحمل معك؟

    كتب فى الصحرا!.....انا مش بستحمل الحر و الشمس دقيقتين على بعض و لونى بيحمر فاكيد مش ح يكون فيه عينيين اقرأ كتب



    ما هو الكاتب الذي لم تقرأ له أبدا ، وتتمنى قراءة كتبه ؟

    صراحة النت مش مخلى فى نفسي حاجة ابدا



    ما هى قائمة كتبك المفضلة؟

    قرات اغلب قصص شارلز ديكنز و شكسبير و فيكتور هوجو و بحب
    القصص الخيالية و عندى كتاب اسمه السحر و السحرة هايل


    ما هي الكتب التي تقرؤها الآن ؟

    كتاب فى الطبيخ عشان لو جالى مزاج او فرصة اطبخ فى يوم من الايام :)

    ردحذف
  11. اجابات جميلة .... ومجموعة مفيدة من الكتب والكتاب ... وكما يقولون ... القارئ لا يهزم .


    تحياتي لك في مرور اول

    ردحذف
  12. مستنى رأيك
    فى البوست
    ده
    bahesanhob.blogspot.com

    ردحذف
  13. ازيك يارحاب وازي اخبارك وكل سنة وانتي طيبة
    وجميل البوست واسلوبك فيه
    تحياتي

    ردحذف
  14. tears
    الحمد لله انا بخير واحسن من الاول
    دمت بود وخير دوما

    ردحذف
  15. محمود
    مش اووي يعني انا لسة لغاية دلوقتي حاسة اني برضصه اقل ناس قريت ليهم ولسة ناس كتير بتمني اقراء ليهم ...
    بالعكس احيان عبد القدوس رائع فعلا انا قراءت تقريبا كل رواياته وكتبه وكتب اتكلمت عنه وكتب كانت معاه وضده ...هو فعلا كاتب متميز

    ردحذف
  16. خواطر شابة
    تقريبا احنا كلنا قراءات الطفولة متشابهه ...الي حد ما
    احلام مستغاني برغم ما قاله عنها يوسف القعيد وقت ازمة مصر والجزائر وبغض النظر ان كان ماقلته قالته فعلا ام مجرد شو اعلامي ...الا انها كاتبة متميزة رائعة انا ان شاء الله لابد ان اقراء لها كل مجموعاتها ..ولو كان بيدي كنت ارسلت لك نسخة ولكن كيف..؟

    ردحذف
  17. عمري يسري
    اشكرك كثيرا للدعوة الجميلة
    لالالالا ناس كتير كانت فاكرة نجيب محفوظ ومازلت فاكراه ملحد وكافر ....لكن لية كدة لية منشوفش الاول وبعدين نحكم بنفسنا مش بحكم الناس وخلاص
    وانت لا تتضائل ولا شيء بالعكس احنا كلنا بنكمل بعض

    ردحذف
  18. رامي
    عزيزي...بجد انا كنت مجنونة بادهم ونور وفاكرة انه حقيقي وكنت بكلم المؤسسة مليون مرة عشان اعرف الاصدار الجيد امتي وكنت بسيب للدكتور نبيل فاروق رسايل علي الانسرماشين تهبل وتجنن من كترها ....فاتورة تليفون البيت كانت بتجي مولعة ...
    بالنسبة للترجمة دي مصيبة بجد ممكن تكرهك في الكتاب برغم انه جميل ...انا كنت بدرس السنة اللي فاتت مادة محتاجة لكتاب نظرية صدام الحضارات لصامويل هنتنجتون ولما بسأل اخويا قالي لو تعرفي تقرية بالانجليزي ماشي لكن ترجمته زفت الزفت ونصيحة بلاش احسن لانك مش هتفهمي حاجة ....وصحيح انا لسة محتفظة بكتب مكتبة الاسرة المترجمة لكن في هناك ترجمات ارقي واحسن مليون مرة لانها في مكتبة الاسرة مختصرة بشكل بشع ....بجد بتمني لو معايا فلوس كتير اشتري بيها كلها الكتب الي عايزاها...هههه اشد علي يدك واحييك بشدة صديقي العزيز

    ردحذف
  19. عاشقة وبدوب في حبيبي
    نورتيني وشرفتيني
    وان شاء الله متنقطعش الزيارة وانا اكيد هزور مدونتك

    ردحذف
  20. نهي صالح
    القراءة في حد ذاتها كنز ومش هتحسي بيه الا مع مرور الوقت
    دمت بخير وحب دوما

    ردحذف
  21. تامر نبيل
    اهلا وسهلا بيك ونورتني بجد واسعدني كلامك
    انا والله بجد مش بدخل مدونات عشان تبادل الزيارة ...انا بيعجبني الكلام بدخل اقرا واعلق عليه
    اسعدني حضورك وتشريفك

    ردحذف
  22. غييييييييودة حبيبتي
    وحشاني يا بنوتة
    اعمل اية بقي مجنونة قراية بجد نسيت كل العاب الطفولة زي ما انت عارفة
    متنسيش الواجب يا ماما ...اشوفك علي خير الاسبوع الجاي ان شاء الله

    ردحذف
  23. تيرز
    ولا يهمك
    تقريبا احنا كلنا قراءات الطفولة واحدة , انا كمان حبيت علاء الاسواني جداوطبعا بموت في ديكنز وهوجو وغيرهم من الكتاب الرائعين الانجليز
    ميرسي علي ردك يا جميل ودمت بخير دوما

    ردحذف
  24. اندروميدا
    والله شفت الاسم عند فاتيما ولفت نظري وقلت هدخل المدونة دي
    بس انت طلعت اشطر مني وسبقتيني
    ميرسي جدا علي مرورك الجميل وكلامك الاجمل

    ردحذف
  25. محمود
    انا شفته خلاص ميرسي للتنبيه
    وعايزة اقولك ان الكتب الدينية دي مشكلة كبيرة ومالهاش حل يعني والا اية ...؟ يا ريت فعلا حد يكتب كتب دينية بمستوي جدير باننا نقراها ونحبها مش نكرهها بالشكل ده لانها معقدة

    ردحذف
  26. فكرة من الزمن ده
    وانت طيبة وبالف خير وصحة وسعادة
    ميرسي يا جميل
    ومنوراني بحضورك

    ردحذف
  27. محمود
    اه صحيح انا لاحظت ده
    بس مدونتك فيها حاجات كتيرة انا مش اعرفها لاني مش بحدث مدونتي ..انا بختار قالب بسيط وبس
    انت ممكن تشوف الاعدادات وتحاول تظبطها هي اكيد في حاجة غلط في الاعدادات

    ردحذف
  28. رحاب

    بوست جميل

    القراءة تشكل فكر و هوية الإنسان منذ بداياته فى مرحلة الطفولة

    دمتى مثقفة متألقة

    ردحذف
  29. الشاعر الفنان احمد فتحي فؤاد
    شكرا لمرورك
    القراءة كنز بيزيد ما بينقصش ابدا والحمد لله اننا عارفين قيمة الكنز
    ده وبنزودة علي طول

    ردحذف
  30. انا قريبا
    فى خلال شهر

    هكون خلصت 7 الاف كتاب
    خلصتهم
    وبدات فى ابتدائى

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين