الأربعاء، 3 أكتوبر 2012

كتاب المائة تدوينة ....الاصدار الثاني



الحقيقة انا لم أكن أتخيل أن  أكون محظوظة هذه المرة في الكتاب
في الاصدار الأول لم يحالفني الحظ
انما هذه المرة ......
في حياتي لم أؤمن بالحظ اطلاقا
وآمنت انه توفيق من عند الله واجتهاد وجهد  وابداع وموهبة 
وبرغم اني ولا مؤرة آمنت بالحظ ....الا ان كثيرون جدا يجدونني محظوظة 
وأنا مش كنت بصدقهم ههه
عادي يعني مكنتش بشوف نفسي محظوظة 
بالعكس تماما
بس  اللي حصل في كتاب المائة تدوينة المرة دي خلاني احس ان الحظ جايز يكون له دور معايا في الفوز
بس لما فكرت لقيت ان القدر هو اللي  كان متحكم ....مش الحظ
شاركت في كتاب المائة تدوينة الاصدار الثاني بثلاث اعمال   كنت قد حددت مسبقا المقال والخاطرة ....لكني كنت محتارة بالقصة جدا 
ولدرجة اني كنت بدخل كل مرة عشان ابعت الاعمال ومبعتهاش 
ف الاخر استعنت بصديق....
صديق عزيز جداااا جدااا جدااا 
هي روح قلب ماما .....ماما بلوجر برغم سنها الصغير ...فاتيما 
وهي اللي اختارت القصة ....حتي هي قالت ....هي دي يا حوبة  انسي الباقي كله ...هي دي بس
وسمعت كلام فاتيما ....مع اني مش بسمع كلام اي حد " سوري يا فاتيما " 
والغريب اني كنت متوقعة ان حاجة تانية خالص اللي تفوز ان مكنش من أول مرة علي الاقل ف التصفيات 
المدهش ان  القصة اللي مأمنتش بيها هي اللي وصلت للتصفيات  واللي حسيت انه مكن يوصل خرج م المسابقة م الجولة الاولي 
حاجة غريبة ....صح 
الأغرب اني متابعتش المشروع خالص ....وأحمد أخويا هو اللي كان بيعرفني  بالاخبار 
واللي عرفني بالتفاصيل وان قصتي متأهلة للتصفيات هي العزيزة " د. ولاء صلاح " صاحبة مدونة دمعة حنين واللي قفلتها للأسف 
ولاء  وقفت جنبي بشكل مش مممكن كأنها معايا طول الوقت مش بينا مسافات ومحافظات  لاء بجد ولاء انسانة مش معقولة 
وبجد شجعتني كتير جدا وكانت بتديني أمل ف الفوز دايما
لما دخلت القصة التصويت خفت جدا ...والحقيقة حسيت اني مهما عملت مش هوصل ومش هفوز 
بس قلت لنفسي اني لازم اعمل محاولة واني لازم احاول النجاح وانا قادرة علي الفوز ....ومش بحب اليأس 
عشان كدة عملت دعاية لنفسي  وطلبت لأول مرة من أصحابي  يعملولي فوت ....وانا بتكسف اطلب  حاجة زي دي 
 الجميل اني اول مرة ادخل علي صفحة التصويتات  لقيت ناس   عملتلي فوت وكتبت كومنت من غير ما تعرفني ...وده اللي أسعدني جدا ....للأسف مش فاكرة كل الاسماء بس افتكر " ريتال " " افنان "  رونا  " 
طبعا غير أصحابي  ....رفقاء التدوين ....نهي صالح , غادة محسن , محمد متولي , مونتي , ضياء عزت ,  ومحمد غالية , وفتافيت وليلي الصباحي  وولاء صلاح  فشكول طبعا ....وغيرهم مش عايزة انسي اي اسم بجد   محدش يزعل لو نسيت 
غير أصحابي علي الفيس بوك  كمبس  ولميس , سمسمة, زهرة , وغيرهم  .... وأخص بالذكر " رانيا عامر "  صديقة اختي شيرين وزميلتها بالعمل وصديقتي بالطبع  ...رانيا بجد وقفت جنبي اووي وشجعتني كتير و بجد بشكرها كتير اووي وبقولها بحبك كتييييير 
طبعا في الوقت اللي كل اصحابي بيشجعوني وبيعملولي فوت ....اتحايل علي احمد اخويا  انه يديني صوته ....ولا عبرني 
الا بمحايلة ...ده حتي احمد ابن عمتي  عملي فوت ...وده ....؟؟؟!! بس بعدين  عملي فوت ....بس " نو كومنت " يظهر انه مؤمن اني منفعش  ومش عندي موهبة اصلا 
بس المدهش ....إن أحمد أخويا  هو أول واحد قالي ان قصتي  فازت ف التصفيات بالمركز التاني .... وساعتها اتصدمت  ومعرفتش اقول حاجة ....^-*
وأول شخص باركلي  واتصل بيا وهناني " نهي صالح " صاحبة مدونة كلام فاضي ...." بحبك يا نهي " ^-^
وطبعا الفيس بوك كان فرح ....بجد احساس جميل 
مبسوطة اني هكون مع ناس بحبهم اووي ...زي غادة محسن صديقتي الصدوقة ... وزي رحاب الخضري ورؤي عليوة ....وغيرهم 
وزي  مصطفي سيف ......برغم انا مش بنتفق مع بعض يا دكتور .....يعني هغتت عليك برضه ف الكتاب زي ما بغتت ف المدونة  هههه.....مبسوطة كتير ...وزعلانة ف نفس الوقت عشان في ناس  موصلتش  للفوز ...كنت بتمني  للناس كلها الفوز
مش عارفة بكرة مبدأ الخسارة ....والمكسب.....بحب كل الناس  توصل للي هي عايزاه
مش بحب يكون في خسارة
كنت بتمني ....حاجة تانية
ان في ناس تهنيني بالفوز
تفرح لي ...تبارك لي بقلب صافي 
كنت بتمني ....بجد قصة تانية اللي تفوز في المسابقة 
متمنتش القصة دي ابدا تفوز
ولا حتي  فكرت ابعتها بالعكس انا استبعدتها خالص ....بس فاتيما...والقدر
حتي فاكرة كويس اني مكنتش عايزة انشرها ف حملة التدوين ...وفضلت ركناها ف الدرافت فترة كبيرة ....
يمكن لغاية ما جه وقتها ....
كنت بقصد بيها حاجة
يمكن ...كنت أقصد بيها  بعض الاشخاص يمكن....ويمكن كنت أقصد بيها شخصية معينة....
يمكن....كنت بقصد بيها رسالة....يمكن....
وجايز جدا تكون الرسالة  موصلتش.....
جايز...ويمكن....أسئلة كلها .....من غير جواب

وف النهاية ......بحبكم أووي وبشكر كل الناس الحلوة اللي شجعتني ووقفت جنبي ....بحبكم اووي اووي اووي ^-^



 

هناك 13 تعليقًا:


  1. مبروك يارحاب

    انا برضه اديتكصوتي بس مش فاكر علقت عندك والا لا

    مبروك يارحاب

    تحيتي

    ردحذف
  2. السلام عليكم

    تستحقى يارحاب الفوز الف مليون مبروك
    وان شاء الله نبارك لك على حفلة التوقيع قريبا ياغالية
    اجمل شىء فى المسابقة انها رسمت ابتسامة السعادة على كل الوجوه حتى اللى مافاز مثلى :) كنت سعيدة جدا لانى تعرفت على مجموعة جميلة من المدونات الراقية
    واهم شىء للمثقف والمدون ان يفهم جيدا ان الفوز فى اكتساب المعلومة و ان اعماله تقدر واعتقد ان كل المشاركين مادامت اعمالهم قبلت مبدئيا تبقى اعمالهم جيدة لكن من المستحيل كلها تنشر فى الكتاب :)

    ان شاء الله نتقابل العام القادم فى الاصدار الثالث

    الف مليون مبروك يارحاب لك ولكل الفائزين
    تحياتى بحجم السماء

    ردحذف
  3. الف مبروك علي هذه الخطوة الرائعة ... والي مزيد من النجاح والتوفيق بإذن الله .

    وفي ظني ان الحظ يأتي دائما الي من يستحقه .

    تحياتي

    ردحذف
  4. ....

    الف الف مبروك يا استاذه رحاب
    وعقبال كتابك الخاص المطبوع ان شاء الله
    حضرتك قلم واعى وتستحقى الكثير

    تحياتى

    ....

    ردحذف
  5. الأول

    فاتيما المقصرة جدا جدااا جداااا
    بتقولك ألف مليون مبرووووك
    يا ♥♥ رحوبتى ♥♥

    http://data.whicdn.com/images/37430995/88383211406806122_5rOplIFq_c_large.jpg

    وانتى يا حبيبتى تستاهلى كل الخير
    ولما قريت التدوينات
    دى كانت أول واحدة لمستنى
    بشدة
    كان فيها الحب والدفا والحنان
    رغم انها ف الشتا والوحدة و البرد

    http://www.mixedplateblog.com/wp-content/uploads/2010/05/weheartit4.jpg


    بس انتى شاطرة
    عرفتى تجسدى الاحساس قوى
    وخلتينى احبها علطوووول
    ويارب تعجب كل حد يقراها
    واقول مش معقول حد تانى يقراها
    ومتعجبوش .. وهيا مكتوبة بكلماتك
    اللى طالعة من الشفايف البنفسج اللى بيبهج
    وهوه زهر حزين
    :)

    http://weheartit.com/entry/33163684


    انا مبسوطالك جدااااااااا
    وعقبال الكتاب الجاى
    لما يبقى م الجلدة للجلدة بقى

    http://media-cache-lt0.pinterest.com/upload/97882991870761918_5GdksdeH_c.jpg


    والتدوينة دى حلوة قوى
    تاريخية كدا
    حساكى فيها فرحانة
    وبتنططى
    وفيكى بهجة فستان دانتيل شقاوة
    بيشد العين ويخلى صاحبته أميرة حلوة
    حلوة قوى زى حكاياتك وكتاباتك

    http://25.media.tumblr.com/tumblr_krbt39EBwm1qzq8zqo1_500.jpg


    ألف مبروووووك يا حبيبتى
    وعقبال كل مرة
    مبسوطة
    وناجحة
    وكسبانة
    ووسط كل حبايبك واصحابك
    واحنا فخورين بيكى لحد آخر الدنيا
    وانا بحبك
    يا بنفسج بيبهج

    http://media-cache0.pinterest.com/upload/18507048438208287_tCc4hPvi_b.jpg


    ردحذف
  6. الف الف مليون مبروك

    عقبال ما نبارك ليكى على الكتاب

    تحياتى

    ردحذف
  7. مبروك ومع خالص دعواتى لك بكامل النجاح والتوفيق دائماً

    ردحذف
  8. مبروك فرحتيني بجد يارحاب

    انتي بتكتبي جميل
    وتستهلي كل خير
    :)

    ردحذف
  9. مساء الغاردينيا رحاب
    ألف ألف مبروووك
    أنتي موهوبة ومبدعة
    وعقبال كتابك الخاص بإذن الله "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
  10. مليوووووووووووون مبروك يارحاب
    انتي فعلا تستاهلي كل خير
    القصه بجدجميله جدا
    وان شاء الله عقبال الاصدار التالت للكتاب
    بالتوفيق دايما

    ردحذف

  11. ألف مبرو يا رحاب
    القصة جميلة جداوتستاهل تفوز

    ومتزعليش من أحمد أنا بقيت ميرو الشريرة وبنتقملك منه
    بس عارفة هتزعلى عليه وتتحايلى عليا أسيبه

    مبروك مرة تانية وان شاء الله بالتوفيق والنجاح دايما

    ردحذف
  12. الف مبروك يا رحاب والله تستاهلي اكتر من كده
    انا من النوع اللي مبيعرفش يجامل ولا بيعيب في حد ولما بشوف حاجه مش كويسه بفضل عدم الكلام

    والعكس صحيح لما بشوف حاجه كويسه لازم اتكلم

    وتدوينتك قريتها مره واحده ولغاية دلوقتي ثابته في مخى
    ومش عارفه ليه كل ما افتكرها اتخيل انك كنت بتكتبيها وانتي قاعده جنب شباك والمطر بينزل عليه

    بجد قيد الإنتظار رائعه يا رحاب

    الف مبروك يا حبيبتي مره تانيه

    ردحذف
  13. ألف مبروووووووووووك
    وأكيد تستاهلي يا رحاب

    ربنا يوفقك دايما.. ومن نجاح لنجاح

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين