الجمعة، 26 أكتوبر 2012

حفل توقيع " بطاقة هوية "


عيد سعيد عليكم كلكم
ويارب تكونوا بكل خير وسعادة ويكون العيد كان ومازال عيد سعد عليكم وتكونوا قضيتوه مع اللي بتحبوهم مش زي حالاتي كدة مع نفسي بتفرج علي الناس من البلكونة  ومخرجتش مع اني كنت ناوية اتمشي علي البحر بس  اعمل اية كسلانة
هو الحقيقة العيد السنة دي كان مختلف فيه حاجة غريبة احساس مختلف
الاحساس الاولاني كان حزين  لان " كان في حالة وفاة شخص قريبي وبنفس الوقت هو زوج صاحبتي  وقريبتي و كانت الصدمة قوية لانها كانت حادث سيارة وقبل العيد بيومين فقط "
الاحساس التاني  احساس جميل بمعني الصداقة  " لي اصدقاء لم اتواصل معهم بسبب سفرهم منذ سنوات وكان اتصالهم بي يوم العيد عيد بالنسبة لي ....الصداقة شيء نادر  فعلا وليس كل من تعرفه صديق ....
اخباري
مش عارفة ....
عادي الطبيعي مشغولة مطحونة ف الشغل ...خسيت بتاع خمسة كيلو ....اصبحت عصبية
اصبحت كئيبة .....مكتئبة .....مش طايقة روحي ....هو ده انا وهي دي اخباري ....بقول جايز لاننا داخلين ع الشتا وجو الشتا بيكئبني .....بقول جايز عشان حالة الوفاة دي ....وبتأثر بالموت انا اووي .......بقول جايز لاني مصدومة في بعض الاشخاص ....يمكن....بقول يمكن عشان  متوترة من ان كتاب صندوق ورق اللي مشاركة فيه خلاص قرب يخرج للنور ....وووراه كتاب المائة تدوينة التاني ....مش عارفة ......بقول جايز عشان صاحبتي الانتيم ف الشغل هتتجوز وتبعد عني وهتسيب الشغل  وهكون لوحدي تاني ....جايز لان جوايا حاجات كتير  ومش عارفة اقول حاجة .....
بس في حاجة عايزة اقولها .....ان كتابي الاولاني ......" بطاقة هوية " له حفل توقيع في طنطا يوم الجمعة الجاي 
ده اول كتاب اشارك فيه .....وله متعه خاصة لانه بيضم اصحابي الانتيم اصحاب الكلية اللي بجد بموت فيهم وبتمني ان علاقاتنا متنقطعش ابدا "غادة محسن ورانيا محسن ورضا العمري " ده غير" نهي صالح ومحمد متولي ومروة شوقي  وخالد ناجي واسلام كنفاش "  ده اول عمل جماعي لي مع اصحابي ...وبجد مش عايزة اقولكم احساسي اية وانا ماسكة الكتاب بإيدي ....

فيه شاركت بقصة بحبها اووي وكنت فيها برسم حاجة بنعيشها كلنا ....او بيعيشها معظمنا ....
فرحانة اووي بحفل التوقيع ده لانه اول حفل توقيع لي ...وأول كتاب ...وأول فرحة ....  بس اكيد فرحتي دي هتكون اجمل لما تشرفوني في حفل التوقيع الصغير اللي عاملينه ف طنطا  يوم الجمعة الجاي
ده الايفينت ....علي الفيس بوك هنا 
بتمني تنوروني ...واكيد انا هتواصل معاكم هنا  وع الفيس كمان عشان اللي حابب يحضر  
بحبكم اووي وعيد سعيد ومستنياكم

هناك 23 تعليقًا:

  1. كل سنة وانتى طيبة
    عيد سعيد عليكى

    الف مبروك الكتاب
    معلش والله لو الحفل فى القاهرة كنت اكيد هاجى
    مبروك مرة اخرى

    تحياتى

    ردحذف
    الردود
    1. وانت طيب يا ابو ساليناز
      بجد هفتقدكم بس في حفل توقيع لكتاب صندوق ورق ف القاهرة ف معرض الكتاب وكمان كتاب المائة تدوينة وهبقي اعرفكم اكيد هو انا اقدر اروح من غيركم اصلا

      حذف
  2. أولا كل سنة و انتى طيبة

    عيد أضحى سعيد عليكى و على الأسرة

    و تتفك الكآبة (:

    ثانياً ان شاء الله أجى حفل التوقيع

    (:

    ردحذف
    الردود
    1. رامي بجد انا اللي نفسي تيجي اي تجمع اكون انا فيه
      بتمني بجد انك تيجي خصوصا ان ازهري الخاين قالي انه مش فاضي وعنده شغل مش عارفة شغل اية يوم الجمعة ده
      عموما هستناكم
      وكل سنة وانت طيب وبخير وسعادة ويارب تكون سعيد

      حذف
  3. كل عام وانتي بخير والف مبروك لحفل التوقيع وعزائنا لصديقتك

    ونتمني لكي دائما النجاح

    ردحذف
    الردود
    1. وانت طيب وبخير
      الحمد لله علي كل شيء

      حذف
  4. كش عارفه اعلق ازاي او منين لفين
    :))
    الموت مالناش حيله فيه

    العصبيه والارتباك علشان الدنيا ملخبطه عندك
    مشاعر متضاربه
    مش عارفه تحزني ولا تفرحي
    زي موضوع صحبتك المفروض تفرحي لها لكن في نفس الوقت هتفرقيها
    معلش الدنيا كده
    ومبروك علي الكتاب وربنا يوفقك
    ومن نجاح لنجاح :)

    وكل سنه وانتي طيبه وبخير وسعادة

    ردحذف
    الردود
    1. الموت ده الحقيقة اللي كلنا بنبعد عن اننا نشوفها
      العصبية والارتباك مش من طبيعتي بس من الظروف اللي انا فيها
      الكتاب الشيء الوحيد اللي محسسني بشيء من الفرحة
      بس اكيد فرحتي دي مش ممكن تكتمل من غير الصحبة الحلوة
      بتمني اشوفك ف يوم وحاسة ان ده هيكون قريب ف القاهرة يوم حفل توقيع كتاب المائة تدوينة او صندوق ورق ان شاء الله

      حذف
  5. مبروك ياقمر الف مبروك
    يارب دايما من تالق لتالق دائم

    ردحذف
    الردود
    1. الله يبارك فيك
      عقبالك
      وعقبال كل اصحابنا المبدعين

      حذف
  6. كل سنه وانتى طيبه
    تستحقى كل خير
    ولكى مستقبل مبهر باذن الله

    ردحذف
    الردود
    1. وانت طيب يا محمود
      ربنا يكرمك وميرسي علي كلامك اللي بيشجعني سواء هنا او ع الفيس

      حذف
  7. ألف مبروك وعقبال ماتعملو واحد في إسكندرية :))))

    ردحذف
    الردود
    1. اكيد يا نور في حفل ف اسكندرية ومش واحد بس
      لاني مشاركة في كتابين تانين
      وان شاء الله في حفلة لكل منهم ف اسكندرية يعني اكيد هنشوفك هناك

      حذف
  8. كل سنة وانت طيبة فعلا العيد بقى متغير جدا عن زمان بنحاول نفرح قد ما نقدر بس برضو مش بنفرح نفسي اعرف ليييييييييه ،، الحمدلله على كل حال وربنا يكتر من الافراح
    عموما الف مبروك الكتاب وان شاء الله من تقدم الى تقدم
    تحياتي وكل الود
    ميمي

    ردحذف
    الردود
    1. الله يبارك فيك يا قمر
      ويارب يوفنا جميعا وكل سنة وانت طيبة

      حذف
  9. كل سنه وانتي طيبه يارحاب
    ويارب يكون عيد سيعيد عليكي وع الامه الاسلاميه

    ردحذف
    الردود
    1. وانت طيبة يا سمسمة
      ويارب اشوفك قريب

      حذف

  10. كل عام وأنت والأهل جميعا بخير أختي رحاب..
    آسف لأني مقصر ومن زماااان ماجتش هنا
    لكن العيد فرصة لصلة الرحم :)

    ردحذف
  11. كل عام وانت بخير
    وربنا يوفقك ويكرمك وعقبال الكتاب الميه
    تحياتي

    ردحذف
  12. وانت طيب يا اسامة
    والسنة والجاية تكون متجوز وعازمنا ع الفرح

    ردحذف
  13. كل سنة و انتي طيبة
    و البقاء لله
    و ألف مبروك على حفل التوقيع
    و الصداقة فعلاً لو صادقة و بدون مصالح هي من أغلى الأشياء في الدنيا

    ردحذف
  14. أختي رحاب ..
    كل عام وأنتم بألف خير ..
    مبارك الكتاب وحفل التوقيع ..
    مع التحية الطيبة ..

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين