الثلاثاء، 27 أكتوبر 2009

6 اكتوبر وانفلونزا الخنازير


المشهد الاول
حوش مدرسة 6اكتوبر الابتدائية
الناظر بيتكلم في الميكروفون في طابور الصباح
الناظر:خلاص يا اولاد هنسلم كل واحد كمامة جاية من الوزارة
يميل علية مدرس هامسا: الوزارة لسة مبعتتش اية كمامات يا حضرة الناظر
الناظر:خلاص يا اولاد كل واحد يشتري كمامة عشان لسة الوزارة مبعتتش
المهم يا اولاد كل واحد يغسل ايدية بالمية والصابون كويس وينشف في الفوطة بتاعته محدش يستعمل حاجات حد
يميل مدرس اخر هامسا للناظر: المية مقطوعة يا افندم
الناظر :يا اولاد كل واحد يبقي يجيب زمزمية مية معاه,المهم انكم تكونوا واخدين بالكم كويس ومحدش يتكلم ف وش زميلة
مدرس ثالث:يا افندم التلاميذ كل ثلاثة مع بعض ف تختة
الناظر يترك الطابور ويمشي
قطع
المشهد التاني
مدرسة في الفصل تحاول ان تجلس كل التلاميذ حتي تبدأ الدرس
المدرسة : يا بني انت اقعد مع زميلك ده ....انتي يا بنتي
يووووووة حرام والله
انت يا بني مقعدتش لية ...؟
ولد : مش لاقي تختة يا ابلة
بنت: ولا انا كمان
ولد اخر :يعني اقعد ع الارض
المدرسة وقد فاض بها
المدرسة :اقعدوا ع الارض
ولد: الارض ماليانة تراب وورق يا ابلة
المدرسة :خلاص حط شنطتك ع الارض واقعد عليها عايزن نخلص الدرس
انا مش عارفة اية القرف ده ما كانوا اجلوا المدرسة احسن هو انتوا يعني فالحيين اووي
قطع
المشهد الثالث
ف استراحة الفسحة في حجرة المدرسات
هويدا:خلاص انا تعبت مش ممكن انا مش هيجيني انفلوزنزا الخنازير وبس دا انا هيجيني الامراض المستعصية كلها
دي مش مدرسة دي
شيرين: طيب انا اعمل اية بقي ..؟والعيال عمالين يعيطوا واللي يكح واللي يعطس واللي يقرف
دي مش مدرسة دي والله
هوايدا تخرج من شنطتها سندوتشات وتمد بيدها واحد لشيرين
هوايدا : خدي يا بنتي كلي دا احنا علي اخر اليوم نكون روحنا ف طيس
شيرين تتردد في اخد السندوتش
شيرين: اصل انا ايدي مش نضيفة ,استني كدة اشوف حد من الولاد معاه ميه اغسل ايدي
تبحث عن اي ولد
شيرين:الاء....الاء
الاء:ايوة يا ابلة ..؟
شيرين:معاكي مية اغسل ايدي...؟
الاءفي لهجة اعلانية تلفزيونية: مش محتاجة المية يا ابلة خدي الديتول السائل
هوايدا تتوقف عن الاكل متسائلة
هوايدا: واشمعني ديتول يعني ...؟
الاء في لهجة الواثقة وبنفس اللهجة التلفزيونية
الاء:لأن العائلة التي تستخدم ديتول قليلا ما تمرض
قطع
المشهد الرابع
جرس المرواح وهويدا تلملم اشيائها وتخرج من الفصل لتلحق بشيرين علي السلم والاولاد في موجات بشرية تنزل من علي السلم
هوايدا : مش مصدقة اروح...الله بكرة اجازة,اه انا بحب 6 اكتوبر بس عشان اجازة
شيرين : انا مش مصدقة كل التعب ده واحنا لسة ف اول يوم
صوت طفلة ينادي هوايدا
الطفلة: ابلة هوايدا هو صحيح بكرة اجازة؟
هوايدا: ايوة يا سمر
سمر: هو صحيح احنا واخدين الاجازة عشان في حرب ؟
شيرين:لاء الحرب خلصت من زمان من قبل انت ما تتولدي
سمر في دهشة : ازاي بس يا ابلة اذا كنا واخدين اجازة عشان الاسرائليين هيحاربوا الفلسطينين بكرة
شيرين وهوايدا في نفس واحد:مين اللي قالك الكلام ده؟؟؟
سمر : ابلة مها
هوايدا: يا نهارك اسود يا مها انت حتي مرحمتيش الاولاد من هزارك وتريقتك علي التاريخ مع انها خريجة تربية عام تاريخ
شيرين: هو انت متعرفيش حاجة عن حرب 6 اكتوبر يا سمر
سمر : 6 اكتوبر....؟ 6 اكتوبر...6 اكتوبر...6 اكتوبر دي اسم مدرستنا
قطع




رحاب احمد صالح

هناك 7 تعليقات:

  1. ياعينى ياعينى على الناس اللى بتكتب سكريبتيا يابنتى ده بجد فطست من الضحك
    بس فاضل نولع فى المدير ويبقى اشطا
    لوووووووووووى دى زغروطه علشان اول مرة ادخل المدونة
    بس بجد عبقريه ياسكر

    ردحذف
  2. ميرسي يا ايمي يا قرة والله انت الاحسن وانتي اللي بتكتبي افضل
    انتي ناسية احمد ومني والا اية اللي كانت ع الفيس بوك

    ردحذف
  3. كل مشهد لوحده فيه فكرة يا رحاب.. الحوار فيه حاجات لطيفة.. بس طبعاً مافيش وحدة واضحة للموضوع، واوعي تفتكري ان الكلام عن انفلونزا الخنازير في اكتر من مشهد معناه ان دي وحدة.. احسن مشهد هو المشهد الأول طبعاً، ده ممكن يبقى فقرة ساخرة في التليفزيون، ويستحق انه يتنفذ لوحده.. واسوا مشهد هو المشهد الأخير.
    بشكل عام.. واضح اننا قدام احتمالية جديدة لكاتبة سيناريو شابة، اسمها رحاب صالح.. بس لازم تشتغلي كتيييييير

    ردحذف
  4. استاذ وائل
    انت شرفت المدونة المتواضعة بتاعتي وانا بجد بهتم جدا باي كلمة تقولها
    وعلي فكرة الموضوع ده جاتني فكرته من تلميذة بتاخد درس عند اختي لما سألتني نفس الحوار في المشهد الاخير
    اما بالنسبة لاني اكون كاتبة سيناريو فده مش عارفة بس هقولك ادعيلي

    ردحذف
  5. بجد هنا انا استمتع وضحكت من قلبى ربنا يوفقك يا بنت الناس الطيبين
    بس هى فين انفلوانزا الخنازير دى هو احنا عندنا حاجه من دى دى البلد فل اوى اوى

    ردحذف
  6. وعلى فكره المشهد الاخير بيجسد حاله عدم الثقافه اللى عند الولاد من ناحيه حرب اكتوبر انا قريت مره مقاله لعمر طاهر وقال انه خايف اى حد يسال اى ولد عندنا عن قائد الجيش فى حرب اكتوبر يقوله محمود يس ودى بتعبر عن قله معرفتنا باكبر واعظم حروبنا 6 اكتوبر 6 اكتوبر مش دى مدينه فى شرم الشيخ

    ردحذف
  7. اهييييييييييين مش اه واحدة
    والله معاك حق يا علي
    تخلف الجيل الجدي ثقافيا عندنا ازمة بكل المقاييس ومحدش فاهم ولا حد عايز يفهم وحتي مهتم , ياربي والله بجد مش عارفة ممكن نعمل اية ؟؟؟؟

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين