الثلاثاء، 4 يناير 2011

مش مجرد حكاية....


ترددت كثيرا قبل ان اكتب.....
فأنا أعرف أن الجميع قد كتب...
وقد أكون أنا الاخيرة .....
ترددت ....فماذا أكتب.....
هل أكتب مجرد حكايات أعرفها وقد عايشت بعضها....
ام احكي عن رامي ذلك الشاب المدون الذي تعرفت عليه منذ شهور قليلة.....اللي حسيت انه مسيحي بس مسألتوش لغاية اول رمضان كان بيهنيني برمضان ويقولي انه مسيحي...
احكي عن ناظر مدرسة عرفته منذ سنوات وتوثقت علاقتي به الي الان وكل عام يقضي عدة ايام في مصيف بلطيم ويكون منها يوم او اثنان  في بيتنا مدعوا علي الغداء مع ابي واخي ...... واجلس معه طوال الوقت بدون اي حساسية
أم احكي عن خالي  الذي كان يريد أن يؤجر قطعة أرض بجوار أرضه لزراعتها بالفاكهه والخضر  وكان صاحبها مسيحي وبعد أن اتفق مع خالي علي ايجار الارض في سنين محددة بسعر معين جاء اخر مسلم وعرض سعر اعلي علي صاحب الارض المسيحي ....
ولكنه قال لخالي لقد اتفقت معك قبله وقد ارتحت لك عنه .......واحببتك .....وكانت الارض من نصيب خالي....دي اسميها اية ...؟
عن زميلي ف الجامعة مينا......اللي دايما بقابله ف امتحاناتنا بس ....وبرغم ذلك يسأل عني اي حد من زمايلنا ويعرف اخباري.....
أحكي عن إية .....عن الدكتورة نوفرت دكتورة الاسنان اللي كنت بروحلها وانا صغيرة انا واخواتي  وكنت ومازلت برغم اني مشوفتهاش من عشر سنين  انها في نظري اجمل  امرأة رأيتها في حياتي ...... ومش شكل وبس ومش ك طبيبة  وبس ومش كمعاملة وبس.....احكي عن تلك المدرسة التي قابلتها في عيادة الطبيب اخر مرة منذ اسبوعين  وكنا نتحدث الي ان يأتي دورنا ف الكشف  وقلت لها انا اتصلت بعيادة الدكتور عهدي وكنت هروحله بس لقيته في اسكندرية ومش جاي الا بعد يومين تلاتة عشان كدة جيت للدكتور محمد وانا مش بحب اجي للدكتور محمد عشان عيادتة زحمة دايما..... انت لية مروحتش للدكتور عهدي ؟عشان مسيحي .....؟
قالت لاء والله  بالعكس ده انسان محترم جدا بس المشكلة اني كنت مدرسة ابنه وهو يعرفني جدا  وصديق زوجي  كمان ولكن مش بيرضي ياخد فلوس الكشف خالص خالص .....عشان كدة مش بروحله عشان الاحراج بس
احكي عن اختي اللي كانت ف مدرسة بنات فقط فيها مدرسين وبنات مسيحين مفيش فرق بينهم ف اللبس ولا الشكل ولا التعامل....
انا كان معايا ف مدرستي بنات مسيحين ......فيهم  حسن التعامل....وفيهم ايضا سوءه مثلهم مثل المسلمين.....فيهم فتاه قطعت المصحف وداست فوقه بالحذاء ....واخري كانت في منتهي الطيبة والهدوء تتعامل معنا بكل ود وحب واحترام واستنكرت فعل صديقتها
احكي عن فريد اللي جاره المسيحي قدم شكوي ضده عشان صوت القرآن ف المحل عنده.... وعامله ازعاج... بدال ما المسيحي يكلمه بالراحة قدم شكوي فيه علي طول  ولما سألوا اصحاب المحال المجاورة من مسيحين ومسلمين قالوا ان الصوت كان عادي ومش مزعج.........ده يبقي اسمه اية.....؟
احكي عن شخص اعرفه سمي بنته " مارية" قالوله ده اسم مسيحي ...قالهم ده اسم زوجة الرسول...ثم مفيش اسم مسلم واسم مسيحي في اسم حلو واسم وحش......
احكي عن اية والا اية.....
مش حكايات وبس ولا مجرد كلام .....
لاء ...كل مسلم زي كل مسيحي فيه الخير وفيه الشر ...فيه حسن المعاملة وفيه ايضا سوءها....فنحن سواء ....نحن بني آدم.....
احنا مصريين .....ولا يوم عمري سألت شخص انت مسلم والا مسيحي ....
ولا عمري فرقت بينهم ....انا بتعامل مع كل الناس بالحسني ....وعايزاهم يعاملوني بنفس الطريقة .....مش ممكن اني اروح اتبرع بدمي واقول ادوه لمسلم مش لمسيحي ....ولا اروح لملجيء او جمعية خيرية واقول نفس الكلام.....
احنا ف وطن واحد وبلد واحدة ولينا مشاكل واحدة  ولينا هموم واحدة ولينا احلام واحدة وعندنا عدو واحد.....والا عايزين نبقي لبنان والشيشان  والعراق ....نتشتت  ونقتل بعض وعدونا يفرح فينا....؟
لازم نعرف عدونا الاساسي ......
كلنا مصرين بنحب ام كلثوم وبنحب فيروز  وصباح ووديع الصافي, بنحب أسامة منير وادوارد سعيد وادوارد الخراط ويونان لبيب رزق وكنا ومازلنا معجبين بالكابتن هاني رمزي والفنان هاني رمزي ويمكن الكثيرين ميعرفوش انهم مسيحين .........
وبعدين احنا جيل واعي ومثقف ومتعلم في اغلبه وليس جميعه طبعا فلماذا نفكر بسلبية وبشكل غبي ....؟
حسنا. ايها المعارضون المشاكسون من الجانبين  الرافعين للصليب والمصحف  متحينين الفرصة للقتال ...ما رأيكم لو بدلنا الاماكن  ...فالمسلم ماذا لو كان هو المسيحي ....؟ والمسيحي ماذا لو كان هو المسلم....؟
تخيلوا هذا الوضع .....ثم اجيبوا بأنفسكم......
نـــحــــن شعب مصر ...مـــصريين
دعونا  نكون يدا واحدة ضد الارهاب .....
يدا واحدة فقط
يــــــــد مصريـــــــة

رحــــــــــــــاب صــــالح

هناك 44 تعليقًا:

  1. اختي الطيبة الفاضلة
    كلامك جميل ومحايد
    التفرقة في الاديان والمذاهب
    دي جديدة علينا
    فهناك علي الجانبين متشددون
    وهناك ايضا معتدلون
    ولكننا في النهاية مصريون
    اشكرك علي الكلام المحايدا لواقعي
    تحيتي لكي اختي الفاضلة

    ردحذف
  2. أزيك
    كل سنة و انت طيبة (:

    الناس عارفة كل دة على فكرة

    بس منهم لله بقى اللى قلوبهم مفهاش محبة لحد

    ردحذف
  3. المشكله مش فينا

    كمصريين

    ولا فينا

    كمسلمين ومسحيين

    المشكله يا فندم

    فى ارهاب الدول العظمى

    اللى بالمخابرات مبهدله الدنيا

    ومحتله البلاد

    فده فعل

    بيتطلب رد فعل من الحكومات

    لما الحكومات مبتعملش حاااجه


    بيقوم افراد برد فعل


    ورد الفعل الفردى بقى

    من سفهاء وناس سواء مسلمين او مسحيسن او كانت ايه ديانتهم

    بتبقى غلط

    الحل الجذرى مش احاربهم

    ولا امسكهم وافهمهم بس
    دا حل مؤقت

    لكن هيكلع غيرهم


    الحل اننا ننشر فكره التسامح الدينى ونشر الدين الصح

    الاسلامى والمسيحى

    ومش نخليه مركون على الجنب

    وبس الدين فى اذاعه القرءان الكريم

    او داخل المساجد والكنائس


    والحل التانى

    نبنى بلدنا

    علشان نقاوم امريكا واسرائيل

    ونتحد

    سوا


    علشان نحمى بلدنا من الارهاااب

    ونحمى العالم بالاسلام

    ردحذف
  4. اللي فكر يقتل مفيش في قلبه محبه ومش مشكلته مسيحيين ان شايف ان النيه حاجه تانيه النيه هو وجود اصلا مشكله ما بين المسلمين والمسيحين وزي ما انت قلتي بالظبط هما حوالينا في حياتنا واحنا حواليهم وعايشين عادي طول عمرنا ما حسينش ان في مشكله ايه الجديد ليه القصه ده اتفتحت اليومين دول شويه العمرانيه وشويه اسكندريه في ايد بتلعب في الموضوع عشان تكبره وتعمل فعلا مشكله من مفيش
    تقبلي تحياتي

    ردحذف
  5. هذا قليل ما حدثتنا عنه
    وهم فعلا ناس طيبون جدا
    ولا اخفي عليك عندما احب ان ازوغ من العمل تغطى علي زميلتي مسيحيه
    وتشيل العمل بدالى
    ولا نعرف شيء اسمه مسلم ومسيحي عندنا فى سيناء حتى الان .
    بل هم اطيب منا فى المعامله الشخصية
    وشكرا لك لطرح هذا الموضوع لقد عبرتي عن ما نريد ان نعبر عنه

    تحياتي الخالصه

    ردحذف
  6. السلام عليكم ورحمة الله

    الاخت الفاضلة بارك الله فيك وفى مشاعرك الطيبة

    مش مهم انت تكتبى امتى المهم تكتبى ايه

    لم نعد نملك كلمات كلنا ولا نملك مداد للاقلام
    لكن اصبحنا نحمل قلوب تنزف ومشاعر اليمة واحاسيس مرتعشة مترقبة للاتى

    الكل يعلم المخطط القذر وراء هذا
    والتاريخ يعيد نفسه
    لكن يأبى الله الا ان يتم نوره ولو كره الكافرون

    مصر ربى تكفل بحمايتها و فى القرآن بلد الامان ولن تكون ابدا سوى مقبرة للطامعين فيها دائما

    لك تحياتى وتقديرى

    ردحذف
  7. ياريت يا رحاب نكون ايد واحده عشان نهزم المتطرفين لما يلاقوا مفيش حاجه بتفرقنا و تهز علاقتنا ببعض
    يارب الناس الجاهله عينة مبروحلوش عشان مسيحي مبزوروش عشان مسيحي مبساعدوش عشان مسيحي يفوقوا بقى و يعرفوا دينهم صح قبل ما يلغوا عقلهم و مشاعرهم

    ردحذف
  8. السلام عليكم
    صحفيتنا المجتهدة
    كلامك صح طول عمرنا فى دراسة او عمل او حياة او حتى واحنا بنلعب او حتى واحنا فى الشارع مبنعرفش الفرق ومبنسألش عشان معندناش فرق اصلنا شعب واحد بدم واحد بس تقولى ايه للى عايزين يقولوا ان بلدنا فيها فتنة ويتدخلوا فيها بأى شكل وخلاص
    كلنا ساعة اللعب واحد وساعة الجد واحد ابدا ما كانش فى فرق
    اللى يفهم الاسلام صح يعرف ان حق غير المسلم عليه انه يحميه لأنه ذمى والنبى يقول من أذى ذميا فقد أذانى
    لهم علينا حق البر والعدل والمساواة بنص كتاب الله (أن تبروهم وتقسطوا اليهم )
    اقول اية شكرا على مقالك وياريت اللى عاوزين يولعوها يهدوا شوية
    تقبلى مرورى

    ردحذف
  9. فعلا .. هتقولي وهنقول ايه بس

    دي بعض من امثلة كتيرة جدا احنا عايشينها ف حياتنا مع مسيحين

    عمو بتاع النظارات مسيحي في عيد الفطر لازم يعدي على العمارة شقه شقه ويهني الكل بالعيد

    فيه مسلمين كتير اوي مش بيعملوها

    وغيره وغيره

    ...!

    حسبنا اللـه ونعم الوكيـل

    //

    ردحذف
  10. رحاب عندي سؤال لاحظت انك خليتي الصوره اللي فرأس الصفحه في المنتصف ممكن أعرف عملتي كده ازاي؟
    معلش عندي تأخر تكنولوجي:(
    ممكن تردي عندك أو عندي
    شكراً يا جميل

    ردحذف
  11. دى مش حكايات يا رحاب

    دى مصر اللى نعرفها حياتنا اليوميه

    الغريب هو اللى بقينا فيه

    يارب زيح الغمه يا قادر يا كريم

    ردحذف
  12. عرضتى امثلة لاصحابنا وجيرانا من اخونا المسيحيين واظهرتى مدى المحبة بيننا وبينهم
    ندعو الله ان ترجع هذة الروح مرة اخرى وتعم المودة والمحبة مرة اخرى
    تحياتى لكى حبيبتى

    ردحذف
  13. جميله جدااااا ...بسيطه و رائعه و حقيقيه....

    موضوع لن امل منه ....

    تحياتى

    ردحذف
  14. يا رحاب احنا مش محتاجين نقول اننا واحد و عايشين مع بعض طول الوقت انما محتاجين نقول ان النظام فاسد و ح يقضى علينا كلنا

    ردحذف
  15. اختي الفاضلة
    اعتقد ان اخواننا المسيحيين مش محتاجين امثلة علشان يعرفوا ازاي احنا بنقدرهم ونحترمهم
    بالعكس هم عاشرونا وعاشوا معانا وعارفين كل الكلام ده
    اعتقد جاري المسيحي اللي دايما بيزورنا وبنهاديه في اعياده وبيهادينا في اعيادنا مش مطالب اقوله اني باحترمك وباقدرك وباراعي شعورك هو اكيد عارف ده كويس
    المتعصبين اللي من الجانبين دول قلة مايتخاطوش 10% بس المشكلة ان صوتهم عالي
    لكن الناس البسيطة الطيبة من غير ما يقولوا فاهمين ده كويس اوي
    شكرا اختي

    ردحذف
  16. الأخت الفاضلة
    هذه هى مشاعرك ومشاعر جميع المصريين مسلمين ومسيحيين...
    ورغم كل المحاولات الفاشلة بإذن الله لإفساد هذه العلاقة ..سوف تستمر وتقوى.

    أحييك لطرحك المتميز ومشاعرك النبيلة
    بارك الله فيك وأعزك

    ردحذف
  17. سواح في ملك الله-
    اخي الفاضل
    اثرت فعلا ان احكي قصصا واقعية ليست جميعها توضح التشدد والاعتدال
    لأننا بني ادمين وفينا الخير والشر والحب والكره ....
    ولا يوجد دين انزله الله يجز ما قد حدث
    شكرا اخي الفاضل ودمت بخير

    ردحذف
  18. Ramy
    فاهمة والله يا رامي
    وان شاء الله الامور تتحسن وتبقي احسن لينا كلنا
    ان شاء الله
    وكل سنة وانت بألف خير

    ردحذف
  19. رحاب :
    انتِ ما قلتيش حكايات ، انتِ قلتي واقع اسمه مصر
    واتكلمتِ عن أشخاص اسمهم مصريين
    ربنا يزيح الغمة دي على خير
    وربنا يستر على تلك الدولة

    ردحذف
  20. عصفور السطح
    ياااااااة عاش من شافك من زمان كتير مشوفتكش بتعلق عندي
    كل سنة وانت طيب الاول
    كلامك معلهش اعتراض مني والله وعلي عيني وعلي راسي
    وبتمني فعلا الحلين اللي انت قلتهم
    بس ياريت يتحققوا فعلا

    ردحذف
  21. eng_semsem
    ابو ملك
    القتل هو القتل
    واللي يفكر يقتل يبقي مش انسان مهما كان
    القتل جريمة بشعة بكل المقاييس
    واذا كنا احنا بنستنكر الجريمة البشعة دي فما بالك بمن يفعلها
    احنا طول عمرنا عايشين معاهم وهما معانا علي الحلوة والمرة
    ومش جديد ان يكون في ايد عدو بتكبر الموضوع عشان نبقي ف حرب داخلية بينا وبين بعض ونضيع وطنا ....
    يارب احمينا كلنا

    ردحذف
  22. ابو فارس
    هو قليل فعلا وعندي حكايات اكثر بكثير ولكني اثرت ان اكتب قليلا وعن مسلم ومسيحي ف كل حالتهم الانسانية
    لاننا بني ادمين وكلنا بنعمل الصح والغلط
    مش هنفرق بين مسلم ومسيحي ف ده
    واحنا عايشين مع بعض من زمان علي الخير والشر

    ردحذف
  23. أم هريرة (lolocat)
    اختي الفاضلة
    شكرا لك ولكلماتك الطيبة
    ونورتي المدونة

    ردحذف
  24. شيرين سامي
    وانا قلت كل واحد فينا يحط نفسه مكان التاني
    اعتقد ف الحالة دي الجهلة والمعارضون هيعرفوا ان ربنا عادل وحق
    ولا يظلم احد
    دمت بخير عزيزتي

    ردحذف
  25. مدونة رحلة حياه
    والله انا بقول لو اتبعنا سنة رسولنا الكريم عمر ما في حد من المعارضين هيفتح بقه بكلمه
    لان الرسول عمره ما اذي شخص اي كان حتي جارة اليهودي الذي كان يأذيه
    هو احنا احسن من رسولنا عليه افضل الصلاة والتسليم......؟
    ياريت فعلا الجاهلين دول يفهم الكلام ده
    ويبطلوا يولعوها
    شكرا علي مجاملتك واتمني لك كل الخير

    ردحذف
  26. تخاريف مترجــِــمة
    اهلا وسهلا بيك
    ونورتيني
    والله احنا فينا الخير باق والناس الطيبين كتير
    مسلمين ومسيحين
    بس ف قلة قليلة تريد ان تزرع الحقد بيننا
    حسبنا الله ونعم الوكيل فيهم

    ردحذف
  27. شيرين سامي
    ولا يهمك يا حبيبتي احنا لبعض كلنا ولو في حد مش عارف شيء بيسأل غيره
    انا رديت عليك وكتبت لك عندك
    واي شيء اسألي ولا يهمك
    احنا لبعض

    ردحذف
  28. richardCatheart
    ازيك الاول ويا تري اسكندرية عاملة اية بعد الحادث.....؟
    ربنا معاكم كلكم
    وربنا يزيح عنا كلنا

    ردحذف
  29. هبة فاروق
    هي دي مصر وهي دي عيشتنا من اول ما وعينا ع الدنيا
    كلنا انسان وكلنا فينا الخير والشر
    وكلنابنحب نعيش وعايزين نعيش
    ودي مش مجرد حكايات
    دي حياتنا اليومية
    يارب يهدينا جميعا لما فيه الخير

    ردحذف
  30. د/دودى
    ديـــــــنا
    ونحن لن نمل من ان نقول اننا اخوة
    واننا مصريين
    دمت بخير عزيزتي

    ردحذف
  31. Tears
    عزيزتي
    اصبت بالطبع فيما قلت
    ولكننا لابد ان يكون لنا دور في هذا
    ولنا ان نخرج انفسنا بأنفسنا من هذا الفساد

    ردحذف
  32. IMSA
    اســــــلام
    ازيك عامل اية....؟
    ربنا يستر فعلا يا اسلام
    والله انا بقيت خايفة اووي علينا
    علي مـــــــــصـــــر
    والمـــصــــــرييين

    ردحذف
  33. مصطفى سيف
    اخي الفاضل
    اصبت في ما قلت
    فالتعامل الحسن وحده يكفي
    فما فائدة ان اقول لك احبك وانا افعل معك العكس....
    طول عمرنا عايشين مع بعض بكل الخير وكل المشاكل الحياتية ....
    اصبت في قولك انهم قلة صوتهم عالي
    والصوت العالي للأسف له شوشرة قوية...
    اتمني ان نتخطي تلك المحنة جميعا علي خير

    ردحذف
  34. محمد الجرايحى
    استاذي الفاضل
    جميعنا نكتب مشاعرنا
    ونكتب ما يحدث بحياتنا
    وجميعنا محب للغير
    ولكنهم قلة يريدون زرع الحقد بيننا
    ف النهاية كلنا مصريين

    ردحذف
  35. ومازال الزمن يشهد على حكايات اخرى قد تروى فيما بعد
    تسلم الايادى

    ردحذف
  36. السلام عليكم

    أختي رحاب.. جميلة كلماتك الخارجة بعفوية وصدق..

    كما قال معظم المعلقين: كلنا يعرف هذه الحقائق.. لأن كلنا يعيش هذه الأمثلة يوميا..

    دمتِ صحفية همامة.. مع تحياتي.
    -----------------
    على فكرة دوري جاي أنا كمان في السرد :)

    ردحذف
  37. عمرو يسرى
    ازيك يا عمرو عامل اية...؟
    الزمن يشهد صحيح ومهما حصل هنفضل مصريين كلنا زي بعض مفيش فروق بينا
    ربنا يخليك علي زوقك

    ردحذف
  38. ماجد القاضي
    فعلا يا استاذ ماجد كلنا بنتكلم لاننا كلنا عايشين نفس الحكاية
    وتسلم علي كلامك الرقيق اللي زييك دايما
    مستنين دورك

    ردحذف
  39. الفاضلة رحاب صالح
    الاختلاف طبيعة البشر , والمهم ان نعرف كيف نتعايش مع هذا الاختلاف حسب نوعه ,
    كنت اريد ان اعرف النقاط التي لست منصفا فيها لعلي ارجع عنها ان كنت محقة ,الوسطية والتشدد مسائل نسبية حسب زاوية الرؤية لذا فانا لم افهم مقصدك , شرفنا بزيارتك ونرحب بافكارك فانا اؤمن ان تحديد نقاط الاختلاف هو بداية التوافق ان صلحت النوايا .

    ردحذف
  40. واحد من الناس
    هحاول بقدر الامكان اني ادخل المدونة تاني واقولك انا قصدت اية
    شكرا لوجودك هنا

    ردحذف
  41. الأخت الفاضلة رحاب صالح
    اسمحي لي أن أشرد قليلاً عن موضوعك ، ذلك أنني شردت بعيداً في ذكرياتي حينما قرأت " بلطيم " على رأس مدونتك ، فلا أعرف سر انجذابي لتلك البقعة من مصر دون غيرها من الأماكن التي ارتحلت إليها و سكنتها مع أهلي بحكم وظيفة أبي يرحمه الله ، و على الرغم أنني تركتها و أنا بالصف الثالث الابتدائي ، إلا أن خيوط الحنين لا زالت تجذبني إلي هناك و قد جاوزت الأربعين بثلاث سنوات ، لا زلت أحن إلى مدرستي أبو بكر الصديق و ما كان بها من ملاعب و حدائق و مسرح مدرسي ، مازلت أحن إلى شقتنا في عمارة الحاج محمد خشبة و لا زلت أذكر فيلا جارتنا الست الناظرة أبلة سميرة ، لا زلت أذكر مدرساتي : أبلة فاتن حمامو و أبلة أمينة رزق. ما زلت أذكر كل شبر فيها ، أعلم أنها تغيرت لكن أبقاها الحنين داخلي كما هي " بلطيم البلد" بلطيم الجميلة

    ردحذف
  42. محمد محمود عمارة
    اهلا وسهلا
    هي دي بلطيم اللي يجيها يوم مش ممكن ينساها ابدا
    اكيد هي اتغيرت بس علي فكرة المدرسة لسة موجودة يمكن لسة الناس دي موجودة
    والبلد بقت احلي
    بس تصدق اني كمان بحن لبلطيم زمان ...
    مش عارفة يمكن بطبعي بحب القديم
    عموما منورني وشكرا لكلامك الجميل
    ويارب تنورني دايما

    ردحذف
  43. تسلم ايدك يارحاب

    غطيتي اركان كتير

    والاخوة برضوا في تعليقاتهم

    هي دي مصر فهلا

    ربنا يحميكم

    ردحذف
  44. شمس النهار
    منوراني
    احنا حاولنا علي قدر المستطاع
    واحنا جيل الحمد لله واعي ومثقف
    ودامت مصر لينا جميعا بكل الخير والحب والامان

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين