الجمعة، 27 مايو، 2011

إنتماء .....وسياسة......وثورة




إن أكثر جملة يكرهها الاشخاص الان هي " انت معندكش انتماء للبلد "  هذا عندما يتجادلوا في شيء  ويختلفا .....
ولكن هل سأل أحدكم ماذا يعني الانتماء للوطن...؟
ماذا يعني الحب للوطن....؟
وهل حقا تحب وطنك الذي لم يعطيك أي شيء سوي الامراض والقهر  والذل والسجن والسحل  ف الشوارع .....؟
دعونا نبتعد عن كلام الاغاني  " ومقولش اية اديتنا مصر وقول هندي اية لمصر"  بلاش كلام شعارات ....خلونا واقعيين .....
ماذا يعني الانتماء ....؟
جلست بجوار رجل عجوز وكنت أقرأ الجريدة ....وتبادلنا الحديث ووجدته يقول لي بعد حوار قصير إن الشباب برضه معذور  وبلاش حكاية معندوش انتماء دي  هو هيبقي عنده انتماء ازاي وبلده اصلا مش بتسأل فيه  انت عارفة كان في شاب أجنبي اتهم في قضية مخدرات في بلد  عربي  وتمت محاكمته وسجنه ف هذا البلد وقامت حكومته بكل ما اوتيت من قوة  لنقله لبلده وقضاء عقوبه السجن هناك الا ان الدولة العربية قالت ان هذا مخالف لقوانينها  فما كان من الدولة الاجنبية الا ان وفرت لمواطنها الشاب كافة سبل الراحة وقامت جامعته بارسال كافة المواد التعليمية له بالسجن حتي يستذكر دروسه ولا يمر عليه العام الدراسي مرور الكرام
وفي مقابلة للشاب مع  وفد من دولته سأله رئيس الوفد " اتريد شيء من بلدك ...؟
فما كان من الشاب الذي لمس اهتمام دولته به الا ان قال " أنا روحي لبلدي "
ونظر لي الشيخ وقال " شايفة الفرق ...؟ بينهم وبينا ,,,, شايفة الفرق بين الاهتمام وبين اللي بيسيبوهم يموتوا علي شواطيء ايطاليا  وتركيا وغيره وبين الاهتمام بمواطن متهم بقضية مخدرات ....؟ وبعد كدة تقولوا انتماء....؟؟؟!!!!"
لا أعرف اذا كانت الحكاية حقيقية ام لا ...ولكني سمعت وقرأت عشرات القصص بهذا المعني  وساعتها اعقد المقارنات ....واندهش...واتحسر
                             **********
أموال مبارك واعوانه  اللي لسة مش عارفين مصيرها إية ولا حد معبرنا ...,السيدة مارجريت سكوبي اللي بترفض الكشف عن التفاصيل ......
والبنوك اللي مش معبرنا
والدول اللي مش سائلة فينا
ده كله بيخليني اد اية احس اننا دولة مالهاش كيان ومالهاش كلمة مسموعة ....
ويا ريتها مصر بس.....لاء ده بلاتر اللي  طبخ الطبخة مع قطر جاي دلوقت ويقول ان ده كان مجرد حلم .....طبعا حلم
انت ازاي تفكر تتحداني يا ولد.....عايز تبقي راسك براسي يا همام....؟
احلم علي ادك يا شاطر....
وادي همام اللي مش همام ...حس بغلطته ور اح يعتذر....
 يا سلام علي الدول العربية ومستواها
يا سلام علي قوتها وكلمتها المسموعة....
                          ***************
بيقولوا ان الثورة دي اتعملت عشان الاسعار  مولعة نار.... سألتني...؟
وقبل ما أرد عليها كانت كملت كلامها قائلة" طب ما الاسعار بتزيد لسة ...وكمان مفيش غاز ولا بترول....ولاولاولاولا ........ والله ايام مبارك كانت احلي ....ده انتم شعب  تييييييييييييييت"
 يا سلام....بقي ايام مبارك كانت أحلي....؟
من ناحية إية طيب....؟
مكانش فية أزمة غاز....؟ مكانش في زيادة أسعار....مكانش في إجرام ولا بلطجية...؟
اقول للناس اللي بتقول للكلام ده.....إصحوا من النوم بقي ...كفاياكم  نوووم

أما بالنسبة لعدم محاكمة مبارك بدعوي سنه ومكانته  وانه مهما كان " راجل كبير وعلي وش موت "
اقول " كل واحد يتكلم عن نفسه ...اللي مات ابنه او ابوه او اخوه,,,اللي مات خطيبها واللي مات جوزها .....ودم الشهداء ده  مين يتحاسب عليه ....؟
وكلام الفنانين أمثال زوج زهرة الاولاني والا التاني .... خليك ف مسلسلاتك الهادفة اللي بتناقش  واقع البلد ده علي اساس اننا عيال  لسة.....
وأخيرا ....
هناك حديث لآشرف خلق الله رسوله محمد صلي الله عليه وسلم معناه أن " انما اهلك من قبلكم أنهم كانوا اذا سرق القوي فيهم تركوه واذا سرق ضعيفهم أقاموا عليه الحد  ووالله لو ان فاطمة بنت محمد سرقت لقطعت يدها "
فهل مبارك وأعوانه يا من تطلبون له الرحمة أفضل من فاطمة بنت محمد رسول الله ...؟؟؟!!!
 لا تتحدثوا بلساننا ......فكل شخص حر وكل شخص يتحدث عن نفسه ولا تنصحونا فنحن نفهم جيدا الوضع....ولن اسامح من استحل دمائنا ودنس طعامنا وصدر القوت لآعداءنا
ابدا....لن أسامح ولن أصالح



ملحوظة

كان نفسي أروح التحرير أووي النهاردة
بس برغم كل شيء...برغم الناس اللي قالت لاء متروحوش...برغم ان في كتير  كنت بعتقد انهم هيكونوا هناك زي البرادعي  والبسطويسي ....
برغم اني توقعت ان حمدين ونرو ميروحوش بس  حصل العكس
برغم كل شيء واي شيء
مبسوطة ان في ناس بتفهم اللي بيحصل حاليا ......ويا ريتهم يزيدوا عن الناس النايمة ف العسل  ومش هاممها اللي بيحصل .........
ملحوظة تانية....
في شيء غريب  ف بلوجر ...معرفش إية مشكلة التعليقات كل ما ادخل مدونة التعليق مش بيظهر وبيعملي تسجيل الدخول تاني ...ف اغلب المدونات ...قليل جدا من المدونات اللي عرفت اعلق فيها...يا تري  المشكلة دي عندي بس والا....؟

رحاب صالح

هناك 11 تعليقًا:

  1. متفق معاكى فى كل الكلام
    يا رحاب


    بس هقولك حاجة على موضوع قطر

    و كاس العالم هما بقوا خُبراء فى الرشاوى و التجنيس

    فأنت مش ترشى الراس الكبيرة و عاوز تشلها بعد كدة

    يبقى انت لسه مفهمتش اللعبة يا همام

    روح ابقى السكرتير زى ما عمل بلاتر و استنى لما استاذك يستكفى و هو لوحده هيديك الكرسى

    معلش اتكلمت فى النقطة دى بس

    لأن أنا متفق معاكى فى كل النقاط التانية

    بالرغم من انى فرحت جداً لما قطر خدت كاس العالم كتنظيم يعنى مش عارف ليه

    تحياتى صدعتك مش كدة (:

    ردحذف
  2. معاكى تقريبا فى كل النقط ....

    بس مش عشان احنا مرتاحين للوزراه و الثوره اننا نكتم نفس كل مواطن يصرخ من الالم و الاسعار و نقوله اكتم انت مش عارف ان فى ثوره ...فى الاول و الاخر و بعيدا عن الانتماء الشعب يريد ان ياكل و يشرب..

    اول كلام الثوره "عيش حريه عداله اجتماعيه" و اتنفذ منها حوالى نص الحريه بس

    ردحذف
  3. معلش يا رحاب مش هاعلق غير على آخر جملة
    غيري المتصفح بتاعك نزلي اوبرا وهتشتغل كل المدونات
    العيب في الاكسبلورر او الفاير فوكس
    تحياتي

    ردحذف
  4. ريري ازيك يا قمر عامله ايه يارب تكونى بخير واحسن دلوقت

    على فكره انا كمان بعانى ف موضوع التعليقات ده لدرجة انى ساعات بققرا من غير ما اعلق

    ردحذف
  5. السلام عليكم ورحمة الله

    ازيك يا رحاب اولا ؟ يارب تكوني بخير حبيبتي ووحشتيني جداااااااااااا والله :)

    ثانيا : انا متفقة الى حد ما في نقطة الانتماء معاكي

    بس حاليا البلد بتحاول تتغير فالمفروض اننا كمان ننسى قديمنا ونحاول نديها علشان هي كمان تدينا يعدين

    ماشي مهتمتش بنا قبلين و و و

    بس حاليا الوضع بيختلف الى حد ما
    ،،

    ثالثا بخصوص محاكمة مبارك

    فانا معاكي

    لان مفيش حاجة اسمها سن ولا مرض في تنفيذ عقوبة .. بلاش خنقات بقى :(

    ،،

    رابعا
    بخصوص البلوجر فانا الحمد لله مش عندي المشكلة دي
    ممكن تكون مؤقته عندك لخلل ما
    :)

    يارب تكوني بالف خير وسعادة حبيبتي

    ردحذف
  6. طب انا هرد بس هبتدي من تحت
    المشكله بتاعه بلوجر عند معظم الناس
    و ده لأنك اكيد بتستخدمي متصفح اكسبلولر او فايروفكس

    حل المشكله : استخدمي متصفح اوبيرا


    بالنسبه للتحرير انا مكنش موافق على المظاهره بتاعه امبارح خالص
    لان اول سبب و اهم سبب كنت خايف يحصل مشاكل بين الجيش و المتظاهرين
    و ثاني حاجه لأن فعلا البلد مبقتش ناقصه اي هزات تانيه
    و كذا مره يطلعوا الناس بتوع المجلس العسكري و بطريقه غير مباشره يترجوا الناس عشان تشتغل ، و لو مشتغلناش و فضلنا على حالنا كده يبقي مش هنلاقي حتي ناكل


    بالنسبه لمحاكمه مبارك
    استحاله حد هيفرط في محامته ابدا
    ولا حد من الشعب هيضي ابدا ابدا
    زيه زي غيره ، غلط يبقي يتحاكم
    هو مش احسن من حد

    ردحذف
  7. وطنى وان جار على عزيز و اهلى ان ضنوا على كرام

    لا يمكن ان نحكم هلى وطن كان مسروقا مننا كيف احكم على ابى بالشح و هو معصوب العينين و مكبل اليدين و مكسور الرجلين كيف اغضب منه انلوم الجريح ام نلوم الطاعن

    موضوع حسنى و العفو عنه و السن و اول طلعة جوية مجننى بس هاقولك حدوتة صغيرة
    كان ياما كان فى زمان راجل شريف مان رئيس اركان القوات المسلحة فى حرب اكتوبر يعنى تقريبا الرجل الاول المسئول عن الحرب كان رئيس حسنى و ابو حسنى اسمه الفريق سعد الشاذلى انهم ظلما و اتحبس و كان راجل كبير راحو ولاد الحلال لسى حسنى نعفو عنه كشان راجل كبير و حرب اكتوبر سى حسنى رد قولا حاسما و هة
    انا لا اتدخل فى احكام القضاء
    و عشان كده احنا هنقول زى انتى ما قولت لا تدخل فى احكام القضاء

    سؤال خبيث على جنب
    محسوبك جاهل شوية و مش عارف يعنى ايه تييت ممكن تقولى لنا معناها ههههههه
    تحياتى

    ردحذف
  8. ازيك يارحاب أولا

    انا بنى وبينك كنت عايز اكتب حاجة عن موضوع والله كانت ايام مبارك احسن

    لو جيتى تفكرى كده فى الثورة هاتلاقى شوية ناس قليلين اوى فكروا يعملوا ثورة وبعدين زاد عليهم شوية كمان وبرده قليلين والناس الباقية كانت بتحاربهم وبعدين لم االثورة نجحت الناس دى ركبت الموجة وهللت للثورة

    وانا جربت اسأل الناس اللى بتهلل دى ما الهدف م الثورة كانوا بيقولوا نفس الرد اللى انتى قولتيه زيادة الاسعار وكان بيتهيألهم ان لما مبارك يمشى الدولة هاتوزع غلى واحد يالميت كده نص مليون جنيه

    وبعدين حاليا وبالذات امبارح نفس الناس اللى كانت بتتفرج فى البداية وبيشتموك هى هى الناس اللى بتشتمك دلوقتى وهو بيعمل كده باقتناع شخصى انى تغيير فى حياته اللى هو رضا به على كده يعتبر خراب بيت له
    مثلا هو عايش بقرشين على اد الحال خايف لا يروحو منه واللى ماشى بالرشوة واللى ماشى بالسرقة كل دول خايفين لا الحاجات دى تروح منهم

    عرفتى العيب فين العيب فى الناس دى اللى هما قعدوا تلاتين سنة مش عايزين يتحركوا وما اتحركوش الا لما كان التحرك امان وهى احتفاليات الملونيات اياها اللى كانت بعد جمعة الغضب الاولى

    لكن اللى قاموا بالثورة بجد هما الناس اللى عندهم انتماء للبلد وعارفين يعنى كلمة بلدهم ومش مستنيين هى تدور عليهم او تعملهم كرامة فى داولة ما او حاجة فقط انا أحب هذه البلد من غير سبب سوى انها مصر

    وبالنسبة للبلوجر اعملى دليت لكل الكاش بتاع الاكسبلورر او الفايرفوكس
    وهو هايشتغل معاكى تمام

    ردحذف
  9. مشكلة متصفح حبيبتي حاولي تغيريه وتجربي
    مقال رائع عندك حق في كل كلمة تسلم ايدك

    ردحذف
  10. المشكله كانت عند الكل والمشكله كادت ان تغضب الكثير لاكن الحمد لله التعليقات الان موجوده
    مطالب الشعب ضرورى تنفيذها لان هذه المطالب كانت اساس الثوره لكن اعتقد ان الشىء الذى يزيد عن حده يقلب لضده اخاف ان المسئولين عن الجيش يعيشوا حالة ملل من تكرار التظاهر فيحدث مالا يحمد عقباه ربنا يستر
    دمتى بكل خير تقبلى تحياتى الاحـــــــلام

    ردحذف
  11. السلام عليكم
    استاذتى كعادتك متميزة
    بالنسبة للانتماء كان عندى بوست قديم اسمه جربت تحب مصر لو عندك وقت ابقى اقرايه
    بالنسبة لجمعة الغضب الثانية انا كنت رافض عشان الخوف من الاحتكاك بين الشعب والجيش وعشان لازم نسيب فرصة البلد تقف على رجلها وعشان ربنا خلق لدنيا فى ستة ايام مع قدرته على خلقها بكلمة ولكن عشان نتعلم التدرج احنا بشر يعنى حياتنا وعملنا مش كن فيكون
    فيما يخص العفو او السماح او غيره انا متفق معاك كل واحد يتحاسب عن اعماله وطالما ارتضينا القضاء حكم يبقى نسيب القضاء يحكم مش نضغط عليه
    دومتى بكل الخير

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين