الجمعة، 9 يوليو 2010

وهكذا تحولت رشا إلي... أم زياد

وأخيرا وبعد معاناة تسع شهور وكأني أنا اللي كنت حامبل مش رشا أختي جاء الاستاذ زياد وشرف حضرته الساعة واحدة ونص بالليل بعد تعب دام اكتر من ثلاث ساعات وانتظار مرير وخوف وقلق ورعب مني يمكن أكتر من أمه وابوه كمان ....
رشا أختي دي الدلوعة التانية ف البيت بعدي طبعا وف العلية كلها زي ما تقولوا كدة حرف الراء ده كله كدة بنات دلوعات وخصوصا اللي اسمهم رحاب ورشا
المهم اني بجد كنت خايفة ومرعوبة وخصوصا لما عرفت انها عملية مش ولادة طبيعية ....وبقيت كل شوية ادخل دماغي للدكتورة "مني " واقولها قبل ما تعمل العملية أنا خايفة أووووي ....تقولي تكونيش انت اللي هتولدي يا بنتي دا اللي هتولد ساكتة وانت عاملة ازمة
وبعد معاناتي طبعا لاني انا اللي روحت معاها انا واختي الكبيرة وقلنا نريح ماما شوية ....كل شوية ابص لأختي بقلق وحاسة اني هعيط بس امسك نفسي واقول يا بنت انت شطورة خليكي راجل واجمدي كدة
ووقفت شوية في البلكونة اتفرج ع الناس ف الشارع وبعد شوية لقيت اختي بتقولي سمعتي صوت النونة ...؟
ولقيت الممرضة جايبة لنا بيبي صغنتوت عمال يقول واااااااء وااااااااااء واااااء
اختي اخدته منها وانا عماله ابص له وانا خايفة ومبسوطة وفرحانة ومش عارفة اعمل اية ...وبعدين لقيتني بعمل زي العيال الصغيرين واتنطط واقولها والنبي عايزة اشيله شوية هاتي اما اشوفه والنبي والنبي
الله حلو الاحساس ده ...اما لو كنت ام كان احساسي هيبقي اية...؟
يعيط اقوله هس هس شششششش يا حرام شايفة بياكل صوابعه اكيد جعان يا عيني والله جعان طيب هنعمله اية دلوقت ...؟ الدكتورة بصت لي وقالت " انت جاية منين يا بنتي ...؟ جعان اية وياكل اية ......ما تروحي احسن تجيبيله كباب وكفته وتأكلية .."
والله فكرة ....هههههههه .....المهم اني فضلت طول الليل اهشك ف الاخ زياد وهو وااااااء واااااء ورشا اختي تقول اهيء اهيء تعبانة حراااااام عليكم اعطوني منوم هموت من الوجع ده ....
ف الاخر وبعد معاناه الليل طلع النهار بنوره الجميل وزياد نايم ورشا بقت تمام التمام وبتبص له وتقولي اخيرا
اااااااااه كان يوم صعب صعب جدا جدا
وبعدين قبل ما ننزل من العيادة بقول للدكتورة "مني " هو مينفعش اتجوز وايبقي عندي ولاد من غير ما اولد واتعب كدة ...؟
قالتلي اه مممكن ما انا حاسة انك من بلاد الواق الواق ....شوفي ممكن تشتريلك عيلين م السوق وانت مروحة البيت بس ابقي شوفيلهم اب كمان م السوق .......اممممممم ...فعلا انا جاية من بلاد واق الواق
بقول لرشا يا رشروشة جيتي واحدة رجعتي اتنين ....يااااة بقيتي ام يا رشا ....لقيت اختي بتقول مسمهاش رشا اسمها ام زياد يا بنتي ...دي بقت ام خلاص اسم رشا ده مبقاش لايق عليها .....
هااااااااااااووووم ....معلش اصل منمتش من يومين اسيبكم بقي واروح أ نام .....سلام
رحاب صالح

هناك 18 تعليقًا:

  1. مبروووووووووك بقيتى خالتو
    حمدلله على سلامتها ربنا يخليهولها ويبارك فيه يارب
    نسيتى انك بقيتى خالتوووووووووووووووووووووا تذكريها
    الف حمدلله على سلامتها

    ردحذف
  2. الف مبروووووك ... يتربي وسطكم...
    وحمدالله علي سلامة رشا...
    وعقبالك... وعقبال منفرح بأبن ليكي....


    فكرتيني بفيلم الحفيد ساعة الولادة والصويت... البنت الصغيرة بتقول لابوها انا مش هتجوز... بيقولها ليه.. بتقوله علشان مخلفش واعمل زي ابلة احلام... هههههههههههه...

    مبروووك كمان مرة...

    ردحذف
  3. مبروك و يا رب يبقى وشه حلو ويملى البيت بهجه وفرح و ابتسامه

    يمكن انا علقت قبل كدا بس التعليق مظهرش

    بس بردو مصمم انى اعلق لانى بفرح لما القى فى حد عندو لسه مناسبه سعيده قادر يحتفل بيها

    ربنا يوفقه ويكرمك بطفل زيو تلعبى بيه

    ومن قلبى بتمنله كل خير وسعاده وصحه وتوفيق وفرح وابتسامه تدوم يا رب طول العمر

    ويا ريت تتقبلى مرورى

    ردحذف
  4. مبروك النونو
    انا بقا عندى نونتين
    والتالت جاى فى السكه
    كل مره اختى تقول توبخر مره
    بس بضحك واقولها نتقابل الشتا الجايه
    اصلها كل شتا تجيب ضيف جديد
    ههههههههههههه
    اه والله
    مبروك بقيتى خالتوا
    ربنا يفرحكم بيه
    عاوزه سبوع بقا

    ردحذف
  5. ((( دعوة للتواصل * كاتب مصرى )))

    ردحذف
  6. مبروووووووووووك
    وحمدالله على سلامته وسلامة اختك
    يتربى في عزكم يا رب
    دي اول زيارة والحمدالله جت على فرحة

    ردحذف
  7. مبروووووووووووك
    وحمدالله على سلامته وسلامة اختك
    يتربى في عزكم يا رب
    دي اول زيارة والحمدالله جت على فرحة

    ردحذف
  8. مبروووووووووووك
    وحمدالله على سلامته وسلامة اختك
    يتربى في عزكم يا رب
    دي اول زيارة والحمدالله جت على فرحة

    ردحذف
  9. الف مبروووووووووووك :))

    ردحذف
  10. الف مبروك
    دى اول زياره ليا برده
    على فكرة انا جايه بلطيم يوم الجمعه جهزى الغدا بقا
    ههههههههههههههههه

    تقبلى مرورى

    ردحذف
  11. ايمي
    الله يسلمك ويارب عقبالك ان شاء الله وتكوني بخير

    ردحذف
  12. ابو علي
    الله يسلمك ويارب تتجوز قريب وتشوف بقي الولاد الصغيرين العفاريت اد اية هما حلوين بس متعبين

    ردحذف
  13. امير الحب
    شكرا لزيارتك ونورتني
    يا سيدي ولا يهمك المهم انك نورتني بجد وبجد مدونتك كتير لذيذة

    ردحذف
  14. الشوكة الناعمة
    شكرا لزيارتك وربنا يخليكي يارب
    بالنسبة للسبوع من عيوني انت تؤمري

    ردحذف
  15. تيرز
    الله يبارك فيك ويبارك لك بكل خير وف كل شيء

    ردحذف
  16. كلام من قلبي
    نورتيني
    الله يسلمك ويارب دايما تيجي علي فرحة دايما زيارتك

    ردحذف
  17. اميرات الاسرار
    نورتيني
    الله يسلمك ويبارك فيك
    وانت جاية بلطيم بجد..؟
    طيب هعرفك ازاي انا دلوقت عشان اعملك غدا...؟؟؟!

    ردحذف
  18. ربنا يبارك في زياد ويرزقك زياد أنت أيضاً

    ردحذف

يا بخت من يقدر يقول واللي ف ضميره يطلعه, يا بخت من يقدر يفضفض بالكلام وكل واحد يسمعه....الله يرحمك يا صلاح جاهين