الثلاثاء، 23 أغسطس 2011

إعلانات.....1/2 كم

بالطبع متابعتش او مقدرتش اتابع لا برامج ولا مسلسلات ولا اي حاجة ف رمضان السنة دي بسبب انشغالي ف الامتحانات
وبصراحة الحمد لله ....احسن لان يعني حالة المسلسلات بجد متطمنش ....بس كنت اتمني اشوف مسلسل " مشرفة" بحب انا  السيرة الذاتية بس يا خووووووفي لا يكون فيه عك هو كمان زي " الشحرورة"
المهم انا بقي نويت اتكلم عن الاعلانات
اصلها مستفزة اوووي الصراحة
أجمل اعلان من وجهة نظري ونظر كتير من الناس  اعلان فودافون " شكرا " يعني يمكن عشان الاغنية المعروفة  بتاعة ايمان البحر درويش وكمان عشان الناس اللي ف الاعلان زي نيللي وسمر غانم وابطال الكورة ابو زيد واكرامي والكاس وامام
بس المستفز بقي  " فودافون شكرا " عاملة الخدمة علي مزاجها .....
يعني لما حبيت اجرب  الخدمة دي بعتها لآخويا أحمد لان رقمه هو الاخف والاسهل عندي  وكمان حافظاه  فبعت له " شكرا" وجريت بسرعة أشوف  الرسالة جاية ازاي ......." ايموشن متغاظ كدة"
لقيت ان الوقت  اللي هيستمتع فيه بالخدمة مش مناسب خالص ...." يعني ساعة مجانا من عشرة الصبح لحداشر الصبح" وطبعا وقتها احمد بيكون نايم ....ده غير الناس اللي بعتالهم الخدمة دي برضه وكانت  خمسة  او ستة الفجر ......يعني اعلان 1/2 كم
اعلان بيبسي ...."دنيا سمير غانم "
لذيذ الاعلان .....بس يغيظ شوية ...." ولفت نظري برضه الفستان البمبي " وبدلع برضه واعمل زييها كدة  بس بابا مش بيديني كريدت ....اصلا مش باب مش بيحب البيبسي ....
المستفز ف الاعلان انه فعلا الثلاث حاجات مهمين ...بس الناس الاغنبيا اللي جم ف الاعلان  مبصوش للاعلان ده بصوا لدنيا ....فتقولهم  هتعمل فوت  علي اية يقولك دنيا سمير غانم....." ما كلهم دنيا يا مجانين " بس تقول اية  بقي ....والا كلهم مركزين اووي علي الفستان البمبي حتي الفنانين اللي استعان بيهم الاعلان ....بس في فنانين كانوا بجد كلامهم جميل جدا ...زي انجي وجدان ودرة  ....علي الاقل فاهمين ...بس معرفش لية جايبين ايمي  فالاعلان ...بتشجع اختها يعني .....؟
الاعلان بقي اللي مفهمتوش.....
اعلان "عمر الشريف " بتاع مؤسسة مجدي يعقوب........" شايفة حد بيقولي مش مفهوم لية...؟؟؟
عشان عمر عمل اعلان بايخ وسخيف عن  مياة غازية وكل الناس انتقدته......ودلوقت جاي ف اعلان خير....غرييييييييييييبة
الاعلان اللي نفسي يتلغي من خريطة الاعلانات.....
ومش هتكلم عنه  غير كلمتين...."قطونيل" بجد اعلان سقيل
الاعلان البايخ المستفز....
هو عرفني ازاي وانا بالدقن......كامل ...انت بتعمل اية ف بنك القاهرة.....خالد صالح السخيف ...اعلان بايخ زييك تمام
الاعلان الممميز علي الاقل من وجهه نظري
اعلان بنك مصر...بصوت عبد الرحمن ابو زهرة ....صوت مميز اعلان مميز بجد لذيذ وجميل وملفت وجاذب للنظر   وده بينطبق فيه شروط الاعلان الفعال ....كلام قليل صوت مميز وجاذب اعلان  عن شيء وصور مرتبطة بشخص الاعلان .....
الاعلان اللي بكرهه وبينقطني ....
احنا اتعرفنا علي جواز اون لاين ....صح حاجة زي كدة ...اصلا لما بيجي الاعلان ده بقلب علي اي حاجة تانية
علي اساس يعني ان متعرفش تتعرف علي اي شخص الا علي مواقع الزواج العبيطة دي ....وبعدين هو الفيس بوك راح فين يعني...؟
كفاية كدة بقي
بلاش  نرفزة تانية

هناك 19 تعليقًا:

  1. السلام عليكم مقال جميل
    اللي يسون اعلاانات همهم بس الربح مايشوفون شعور الناس لما تشوفه وهل الاعلان في المستوى انك تشوفه مع عائلتك او لوحدك خصوصا مرات يسون اعلانات واهلك جنبك تستحي
    اما اصحاب الشركات يعطون اموال طائلة للممثل او رياضي عشان يسوي اعلان بسيط كان الناس المحتاجة اولى بهالفلوس واللي يقهر انو ناس احيانا تحب تمثيلهم او برامجهم وتجي تلقينهم مسوين اعلان بايخ ليش هم مايشوفون الاعلان وكيف بتكون نظره الناس لما يشوفوه بس المشكل الناس تهتم بس كم بتاخد من هالاعلان

    ردحذف
  2. انا كمان عاجبنى اعلان كيمو كونو بتاع اوشه كان لطيف...و اعلان اتصالات بتاع عطشان يا صبايا ...اكثر حاجه تفقع فعلا اعلان سيراميك لابوتيه اللى الممثله بتتنح فيه بشكل يفقع...

    ردحذف
  3. إزاي نسيتي إعلان ترو شيبس , وسيراميكا لا بوتيه

    أنا ببقي هولع في التليفزيون . .

    بصراحة كله زفت , وبيضيعوا متعة الفرجة علي أي مسلسل من كتر الفواصل

    ردحذف
  4. صباح الغاردينيا رحاب
    والف الحمدالله على سلامتك
    انا جيت اسلم وكلام في سرك
    ههههههههههه
    ماشفتش حاجة من الاعلانات
    :)
    ربنا يرحمنا من التلفزيون المستفز "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  5. جميل الموضوع وخفيف الظل بصراحة
    من فترة طويلة لم اشاهد اعلان يجبرني علي احترام صاحب فكرته

    يمكن بعد رمضان
    كل عام وانت بيخير

    ردحذف
  6. اعلانات تحرق الدم
    مش 1/2 كم بس

    ردحذف
  7. بجد جديدة دي
    :)))
    المدونات اتكلموا علي المسلسلات
    اول مدونة ادخلها تتكلم عن الاعلانات

    اعلان قوطونيل بااااااااايخ
    وخصوصا لما تكوني بتتفرجي علي برنامج ديني ويطلع لك ياهو يااعلان اولوز

    حاجة بقت سخيفة

    ردحذف
  8. صلى على النبى
    زيدى النبى صلاه

    بصى يا ستى اعلان فودفون جميل و رسالته جميلة لكن بيعتمد على مين على سيد درويش و احنا فى القرن الواحد و عشرون مازلنا نعتمد على سيد درويش اين الابتكار
    زمان كانت الاعلانات تاليف صلاح جاهين و حسين السيد و غيرهم و كانت الحان منير مراد و الموجى كان الاعلان غنوة صغيرة
    بقية الاعلانات متفق معكى و اغفر لخالد صالح ذلك الاعلان لانى احبه على المستوى الشخصى قبل الفنى
    بقية الاعلانات سيئة حتى بيبسى طريقة عرض عمل الخير كأنك بتدعى لحفلة فى الساحل الشمالى و لا فى العجمى و لا بورتو السخنة و انت اختار هو فى كلام بالشكل ده
    طولت عليكى لكن اعلان قطونيل اسخف اعلان فى تاريخ مصر
    تحياتى

    ردحذف
  9. معلش أنا الصراحة ماشوفتش ولا اعلان من اللى بتتكلمى عليهم لانى ببساطة خارج مصر.. بس حبيت اتكلم برضو فى الموضوع لانى هنا باشوف اعلانات بتعملها مؤسسة فى الامارات فيها توعية جامدة ونصيحة بطريقة بتوجع فعلا وأنا متأكد انها بتأثر فى أى واحد بيشوفها.. الصراحة هما طلعوا أحسن مننا فى الموضوع ده ولو تفتكروا مثلا إعلان أقم صلاتك قبل مماتك.. تقبلى مرورى

    ردحذف
  10. اعلان كيمو كونو اكتر واحد بيعجبنى بس اعلان موقع جواز اونلاين مش عارفه ليه متشككة فيه و حاسة انه حاجة غلط و ح يعمل مشاكل بعدين و موضوعه ح ينتهى بفضيحه

    ردحذف
  11. هههههههه تصوري كنت بفكر أكتب بوست عن الإعلانات و بعدين حسيت إنهم ميستاهلوش بس إنتي جبتي من الآخر :)
    بختلف معاكي بس إني مبطيقش إعلان (شكراً) خصوصاً الجزء بتاع سموره و نيللي ببقى خلاص هتنقط من ثقل دمهم.

    أما إعلان كوتونيل فلغاية دلوقتي مش مصدقه اللي بسمعه...و إعلان الجواز ده فشر الكاميرا الخفيه:)

    جميل البوست يا رحاب يا رب دائماً منوره البلوجر:)

    أرق تحية ليكي

    ردحذف
  12. رحاب ازيك منوره دائما
    هناك اعلانات مستفذه كثيره جدا والاحسن انكى لم تتكلمى عنها لانها فعلا مستفذه ومستفذه جدا كمان
    سعدت بوجودى هنا وتمنياتى لكى بالسعاده
    تحياتى الاحــــــــــــــلام

    ردحذف
  13. انا مش متابع المسلسلات ولا البرامج فى التلفزيون المصرى من فترة يمكن لانى حاسس ان التلفزيون المصرى كان وصل لدرجة من الاسفاف وقلة الادب فى المسلسلات والافلام وكان مصر ارض الكنانة تحولت مرة واحدة لارض لاتضم الا الاقذاء بين محتوياتها


    كلى امل بعد الثورة ان الحال عندهم يتغير وانزل مصر الاقيها غير

    شكرا على البوست

    ردحذف
  14. هههه بصراحة البوست ضحكني جدا
    عاجبني طريقتك واسترسالك في وصفك للأعلانات

    بس انتي نسيتي اعلان بالنسبالي اهو افضل اعلان وهو اعلان كوكاكولا بس لما بيتذاع كامل مش متجزء :)
    بصراحه اعلان بيديني تفائل اعلان كله امل غير انه مفيهوش حاجه سخيفة.

    اما بئي اعلان قوطونيل فده مش هتكلم عليه هيب الكلام ليكم :)

    رغم العامية لك مقال جميل .
    تحياتي

    ردحذف
  15. السلام عليكم غاليتي

    هو مش بس الاعلانات المستفزة التلفزيون بكل ما فيه مستفز حتى نشرات الاخبار

    الاعلام الهادف يبني اجيال و مؤسسات الاعلام انتاجها مجند و هدفهم يغرقونا في التفاها و يحجموا عقولنا و تربي اجيال سخيفة سطحية

    انت انسيتي اعلان الارهاب لا دين له ؟؟؟


    الله يلطف بحالنا

    ردحذف
  16. كل سنة وانت بالف خير عيد سعيد عليك يارب :)

    ردحذف
  17. والله انا باستمتع وانا باقرأ تحليلات الاخوة المدونيين لما جاء في شهر رمضان من مسلسلات واعلانات بس للامانة عندنا في غزة كان اكثر اعلان عامل ضجة اعلان بيبسي بتاع دينا وانا عن نفسي كنت ادندن انا وابنتي الصغيرة بـ " العب كورة بعد الفطار في ملعب نادي شبه منهار " كنت معلقة عليها كثير بصراحة اكثر من الباقي .. باقي الاعلانات ماشفتهاش إلا اعلان خالد صالح .. بس ماحسيتش انه مستفز كثير .. عادي يعني .. وبصراحة اعجبني مسلسل الريان كسيرة ذاتية مش كممثلين وبصراحة بدرية وفتحي كانوا من اجمل الادوار ..

    نسيت اقولك كل عام وانت بخير ، ينعاد عليك وعلى الأسرة الكريمة بالخير واليمن والبركات .

    ردحذف
  18. السلام عليكم جميعا
    وكل سنة ويوم وكل وقت انتم بخير وسعادة وصحة وراحة بال
    عيد سعيد عليكم
    وبتأسف لكم جميعا مقدرتش اقولكم عيد سعيد
    بس غصب عني بجد كنت تعبانة شوية كتير
    متشكرة جدا لوجودكم هنا معايا دايما
    وبشكر لناس اللي اتعرفت عليها جديد
    [
    [
    [
    بالنسبة للبوست
    أراكم كلها اعتز بيها

    ولكن يبقي اعلان مكتبتوش هنا
    وهو ده اللي عالق دايما في لساني وبدندن بيه علي طول وبحب اشوفه دايما حتي ف البيت عارفين اني بحب الاعلان ده ولو بعمل اي شيء وجه الاعلان ينادوني عشان اشوفه
    وهو اعلان كوكا كولا

    انسي كل اللي فات
    تعالي قول اللي جواك
    افرد جناحك
    طير ف الهوا
    تاخدك بعييييد
    فوق ف السما
    .
    .
    .
    ده برغم انهم حذفوا كتير من الاعلان
    بس بجد اعلان راااائع كتير بحبه
    وبعتقد انه ترنيمة
    وبحب الاولاد اللي فيه خصوصا البنوتة اللي مركزين عليها مش هقول جميلة ...بس هي جذابة وطبيعية ولذيذة اوووي
    http://www.youtube.com/watch?v=hBjzUf2fMVs
    ده لينك الاعلان كامل
    وكل سنة وانتم طيبيين
    وان شاء الله متابعاكم دايما

    ردحذف
  19. نسيت اقولكم ان الاعلان ده بيحسني بالامل اوووي
    يا رب يدينا امل لبكرة
    برغم اني مش حاسة بده بسبب اللي بيحصل ف البلد
    وبدعي دايما ف صلاتي ان ربنا يوصل مصر لبر الامان
    يااااارب

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين